AU UIANGA A TE ARONGA TATAU
Eaa te tumu i aue ei a Iesu i mua ake ka akatuakaouia ai a Lazaro, mei tei akatakaia mai i roto ia Ioane 11:35?
Me mate tetai tangata tei akaperepereia e tatou, ka aue tatou no te mea kare tatou e kite akaou iaia. Noatu tona akaperepere ia Lazaro, kare a Iesu i aue no tei mate a Lazaro. Kua aue aia no tona tangi i te kopu tangata e te au taeake o Lazaro, mei tei akaariia mai i roto i te aerenga tuatua a te tataanga a Ioane.—Ioa. 11:36.
Te akarongo mua anga a Iesu e kua maki a Lazaro, kare aia i rapurapu ana i te aere i te akaora ia Lazaro. Te karanga ra te irava e: “E kite akera [a Iesu] e kua mate [a Lazaro] i te maki, noo iora aia i taua ngai ra e po rua.” (Ioa. 11:6) Eaa a Iesu i taroaroa ai? E tumu tetai i pera ai aia. Karanga aia e: “Kare te reira maki e riro ei maki mate, kia akakakāia ra te Atua, e kia akakakāia te Tamaiti a te Atua i te reira.” (Ioa. 11:4) Kua akakoro a Iesu i te akariro i te mate o Lazaro ei ‘akakakā i te Atua.’ Akapeea ra? Ka rave a Iesu i tetai temeio umere tikai na te akatuakaou mai anga i tona oa akaperepere mei te mate.
I roto i tana uriurianga ki tana au pipi i teia atianga, kua akaaite a Iesu i te mate ki te moe. No reira aia i akakite ei kia ratou e te aere nei aia “e akaara [ia Lazaro].” (Ioa. 11:11) Kia Iesu, aite rai te akatuakaou mai anga ia Lazaro mei te mate ki tetai metua e akaara maira i tana tamaiti mei te moe. No reira, kare ona tumuanga tau kia taitaia i te mate anga a Lazaro.
Eaa i reira te tumu i aue ei a Iesu? Ka kitea akaouia te pauanga i roto i tana aerenga tuatua. Te aravei anga a Iesu ia Maria te tuaine o Lazaro e kua kite atu aia i te tangata e aue ra, kua “ngunguru iora aia i roto iaia, e taitaia atura.” Kua tukia to Iesu ngakau i te kite anga aia i to ratou mamae e kua “ngunguru iora aia i roto iaia.” Ko te tumu te reira i “aue iorā Iesu.” Taitaia tikai a Iesu i te kite anga i tona au taeake akaperepere e aue ra no te mamae ngakau.—Ioa. 11:33, 35
Te akaari maira teia tataanga e e mana to Iesu i te akaora akaou mai i to tatou aronga akaperepere i roto i te ao ou e vaitata maira. Akaari katoa teia kia tatou i to Iesu aroa no te au taeake kua mate to ratou aronga akaperepere. Tetai apiianga ke ta tatou ka mou mai mei teia koia oki, kia akaari i te tu aroa e te tangi no te aronga tei rokoia e te tumatetenga no tei mate to ratou au akaperepere.
Noatu kua kite a Iesu e ka akatuakaou aia ia Lazaro mei te mate, kua aue rai aia no tona aroa maata e te tangi i tona au oa. Penei ka riro katoa to tatou aroa e te tangi ei akakeu ia tatou kia ‘aue katoa e te aronga e aue ra.’ (Roma 12:15) Kare taua tu ra i te akairo e kare o tatou akarongo i roto i te manakonakoanga no te tuakaouanga. Kua tau rai i reira te akaraanga ta Iesu i akanoo i te akaari i te tu tangi e te aroa no te aronga tei rokoia e te tumatetenga i tona aue anga noatu te aere ra aia ka akatuakaou mai ia Lazaro mei te mate.