Na Te Akarongo Anga i Akaoraia ai to Ratou Oraanga

KUA oronga takere mai a Iesu Karaiti i te akamatakite anga no te openga o te akatereanga o te au mea o te ngati Iuda te vaira i te iero i Ierusalema. Kare aia i oronga mai ana i te ra e aea te reira e tupu mai ei. Inara kua akataka mai aia i te au tupuanga te ka taki atu ki to te reira akapouanga. Kua raurau aia i tana au pipi kia vai matakite ua atu e kia akaatea mai mei te ngai kino ra.

Kua akakite mai a Iesu e: “Kia akara ra kotou ia Ierusalema i te takako angaia e te au nuku, kua vaitata rava tona pou i reira, kia kite mai kotou.” Kua karanga katoa aia e: “Kia akara atu kotou i te mea rikiriki e taneaʼi ra . . . i te tu anga i te ngai-tapu ra. . . . Te aronga e noo i Iudea ra, ka oro ratou ki te maunga i reira.” Kua raurau a Iesu i tana au pipi e auraka e oki akaou atu i te rave mai i te au apinga materia. E mea rapurapuia te oro anga kia akaoraia mai to ratou oraanga.​—Luka 21:20, 21; Mataio 24:15, 16.

E rauka ai i te akakore i te meameaau akaroaia, na Cestius Gallus i arataki i te vaeau o Roma kia tamaki atu ia Ierusalema i te 66 T.N. Kua tomo katoa atu aia ki roto i te oire e kua takapini atura i te iero. Kua koropiniia te oire e te oripu ua. Ko te aronga tei vai matakite ana kua kite atura e te vaitata maira te tumatetenga. Inara ka rauka ainei i te oro atu? Kare i tapapaia, kua akaatea atu a Cestius Gallus i tona au nuku vaeau. Kua arumaki atura te aronga meameaau o te ngati Iuda ia ratou. Ko teia tikai te tuatau kia oro mei Ierusalema mai e ia Iudea katoa!

I tera mai mataiti, kua oki mai te au vaeau Roma i raro ake ia Vespasian e tana tamaiti ko Titus. Kua koropiniia te enua katoa i roto i te tamaki. Akamata anga i te 70 T.N., kua patu te au Roma i tetai au punanga rakau keokeo tei takapini ia Ierusalema. Kua arai pouroaia te mataara no te oro anga. (Luka 19:43, 44) Kua ta te au tangata i roto i te oire i tetai e tetai. Te toenga o te au tangata ra penei kua tamateia e te au Roma me kare kua apainaia atu ki roto i te tu tuikaa. Kua takore takiriia te oire e tona iero. Kia tau ki ta te tangata tata tuatua enua ngati Iuda ko Josephus o te anere mataiti mua, kua tere atu i te mirioni ngati Iuda tei mamae e tei mate. Kare taua iero i patu akaouia.

Naringa te au Kerititiano i noo ua atu ki roto ia Ierusalema i te 70 T.N., kua tamateia rai ratou me kare kua akatuikaaia ma te katoatoa i reira. Inara, kua ripoti mai te au tata tuatua enua taito e kua akarongo te au Kerititiano i te akamatakite anga tu-Atua e kua oro atu mei Ierusalema mai e ia Iudea katoa ki te au maunga i te tua itinga o te Kauvai Ioridana. Kua noo etai papaki ki Pela, i te enua i Perea. Kua akaruke ratou ia Iudea e kare i oki akaou atu. Na te akarongo anga ki ta Iesu akamatakite anga kua akaoraia mai to ratou oraanga.

Ka Akarongo Ainei Tikai Koe ki te Au Akamatakite Anga no ko mai i te Au Tumu Irinaki Meitakiia?

I muri ake i te akarongo anga no runga i te au akamatakite anga e manganui kare i tupu ake, te manako ra te au tangata e manganui i te au akamatakite anga katoatoa e e mea puapinga kore ua. Inara, te akarongo anga ki te au akamatakite anga penei ka akaoraia mai toou oraanga.

I Tinito i te 1975, kua orongaia te au akamatakite anga e ka tupu mai tetai ngaruerue enua. Kua rave te aronga opita i te angaanga. Kua ariu mai te au tangata. E manganui te au tauatini o te au oraanga tei akaoraia mai.

I roto ia Aperira 1991 i te Piripine, kua ripoti mai te au tangata o te vira i runga i te au ngai tariva o te Maunga Pinatubo e te pupui ua maira te auai e te reu mei te maunga. I muri ake i te akarakara anga i te turanga e rua marama ra, kua akamatakite atu te Philippine Institute of Volcanology and Seismology i te tumatetenga te vaitata maira. Ma te viviki, kua akaateaia atu mei te ngauru te tauatini o te au tangata mei te reira ngai. I te akamataanga ia Tiunu 15, ma tetai aruaruanga ririnui, tere atu i te varu kupiti kiro mita o te apinga tei akapueurikirikiia e kua titiriia atu ki te rangi e kua topa maira ki te tua i uta. Na te akarongo anga e tauatini ua atu au oraanga tei akaoraia mai.

Te akamatakite maira te Pipiria i te openga o teia akatereanga o te au mea. Te noo nei tatou i teianei i roto i te tuatau openga. Te vaitata maira te openga, te vai matakite ua atura ainei koe? Te rave ra ainei koe i te angaanga kia akaatea mai mei roto i te ngai kino ra? Ma te manako rapurapu, te akamatakite ra ainei koe i tetai ke kia rave i te reira?

[Tutu i te kapi 20]

Na te akarongo anga ki te akamatakite anga i akaoraia ai te au oraanga o te manganui i te pupui mai anga te Maunga Pinatubo i te reu o te maunga ka

[Tutu i te kapi 21]

Kua akaoraia mai te au oraanga o te au Kerititiano tei akarongo ki ta Iesu akamatakite anga i te akapouia anga a Ierusalema i te 70 T.N.