Tamou i te Akarongo i Roto i te Atua e te Mesia

Au Akataka Anga a Kolosa

E PUAPINGA kia ora te akarongo ki te Atua ko Iehova e Iesu Mesia. Inara te tamou anga i te reira akarongo e akaaoanga ia. Kua tika te reira no te au Kerititiano i Kolosa, tetai oire i te tua itinga ra o Ephesia i Asia Minora. No teaa ra? No te mea kua apii te au puapii pikikaa i te reira e kia peritomeia tetai e oraʼi, ta tetai ka kai, e te akonoanga i tetai au oroa.

Ma te marama tikai, kua manako te apotetoro ko Paulo i te tu akono o te au Kerititiano o Kolosa i te pae vaerua, e kua inangaro tikai aia ia ratou kia tamou i to ratou akarongo ki roto i te Atua e te Mesia. No reira i te openga o to te apotetoro tapeka mua angaia i Roma (mei te 60-61 T.N.), kua tata aia i tetai reta ki te au Kolosa tei akatumuia no te akatikatika i te au manako tarevake e te akamaroiroi i to ratou akarongo. Ka akara ana tatou e akapeea tatou e puapingaʼi mei tana au tuatua aroa.

E Ariki i to te Mesia Turanga

I te akamata i tana reta, kua akataka a Paulo i te tu ariki no to Iesu turanga. (1:1–2:12) Kua akameitaki aia i te au Kolosa no to ratou akarongo i te pirianga atu ki te Mesia e to ratou aroa no te au taeake tei irinaki. Kua taiku a Paulo i to te Mesia tu ngateitei e koia Tei na roto mai i teia au mea nei i angaia, te Upoko o te putuputuanga, e te momua mei te mate mai. Te tupu ra te akaongi anga ki te Atua na roto i te Mesia, na roto iaia i akaariia mai ei te au apinganui ravarai o te pakari e te kite. Te manako anga i teia au mea ravarai, kia aaere ua rai te au Kerititiano ma te taokotai ki te Mesia e auraka rava e tuku i tetai ua atu i te apai ia ratou ei maunu na roto i te kimikimianga kite a te tangata.

Na roto i te Mesia, kua apai ke atu te Atua i te Ture. (2:13-23) Te akatutu anga e kua patiatiaia ki runga i te rakau ta Iesu i mate ei ki runga. Te au ikuikuanga a te Ture e “ata anake ïa no te ka tupu a muri atu: kareka te kopapa tika ra, ko te Mesia ïa.” Na te mou ketaketa anga ki te Mesia, kare ratou e akatika i tetai tangata i te arai ia ratou i te tutaki no te oraanga mate kore i te au rangi.

Ariki i te Atua e te Mesia

Aru mai kua raurau a Paulo i te au Kolosa kia aao i te akatangata ou e te kauraro ki te mana o Iesu Mesia. (3:1-17) Na te akonoanga i to ratou au manako ki runga i te au mea i runga ake nei, te oronga ra ratou i te au mea o te pae vaerua ki te ngai mua i roto i te oraanga. Te anoanoia ra te kopae anga i te au tu e te au tuatua tarevake. Mei teaa ra ratou kia akameitakiia me ka akakakau ratou ia ratou uaorai ki te au tu mei te tangi, te manako akaaka, e te aroa! Ka rauka i te au o te Mesia i te akaaere i to ratou au ngakau me ka rave ia te au mea ravarai i roto i to Iesu ingoa, no te akameitakianga i te Atua na roto iaia.

To tatou tu ariki i te Atua ko Iehova e Iesu Mesia kia akatuke katoa ia te reira i to tatou pirianga ki tetai pae. (3:18–4:18) Kua tau te au vaine, te au tane, te tamariki, te au tavini, e te au pu kia rave i ta ratou au angaanga ma te mataku i te Atua e te kiteanga i te Mesia. E mei teaa ra tei anoanoia kia aruaru i te pure e te aaere i roto i te pakari!

Ta Paulo reta ki te au Kolosa ka rauka te reira i te tauturu ia tatou kia kopae i te au apiianga pikikaa te ka arai ia tatou i teia re o te oraanga. Ta te apotetoro akapakari anga i te tuatua no runga i te kiteanga i te mana o Iehova e tana Tamaiti ka riro te reira e mana memeitaki ki runga i ta tatou au raveanga angaanga ki tetai pae. E te akapapuia maira te au akameitakianga puapinga kia tatou me tamou i to tatou akarongo ki te Atua e te Mesia.

[Pia/​Tutu i te kapi 26]

Reta ki Laodikea: “E kia oti teianei leta i te tatauia i rotopu ia kotou na,” i tataʼi a Paulo ki te au Kolosa, “e akaue atu oki kotou kia tatau katoaia i te ekalesia i Laodikea ra, e kia tatau katoa kotou i to Laodikea maira.” (Kolosa 4:16) E oire apinganui a Laodikea i te tua opunga ra o Asia Minora, tei pauia i te au mataara ki te au oire mei ia Philadelaphia e Ephesia. Te akaraanga, kua taea te angaanga a Paulo ki Laodikea mei Ephesia mai, noatu e kare aia i tavini ki reira. Kua tuku aia i tetai reta ki te au Kerititiano o Laodikea, noatu e kua irinaki etai aronga apiipii e e tau rua ua te reira i tana reta mua i tata ki te au Ephesia. Kare te reta ki Laodikea i kiteaia i roto i te Puka Tapu, penei e kare i o i tetai au putunga tuatua tei anoanoia no tatou i teia tuatau, me kore penei kua taokiokiia te au tumu manako tei taiku meitakiia i roto i tetai au reta papaanga o te tuatua tapu.

[Tutu]

Au mea pueurikirikiia i Laodikea