Au Uianga a te Aronga Tatau

I papau ainei a Iehova i tana koreromotu kia Aberahama i Ura me i Harana?

Ka kitea te tataanga mua o ta Iehova koreromotu kia Aberahama ia Genese 12:​1-3, te na ko ra: “I tuatua mai ana oki a Iehova kia Aberama e, E aere ke mai koe i to enua na, e toou kopu-tangata, e te ngutuare o toou metua, ki te enua taku e akakite atu kia koe na: E akariro oki au ia koe ei iti-tangata maata, . . . e ei ia koe e meitaki ei te au kopu-tangata katoa o te ao nei.”a Penei kua papau a Iehova i teia koreromotu kia Aberahama koi akakite ei i te tuanga openga i Ura e kua akapapu akaou i te reira kia Aberahama i Harana.

I te anere mataiti mua, kua taiku a Setephano no runga i ta Iehova akauenga kia Aberahama kia neke ki Kanaana. I te tuatuaanga ki te Sunederi, kua karanga atu aia: “Kua akakite mai te Atua kakā kia Aberahama ki to tatou metua ka noo ei aia i Mesopotamia ra, ou aia i noo ei i Harana, Kua na ko maira kiaia, ‘E aere ke mai koe i to enua e toou kopu-tangata, e aere mai koe ki te enua taku e akakite atu kia koe.’” (Angaanga 7:​2, 3) I te akamata anga no Ura mai a Aberahama, e mei tei akakiteia mai e Setephano, i reira aia i akarongo muai i te akauenga kia aere atu ki Kanaana. (Genese 15:7; Nehemia 9:7) Kare a Setephano i taiku ana i ta te Atua koreromotu kia Aberahama, inara ia Genese 12:​1-3, kua piri atu taua koreromotu ra ki te akauenga kia aere atu ki Kanaana. No reira e mea tau kia irinaki e kua papau a Iehova i taua koreromotu kia Aberahama i Ura.

Inara, te akakite maira te tatau meitaki anga i te tataanga a Genese e kua tuatua akaou a Iehova i tana koreromotu kia Aberahama i Harana, mei tana i ripiti ua e tei tuatua akaou i te au tu o te reira i tetai au atianga i Kanaana. (Genese 15:5; 17:​1-5; 18:18; 22:​16-18) Kia tau ki ta Genese 11:​31, 32, kua akaruke atu te metua tane o Aberahama, ko Tera, ia Ura no Kanaana, aruia atu e Aberahama, Sarai, e Lota. Kua tae atu ratou ki Harana e kua noo ki reira e mate ua atu a Tera. Kua roa a Aberahama i Harana e kua rauka te au apinganui. (Genese 12:5) E i tetai mai tuatau, kua neke atu, a Nahora, te teina o Aberahama, ki reira.

I muri ake i te tataanga i to Tera matenga, kua ripoti mai te Pipiria i te au tuatua a Iehova kia Aberahama e te na ko ra: “Aere aturā Aberama, i ta Iehova i tuatua mai kiaia ra.” (Genese 12:4) No reira, te oronga maira a Genese 11:31–12:4 i te akara anga pakari e kua tuatua atu a Iehova i te au tuatua tei rekotiia ia Genese 12:​1-3 i muri mai i te matenga a Tera. Me koia ia, kua akaruke atu a Aberahama ia Harana e kua neke atu ki te enua ta Iehova i akakite atura i te ariu anga atu ki te akauenga tana i rongo atura, e pera katoa tana i rongo i mua ana i Ura.

Kia tau kia Genese 12:1, kua akaue atu a Iehova ia Aberahama: “E aere ke mai koe i to enua na, e toou kopu-tangata, e te ngutuare o toou metua.” I tetai tuatau kua riro ana a Ura e ko to Aberahama “enua” ia, e tei reira te “kainga” o tona metua. Inara, kua neke atu te metua tane o Aberahama i tona ngutuare tangata ki Harana, e kua tapa iora a Aberahama i taua ngai e ko tona enua. I muri mai i te au mataiti e manganui i Kanaana, kua tono atu aia i tona tavini ki ‘tona enua e te au kopu tangata’ kia kimi i tetai vaine na Isaaka, kua aere atura te tavini “ki te oire o Nahora” (me i Harana me kare i tetai ngai i te pae mai). (Genese 24:4, 10) I reira kua kitea e te tavini a Rebeka i roto i te kopu tangata o Aberahama, te ngutuare tangata maatamaata o Nahora.​—Genese 22:20-24; 24:15, 24, 29; 27:42, 43.

I roto i tana tuatua anga ki te Sunederi, kua tuatua a Setephano no Aberahama: “E mate atura tona metua, mei reira oki, kua arataki maira te Atua iaia ki teianei enua e nooia e kotou nei.” (Angaanga 7:4) Te akakite mai nei teia e kua tuatua atu a Iehova kia Aberahama i Harana. E mea tau kia irinaki e i taua atianga ra e kua tuatua akaou a Iehova i tana koreromotu kia Aberahama mei tei ripotiia ia Genese 12:1-3, i te mea kua akatupuia taua koreromotu i te neke anga a Aberahama ki Kanaana. No reira, na te akaraanga i te au tataanga te taki atura ki te taopenga anga e kua papau a Iehova i tana koreromotu kia Aberahama i Ura e kua akapapu akaou i te reira i Harana.

[Tataanga Rikiriki i Raro]