Pene 89

E Tere Aroa ki Iudea

I ETAI epetoma i mua akera, i te tuatau o te Oroa o te Akatapu anga i Ierusalema, kua tauta te ngati Iuda i te tamate ia Iesu. No reira kua aere atu aia ki te apa tokerau, penei ki tetai ngai kare i mamao mei te Tai o Galilea ra.

I te tuatau poto i topa, te aere akaou atura aia ki te pae apa tonga e tae atu ei ki Ierusalema, ma te tutu aere anga i te mataara i te oire o Perea ra, e tapere i te pae o te itinga ra o te Kauvai i Ioridana ra. Koi oti ua akera tana tuatua anga i te akatutu anga no te tangata apinga nui raua ko Lazaro. I reira kua rave ua atu aia i te apii anga i tana au pipi i te au mea tana i apii i mua akera, iaia i Galilea ra.

Ei akaraanga, kua tuatua aia, e meitaki atu no tetai tangata “kia riia tetai toka tavirianga ki runga i tona kaki, e kia titiriia aia ki raro i te tai,” i te riro nana e akaturori i tetai o teianei “au tangata rikiriki.” Kua akaketaketa katoa maira aia i tei anoanoia o te akakore anga ara, ma te akataka anga: “E kia itu ua atu rai [o tetai taeake] takinga-kino anga mai ia koe i te rā okotai ra, e e itu oki ariu anga mai, e te tuatua anga mai e, Kua tataraara au; e akakore rai koe i tana apa.”

I te pati anga te au pipi ra, “E akamaata mai i to matou akarongo,” kua karanga atura Iesu: “Naringa e akarongo to kotou mei te ua sinapi uaorai te maata, e karanga ua atu ïa kotou ki teianei sukamino, Kia kiriti tumuia koe, e kia tanumia atu ki raro i te tai; nana ïa e akarongo mai.” No reira noatu rai e mea ngiti te akarongo ka rauka te akatupu i te au apinga mamaata ra.

I muri akera kua tuatua a Iesu i tetai tu tau tikai ki te oraanga te akatutu maira i te tu manako tika no te tavini i te Atua mana katoatoa ra. “Koai to kotou na, e tavini tona, te arote ra, e te akaangai ra i te mamoe, e oki maira mei te kainga, e karanga vave atu kiaia, Ka aere koe, ka takoto i te kaingakai? Kare aina e karanga atu kiaia e, E akanoonoo i te kaingakai naku, tatuaia to kakau ka rave mai ei i te kai, kia kai au, e kia inu oki! e akonei ake koe ka kai ei, e inu oki? E manako ainei aia, e meitaki to taua tavini ra iaia, koia i rave i tei akaueia atu iaia ra? Te manako nei au kare. Koia katoa kotou, kia raveia e kotou te au mea katoa i akaueia atu, e na ko atu kotou, E au tavini puapinga kore matou nei: ko tei tau tikai ia matou ra, ko ta matou ïa i rave io nei.” No reira, auraka rava te au tavini o te Atua kia manako e te rave ra ratou i tetai apinga akaperepere i te Atua na te tavini anga nona ra. Kareka ra, kia mou to ratou manako i te tika tei ia ratou ra te akamori anga iaia ei au mema irinakiia no tona ngutuare.

I te akara anga nei i muri poto ake i tana oronga anga i teianei akatutu anga kua tae mai tetai karere. Na Maria raua ko Mareta i tono mai iaia, ko raua nga tuaine o Lazaro, tei noo ki Betania i Iudea ra. “E te Atu, i na, te tangata akaperepere naau ra, kua mate i te maki,” ko ta te karere ia i akakite atu.

Kua na ko atura Iesu: “Kare te reira maki e riro ei maki mate, kia akakakāia ra te Atua, e kia akakakāia te Tamaiti a te Atua i te reira.” Kua noo aia e rua ra i reira, kua karanga atura Iesu ki tana au pipi: “Ka oki akaou tatou ki Iudea.” Inara, kua akamaaraara atura ratou kiaia: “E Rabi, i anoano akenei te ngati Iuda ia koe e pei ki te toka, e te oki akaou rai koe ki reira?”

“Kare ainei okotai ngauru ma rua te ora i te ao okotai nei?” Ta Iesu ia i ui atu kia ratou. “Kia aere te tangata i te ao ra, kare e turori, no te mea kua kite aia i te mārama no teianei ao. Kareka kia aere aia i te po ra, ka turori ïa, no te mea kare [ona, NW] mārama.”

Ko te aite anga o ta Iesu tuatua e ko te “ora i te ao okotai” me kare te tuatau akatakaia e te Atua no tana angaanga orometua i te enua nei, kare i ope ake, e me kare i ope, kare e rauka i tetai tangata i te akakino iaia. Ka tau aia kia akono i te katoa anga o te tuatau poto no te “ao okotai” tei toe nona, no te mea i muri ake i te reira ko “te po” kia tamateia aia e tona ra au enemi.

Kua karanga atura Iesu: “Kua moe to tatou oa ko Lazaro; e te aere nei au e akaara iaia.”

Te manako ra ratou e te moe akaangaroi ra a Lazaro e ko te reira e akairo papu e ka meitaki mai aia, kua na ko atura tana au pipi: “E te Atu, te moe ra aia, ka ora ïa.”

Kua akakite pu atura Iesu kia ratou: “Kua mate takiri a Lazaro. No kotou ra i rekarekaʼi au, i te mea kare au i reira, kia akarongo oki kotou; e teianei taki aere tatou kiaia ra.”

I to ratou kite anga penei ka tamateia a Iesu ki Iudea, inara te anoano ra kia turu iaia, kua akamaroiroi atura a Toma i tona au taeake pipi ra: “E taki aere tatou, kia mate katoa atu.” No reira na roto i te tu ekoko no to ratou oraanga, kua aere kapiti atura te au pipi ma Iesu katoa i teia tere aroa ki Iudea ra. Luka 13:22; 17:​1-10; Ioane 10:​22, 31, 40-42; 11:​1-16.

▪ I ea a Iesu i tutu aere ei i mua ua ake ra?

▪ Eaa te au apiianga ta Iesu i tuatua akaou, e eaa te tu no te oraanga mou tikai tana i akataka mai ei akatutu anga i teea tumu ra?

▪ Eaa te akakite anga tei orongaia atu kia Iesu, e eaa tana aite anga no te “ao okotai” e pera katoa “te po”?

▪ Eaa te aite anga o ta Toma i tuatua ra e ‘E taki aere tatou, kia mate katoa atu ma ia katoa’?