Tauturu i te Aronga Matapo Kia Kite ia Iehova
1. Akapeea a Iesu te akaari anga i te tu aroa no te aronga matapo?
1 Kare e roa atu ka tamateia a Iesu. Iaia e aere maira mei Ieriko, kapiki mai e rua nga tangata matapo: ‘E te Atu, e aroa mai koe ia maua.’ Noatu te manata ra Iesu i tona mate e vaitata maira, kua tapu aia kapiki atu e kua rapakau iora ia raua. (Mata. 20:29-34) Akapeea tatou me aru i to Iesu tu aroa no te aronga matapo?
2. Akapeea tatou i te tuatua anga ki tetai tangata matapo i te ngai tangata?
2 Tauturu Atu: Me aravei koe i tetai tangata matapo, penei i te ngai tangata, akakite atu i toou ingoa ma te ui atu me ka inangaro tauturu aia. No te mea kua akavaavaaia ana teia aronga, penei ka tarotokaka ratou ia koe. Ka riro toou tu oaoa e te inangaro i te tauturu ei akamaru mai iaia. Akamanako katoa e tukeke te turanga matapo, na teia e akataka mai te maata o te tauturu taau ka oronga atu. Me oti, taiku atu e e piri ana koe ki tetai angaanga apii Pipiria. Pati kia tatau atu koe tetai irava, mei ia Salamo 146:8 me kore Isaia 35:5, 6. Me ka kite aia i te tatau i te reo o te aronga matapo koia oki te Braille, ui atu me ka inangaro aia i tetai puka kia kite maata atu no runga i te Pipiria. Tauturu katoa atu iaia kia rauka tetai au mea akatangi mei runga i te jw.org. Me e porokaramu tatau tetai i runga i tana komopiuta, penei ka reka aia i te akarongo i te au atikara i runga i te jw.org e te kopi mai i te reira i roto i te RTF (Rich Text Format).—Akara i te pia “Me Tauturu i te Tangata Matapo . . .”
3. Akapeea tatou me kimi atu i te aronga matapo?
3 Kimi Marie Atu i te Aronga Matapo: Kare tatou e aravei putuputu ana i te aronga matapo me tutu aere no te mea e emiemi ana ratou i te tuatua ki te tangata. No reira, kia tauta tatou i te “ui atu” koia oki kia kimi marie atu ia ratou. (Mata. 10:11) E oa matapo ainei toou i te ngai angaanga me kore i te apii? Tuatua atu kiaia. Me e ngai apii to te aronga matapo i roto i te ngai tutuanga, oronga atu i tetai au puka Braille no ta ratou runanga puka. E tangata ainei taau i kite e e tangata matapo to roto i tona ngutuare? E akaaerenga ainei tetai e akanoonooanga ta ratou no te aronga matapo me kore e tauturu ana i to ratou ngai nooanga? Akamarama atu ki te ngutuare tangata, te tiaki opati, me kore ki te akaaere e te inangaro nei te Au Kite o Iehova i te tauturu i te aronga matapo. Pati atu me ka inangaro ratou i tetai puka Braille e te akarongo i te au rekotianga apii Pipiria. Akaari kiaia i te taputou a te Pipiria e ka takore takiri te Atua i te turanga matapo. Akaari katoa i te vitio “Without It, I Would Feel Lost,” mei runga i te jw.org, te akaari maira i te puapinga tei rauka i tetai tangata matapo mei te Pipiria Braille. Me marama ratou i toou akakoroanga, penei ka akatikaia koe kia aravei atu i te aronga matapo.
4. Eaa te apiianga ka rauka mei te akaraanga o Janet?
4 Kua atoro te tuaine matapo ko Janet i tetai ngai e noo ana te aronga matapo. Tuatua atu aia ki tetai vaine mapu. Akakite a Janet kiaia, “kua rapakau a Iesu i te aronga matapo ei akaari eaa tana ka rave no te au tangata matapo.” Kua tatau kapiti raua ia Apokalupo 21:3, 4, e kua akamarama atu a Janet akapeea te Patireia o te Atua me akatupu i teia taputou. Kua muteki ua te vaine e oti kua karanga e: “Kare roa au i akarongo ana i teia mei tetai tangata matapo. Maata te tangata kare i te matapo te irinaki ra e me matapoia te tangata kua rave ana ratou me kore to ratou ai metua i tetai apinga kino.” Kua imere atu a Janet i te puka ta te Pipiria e Apii Maira, e teianei te apii kapiti nei raua i te Pipiria e rua taime i te epetoma.
5. Noatu kare e rauka ia tatou te rapakau i te aronga matapo mei ta Iesu i rave, eaa te akameitakianga ka rauka me akaari tatou i te tu aroa?
5 Kare e rauka ia tatou te rapakau i te aronga matapo mei ta Iesu i rave. Ka rauka ra ia tatou te tauturu i te aronga tei akapoiriia te manako e te atua o teianei ao, kapiti mai te aronga matapo tikai, kia marama i te Tuatua mou a te Atua. (2 Kori. 4:4) No to Iesu “aroa” i nga tangata matapo i Ieriko, i rapakau ei aia ia raua. (Mata. 20:34) Me akapera tatou i te aronga matapo, e tikaanga mataora teia no tatou i te tauturu ia ratou kia kite no runga ia Iehova, te ka takore takiri i te turanga matapo.