Pene 71

Irinaki Kore Akakoroia o te au Pharisea

TE MATAKU ra nga metua o te matapo patipati ra i te kapiki angaia raua ki mua i te au Pharisea ra. Kua kite oki raua e kua oti te tuku i te tika e ko tetai ua atu tangata tei akakite i te akarongo ia Iesu ra ka akaateaia atu mei te sunago ra. Ko te reira tipu ke atu anga i te pirianga ma etai atu i roto i te au tangata ka riro ei tu ngata rava, ki runga tikai i te ngutuare putaua. No reira te matakite ra nga metua.

Kua ui atura te au Pharisea ra: “Ko ta korua tamaiti teia?” “Eaa oki aia i kite ei i teianei?”

Kua tuatua maira nga metua nona ra: “Kua kite maua, na maua tikai teianei tamaiti, e matapo tikai aia mei te anau anga mai. Kareka ra te mea i kite ei aia i teianei, kare ua maua i kite; me naai i akapuera i tona mata kare rai maua i kite.” E mea papu rai kua akakite ana ta raua tamaiti kia raua i te au apinga katoa tei tupu ra, inara e pakari tikai nga metua i te na ko anga: “Kua pakari oki aia; ka ui atu kiaia: Nana uaorai e tuatua mai.”

Ei reira, kua kapiki akaou atura te au Pharisea i taua tangata ra. I te reira taime kua tamata ratou i te tamataku iaia na te akakite atu anga e kua akaputu ratou i te akapapu anga ei akaapa ia Iesu. Kua maro ratou: “Ka akameitaki i te Atua: Kua kite oki matou e, e tangata ara teianei tangata.”

Kare ra te reira tangata i matapo ra i akakore i ta ratou akaapa, kua na ko maira: “Kare au i kite e, e tangata ara aina aia.” Kua tuatua katoa atu aia: “Okotai rava aku tuatua i kite, e matapo toku i muatangana, e teianei, te kite nei au.”

I te tauta anga kia mou tetai tarevake i tana e tuatua ra, kua ui akaou atura te au Pharisea kiaia: “I aa mai aia ia koe i akapeea aia i te akapuera anga i to mata?”

“Kua aaki atu na oki au ia kotou,” te tuatua akaapa atu a te reira tangata, “kare kotou i akarongo: Eaa ra oki kotou i anoano akaou ei i te akarongo?” Na te tu aviri, kua ui atura aia: “Ei pipi katoa ainei kotou nana?”

Na te reira pau anga i akariri i te au Pharisea ra, e kua akaapa atura: “Ko koe tana pipi; kareka matou, e pipi matou na Mose. Kua kite matou e, kua tuatua mai te Atua ia Mose; kareka teianei tangata, kare matou i kite e noea aia.”

I te akakite anga i tona poitirere, kua karanga atura te reira tangata patipati akaaka: “E mea tuke oki tena, kare kotou i kite e noea aia, e i na, kua akapuera aia i toku nei mata.” Eaa te manako tau te ka tupu mai i teia? Kua tou atura te reira tangata patipati ki te mea tau kia arikiia: “Kua kite oki tatou e, kare te Atua e akarongo i te tangata ara: Ko te tangata ra e [mataku, NW] i te Atua, e ko te akono i tona anoano, ko tana ïa e akarongo. Kare akerai i kitea te matapo anau nei i te ora anga i te tangata.” No reira, te tau ra kia kitea te manako tika: “Naringa teianei tangata kare to te Atua ra, kare rava tana ravenga e tika.”

Kare e pau anga a te au Pharisea no te reira tuatua tika tikai, e te marama. Kare i rauka ia ratou i te aro atu i te tuatua mou, e no reira kua akakino atura ratou i te reira tangata: “I anau rava mai koe ma te ara, e ka apii mai koe ia matou?” I reira, kua tuaru ratou iaia ki vao, penei kua akaateaia atu mei te sunago ra.

I to Iesu kite anga i ta ratou i rave, kua aravei akera aia i taua tangata ra, e kua karanga atura kiaia: “Kua akarongo koe i te Tamaiti a te Atua?”

Kua tuatua maira taua tangata patipati ra i muana: “Koai aia, kia akarongo atu au iaia?”

Kua karanga atura Iesu kiaia e: “Koia oki teia e karangaranga atu kia koe nei.”

I reira tikai, kua tipapa iora te reira tangata ki mua ia Iesu e kua tuatua maira: “E te Atu, kua akarongo au [iaia].”

E kua akamarama atura Iesu: “No teia akavaanga i aere mai ei au ki te ao nei: kia kite te aronga kite kore nei e kia riro te aronga kite ra ei matapo.”​—NW.

Ei reira, kua ui atu te au Pharisea te akarongorongo ra: “E matapo katoa ainei matou nei?” Naringa ratou i akatika e e manako matapo to ratou ra, e kotoe anga ta ratou i reira no te patoi anga ia Iesu. Mei ta Iesu i karanga atura kia ratou: “Naringa kotou e matapo ra, kare ïa a kotou e ara.” Kareka ra kua tuatua marokiakia ua atura ratou e kare ratou i te matapo e kare e anoanoia te akamarama anga i te pae vaerua. No reira kua akara a Iesu: “Te tuatua maira kotou e, kua kite matou; te vai ra ïa ta kotou ara.” Ioane 9:​19-41.

▪ Eaa ra te nga metua o te tangata tei matapo i muana i mataku ei i to raua aratakiia atu anga ki mua i te au Pharisea ra, e no reira akapeea ta raua pau anga matakite ra?

▪ Akapeea te au Pharisea te tauta anga i te tamataku i te tangata matapo ra i muana?

▪ Na teea akataka anga tau a te reira tangata i akariri atu i te au ­Pharisea ra?

▪ Eaa ra i kore ei e kotoe anga na te au Pharisea no to ratou patoi anga ia Iesu ra?