Au Uianga a te Aronga Tatau
I kite ainei a Abela e te umuumuia ra te atinga animara kia raukai te akaperepere anga a te Atua?
Te tataanga i te Pipiria no ta Kaina raua ko Abela tukuanga i ta raua nga atinga e poto ua. Ia Genese 4:3-5, ka tatau tatou: “E tae akera ki tetai tuatau, kua apai aturā Kaina i te kai o te enua ei atinga na Iehova. E kua apai katoa aturā Abela i to roto i te anaunga mua o tana ra anana, e tei matu oki i reira. Kite mairā Iehova ia Abela e tana atinga: Karekā Kaina e tana atinga, kare ïa aia i kite mai.”
Kare e taiku anga i te Pipiria e i mua ake i teia tupu anga kua oronga mai a Iehova i tetai akakiteanga takake no runga i te au atinga me kare no te tu o te au atinga te ka arikiia e ia. No reira, kua rave a Kaina raua ko Abela i ta raua orongaanga no ta raua uaorai iki anga. Kua araiia raua kia kore e tae ki te kainga Parataito mua o to raua nga metua; kua akamata raua i te kite i te tupu anga o te ara; e kua taka ke raua mei te Atua. I to raua tu ara e te tangi, kua tika kia manako ngakau maata raua i te umuumu anga kia ariu ki te Atua no te tauturu. Penei ko te orongaanga apinga ki te Atua tetai tuanga rave ua anga na raua kia rauka ta te Atua ra akaperepere anga.
Ei tupu anga, kua arikiia ta Abela orongaanga e te Atua, mari ra kare ta Kaina. No teaa ra? No te mea ainei e kua oronga a Abela i te au mea tika e ko Kaina kare? Kare e papu ia tatou e ko te tu o te orongaanga e kare e tumu no runga i te reira, i te mea e kare i akakiteia kia raua eaa te ka arikiia e eaa te ka kore. Inara, i te akara anga ka arikiia nga mea e rua ra. I roto i te Ture ta Iehova i oronga i muri akera ki te iti tangata o Iseraela, kua kapiti te au atinga arikiia ra kare i te au animara anake me kare au tuanga animara mari katoa ra i te au ua tunu katoaia, te au ruru kerite, te varaoa meitaki, te au kai tunuia, e te uaina. (Levitiku 6:19-23; 7:11-13; 23:10-13) I te akara anga, kare i te apinga anake o te atinga a Kaina raua ko Abela ra tei akariro i te Atua kia ariki i tetai e kia kopae keia tetai.—Akaaiteia Isaia 1:11; Amosa 5:22.
E tere atu i te au anere mataiti i muri akera, kua tuatua te apotetoro ko Paulo: “No te akarongo i meitaki ravaʼi ta Abela atinga i apai i te Atua i ta Kaina, i tuatuaia mai ei aia e e tangata tuatua-tika aia, ko te Atua i akatika mai i taua apinga atinga nana ra.” (Ebera 11:4) No reira, no te akarongo o Abela i kitea mai ei ei tuatua tika e te Atua. Inara e akarongo i teaa? Akarongo i te taputou a Iehova e ka oronga mai aia i te Uanga, te ka ‘akaparuparu i te mimiti o te ovi ra’ e ka akaoki mai i te au e te tu apa kore ua tei rekarekaia ra e te tangata i mua ana. Mei te tuatua anga e ka ‘akaparuparuia te pooavae,’ o te Uanga ra penei kua manako a Abela e ko te atinga tei kapitiia ki te akamaringianga toto te umuumuia ra. (Genese 3:15) Inara, te vaira te tika e na ta Abela akakite anga i te akarongo i akariro i ‘tana ei atinga meitaki atu i ta Kaina.’
Mei te reira katoa oki, kua kopae keia a Kaina, kare no te tarevake o tana atinga, mari ra no tona ngere i te akarongo, mei tei akakiteia maira i tana au angaanga. Kua akakite taka meitaki atura Iehova kia Kaina: “Kia rave koe i te meitaki ra, kare ainei koe e kitea mai?” (Genese 4:7) Kare te Atua i kopae ke ia Kaina no tetai tu mareka kore i tana i oronga ra. Kareka ra, ‘no te mea e au angaanga kikino tana uaorai,’—tei akairoia e te vareae, te makitakita, e te ta anga i te openga ra—i kopae keiai a Kaina e te Atua ra.—1 Ioane 3:12.