TUA 38
E 12 Tangata Tutaka
AKARA ana i te ua rakau e apai ra teia au tangata. Akara ra i tera kaui vine maatamaata. E rua roa nga tangata i te apai i te reira na runga i te rakau. Akara ana i te au suke e te remuna. Noea ra te ngai i apaiia mai ei teia au ua rakau manea? No te enua mai o Kanaana. Akamaara ana ra e ko Kanaana te enua i noo ei a Aberahama, Isaaka e Iakoba. Tera ra no te onge i reira, kua neke a Iakoba e tona ngutuare tangata ki Aiphiti. Teianei, mei te 216 mataiti i muri mai, kua arataki akaou mai a Mose i to Iseraela ki Kanaana. Kua aere mai ratou ki tetai ngai i roto i te metepara tei kapikiia e ko Kadesa.
E au tangata kino te noo ana i roto i te enua o Kanaana. No reira a Mose i tono ei i te au tangata tutaka e 12, e kua akakite kia ratou e: ‘Akara mai e mei teaa te maata o te tangata e noo ra ki reira, e mei teaa te ririnui ia ratou. Akara mai e me e meitaki te enua no te tanu kai. Akapapu e kia apai mai kotou i tetai au ua rakau.’
Te oki mai anga te aronga tutaka mei Kadesa, kua akakite ratou kia Mose e: ‘E enua meitaki tikai te reira.’ E ei akapapu i te reira, kua akaari ratou kia Mose i tetai o te au ua rakau. Tera ra e 10 aronga tutaka tei karanga e: ‘E mamaata e te ririnui te au tangata e noo ra ki reira. Ka tamateia tatou me aere tatou me rave i te enua.’
Kua mataku te ngati Iseraela i te akarongo anga i teia. ‘Meitaki atu naringa matou i mate ki Aiphiti me kore i konei i roto i te metepara,’ i na ratou ei. ‘Ka mate matou i roto i te tamaki, e ka opuia ta matou au vaine e te tamariki. Ka iki tatou i tetai arataki ou ei mono ia Mose, e ka oki tatou ki Aiphiti!’
Inara e rua nga tangata tutaka tei irinaki ia Iehova, kua tauta i te akamaru i te tangata. To raua ingoa ko Iosua e Kaleba. Karanga raua e: ‘Auraka e mataku. Tei ia tatou a Iehova. Mama ua i te rave mai i te enua.’ Tera ra kare te tangata i akarongo ana. Inangaro katoa ratou i te tamate ia Iosua e Kaleba.
Kua riri tikai a Iehova i teia, e kua akakite kia Mose e: ‘Kare rava e tangata mei te 20 mataiti e tere atu, e aere ki roto i te enua o Kanaana. Kua kite ratou i te au temeio taku i rave i Aiphiti e i roto i te metepara, e kare rai ratou e irinaki mai iaku. No reira ka aaere ratou i roto i te metepara no te 40 mataiti e mate ua atu te tangata openga. Ko Iosua e Kaleba ua te ka aere ki roto i te enua o Kanaana.’