Pene Tai Ngauru Ma Itu
E Rave i te Akamori Tau i te Atua i te Ngutuare
1. Akapeea te akonoanga i te arataki anga mei te Tuatua a te Atua i te akatupu anga i te au akaipoipoanga?
NA IEHOVA i Akamata mai te akaipoipo anga, e te oronga maira tana Tuatua i te aratakianga meitaki roa no te au pamiri. Ei tupu anga no te akonoanga i taua arataki anga ra, e manganui te au tangata kua patu puapinga i te au akaipoipo anga. E mea meitaki oki, ko tetai papaki tei noo kapiti ua kua akakeuia kia retita i to ratou akaipoipo anga i te ture. Ko etai atu kua akamutu i te noo pirianga i vao ake i te akaipoipo anga. Te au tangata takinga kino i ta ratou au vaine e te tamariki kua apii oki i te akaari i te takinga meitaki e te maru.
2. Eaa te o atura ki te oraanga pamiri Kerititiano?
2 E manganui te au mea e o atura ki te oraanga pamiri Kerititiano, mei te akapeea ra to tatou manako anga no te tinamou anga o te akaipoipo anga, eaa ta tatou ka rave i te akatupu anga i ta tatou au apainga i roto i te pamiri, e akapeea ta tatou akono anga i te au mema o te pamiri. (Ephesia 5:33–6:4) Noatu penei te kite ra tatou eaa te tuatua a te Pipiria no te oraanga pamiri, e apinga ke ra te akono anga i te akoanga a te Pipiria. Kare tetai o tatou e inangaro kia aite atu ki te aronga ta Iesu i akaapa atura no te aere ke anga i ta te Atua au akauenga ra. Kua akamanako pikikaa ua ratou e kua rava ua te akamori akonoanga. (Mataio 15:4-9) Kare tatou e inangaro i tetai akatutu anga akamori tau i te Atua inara kare e akono ana i te reira i roto i to tatou uaorai ngutuare. Kareka ra, ka anoanoia tatou kia akakite i te akamori anga tau tikai i te Atua, “ko te apinga maata ïa.”—1 Timoteo 5:4; 6:6; 2 Timoteo 3:5.
Eaa te Roa e Mou ei te Akaipoipo Anga?
3. (a) Eaa te tupu ra ki te au akaipoipo anga e manganui, inara eaa te tamanako anga tau no tatou? (e) Na te taangaanga anga i taau Pipiria, e pau mai i te au uianga tei akapapaia i raro ake i teianei parakaoa.
3 Te tupu maata ra, te akapapuanga e te paruparu maira te au tapekaanga akaipoipo. Etai au tokorua tei kapitiia ra no etai mataiti e manganui kua iki kia kopae keia e kia akaipoipo atu i tetai ke. Pera katoa kare i te mea tuke kia akarongoia e kua tataka ke etai tokorua ou i muri ake i te akaipoipo anga no te tuatau poto ua. Noatu rai eaa ta etai ke ka rave, ka tau tatou kia inangaro i te akamareka ia Iehova. No reira e akamanako tatou i te au uianga te aru mai nei e te au tuatua tapu kia kite e eaa ta te Tuatua a te Atua e akakite maira no te tinamou anga o te akaipoipo anga.
Me akaipoipo tetai tangata e te vaine, eaa te roa ka tau raua kia manako kia noo kapiti? (Mareko 10:6-9; Roma 7:2, 3)
Eaa anake te tumuanga no te kopae ke ma te tika kia akaipoipo akaou tei manaia ki mua i te Atua ra? (Mataio 5:31, 32; 19:3-9)
Eaa to Iehova manako ngakau no te au kopae anga kare ra i akamanaia e tana Tuatua? (Malaki 2:13-16)
Te akakite ra ainei te Pipiria i te akataka ke anga ei tika anga no te akakore anga i te au manamanata akaipoipo anga? (1 Korinetia 7:10-13)
Penei i raro ake i teea au turanga e akatikaiai te akataka ke anga? (Salamo 11:5; Luka 4:8; 1 Timoteo 5:8)
4. Eaa ra etai au akaipoipo anga i vai roai?
4 Etai akaipoipo anga te puapingaia ra, ka vairai. No teaa ra? Na te tatarianga kia pakari nga tokorua ei reira ka akaipoipo ei ko tetai tumu ia, inara ko te kimi anga i tetai tokorua tei aiteite maira tona au manako e ka uriuri atea ua i te au tumu e puapinga katoa ia. Inara, te mea maata atu te puapinga, ko te kimianga i tetai tokorua te inangaro ra ia Iehova e te akangateitei ra i tana Tuatua ei tumuanga no te akonoanga i te au manamanata. (Salamo 119:97, 104; 2 Timoteo 3:16, 17) Kare taua tangata ra e manako e me kare e meitaki te au apinga, ka rauka ua iaia te akataka ke anga me kare te kopae anga. Kare aia e taangaanga i te au tarevake a tona tokorua ei kotoe anga kia akaruke i tana uaorai au apainga. Kareka ra ka aro atu aia ki te au manamanata e ka kimi i te ravenga e meitaki ei.
5. (a) Akapeea ra te tiratiratu kia Iehova i te o atu anga ki roto i te akaipoipo anga? (e) Noatu rai me ka rokoia mai e te patoi anga, eaa te au puapinga ka rauka mai mei te mouanga ki te au turanga a Iehova?
5 Te karanga ra a Satani e me mamae tatou, ka akaruke tatou i ta Iehova au aerenga. ( Iobu 2:4, 5; Maseli 27:11) Inara ko te maataanga o te Au Kite o Iehova tei mamae ra no te tokorua patoi kare i akakore i ta ratou au tia akaipoipo anga. Te rave ua atura ratou i te tiratiratu kia Iehova e tana au akauenga. (Mataio 5:37) Tetai papaki tei akakoromaki ra kua rekareka i te kapiti atuanga ma to ratou tokorua i te tavinianga ia Iehova—noatu rai i muri ake i etai au mataiti patoi anga! (1 Petero 3:1, 2) E ko te au Kerititiano kare ra to ratou au tokorua i akaari mai i te au akairo no te taui anga me kare kua akarukeia mai ratou no te mea te tavini ra ratou ia Iehova, te kite katoa ra teianei aronga e ka akameitakiia ratou no ta ratou orongaanga i te akapapu anga i te akamori tau i te Atua ra i te ngutuare.—Salamo 55:22; 145:16.
Te Rave Taki Tai ra Tetai i Tana Tuanga
6. E raukai te akaipoipo anga puapinga, eaa te akanoonoo anga ka tika kia akangateiteiia?
6 Inara, te rauka anga te akaipoipo anga puapinga e maata atu te umuumuia ra i te nooanga kapiti ua. Ko te umuumu anga puapinga i te tuanga o nga tokorua taki tai ra kia akangateitei i te akanoonoo anga upoko anga a Iehova. Te oronga ra teianei i te papa anga meitaki e te manako ngakau tinamou i roto i te ngutuare. Ia 1 Korinetia 11:3, ka tatau tatou: “Ko te Mesia te upoko o te tangata ravarai nei; e to te vaine ra upoko, ko te tane ïa; e to te Mesia upoko, ko te Atua ïa.”
7. Akapeea te akono anga i te taoonga upoko i roto i te pamiri?
7 Te kite ra ainei koe e eaa ta taua irava i taiku mua mai? Ae, e Upoko to te au tangata ravarai, ko Karaiti, kiaia te tau ra kia kauraro. Te aiteanga o teia e kia akono te tane i tona taoonga upoko na roto i tetai tu te akaata ra i te au tu o Iesu. Te kauraro ra a Karaiti kia Iehova, te aroa oonu ra i te putuputuanga, e te oronga maira i te au apinga no te reira. (1 Timoteo 3:15) E “kua oronga [mai aia] iaia uaorai ei oko.” Kare a Iesu i akaparau e i manako kore ua, mari ra ‘e maru, e te ngakau akaaka.’ Ko te aronga tei aere mai ki raro i tona taoonga upoko ka ‘rauka oki te akaangaroianga no to [ratou] au meta.’ Me akono te tane i tona pamiri na teia tu, te akaari ra aia e te kauraro ra aia iaia uaorai kia Karaiti. Ka kitea e tetai vaine Kerititiano i reira i te puapinga e te akaangaroianga kia taokotai atu ki tana tane e kia kauraro i tona taoonga upoko.—Ephesia 5:25-33; Mataio 11:28, 29, NW; Maseli 31:10, 28.
8. (a) Penei eaa i riro ei kia akaraanga e kare te au ravenga Kerititiano e rauka ana kia akatupu mai i te au mea anoanoia i etai au ngutuare? (e) Eaa ta tatou ka tau kia rave me ka aro atu i taua turanga ra?
8 Inara, ka tupu mai te au manamanata. Tetai tuanga riri i te arataki anga a etai ke atu penei kua oonu ke ana te tupu anga i mua ake ka akamatai tetai o te pamiri i te akono i te au kaveinga Pipiria. Te au patianga takinga meitaki e te tu aroa penei kare e rauka te au tupu anga meitaki. Kua kite tatou e te tuatua ra te Pipiria kia kopae ravaia “te maru kore, e te rotoriri, e te makitakita, e te taumāro ra.” (Ephesia 4:31) Inara me kare tetai papaki e kite i tetai ua atu apinga, eaa te ka tau kia raveia? I na, kare a Iesu i aru i te aronga tei akakoko ra e tei akaapa, mari ra kua irinaki aia i tona ra Metua. (1 Petero 2:22, 23) No reira me ka tu mai te au turanga timataanga i roto i te ngutuare, e oronga i te akakite anga i te akamori anga tau i te Atua na te pureanga kia Iehova no tana tauturu auraka e akono i te au tu o teianei ao.—Maseli 3:5-7.
9. Kare e kia kimi i te tarevake, eaa ta tetai au tane Kerititiano e manganui i apii i te rave?
9 Kare te au tauianga e aere viviki ua mai, inara ka angaanga tikai te akoanga Pipiria me akono akakoromakiia e te ngakau tae oki. E manganui te au tane tei kite e kua akamata te akaipoipo anga i te meitaki mai i to ratou ariki anga i ta Karaiti au akonoanga ma te putuputuanga ra. Kare taua putuputuanga ra no te au tangata apa kore ua. Inara, kua aroa atura Iesu i te reira, kua akanoo i te akatau anga tika no te reira, e kua taangaanga i te au Tuatua Tapu ei tauturu kia akameitaki mai i te reira. Kua oronga aia i tona oraanga no te putuputuanga. (1 Petero 2:21) Kua akamaroiroi tana akatauanga i te au tane Kerititiano e manganui kia akono i te upoko anga meitaki e kia oronga i te tauturu aroa kia akameitaki mai i te reira. Te akatupu maira teia i te au tupu anga meitaki atu i to te kimianga tarevake me kare te akakoreanga i te tuatua anga.
10. (a) Penei na roto i teea au tu te tane me kare te vaine—noatu me ko tetai te manako ra e Kerititiano aia—i te akariro anga kia ngata te oraanga no etai ke i roto i te ngutuare? (e) Penei eaa te ka raveia kia akameitaki mai i te turanga?
10 Akapeea me kare te tane e matakite ana i te umuumuanga manako ngakau o tona pamiri me kore ra kare i akono i te manako rave ua no te akanoonoo i te uriuri anga i te Pipiria ei pamiri e no tetai atu au angaanga? Me kore akapeea me kare tetai vaine e taokotai mai e te akaari oki i te kauraro anga tau i te Atua ra? Kua rauka i tetai papaki te au tupu anga meitaki na te rave anga i te au uriuri anga ngateitei na te pamiri no runga i te au manamanata. (Genese 21:10-12; Maseli 15:22) Inara noatu me kare te au tupuanga katoatoa tei manakoia ra i rauka, ka rauka ia tatou tataki tai te tauturu kia akameitaki mai i te reva o te ngutuare na te akaari anga i te au ua o te vaerua o te Atua i roto i to tatou oraanga, te akaarianga i te manako aroa no etai atu au mema pamiri. (Galatia 5:22, 23) Ka aere mai te tereanga ki mua, kare na te tatarianga i tetai atu kia rave i tetai apinga, mari ra na te raveanga i ta tatou uaorai tuanga, te akaari anga e te akono ra tatou i te akamori anga tau i te Atua.—Kolosa 3:18-21.
Te Ngai e Raukai te Au Pauanga
11, 12. Eaa ta Iehova i oronga mai ei tauturu ia tatou kia akariro kia puapinga te oraanga pamiri?
11 E manganui te au tumu te ariu atura te au tangata no te apiianga i te au mea no to ratou pamiri. Inara te kite ra tatou e tei roto i te Tuatua a te Atua te apii anga meitaki roa, e te akameitaki ra tatou e na roto i tana akaaerenga akara maataia, te tauturu maira te Atua ia tatou kia akono i te reira. Te puapinga ki katoaia ra ainei koe mei taua tauturu ra?—Salamo 119:129, 130; Mika 4:2.
12 Kapiti atu ki te aereanga ki te au uipaanga putuputuanga, kua akataka ainei koe i te au tuatau putuputu no te apii Pipiria a te pamiri? Te au pamiri te rave ra i te reira ka rauka kia akono atu kia taokotaiia i ta ratou akamori anga. Kua apinganuiia to ratou pamiri ia ratou e akono ra i te Tuatua a te Atua ki to ratou uaorai au turanga.—Deuteronomi 11:18-21.
13. (a) Me e au uianga ta tatou no runga i te au tumu no te pamiri, teiea te ngai ka kite putuputuiai e tatou te tauturu i anoanoia ra? (e) Eaa te tau ra kia akaataia mai ta tatou au ikianga katoatoa?
13 Penei e au uianga taau no runga i te au tumu no te pamiri. Ei akatauanga, ka akapeea te akakore i te anau anga? Ka akatikaia ainei te titiri pepe? Me e meangiti ua te akaari anga a te tamaiti i te inangaro i te au tumu pae vaerua, eaa te maata nona kia umuumuia kia kapiti atu ki roto i te akamori a te pamiri? E manganui te au uianga mei te reira tei uriuri manakoia i roto i te au puka i neneiia e te Au Kite o Iehova. E apii i te taangaanga i te au puka tauturu apii Pipiria, kapiti katoa te au index, kia kimi i te au pauanga. Me kare ia koe te au puka tei taikuia i roto i te index, e akara i te ngai vairanga puka i te Are Uipaanga Patireia. Me kare penei ka rauka ia koe teianei au puka i runga i taau komupiuta. Ka rauka katoa ia koe te uriuri manako i taau au uianga ma te au tane e te au vaine pakari Kerititiano. Inara auraka e manakonako atu i te pauanga ae me kore e kare ki te au uianga ravarai. E putuputu te taime ka tau naau e iki, ko koe anake me kare ei nga tokorua akaipoipoia. Ei reira ka tuku ei i te au ikianga te ka akaari e te akono ra koe i te akamori tau i te Atua kare i te ngai tangata anake ua mari ra i te ngutuare katoa oki.—Roma 14:19; Ephesia 5:10.
Uriuri Akaou Anga
• Akapeea te tiratiratu kia Iehova i te piri anga mai i roto i te akono tu tika anga i to tetai tokorua akaipoipo?
• Me tei raro ake i te taomi anga no te au manamanata o te pamiri, eaa te ka tauturu ia tatou kia rave i tei marekaia ki te Atua?
• Noatu me ka ngere etai i roto i te pamiri, eaa ta tatou ka rave ei akameitaki mai i te turanga?
[Tutu i te kapi 155]
Ka tau te taoonga upoko o te tane kia akaata i te au tu o Iesu
[Tutu i te kapi 157]
Na te apii putuputu anga i te Pipiria ma te pamiri ka tauturu kia taokotai i te reira