TUA 15
Akara te Vaine a Lota ki Muri
E NOO kapiti ana a Lota e tona pamiri e Aberahama i roto i te enua o Kanaana. Tetai ra kua tuatua atu a Aberahama kia Lota e: ‘Kare e rava te enua i konei no ta taua au manu pouroa. Ka akaatea taua, ine. Me aere koe ki tetai tua, ka aere au ki te tua ke.’
Kua akara atu a Lota i te enua. Kua kite atu aia i tetai tuanga manea tikai o te enua, e vai to reira e te maata i te tita meitaki no tana manu. Ko te ngai o Ioridana. Ina, kua neke a Lota i tona pamiri e tana au manu ki taua ngai ra. Kua maani i to ratou kainga ki roto i te oire o Sodoma.
E kino tikai te tangata o Sodoma. Kare a Lota e mareka ana ia ratou no te mea e tangata meitaki aia. Kare katoa te Atua e mareka ana. I te openga, kua tono te Atua e rua angera kia akamatakite ia Lota e ka takore aia ia Sodoma e te oire i te pae mai ko Gomora, no te mea e kino tikai ratou.
Kua akakite te nga angera kia Lota e: ‘Taviviki! E rave i to vaine e nga tamaine e akaatea mei konei!’ Kare a Lota e tona pamiri i taviviki ana, no reira nga angera i mou ei i to ratou rima kia taki atu ia ratou ki vao ake i te oire. Karanga tetai o te angera e: ‘E oro kia ora kotou! Auraka e akara ki muri. Oro ki te maunga kia kore kotou e mate.’
Kua akarongo a Lota e tana nga tamaine e kua oro mei Sodoma atu. Kare ratou i tapu ana e kare i akara ana ki muri. Inara kare te vaine a Lota i akarongo ana. Kare ratou i mamao mei ia Sodoma, kua tapu aia e kua akara ki muri. I reira kua riro mai te vaine a Lota ei poupou miti. Te kite ra koe iaia i roto i te tutu?
E apiianga meitaki ta tatou ka tamou mai mei teia. Te akaari maira kia tatou e ka akaora te Atua i te aronga e akarongo ra kiaia, te aronga ra kare e akarongo kiaia ka mate ratou.
Genese 13:5-13; 18:20-33; 19:1-29; Luka 17:28-32; 2 Petero 2:6-8.