Pene 109

Akaapa a Iesu i Tei Patoi Iaia Ra

I TE oripu ua anga a Iesu i te manako o te aronga tei patoi iaia ra no te akonoanga atua, kua mataku ratou i te ui akaou atu kiaia i tetai ua atu apinga. No reira kua tamata aia i te akakite i to ratou ra kite kore. Kua ui atura a Iesu: “Eaa to kotou manako i te Mesia ra? e tamaiti aia naai?”

“Na Davida,” ta te au Pharisea i pau atu.

Noatu rai e kare a Iesu i akakore e e tupuna kopapa tikai a Davida no te Mesia, kua ui atura aia: “Eaa oki a Davida, ko tei tuatua ma te Vaerua [ia Salamo 110] i tuatuaʼi kiaia e, e Atu, ka na ko ei ra e, ‘Kua tuatuā Iehova ki taku Atu, Ka noo koe ki taku rima katau nei, e kia akariro au i to au enemi ei pange vaevae noou?’ E teianei, te tuatua rā a Davida kiaia e, e Atu, eaa iora oki aia i riro ei ei tamaiti nana?”

Kua muteki ua te au Pharisea ra, no tei kore ratou i kite i te akatakaanga mou i te Mesia ra, me kare tei akatainuia ra. Kare te Mesia i te uanga tangata ua no Davida, mei ta te au Pharisea i manako ra, kareka i noo ana aia i te rangi e e teitei atu aia ia Davida, me kare e Atu.

Kua ariu atura aia ki te urupu tangata ra e ki tana au pipi katoa, e kua akamatakite atura no te au tata tuatua e te au Pharisea. I te mea te apii ra te reira aronga i te Ture a te Atua, e “te noo nei te au tata tuatua e te au Pharisea i te nooanga o Mose” kua raurau atura a Iesu: “E akono kotou, e e rave i te au mea katoa, ta ratou e tuatua mai.” Inara kua kapiti katoa maira aia: “Auraka ra kotou e aru i ta ratou akonoanga: ko te tuatua ua oki ta ratou, kare ra e akono.”

E pikikaa ratou ra, e kua akaapa atu a Iesu ia ratou mei tana i tuatua atu i te kaikaianga i te are o tetai Pharisea i nga marama i mua akera. “Ta ratou e rave ra,” e nana ei, “e rave anake ïa, kia akaraia ratou e te tangata.” E kua oronga aia i te au akatauanga, i te akakiteanga:

“Te akapararauare ra ratou i te au vairanga tataanga tapu ta ratou e aoao ra ei paruru.” Ko teia au vairanga mea ngiti ua, te tamouia ra ki runga i te rae me kare te rima, e a tuanga o te Ture i roto: Exodo 13:​1-10, 11-16; e Deuteronomi 6:​4-9; 11:​13-21. Inara kua akamaata atu te au Pharisea i te reira au vairanga ei akameamea ua e e totomapu ratou no te Ture ra.

Kua tuatua ua atura a Iesu e “te akamaata atu nei i te veruveru o ta ratou kakau.” Ia Numero 15:​38-40 te akaueia ra to Iseraela kia anga i te veruveru no to ratou kakau, inara kua anga te au Pharisea kia maata atu ta ratou i ta etai katoa ra. Te akonoia ra te au mea ravarai kia akaraia! “Te inangaro i te ngai teitei,” e na Iesu ei.

E mea mii ra, kua tupu katoa te reira inangaro ki tana uaorai au pipi no te ngai teitei. No reira kua ako atura aia: “Kareka kotou, auraka kia tapaia ia Rabi; okotai rai oki o kotou Orometua, ko te Mesia: e taeake anake oki kotou katoa na. Auraka kotou e akametua i tetai tangata i teianei ao: okotai rai oki o kotou Metua, ko tei noo i te rangi. Auraka kotou kia tapaia i te arataki; okotai o kotou Arataki, ko te Mesia.” Ka tau te au pipi kia takore atu i te inangaro ia ratou uaorai e ei numero tai! “Tei rai i roto ia kotou nei, ei tavini ïa no kotou,” ta Iesu ia i apii atu.

I muri akera kua akakite atura aia i etai aue anga no te au tata tuatua e te au Pharisea, e putuputu te karangaanga ia ratou e pikikaa. “Te topiri nei kotou i te basileia o te [rangi, NW] i te tangata nei” e nana ei, e “te pou nei oki ia ratou te au ngutuare o te au vaine takaua ra, e te akaroa nei i te pure.”

“Aue kotou, e te au arataki matapo e,” ta Iesu ia i tuatua. Kua akaapa aia i te ngere o te au Pharisea ra i te puapinga i te pae vaerua, tei kitea ra no te tarevake ta ratou au akataka anga. Ei akatauanga, te karanga ra ratou e, ‘Ko te taputou ki te nao ra, kare ia o reira; kareka te taputou ki te auro o te nao ra, e kai ou ia.’ Na to ratou akaketaketa anga i te auro o te nao ra e kia maata atu i te puapinga i te pae vaerua o te reira ngai akamorianga, te akakite ra ratou i to ratou tu matapo e te manako.

E, mei tana i rave i mua akera, kua akaapa atura a Iesu i te au Pharisea no te manako kore i “te au mea mamaata o te ture, te tuatua-tau, te aroa, e te akarongo” e te oronga ra i te manako maata no te tutaki anga i te tai ngauru anga, me kare tuanga ngauru, o te au ngangaere mea ngiti ra.

Kua karanga a Iesu i te au Pharisea ra e e “au arataki matapo e, te tamauku nei i te namu, e te apuku ua nei i te kamela”! Te tamauku ra ratou i te namu i ta ratou uaina kare no te mea e e manumanu mari ra no te mea e viivii te reira ra. Kareka ra kua akaruke ratou i te au mea teiaa atu o te Ture kua arite ki te apukuanga i te kamera ra, e pera katoa oki e manu viivii ia. Mataio 22:​41–​23:24; Mareko 12:​35-40; Luka 20:​41-47; Levitiku 11:​4, 21-24.

▪ Eaa ra te au Pharisea i muteki uaʼi i ta Iesu uianga kia ratou i ta Davida i tuatua ia Salamo 110 ra?

▪ Eaa ra te au Pharisea i akamaataʼi i ta ratou vairanga tataanga Tapu ra e te au veruveru o to ratou kakau?

▪ Eaa te akoanga ta Iesu i oronga ki tana au pipi ra?

▪ Eaa te akataka anga tarevake ta te au Pharisea i akono ra, e akapeea ta Iesu akaapa anga ia ratou no te akaruke anga i te au mea mamaata ra?