Tere ua Atu ki Mua i te Akakoroanga!
Te au Akataka Anga a Philipi
KUA inangaro a Paulo i te au Kerititiano i Philipi kia tamou ua atu e kia tere ki mua i te akakoroanga no te mea puapinga o te oraanga mutu kore. No reira kua tata aia kia ratou i te 60 me kore 61 T.N., i tona tapeka mua angaia i Roma. Kua tukuia tana reta ki tetai putuputuanga tana i akatumu i Philipi no etai 10 mataiti i mua atu, i tetai oire tei akanooia e Philipi o Makedonia (metua tane o Alekanederea Maata). I te tae anga ki te anere mataiti mua, kua riro mai ia ei “oire maata ïa i tei reira pae i Makedonia,” i teianei e tuanga no te apa tokerau o Ereni e te tua tonga o Ukotaravia (Yugoslavia).—Angaanga 16:11, 12.
E putaua te au Philipi tei irinaki ra inara e takinga meitaki tikai. E maata atu i te tai taime to ratou tuku apinga anga na Paulo i tana au mea i anoanoia. (Philipi 4:14-17) Inara tana reta i tata e maata atu te reira i te pepa akameitaki uaia. Kua oronga katoa te reira i te akamaroiroi anga, te aroa, e te ako.
Te Kiteaia ra te au tu Kerititiano
Kua akamata ta Paulo reta ma te kiteaia tona aroa no te au Philipi tei irinaki ra. (1:1-30) Kua akameitaki aia ia Iehova no ta ratou tauturu i te akatotoa anga i te nuti meitaki e kua pure kia maata ua atu rai to ratou aroa. Kua rekareka tikai a Paulo i te mea kua riro tona tapekaia anga i te akatupu ia ratou kia akaari i te ‘tu maroiroi maata no te tuatua i te tuatua na te Atua ma te mataku kore.’ Kua inangaro aia kia noo ma te Mesia inara kua manako aia e kia tavini ua atu rai aia ia ratou. Kua inangaro katoa a Paulo ia ratou kia aere ua atu i te “uapou anga kotou ravarai i te akarongo i te evangelia nei.”
E oti kua aere mai te ako no runga i te tu e te tu akono. (2:1-30) Kua akamaroiroiia te au Philipi kia akaari i te tu manako atu i tetai pae e te akaari i te tu akaaka mei te Mesia. Kia “kakā kotou i rotopu ia ratou mei te rama i teianei ao” e kua raurauia kia tamou “i te tāpu akakite anga i te tuatua ora.” Kua manako a Paulo i te tuku ia Timoteo kia ratou e kua papu e ka aere katoa aia i muri mai. No te akapapu ia ratou no Epaperodito, tei makiia ana, kua tuku a Paulo i teia tavini akaaka meitaki kia ratou.
Tamou Ua Atu Rai Kia Tere ki Mua i te Akakoroanga
E oti kua akaari te apotetoro ki te au Philipi e kiea ratou e tuku ei i to ratou tu papu ia ratou e tere atura ki mua i te akakoroanga. (3:1-21) Kia tukuia te reira ki roto ia Iesu Mesia, kare ki roto i te pae kopapa me kore te peritome anga mei ta tetai pae e rave ra. Kua tamanako a Paulo i tona au pepa i te pae kopapa ei teita i te tamanako anga i “te meitaki maata ra i te kite i taku Atu ra ia Iesu Mesia.” Te “aruaru atura [te apotetoro] i te akakoroanga no te tutaki o te kapiki anga no runga mai i te Atua na roto ia Iesu Mesia” (NW) e kua akamaroiroi i te au Philipi kia rauka rai te tu manako aiteite.
Te taangaanga anga i ta Paulo ako openga ka tauturu te reira i te au Philipi kia tamou i te akakoroanga e te tutaki i mua. (4:1-23) Kua raurau aia ia ratou kia oronga i to ratou au taitaia ki te Atua na roto i te pure e te akaki i to ratou au manako ma te au manako meitaki. Kua akameitaki akaou a Paulo ia ratou no to ratou tu takinga meitaki tikai e kua taopenga ma te au tuatua araveianga e te manako e kia riro ia ratou te takinga meitaki tei akatuangaia o te Atu ko Iesu Mesia i te vaerua ta ratou ka akaari.
Te akamaata ra ta Paulo reta ki te au Philipi i te tu takinga meitaki tikai, te aroa e te akaaka. Te akamaroiroi ra i te tu papu ki roto i te Mesia e te pure ma te manako ngakau ki te Atua. Te tauturuia ra te au Kite o Iehova e te au tuatua a Paulo kia tamou ua atu rai i te tere ki mua i te akakoroanga o te tutaki o te oraanga mutu kore.
[Pia/Tutu i te kapi 25]
Ki Mua i te Akakoroanga: Kua tata a Paulo, “te akangaro anga i te au mea i muri ra, e te uapou anga atu i tei mua ra, Te aruaru atu nei au na te akairo, kia rauka iaku te tutaki i ta te Atua ra kapiki anga no runga maira i te Mesia nei ia Iesu.” (Philipi 3:13, 14) Te aruaru pakari ra te apotetoro iaia uaorai mei tetai rai i roto i tetai taemoemoanga oro. Kare aia i kaimoumou i te taime e te tu tauta i te uri anga ki muri mari ra kua tere atu ki mua i tana akakoroanga—mei tetai tangata oro te aruaru pakari ra i te tikoti i te ngai akamutuanga. Kia Paulo e tetai pae au Kerititiano akatainuia, te re ko te oraanga i te rangi na roto i te tuakaouanga i muri ake i te akamutuanga i tetai oroanga i te enua nei o te tu akono meitaki ki te Atua. Noatu e e manakonakoanga to tatou no te rangi me kore no te enua nei, e tamou ua atu rai tatou i te akono i te tu irinaki papu ki te Atua e te tere ki mua i te akakoroanga ei au Kite nona.—2 Timoteo 4:7.