TUA 29
Tumu i Oro Ei a Mose
AKARA ana ia Mose e oro ra mei Aiphiti. Te kite ra koe i te au tangata e arumaki ra iaia? Kua kite koe e eaa ratou i inangaro ei i te ta ia Mose? Ka akara ana e me ka kite tatou.
Kua tupu mai a Mose i roto i te are o Pharao, te tutara o Aiphiti. Kua riro mai aia ei tangata kite pakari e te rongonui. Kua kite a Mose e kare aia i te tangata Aiphiti, e ko tona nga metua tikai e nga tuikaa Iseraela.
Tetai ra, e 40 o Mose mataiti kua manako aia i te aere e akara e te peea ra tona iti tangata. E kino tikai te tu e raveia ra kia ratou. Kua kite aia i tetai tangata Aiphiti e papa ra i tetai tuikaa Iseraela. Akara aere a Mose, e i tona kite anga e kare e tangata e akara maira, kua rutu aia i te tangata Aiphiti, e kua mate taua tangata ra. I reira kua uuna a Mose i te kopapa ki roto i te one.
Tera mai ra kua oki atu a Mose i te akara akaou i tona iti tangata. Manako aia e ka rauka iaia te tauturu ia ratou kia kore ratou e riro ua rai ei au tuikaa. Inara kua kite atu aia e rua nga tangata Iseraela e ta ra, i reira kua tuatua atu a Mose ki te tangata tei tarevake e: ‘Eaa koe i ta ei i toou taeake?’
Karanga mai taua tangata ra e: ‘Naai i maani ia koe ei tutara e ei akava? Ka ta ainei koe iaku mei taau rai i ta i tera tangata Aiphiti?’
Kua mataku mai a Mose. Kua kite aia e kua kite te au tangata i tana i rave ki te tangata Aiphiti. Kua akarongo katoa a Pharao i te reira, e kua tono i te au tangata kia ta ia Mose. No reira a Mose i oro ei mei Aiphiti.
I to Mose akaruke anga ia Aiphiti, kua aere aia ki te enua mamao o Midiana. Kua aravei aia i te pamiri o Ietero i reira, e kua akaipoipo i tana tamaine ko Zipora te ingoa. Kua riro mai a Mose ei tiaki mamoe e kua akono i te au mamoe a Ietero. E 40 ona mataiti i te noo anga ki Midiana. Teianei e 80 ona mataiti. I tetai ra, ia Mose e tiaki ra i te mamoe a Ietero, kua tupu tetai apinga umere tei taui i te oraanga katoa o Mose. Uri mai i te kapi, e ka akara tatou e eaa taua apinga umere ra.
Exodo 2:11-25; Angaanga 7:22-29.