TUA 87
Tamaiti ko Iesu i Roto i te Iero
AKARA ana i te tamaiti meangiti e tuatua ra ki teia au tangata pakari. E au puapii ratou i roto i te iero o te Atua i Ierusalema. E ko Iesu teia tamaiti. Kua maata mai aia. E 12 ona mataiti i teianei.
Poitirere tikai te au puapii no te mea e maata ta Iesu i kite no runga i te Atua e te au apinga i tataia i roto i te Pipiria. Tera ra eaa i kore ei a Iosepha raua ko Maria i konei? Teea raua? Ka akara ana tatou.
I te au mataiti ravarai e apai mai ana a Iosepha i tona ngutuare tangata ki Ierusalema no te akamaaraanga puapinga tei kapikiia e ko te Pasa. E tere mamao teia mei Nazareta ki Ierusalema. Kare e motoka e kare e rerue. Kare e apinga mei te reira rai i taua tuatau ra. Te maataanga o te tangata e aere ana na raro ua, e e pou ana e toru ra e tae atu ei ratou ki Ierusalema.
Teianei kua maata te ngutuare tangata o Iosepha. No reira e au teina e te au tuaine to Iesu kia akonoia. Ina, teia mataiti kua akaruke atu a Iosepha raua ko Maria e ta raua tamariki no te tere mamao i te oki ki te kainga i Nazareta. Manako ratou e kua aru a Iesu i tetai aronga i runga i te mataara. Inara i te tapu anga ratou i te openga o te ra, kare ratou i kite ana ia Iesu. Kua kimi ratou iaia i roto i to ratou kopu tangata e te au oa, tera ra kare aia i reira! No reira kua oki ratou ki Ierusalema i te kimi iaia.
I te openga kua kite mai ratou ia Iesu i konei i teia au puapii. Te akarongo ra aia ia ratou e te ui ra i te au uianga. E kua umere te au tangata pouroa i te tu kite o Iesu. Inara kua karanga atu a Maria e: ‘E tama, eaa koe i rave ei teia kia matou? Kua manamanata tikai maua ko toou papa i te kimi aere anga ia koe.’
‘Eaa korua i kimi ei iaku?’ i pau ei a Iesu. ‘Kare korua i kite e tei roto au i te are o toku Metua?’
Ae, inangaro a Iesu i tetai ngai kia apiiia aia no runga i te Atua. Kare ainei tera i te manako ta tatou ka inangaro? I te kainga i Nazareta, e aere ana a Iesu ki te au uipaanga no te akamorianga i te au epetoma ravarai. No te mea e akarongo meitaki ana aia, kua tamou mai aia e maata ua atu te apinga mei roto i te Pipiria. Kia pera rai tatou mei ia Iesu e kia aru i tona akaraanga.
Luka 2:41-52; Mataio 13:53-56.