TUA 43
Riro a Iosua ei Arataki
KUA inangaro a Mose i te aere ki roto i Kanaana e te ngati Iseraela. No reira kua pati aia e: ‘E Iehova, e tuku ana koe iaku kia aere ki tetai tua i te Kauvai Ioridana, kia kite au i te enua meitaki.’ Inara kua karanga a Iehova e: ‘Kua rava ua tena! Auraka koe e taiku akaou mai i teia!’ Kua kite koe e eaa a Iehova i tuatua ai i te reira?
No ta Mose i rave i te rutu anga aia i te toka. E akamaara e, kare raua ko Aarona i akangateitei ana ia Iehova. Kare raua i akakite ana ki te tangata e na Iehova i tuku mai i te vai no roto i te toka. No teia, kua akakite a Iehova e kare aia e akatika ia raua kia aere ki roto i Kanaana.
No reira i te au marama ua i muri mai i te matenga o Aarona, kua akakite a Iehova kia Mose e: ‘E apai koe ia Iosua kia tu ki mua ia Eleazara te taunga e te iti tangata. E i mua i te katoatoa rava, e akakite koe kia ratou pouroa e ko Iosua te arataki ou.’ Kua rave a Mose i ta Iehova tikai i tuatua mai, mei taau e kite ra i roto i te tutu.
Kua akakite i reira a Iehova kia Iosua e: ‘Kia maroiroi, auraka e mataku. Ka arataki koe i to Iseraela ki roto i te enua o Kanaana taku i taputou kia ratou, e ka vaitata ua rai au kia koe.’
Muri mai kua akakite a Iehova kia Mose kia aere ki runga i te take o te Maunga ko Nebo i roto i te enua o Moabi. I runga i reira ka kite atu a Mose i te enua mei te Kauvai Ioridana e te enua manea o Kanaana. Karanga a Iehova e: ‘Ko te enua teia taku i taputou kia oronga ki te tamariki a Aberahama, Isaaka e Iakoba. Kua tika iaku kia kite koe i te reira, kare ra e tika iaku kia aere koe ki reira.’
I runga i te take o te Maunga ko Nebo kua mate a Mose. E 120 ona mataiti. Te maroiroi ra rai aia, e te meitaki katoa ra tona mata. Kua taitaia tikai te tangata e kua aue ratou i te mate anga o Mose. Inara kua mataora ratou e ko Iosua to ratou arataki ou.
Numero 27:12-23; Deuteronomi 3:23-29; 31:1-8, 14-23; 32:45-52; 34:1-12.