TUA 6
Tamaiti Meitaki, e Tamaiti Kino
AKARA ana ra ia Kaina raua ko Abela i teianei. E nga tangata mamaata raua. Kua riro a Kaina ei tangata tanu kai. E tanu ana aia i te titona, ua rakau e te au kai tanutanu.
E tangata tiaki mamoe a Abela. E reka ana aia i te akono i te au punua mamoe. Tupu mai ratou ei au mamoe mamaata, kare i roa ana rauka ta Abela anana mamoe ei tiaki nana.
Tetai ra, kua apai mai a Kaina raua ko Abela i tetai apinga aroa na te Atua. Kua apai mai a Kaina i tetai au kai tana i akatupu. E kua apai mai a Abela i tana mamoe meitaki rava atu. Kua mareka a Iehova i te apinga aroa a Abela. Kare ra aia i mareka ia Kaina e tana apinga aroa. Kite koe e no teaa?
Kare no te mea e e meitaki atu ta Abela apinga aroa i ta Kaina. No te mea ra, e tangata meitaki a Abela. E inangaro ana aia ia Iehova e tona tuakana. Inara e tangata kino a Kaina; kare aia e inangaro ana i tona teina.
No reira kua tuatua te Atua kia Kaina kia taui i tona tu. Kare ra a Kaina i akarongo. Kua riri tikai aia no te mea e inangaro atu te Atua ia Abela. No reira kua karanga a Kaina kia Abela e, ‘Aere mai ka aere taua ki roto i te kainga.’ Ia raua i reira, ko raua anake ua, kua ta a Kaina i tona teina ia Abela. Pakari tikai tana ta anga e kua mate tona teina iaia. E angaanga kino tikai ta Kaina i rave, me kare ainei?
Noatu e kua mate a Abela, te akamaara nei rai te Atua iaia. E tangata meitaki a Abela, e kare rava a Iehova e akangaropoina i tetai tangata mei tera. No reira a tetai ra ka akaora akaou mai te Atua ko Iehova ia Abela. A te reira taime kare rava a Abela e mate akaou. Ka rauka iaia te noo ki runga i te enua e mutu kore ua atu. Kare ainei i te mea meitaki kia kite i tetai tangata mei ia Abela?
Kare ra te Atua e mareka ana i te aronga mei ia Kaina rai. No reira i muri ake i te tamate anga a Kaina i tona teina, kua akautunga te Atua iaia na te tono anga iaia ki tetai ngai mamao mei tona kopu tangata. I te aere anga a Kaina ki tetai tuanga o te enua, kua apai aia i tetai tuaine ona, e kua akariro iaia ei vaine nana.
I te tuatau i aereia, kua akamata a Kaina e tana vaine i te anau tamariki. Kua akaipoipo tetai au tamariki tamaroa e te au tamaine a Adamu raua ko Eva, e kua anau katoa ta ratou tamariki. Kare i roa kua maata te tangata i runga i te enua. Ka akara tatou no runga i tetai papaki ia ratou.
Genese 4:2-26; 1 Ioane 3:11, 12; Ioane 11:25.