Pene 32
Eaa te Mea Tika Kia Rave i te Tapati?
NO TETAI Tapati mai a Iesu i aere ei ki te sunago i vaitata i te Tai o Galilea ra. I reira tetai tangata, kua maro tona rima katau. Te akara matatio maira te au tata tuatua e te au Pharisea kia kite me ka akaora a Iesu iaia. I te openga kua ui ratou: “E tika aina kia akaora i te ra Sabati?”
Kua irinaki te au arataki o te akonoanga ngati Iuda e e mea tika kia akaora i te Tapati me te vaira te tu e, ka kino te oraanga. Ei akatauanga, te apii ra ratou e i te Tapati kare e tika kia akatikatika i te ivi me kare kia takai i tei manuku ra. No reira te uiui ra te au tata tuatua e te au Pharisea ia Iesu i te tautaanga kia mou te akaapaanga iaia.
Inara kua kite a Iesu i to ratou au manako. Ei reira katoa, kua kite aia e e tuke roa to ratou manako i ta te tuatua tapu, e eaa te aati anga i tei umuumuia ra no te angaanga, a te ture i te ra Tapati. I reira kua akanoo a Iesu i te paata no tetai nuku maroanga na tana karanga atu anga ki te tangata ma te rima maro ra: “Ka tu ki runga i rotopu nei tu ei.”
Kua ariu atura a Iesu ki te au tata tuatua e te au Pharisea, kua na ko atura: “Koai ïa tangata i roto ia kotou na, okotai ana mamoe, e kia topa ki roto i te rua i te rā sabati, kare e rave atu, e kika mai ki runga?” I te mea e moni te ka rauka mai no te mamoe, kare ratou e akaruke i te reira ki roto i te rua e tae roa ki tetai ra mai, penei ka makiia e ka ngere ratou. Pera katoa oki, te karanga ra te au Tuatua Tapu: “E akono rai te tangata tuatua-tika ra i tana ra puaka kia ora.”
I te akakiteanga i tetai arite anga, kua karanga atura a Iesu: “E kare aina e rai to te tangata meitaki i to te mamoe? E tau mari i te ture kia takinga-meitaki i te sabati.” Kare i rauka i te au arataki o te akonoanga atua ra i te akaapa atu i te reira manakoanga tau, e te aroa, e kua muteki ua ratou.
Ma te riri, e pera katoa te mii no to ratou tu marokiakia e te neneva, kua akara atura a Iesu. Kua karanga atura aia ki taua tangata ra: “Ka akatika mai na i to rima.” E kua akatika maira aia i tona rima e kua ora iora.
Kare ratou i rekareka no tei akaoraia te rima o taua tangata ra, kua aere atura te au Pharisea e kua tamata i te pupu pipi a Heroda kia ta ia Iesu. Te akaraanga te kapiti ra te reira aronga poritiki i te au mema o te akonoanga Sadukea. Te mea matauia, e patoi ua ana teia pupu poritiki e te au Pharisea ia ratou uaorai, inara te piri ketaketa ra ratou i ta ratou patoi anga ia Iesu. Mataio 12:9-14; Mareko 3:1-6; Luka 6:6-11; Maseli 12:10; Exodo 20:8-10.
▪ Eaa te akanooanga no tetai nuku maroanga i rotopu ia Iesu e te au arataki o te akonoanga ngati Iuda ra?
▪ Eaa ta te reira au arataki o te akonoanga ngati Iuda i irinaki no runga i te akaoraanga maki i te Tapati?
▪ Eaa te akatutuanga ta Iesu i akono ei akakite i te tarevake o to ratou manako?