Ka Tinai Ainei Koe i Tetai Viki Matemate Ra?

KUA akakite aere a Iesu Karaiti i te tuatua meitaki o to te Atua Patireia ki te au tu tangata ravarai. E manganui ia ratou ra kua takinga kinoia, kua akaparuparuia. Inara kua oronga a Iesu kia ratou i tetai tuatua akapumaana ki te ngakau. E ngakau aroa tona no te au tangata e mamae ra.

Kua akataka atea mai te tata Evangeria ko Mataio i te tu ngakau aroa o Iesu na te apai anga mai ki te manako i te totou tei rekotiia e Isaia. Te taikuanga i te au tuatua tei aka­tupuia e Karaiti, kua tata a Mataio e: “Te kakao paruparu ra, kare aia e aati, e te [“viki,” NW] matemate ra, kare aia e tinai, e kia akatupu ravaia e ia te tuatua-tau nana.” (Mataio 12:20; Isaia 42:3) Eaa te aiteanga o teia au tuatua nei, e i akapeea a Iesu i te akatupu anga i teia totou?

Tetai Akaraanga i te Totou

E mea matauia e e tupu ana te kakao i te ngai mauu e kare i te rakau pakari e te matutu. Ka tau i reira e ko tetai “kakao paruparu” e apikepike tikai. Mei te mea atura i reira e te akatutu maira te reira i te aronga takinga kinoia me kore te au tangata e mamae ra mei te tangata e rima maro tona tei rapakauia e Iesu i te Tapati ra. (Mataio 12:10-14) Inara akapeea te taiku anga i te totou no runga i tetai viki o te ramepa ra?

Tetai ramepa ua nei o te ngutuare i te anere mataiti mua T.N. e vairanga meangiti ua mei te ariki karakaraea ra e tatai amingiia tona. E mea matauia e ka akakiia te ramepa i te inu orive. Na roto i te au rau angiangi, ko tetai viki tei maaniia i te raupo ka ngote i te inu ei angai i te mura o te ai. E tika, ko te ‘viki matemate ra’ ka tau e ko tetai te mate atura.

Kua akakite a Iesu i tana tuatua akapumaana ki te au tangata e manganui tei akatutuia maira mei tetai kakao paruparu ra, tei mingi ra e kua oparapara aereia. Kua aite katoa teia au tangata ki te viki matemate ra no te mea to ratou mura toe i te oraanga kua vaitata i te tinaiia. Kua takinga kinoia tikai ratou e kua akaparuparuia. Inara, kare a Iesu i aati i tetai kakao paruparu akatutu ua me kore i tinai i tetai viki matemate akatutu ua ra. Kare tana au tuatua aroa, maru, ngakau aroa i akaparuparu e i akataitaia atu i te au tangata e mamae ra. Mari ra, kua riro tana au tuatua e tana au akonoanga ia ratou ra ei akamaroiroi anga.​—Mataio 11:28-30.

I teia tuatau katoa, te anoano ra te manganui i te ngakau aroa e te akamaroiroi anga no te mea te aro atura ratou i te au manamanata akapumaana kore i te ngakau. Pera katoa te au tavini o Iehova kare e maroiroi ua ana i raro ake i te takinokino anga. I tetai au taime te aite ra tetai papaki ki te au viki matemate ra. Ka tau i reira te au Kerititiano kia akamaroiroi​—te tairiirianga i te mura o te ai, mei te reira atura—​te akamaroiroianga i reira i tetai e tetai.​—Luka 22:32; Angaanga 11:23.

Ei au Kerititiano ka inangaro tatou kia akaketaketa atu. Kare tatou e rave akakoro ua i te akaparuparu i tetai ua atu te kimi ra i te tauturu i te pae vaerua. E tikai, te inangaro ra tatou i te aru i te akaraanga a Iesu i te akamaroiroianga ia etai ke. (Ebera 12:1-3; 1 Petero 2:21) Ko te tika, penei ka aati kite kore ua tatou i tetai ua atu te akara maira kia tatou no te akamaroiroi anga e tumu meitaki ia no te oronga atu i te akamanako anga oonu i te tu o ta tatou akonoanga ia etai ke ra. Kare rava tatou e inangaro i te ‘tinai i te viki matemate ra.’ Eaa te au arataki anga Tuatua Tapu te ka tauturu ia tatou no runga i teia?

Au Tupu Anga o te Akaapa Anga

Ko tetai Kerititiano ‘tei rokoia e te apa ra, ko te aronga tei akono i ta te Vaerua ra ka tau i te akaora i te reira tangata ma te ngakau maru.’ (Galatia 6:1) Inara, e mea tau ainei i te kimi i te au tarevake i roto ia etai ke ra e te opu i te au atianga ravarai i te akatikatika atu ia ratou ra? Me kore ra e mea tano ainei i te opara ia ratou kia meitaki atu na te karanga anga e ko ta ratou tauta anga i teianei kare e rava ana, penei te akatupuanga ia ratou kia kite i te au manako apa? Kare rava e akakite anga e kua rave a Iesu i tetai apinga mei te reira te tu. Noatu e ko to tatou akakoro anga ia i te tauturu ia etai ke kia meitaki mai, ko te aronga ra tei akaapaia ma te takinga meitaki kore penei ka akaparuparuia kare e akamaroiroiia. Pera katoa te akaapa anga kia meitaki mai ka riro rai ei akaparuparuanga me te rave maataia ra. Me ka aravei ua rai te au tauta anga meitaki tikai a tetai Kerititiano akava ngakau meitaki i te tu mareka kore, penei ka akamutu ua aia e ka karanga e, ‘Eaa i reira ka tauta ua atu ei?’ Ko te tika, penei ka akamutu takiri aia.

Koi puapingaʼi te orongaanga i te ako Tuatua Tapu, kare te reira e tau kia akataka mai i te vaerua o te aronga pakari akataoongaia me kore ra o etai ke atu i roto i te putuputuanga. Kare te au uipaanga Kerititiano e rave maataia ana ei oronga e ei rave mai i te ako anga. Mari ra, te aravei putuputu ra tatou i te akaketaketa e te akamaroiroi i tetai e tetai kia rauka i te katoatoa te rekareka i to ratou kapitianga e ta ratou tavini anga tapu i te Atua. (Roma 1:11, 12; Ebera 10:24, 25) Mei teaa i reira te meitaki me kite meitaki tatou i te tuke i rotopu i te tarevake kino tikai e te tu tiama kore e e mea pakari ia e te aroa i te akangaropoina atu!​—Koheleta 3:1, 7; Kolosa 3:13.

E viviki ake te au tangata i te ariu mai ki te akamaroiroi anga i ta ratou e rave ra ki te akaapa anga. Ko te tika, me kite te au tangata tataki tai e te akaapaia ra ratou ma te tau kore, penei ka mou pakari atu ratou ki te tu akaapaia ra! Inara me akameitakiia tikai ratou, ka akamaroiroiia ratou, e ka akakeuia ratou kia meitaki mai. (Maseli 12:18) Mei ia Iesu rai, ka tau tatou i reira kia akamaroiroi auraka rava e ‘tinai i te viki matemate ra.’

Akapeea te Akatupuanga i te Au Akaaite Anga?

Te akarongoanga i te au tupuanga memeitaki o etai au Kerititiano ka riro ei akakeuanga tikai. Kua rekareka a Iesu uaorai i tona akarongo anga no runga i te puapinga o tana au pipi i te tutu aereanga i te tuatua o te Patireia. (Luka 10:17-21) Mei te reira katoa, me akarongo tatou i te puapinga, te akaraanga meitaki, me kore ra i te tu tiratiratu o etai pae i te akarongo, ka akamaroiroiia tatou e ka tauta maata atu i te mou ki to tatou aerenga Kerititiano.

Inara, akapeea me kua orongaia mai tetai ripoti na tetai mataara kia kotoe mai e, ‘Kare koe e meitaki ana mei teia au Kerititiano nei, e ka tau koe i te rave kia meitaki atu i taau e rave ra’? Ka rauka ainei i te tangata akarongorongo i te akamata i tetai porokarama maroiroi kia meitaki mai? I te akaraanga ka akaparuparuia aia, penei ka akamutu, me raveia tikai te akaaite anga putuputu me kore ra me akakiteia atu. Te aite atura i reira teia mei tetai metua e ui ra i tana tamaiti e, ‘Eaa ra koe i koreʼi e aite mei toou tungane ra?’ Te reira au tu tuatua anga penei ka akatupu i te akamoupukuanga e te akaparuparuanga, inara i te akaraanga kare te reira e akatupu i te tu meitaki. Penei ka aite rai te tupuanga o te akaaite anga ki te aronga mamaata, te akariro katoa anga ia ratou kia akamoupuku atu i te aronga e akaaiteia atura ratou.

Kare e rauka ia tatou i te tapapa atu i te katoatoa kia aiteite te ka rauka i te rave i roto i te angaanga a te Atua. I roto i tetai o ta Iesu au akatutu anga, kua oronga tetai pu ki tona au tavini me e tai, e rua, me kore e rima au tareni ario. Kua orongaia teia “i tei tau katoa i aua nga tangata ra.” Te nga tavini tei angaanga pakari ra e kua akamaata atu i ta raua au tareni kua akameitakiia no te mea kua tiratiratu raua, noatu e kua tukeke te au tupuanga o ta raua angaanga.​—Mataio 25:14-30.

Kua tau ta te apotetoro ko Paulo tataanga e: “Ka timata te tangata ravarai i tana uaorai angaanga, ei reira aia e rekarekaʼi iaia uaorai, eiaa i tetai ke.” (Galatia 6:4) No reira, e raukaʼi te akamaroiroi atu ia etai ke, ka tauta tatou kia kopae atu i te raveanga i tetai au akaaite anga papu kore.

Etai Au Mataara no te Akamaroiroi

Eaa ta tatou ka rave ei akamaroiroi atu i te aronga paruparu e te kopae anga atu kia kore e ‘tinai i te viki matemate ra’? Ina, te orongaanga i te akamaroiroianga kare ia i te mea e ka aru ua i tetai apinga akatakaia. Inara, i te akaraanga e ka riro ta tatou au tuatua ei akamaroiroi ia etai ke me taangaanga tatou i te au kaveinga Puka Tapu. Eaa etai o teia?

Kia taakaaka. Ia Philipi 2:3, kua akamaroiroi mai a Paulo ia tatou “auraka takiri e mea e raveia ma te taumāro, e te akanengonengo puapinga kore.” Mari ra, ka tau tatou kia tuatua e kia akono ma te akaaka. ‘Ma te ngakau akaaka ra, ka tau tatou kia manako e e meitaki atu tetai ia tatou uaorai.’ Kare a Paulo i karanga ana e kia manako tatou e kare o tatou uaorai puapinga. Inara, ka tau tatou kia ariki e ko te au tangata ravarai e meitaki atu ia tatou i tetai au ngai. Te tuatua Ereni e tuatuaia ra i konei e “meitaki atu” te akakite ra e ko tetai tangata ka “akaangake atu i ona nga mata mei tana uaorai au angaanga, e ka akamanako pakari atu i ta tetai au apinga i te mea e koia tei meitaki atu.” (New Testament Word Studies, na John Albert Bengel, Voriumu 2, kapi 432) Me ka rave tatou i teia e ka akamanako atu ia etai ke e e meitaki atu, ka akono tatou ia ratou na roto i te tu akaaka.

E akaari i te akangateitei anga. Na te akakite anga ia tatou uaorai ma te ngakau tae tikai, ka rauka ia tatou i te akataka meitaki e e tu papu tikai to tatou i roto i to tatou au taeake irinaki tei tiratiratu ra, te akaraanga atu ia ratou ei au tangata tataki tai tei anoano i te akamareka i te Atua. Inara akapeea me ka inangaro ratou i te tauturu i te pae vaerua. Ka oronga i reira tatou i te tauturu na roto i te tu ngateitei e te tapu. Kua tuku a Paulo i te au mea na teia tu: “I te akangateitei anga tetai ki tetai.”​—Roma 12:10.

Kia riro ei tangata akarongorongo meitaki. Ae, e raukaʼi te akamaroiroi atu i te aronga te ka aro atu i te au manamanata akaparuparu, ka anoanoia tatou kia riro ei au tangata akarongorongo meitaki, auraka ei au tangata apiipii. Koi kore ei e oronga atu i te au manako viviki, puapinga kore ua, ka rave tatou i te taime i anoanoia kia oronga atu i te au aratakianga Tuatua Tapu te ka aravei tikai i te au anoano e vaira. Me kare tatou i kite e eaa ta tatou ka tuatua, ka riro te kimikimianga Puka Tapu ei tauturu ia tatou kia tuatua ma te akapumaana e te akamaroiroi ia etai ke.

Kia aroa. Ka anoano tatou kia kite i te aroa no te aronga ta tatou ka inangaro i te akamaroiroi. Me raveia no te au taeake e tavini ra ia Iehova, ka anoanoia to tatou aroa kia mamao roa atu i te rave ua anga i te au mea i anoanoia e ratou. Ka tau kia o mai te manako oonu. Me e aroa to tatou mei te reira te tu no te iti tangata katoatoa o Iehova, ka riro ta tatou au tuatua ei akamaroiroianga tikai kia ratou. Noatu e ka anoanoia tatou kia oronga atu i tetai manako kia meitaki mai, i te akaraanga ko ta tatou ka tuatua kare e marama koreia me kore ra e akatupu i te kino i te mea e ko to tatou akakoro anga kare no te oronga ua i tetai manako mari ra no te oronga i te tauturu aroa. Mei ta Paulo tikai i tuatua e, “kareka te aroa, e tamaata ïa i te meitaki.”​—1 Korinetia 8:1; Philipi 2:4; 1 Petero 1:22.

Kia Akaketaketa Ua Rai

I teia au “tuatau openga ra” e te kino, te aro atura te iti tangata o Iehova i te au timata anga e manganui. (2 Timoteo 3:1-5) Kare i reira i te mea umere e te mamae ra ratou i tetai au taime mei te mea atura e ko te kotinga ia o to ratou akakoromaki. Ei au tavini no Iehova, e mea papu e kare tatou e inangaro i te karanga e me kore ra i te rave i tetai au apinga te ka riro ei akatupu i tetai o to tatou au taeake akamori kia riro e mei te au viki matemate ra te vaitata atura i te tinaiia.

Mei teaa i reira, te puapinga, kia akamaroiroi tatou i tetai e tetai! Ka tauta pakari tatou i reira kia akaketaketa atu na te taakaaka anga e te akangateitei anga i te au taeake akamori tei akaparuparuia ra. Kia akarongo meitaki atu tatou ia ratou me tuatua mai ratou i tetai au mea muna kia tatou e e kimi ua rai i te tauturu atu ia ratou na te aratakianga i te manako ki te Tuatua a te Atua, te Puka Tapu. I runga rava atu i te reira au mea katoatoa, ka akaari tatou i te aroa, no te mea na teia ua o te vaerua tapu o Iehova e tauturu ia tatou kia akamaroiroi i tetai e tetai. Auraka rava tatou kia tuatua me kore ra kia rave i tetai mea na tetai ua atu tu te ka riro i te ‘tinai i te viki matemate ra.’