Pene 33

Akatupuanga i ta Isaia Totou

I TO Iesu kite anga e te akapapa ra te au Pharisea e te au tangata tei aru ra ia Heroda kia ta iaia, kua aere atura aia e tana au pipi ki te Tai o Galilea. Kua aere katoa maira kiaia, te urupu maata no te takapini ia Paretaina, e pera katoa te aronga no vao mai i tona au kotinga. E manganui tana i rapakau, e ko tei tupu ko te aronga katoatoa e maki kino to ratou kua opara maira ki mua kia akatukia atu kiaia ra.

No te maatamaata ua atu te au urupu i reira, kua akaue a Iesu i tana au pipi kia teateamamao i tetai pai kia papa no tana angaanga. Na te oe atu ki vao mai i taatai, ka rauka iaia i te tapu atu i taua aronga tini ra kia kore e aere piri roa mai kiaia. Ka rauka iaia i te apii ia ratou mei te pai atu me kare ka aere e ngai ke i taatai e tauturu i te au tangata i reira ra.

Kua akara te pipi ko Mataio e te akatupu ra a Iesu i te angaanga i “te tuatua a Isaia peroveta ra.” Ei reira kua taiku maira a Mataio i te totou ta Iesu i akatupu ra:

“I na! taku tavini, tei ikiia e au ra, taku akaperepere, kua rekareka rava toku ngakau iaia: e tuku atu au i toku vaerua ki runga iaia, e nana e tuku atu i te tuatua-tau ki te au etene. Kare aia e taumaro atu, kare e akateitei i te reo; e kare tona reo e kitea i te au arataa ra. Te kakao paruparu ra, kare aia e aati, e te lamepa matemate ra, kare aia e tinai, e kia akatupu ravaia e ia te tuatua-tau nana. E i tona ingoa e irinaki ei te au etene ra.”

Inara, ko Iesu tikai, te tavini akaperepere ta te Atua i mareka ra. E kua akataka maira a Iesu eaa tikai te tuatua tau mou ra, tei araiia ra i te au ikuiku anga a te au akonoanga atua pikikaa ra. No te tika kore i ta ratou tuku anga i te ture a te Atua ra, kare te au Pharisea e akatika kia tauturu i te tangata maki i te Tapati! Na te akataka anga papu i te tuatua tau a te Atua ra kua tatara maira a Iesu i te au tangata mei te apainga teiaa o te ikuiku anga tika kore ra, e no te reira kua tauta te au arataki o te akonoanga atua e ta iaia ra.

Eaa te aiteanga o te tuatua e ‘kare aia e taumaro atu, kare e akateitei i tona reo, e kare tona reo e kitea i te au arataa ra’? I te akaoraanga i te au tangata ra, ‘kua ako atura a Iesu ia ratou, auraka ratou e aaki iaia.’ Kare aia i anoano kia akakitekite maataia tona reo iaia i te au arataa ra me kare kia akakitekite tarevakeia mei tetai vaa ki tetai vaa ei akapoitirere ua.

Pera katoa, kua kave atu a Iesu i tana tuatua akapumaana ki te aronga tei akatutuia mei te kakao paruparu rai te tu, kua piko e kua takaiia ki raro i te vaevae. Te aite ra ratou mei te ramepa matemate ra, te vaitata ra i te tinaiia atu te manga oraanga toe. Kare a Iesu e aati i te kakao paruparu me kare e tinai i te ramepa matemate ra e te auai. Mari ra ma te tu maru e te aroa, ka taaki kite ua aia i te aronga akaaka ra. E tika tikai, ko Iesu ta te au etene ka tau kia irinaki atu! Mataio 12:​15-21; Mareko 3:​7-12; Isaia 42:​1-4.

▪ Akapeea ta Iesu akataka anga papu i te tuatua tau, kare e taumaroanga me kare akateiteianga i tona reo i te au arataa ra?

▪ Koai ma tei aite ki te kakao paruparu e te ramepa ra, e akapeea ta Iesu akono ia ratou ra?