TUA 13
Aberahama—E Oa no te Atua
TETAI o te au ngai ta te tangata i noo i muri ake i te Vaipuke kua kapikiia e ko Ura. Kua riro mai ei oire puapinga e e au kainga manea to reira. Tera ra, e akamori ana te au tangata o reira i te au atua pikikaa. E akapera ana rai te tangata i Babela. Kare te tangata i roto ia Ura e Babela i aite mei ia Noa e tana tamaiti ko Sema, tei tavini ua atu ia Iehova.
I te openga, e 350 mataiti muri ake i te vaipuke, kua mate te tangata akarongo ko Noa. E rua ua rai mataiti i muri mai, kua anauia mai teia tangata i roto i te tutu. E tangata akaperepereia aia e te Atua. Ko Aberahama tona ingoa. E noo ana aia e tona pamiri ki roto i te oire ko Ura.
Tetai ra kua akakite a Iehova kia Aberahama e: ‘Akaruke koe e toou kopu tangata ia Ura, e e aere ki te enua taku ka akaari atu kia koe.’ Kua akarongo ainei a Aberahama i te Atua e kia akaruke i te oraanga meitaki o Ura? Ae. No te mea e akarongo ua ana rai a Aberahama i te Atua, e kua kite uaia aia e e oa no te Atua.
Kua aru tetai pae o te pamiri o Aberahama iaia i tona akaruke anga ia Ura. Ko tona papa tetai ko Tera. Pera katoa a Lota, te tamaiti a tona tuakana. E kua aere katoa a Sara, te vaine a Aberahama. I tetai taime i muri mai, kua tae pouroa ratou ki te ngai tei kapikiia ko Harana, e i mate a Tera ki reira. Mamao tikai ratou mei ia Ura mai.
Muri mai i tetai taime, kua akaruke a Aberahama e tona ngutuare tangata ia Harana e kua aere ki te enua tei kapikiia ko Kanaana. I te reira ngai, kua akakite a Iehova e: ‘Teia te enua taku ka oronga ki taau tamariki.’ Kua noo a Aberahama i Kanaana i roto i te au puakapa.
Kua akamata te Atua i te tauturu ia Aberahama, e kua akamaata atu i tana au anana mamoe e te au manu ke, e e anere ua atu ona tavini. Inara kare raua ko Sara i anau tamariki, na raua rai.
I te tae anga te mataiti o Aberahama ki te 99, kua akakite a Iehova e: ‘Te taputou nei au e ka akariro au ia koe ei metua no te au iti tangata e manganui.’ Tera ra, akapeea teia e tupu ei ina e, kua ruaine a Aberahama raua ko Sara i teianei i te anau i tetai tamaiti?
Genese 11:27-32; 12:1-7; 17:1-8, 15-17; 18:9-19.