Pene 9
To Iesu Oraanga Mua ei Ngutuare Tangata
IA Iesu e tupu akera i Nazareta, ko tetai oire meangiti ua ia, e kare e maata te puapinga. I te tuanga maunga o te ngai tei tapaia ra ko Galilea, kare i mamao atu i te O manea o Iezereela ra.
Penei kua vaitata i te rua mataiti a Iesu, i raveia mai ei ki konei e Iosepha raua ko Maria mei Aiphiti mai, te akaraanga ko ia anake ua ta Maria tamaiti i reira. Inara kare no te tuatau roa. I muri akera kua anauia mai a Iakobo, Iosepha, Simiona, e Iuda katoa oki, e kua riro katoa oki a Maria raua ko Iosepha ei nga metua no etai tamaine. E oti akera, kare i raro ake i te toko ono nga teina e nga tuaine i muri mai ia Iesu ra.
E au kopu tangata ke atu oki to Iesu. Kua kite ke ana tatou i tona katini pakari atu iaia koia a Ioane, te noo maira aia ki Iudea e manganui te au maire te mamao atu. Inara ko Salome e vaitata ua mai aia i Galilea, te akaraanga e teina aia no Maria. Kua akaipoipoia a Salome kia Zebedaio, no reira ko ta raua nga tamaroa, ko Iakobo raua ko Ioane, ei katini no Iesu. Kare tatou i kite, me i te tupu ake anga, e akapou ana a Iesu i te taime ki teia nga tamaroa, inara i muri akera kua riro ratou ei oa piri vaitata.
Kua angaanga pakari roa a Iosepha i te akono anga i tona ngutuare tangata te tupu akera. E kamuta aia. Kua akono a Iosepha ia Iesu mei te mea rai e nana uaorai ia tamaiti, no reira kua tapaia a Iesu e ko “te tamaiti a te kamuta ra.” Kua apii katoa a Iosepha ia Iesu ei kamuta, e kua kite meitaki aia. No reira rai te au tangata i muri akera i tuatuaʼi no Iesu, ko “te kamuta.”
Kua koropiniia te oraanga o te ngutuare o Iosepha i te akamori anga i te Atua ko Iehova. I te mouanga i te Ture a te Atua, kua akono a Iosepha raua ko Maria i ta raua tamariki i te apiianga i te pae vaerua ‘kia noo ua i to ratou are, e kia aere ua ratou na te arataa ra, e kia akāvai ratou ra, e kia tu ratou ki runga.’ E sunago tetai i Nazareta, e ka papu ia tatou kua rave putuputu a Iosepha i tona ngutuare i te akamori i reira. Inara kare e ekoko anga e kua kite ratou i te rekareka anga maata i to ratou au tere putuputu ki te iero o Iehova i Ierusalema ra. Mataio 13:55, 56; 27:56; Mareko 15:40; 6:3; Deuteronomi 6:6-9.
▪ Kare i raro ake i teaa te numero o te au teina e te au tuaine o Iesu i muri ake iaia ra, e koai ma te au ingoa o etai io ratou ra?
▪ Koai nga katini toko toru o Iesu tei matau puia ra?
▪ Eaa ta Iesu angaanga i rave i te pae kopapa ra, e no teaa ra?
▪ Eaa te apiianga puapinga ta Iosepha i akono no tona ngutuare ra?