Pene A
Koia Oki ta te Au Peroveta Katoa i Akakite Maira
1. Eaa ta te au tika no to Iesu ora anga i mua ake i te riro anga ei tangata e akaari maira i tona pirianga ma Iehova ra?
“E AKAPEREPERE rai oki te Metua i te Tamaiti, e akakite mairai oki kiaia i te au mea katoa tana tikai e rave ra.” (Ioane 5:20) Mei teaa ra tetai pirianga pumaana ta te Tamaiti ra i rekareka ma tona Metua, ko Iehova! Te vaitata anga o taua pirianga ra kua akamata mai i te tuatau o tona anga ia maianga, e au mareniamu kare i rauka kia tatauia i mua ake i tona anau maianga ei tangata. Koia te Tamaiti anau tai a te Atua, ko tei anga tikaia mai e Iehova anake uaorai. Etai atu au mea ravarai i te rangi e i runga i te enua nei kua angaia mai na roto i taua Tama mua akaperepereia ra. (Kolosa 1:15, 16) Kua tavini katoa aia ei Tuatua na te Atua ra, me kare ei Vaa Tuatua, ko Tei na roto iaia te komunikeiti anga i te anoano tu-Atua ra kia etai ke atura. Koia, te Tamaiti ta te Atua i akaperepere takake ra, kua riro mai ko te tangata ko Iesu Karaiti ra.—Maseli 8:22-30; Ioane 1:14, 18; 12:49, 50.
2. Eaa te maata o te taiku anga a te au totou Pipiria ra kia Iesu?
2 I mua ake ka to temeio maira ta te Atua ra Tamaiti anau mua ra ei tangata, e manganui te au totou akauruia tei tataia nona ra. Kua akakite te apotetoro ko Petero kia Korenelio ra: “Koia oki ta te au peroveta katoa i akakite maira.” (Angaanga 10:43) Kua maata oki te akakite anga i ta Iesu ra tuanga i roto i te Pipiria no reira tetai angera i tuatuai ki te apotetoro kia Ioane e: “Ko te akakite oki ia Iesu ra, ko te vaerua ïa o te totou.” (Apokalupo 19:10) Kua akataka meitaki maira taua au totou ra iaia e ko te Mesia. Kua taki atu ratou i te manako anga ki te au tuanga ke ke tana ka rave i te akatupuanga i to te Atua au akakoro anga. Pouroa teianei ka tau kia riro ei manako maataanga na tatou i teia tuatau nei.
Ta te Au Totou i Akakite Maira
3. (a) I te totou ia Genese 3:15 ra, koai tei akatutuia mai e te ovi, “te vaine,” e te ‘uanga o te ovi ra’? (e) Eaa ra te ‘akaparuparu anga o te mimiti o te ovi ra’ i riro ei ei manako anga maata ki te au tavini o Iehova ra?
3 Te mea mua o taua au totou ra kua tuatuaia mai i muri ake i te meameaau i Edene ra. Kua tuatua Iehova ki te ovi ra: “Ka tuku oki au i te ke ia korua ko te vaine, e to uanga e tona uanga; nana e akaparuparu i to mimiti, e naau e akaparuparu i tona pooavae.” (Genese 3:15) Kua tuatua tikaia atu taua totou ra kia Satani, koia tei akatutuia maira e te ovi. “Te vaine” ko ta Iehova uaorai akaaerenga tiratiratu i te rangi ra, tei aite ra ki tetai vaine tiratiratu kiaia. Te ‘uanga o te ovi’ te kapiti ra i te au angera katoa e te au tangata oki te akakite ra i te vaerua o Satani, te aronga te patoi ra ia Iehova e Tona au tangata. Te ‘akaparuparuanga i te mimiti o te ovi ra’ te aiteanga ko te akapouanga i taua meameaau ra ia Satani, tei tuatua akakino ra ia Iehova e tei apai maira i te mamae ngakau maata ki te au tangata nei. Inara eaa te akataka anga no te tuanga maata o te “uanga” te ka rave i te akaparuparuanga ra? No etai au anere mataiti, kua vai mai te reira ei “tuatua ngaro.”—Roma 16:20, 25, 26.
4. Akapeea to Iesu akapapa anga tupuna i te tauturu anga kia akataka iaia ra e ko te Uanga taputouia maira?
4 I muri ake i etai 2,000 mataiti o te tuatua enua tangata nei, kua oronga maira Iehova i etai atu akakite anga. Kua akakite mai aia e ka mama mai te Uanga ra i te papa anga pamiri o Aberahama. (Genese 22:15-18) Inara, ko te papaanga te ka taki atu ki te Uanga ka vairai, kare ki runga i te papaanga kopapa, mari ra ki runga i ta te Atua ra iki anga. Noatu rai to Aberahama aroa no tana tamaiti ko Isemaela, tei anauia maira e Hagara, kua tuatua Iehova: “E akatinamou ra au i taku koreromotu ia Isaaka, ta Sara e anau naau.” (Genese 17:18-21) I muri akera kua akatinamouia taua koreromotu ra, kare ki ta Isaaka tama mua ra, ia Esau, mari ra kia Iakoba, mei iaia maira te 12 kopu o Iseraela i anauia mai ei. (Genese 28:10-14) I muri akera, kua akakiteia mai e ko taua Uanga ra ka anauia mai i te kopu o Iuda, i te papaanga o Davida ra.—Genese 49:10; 1 Paraleipomeno 17:3, 4, 11-14.
5. I te akamata anga a Iesu i tana angaanga orometua i te enua nei, na teaa i akataka mai e koia te Mesia ra?
5 Eaa etai atu au tumu i orongaia mai no te akatakaanga i te Uanga ra? E tere atu i te 700 mataiti i mua akera, kua tapa te Pipiria ia Betelehema e ko te ngai e anauia mai ei te Uanga taputouia ra ei tangata. Kua akakite katoa mai te reira e kua vai ana te Uanga ra “mei tupua rava mai,” mei te tuatau i angaiai aia i te rangi ra. (Mika 5:2) Kua totou katoaia te tuatau tikai no tona mama anga mai ki te enua nei ei Mesia ra, na roto i te peroveta ko Daniela. (Daniela 9:24-26) E i te akatainu angaia a Iesu ra i te vaerua tapu, e te riroanga tikai e ko Tei Akatainuia e Iehova, kua akataka meitaki maira to te Atua uaorai reo mei te rangi ra iaia e ko Tana Tamaiti. (Mataio 3:16, 17) Kua akakiteia mai te Uanga ra! No reira, kua rauka ia Philipa kia tuatua ma te irinaki anga: “Kua kitea e matou ta Mose i tata ki roto i te ture ra, e ta te au peroveta ra, ko Iesu.”—Ioane 1:45.
6. (a) Kia tau ki ta Luka 24:27, eaa ta te au pipi a Iesu i kite mai? (e) Koai te tuanga maata o te ‘uanga o te vaine ra,’ e eaa te aiteanga o tana akaparuparuanga i te mimiti o te ovi ra?
6 I muri iora, kua kite te au pipi a Iesu ra e manganui tikai te au taikuanga totou iaia ra ei tuanga ki roto i te au Tuatua Tapu akauruia ra. (Luka 24:27) Kua riro kia taka meitaki atu e ko Iesu te tuanga maata o te ‘uanga o te vaine ra,’ ko te ka akaparuparu i te mimiti o te ovi ra, kia akapaii ia Satani kia kore atu. Na roto ia Iesu, te au taputou katoatoa a te Atua ra ki te au tangata, te au mea katoa ta tatou e inangaro akatenga atu nei, ka apaiia mai ki te tupu anga ra.—2 Korinetia 1:20.
7. Kapiti atu ki te akataka anga i Tei taikuia ra i te au totou, eaa atu tetai mea puapinga kia kiteia?
7 Akapeea te akatupu anga tau kia tatou i te kiteanga i teia? Te akakite maira te Pipiria no tetai eunuka Etiopia tei tatau ra i etai o teianei au totou no runga i Tei Oko e te Mesia te aere maira. No te kite kore, kua ui atura aia kia Philipa te tangata tutu evangeria ra: “Noai ta te peroveta nei tuatua?” Inara kare te eunuka ra i tuku kia ope taua tumu ra i reira i te rauka anga iaia te pauanga. I muri ake i te akarongoanga matakite ki te akataka anga ta Philipa i oronga atura, kua kite taua tangata ra e ko te ariki anga no teianei akatupu anga totou te anoanoia ra te angaanga i tona uaorai tuanga. Kua kite aia e te umuumuia ra aia kia papetitoia. (Angaanga 8:32-38; Isaia 53:3-9) Te akono aiteite ra ainei tatou?
8. (a) Eaa te akaataia maira e ta Aberahama tauta anga kia tuku atinga ia Isaaka? (e) Eaa a Iehova i tuatuai kia Aberahama e ka akameitaki te pa enua katoa o te enua nei ia ratou uaorai na roto i te Uanga, e eaa te aite anga o teia kia tatou i teia tuatau nei?
8 E akamanako, katoa, i te tataanga akatukia maira o ta Aberahama tauta anga kia oronga ia Isaaka ei atinga, ko tana tamaiti anake ia na Sara. (Genese 22:1-18) Kua akaata mai te reira i ta Iehova ka rave—kia oronga i tana Tamaiti anau tai: “I aroa mai te Atua i to te ao nei, kua tae rava ki te oronga anga mai i tana Tamaiti anau tai, kia kore e mate te akarongo iaia, kia rauka ra te ora mutu kore.” (Ioane 3:16) Te oronga maira teia i te irinaki anga kia tatou e mei ta Iehova oronga anga i tana Tamaiti anau tai ra kia akatupu i Tana akakoro anga, ka pera katoa Aia “e oronga katoa mai i te au mea ravarai no tatou.” (Roma 8:32) Eaa ra tei umuumuia i to tatou tuanga? Mei tei tataia ra ia Genese 22:18, kua tuatua a Iehova kia Aberahama e ka akameitaki te pa enua katoa o te ao nei i toou ra Uanga, “ko koe [ko Aberahama] i akarongo mai i [te reo o te Atua ra].” Ka tau katoa tatou kia akarongo atu kia Iehova e ki tana Tamaiti oki: “Ko te akarongo i te Tamaiti ra, e ora mutu kore tona: e te kore akarongo i te Tamaiti ra, kare aia e kite i te ora; te vai ra ïa te riri o te Atua ki runga iaia.”—Ioane 3:36.
9. Me te ariki nei tatou i te manakonako anga no te ora mutu kore ka rauka na roto i te atinga o Iesu ra, eaa ta tatou ka rave?
9 Me te ariki ra tatou i te manakonako anga no te ora mutu kore tei rauka maira na te atinga o Iesu, ka anoano ia tatou kia rave i te au mea ta Iehova i tuatua maira kia tatou na roto ia Iesu. Te koropini ra teianei i to tatou inangaro no te Atua e to tatou au tangata tupu. (Mataio 22:37-39) Kua akaari maira Iesu e na to tatou inangaro ia Iehova e akakeu ia tatou kia apii atu ia etai ke ra “kia akono i te au mea katoa [ta Iesu i] akaue mai kia [tatou].” (Mataio 28:19, 20) E te anoano ra tatou kia tua i taua aroa ra ma te au oa tavini no Iehova ra na te putuputu ‘te akaputuputu anga ia tatou uaorai’ ma ratou katoa ra. (Ebera 10:25; Galatia 6:10) Pera katoa oki, i te akarongoanga ki te Atua e tana Tamaiti ra, auraka tatou e tau kia manako e te pati maira raua i te tu apa kore mei ia tatou. Te tuatua ra Ebera 4:15 e ko Iesu, to tatou Taunga Maata, ka “aroa mai ia tatou i to tatou au paruparu nei.” Mei teaa ra te akapumaanaanga o te reira, e maata oki me ka akavaitata atu tatou ki te Atua i te pure na roto ia Karaiti no te tauturu kia akakore atu i to tatou tu paruparu!—Mataio 6:12.
E Akaari i te Akarongo ia Karaiti Ra
10. Eaa i kore ei e ora i te pae atu mei ia Iesu Karaiti ra?
10 I muri ake i te akatakaanga ki te akavaanga teitei o te ngati Iuda i Ierusalema ra e kua akatupuia te totou Pipiria i roto ia Iesu, kua taopenga maroiroi atura te apotetoro ko Petero: “Kare rava oki e ora i tetai ke: kare atu oki e ingoa i akakiteia mai ki te tangata i raro ake i teianei rangi, e oraʼi tatou nei.” (Angaanga 4:12) I te mea e ki katoa te au anaunga o Adamu i te ara, kare to ratou matenga e mou i tetai puapinga te ka rauka kia taangaangaia ei oko no tetai ke ra. Inara ko Iesu e apa kore ua, e ko tona oraanga e puapinga ia ei atinga oko. (Salamo 49:6-9; Ebera 2:9) Kua oronga aia ki te Atua ra i tetai oko tei tau tikai te puapinga ki te oraanga tei ngaro ke ra ia Adamu. (1 Timoteo 2:5, 6) Na teia i akatuera i te aerenga no tatou kia rauka te ora mutu kore i to te Atua ao ou ra.
11. E akataka mai e akapeea tatou e puapinga maataiai i to Iesu atinga ra?
11 Kua akatuera katoa te oko i te mataara no tatou kia rauka mai etai atu au puapinga, noatu rai i teianei. Ei akatauanga, noatu rai e aronga ara tatou, na te atinga o Iesu e raukai ia tatou tetai akava ngakau ma no te akakore anga i te ara. E maata roa atu teia i tei rauka no to Iseraela ra na te au atinga manu tei umuumuia ra e te Ture a Mose. (Angaanga 13:38, 39; Ebera 9:13, 14; 10:22) Inara, e raukai taua akakore anga ara ra te umuumuia ra e kia kite tiratiratu tatou e eaa te maata o to tatou umuumu anga i te atinga o Karaiti ra: “Kia karanga tatou e kare a tatou ara, te pikikaa nei tatou ia tatou uaorai, e kare te tuatua-mou i roto ia tatou nei. Kia aaki tatou i ta tatou ara, e tuatua-mou tana e te tika i te akakore anga mai i ta tatou ara, e te tamā anga ia tatou i te au tuatua-tika kore ravarai.”—1 Ioane 1:8, 9.
12. Eaa te papetitoanga i te vai i riro ei ei tumu maata i te rauka anga tetai akava ngakau meitaki ki mua i te Atua ra?
12 Akapeea e raukai i te aronga ara te akakite i te akarongo ia Karaiti ra e tona atinga? I te riro anga te au tangata i te anere mataiti mua ra kia akarongo, kua akakite ratou ki mua i te au tangata i te reira. Akapeea? Kua papetitoia ratou. No teaa ra? No te mea kua akaue atura Iesu i tana au pipi katoa kia papetitoia. (Mataio 28:19, 20; Angaanga 8:12; 18:8) Kare tetai peretana e tapupu ua me kua akakeu tikaia tona ngakau e te apinga aroa ta Iehova i oronga mai na roto ia Iesu ra. Ka rave ra aia i etai ua atu akatikatika anga i tona oraanga, e ka akatapu iaia uaorai ki te Atua ra na roto i te pure, e ka akatutu oki i tona akatapuanga na te taruku anga i te vai. Na te akakiteanga i te akarongo i teianei tu e rave ei aia “i te tuatua ra i te akava-ngakau meitaki ra i te Atua.”—1 Petero 3:21.
13. Me kite tatou e kua rave tatou i tetai ara, eaa ta tatou ka tau kia rave no te reira, e no teaa ra?
13 Te tika, noatu rai i muri ake i te reira, ka akaari mai te au tu ara ia ratou uaorai. Ka peea i reira? Kua tuatua te apotetoro ko Ioane: “Te tata nei au i teianei au tuatua kia kotou, kia kore kotou e rave i te ara. Kia rokoia atura tetai tangata i te ara, e Tika to tatou tei ko i te Metua ra, ko Iesu Mesia tuatua-tika ra: Koia oki te tarangaara i ta tatou nei ara.” (1 Ioane 2:1, 2) Te aite anga ainei o teia e noatu eaa ta tatou ka rave, me pure tatou ki te Atua no te akakore anga ara, ka meitaki ua te au mea ravarai? Kare ia. Te taviri ki te akakore anga ara ko te tataraara tika tikai. Penei ka anoanoia te tauturu mei ko mai i te aronga pakari, te aronga karape i roto i te putuputuanga Kerititiano ra. Ka tika tatou kia kite i te tarevake o tei raveia ra e kia mii ma te ngakau tae no te reira kia rave ei tatou i te tauta anga akatenga kia kopae ke i te rave akaouanga i te reira. (Angaanga 3:19; Iakobo 5:13-16) Me rave tatou i teia, ka papu ia tatou ta Iesu ra tauturu anga e to tatou akaora anga oki ki te akaperepere anga a Iehova ra.
14. (a) E akataka mai i tetai tu puapinga maata i puapingaiai tatou i to Iesu atinga ra. (e) Me e akarongo tikai to tatou, eaa ta tatou ka rave?
14 Na te atinga o Iesu i akatuera i te mataara no te ora anga mutu kore i te rangi no te “anana iti,” te tuanga rua no te uanga ia Genese 3:15 ra. (Luka 12:32; Galatia 3:26-29) Kua akatuera katoa te reira i te mataara no te ora anga mutu kore ki runga i tetai enua parataito no te au pirioni ua atu o te au tangata ke atura. (Salamo 37:29; Apokalupo 20:11, 12; 21:3, 4) Te ora mutu kore “e mea oronga uaia mai e te Atua i roto i to tatou Atu ia Iesu Mesia.” (Roma 6:23; Ephesia 2:8-10) Me e akarongo to tatou i taua mea oronga uaia maira e te ariki anga i te tu i raukai te reira, ka akakite tatou i teia. I te kiteanga i akapeea te umere o ta Iehova ra taangaanga anga ia Iesu i te akono anga i Tona ra anoano e akapeea te puapinga maata kia aru vaitata tatou katoatoa i to Iesu au tapuae, ka akariro tatou i te angaanga orometua Kerititiano e ko tetai o te au angaanga maata katoa i to tatou oraanga. Ka kitea to tatou akarongo mei te irinaki anga ta tatou ka tuatua atu kia etai ke ra i te apinga aroa maata mei ko mai i te Atua ra.—Angaanga 20:24.
15. Akapeea te akarongo anga ia Iesu Karaiti ra i riro ei ei tupu anga taokotaianga?
15 Mei teaa ra te taokotaianga meitaki o taua akarongo ra! Na roto i te reira ka akapiri vaitataia atu tatou kia Iehova, ki tana Tamaiti, e ki tetai e tetai i roto i te putuputuanga Kerititiano ra. (1 Ioane 3:23, 24) Te akariro ra ia tatou kia rekareka e kua oronga takinga meitaki mai a Iehova ki tana Tamaiti “i te ingoa i maata ua atu i te teitei i te au ingoa ravarai nei nona [kare ra i to te Atua ingoa]: Kia tuku te au turi katoa ki raro, to te rangi, to runga i te enua, e to raro ake i te enua, i te ingoa o Iesu; E kia aaki te au vaa ravarai e, ko Iesu Mesia te Atu, kia kakā te Atua Metua ra.”—Philipi 2:9-11.
Uriuri Akaou Anga
• I te mama maianga te Mesia, eaa ra aia i taka meitaki ei ki te aronga tei irinaki tika ra i te Tuatua a te Atua?
• Eaa etai o te au mea ta tatou ka tau kia rave ei akaari i to tatou ariki anga i te atinga o Iesu ra?
• Na roto i teea au tu i puapingaiai tatou e te atinga o Iesu i teianei? Akapeea teia i te tauturu anga ia tatou me pure tatou kia akakore mai a Iehova i ta tatou au ara?
[Tutu i te kapi 36]
Kua tuatua atura Iesu ki tana au pipi e ka tau ratou kia apii atu i etai ke kia akono i ta te Atua au akauenga