Au Uianga a te Aronga Tatau
◼ Kua tuatua a Iobu 33:24 (NW) i “tetai oko” tei kitea no Iobu, rauka atura iaia kia kore e mate. Koai ra oki tei riro ei oko no Iobu?
Kare oki e oko atinga tangata i oronga ia ana no Iobu i reira, kua tapoki ra te Atua, me kare kua akakore, i ta Iobu ara.
E manganui oki ta Satani au manamanata i akatupu no Iobu “te ee mamae, mei tona tapuae vaevae e tae ua atu ki tona take upoko.” Kua kino rava to Iobu tu no reira kua raurau tana vaine kiaia “ka akakino atu i te Atua, ka mate atu ei.” Kua manako uaorai a Iobu penei meitaki atu kia mate e ki te reira mamae.—Iobu 2:7-9; 3:11.
I te akaraanga e ka mate a Iobu, kua akara matatio i reira a Eliu i to Iobu turanga taitaia e kua akanoo i te tumu no te manakonako anga, te tuatua anga e: “Kua pou tona kiko, kare rava e kitea atu; . . . Te akavaitata ra oki tona vaerua ki te vaarua, e te ora nona ki te aronga akapou. Naringa tei iaia tetai [karere, NW] ei akakite i te tuatua, taki tai to roto i te tausani katoa ra, ei akakite ki te tangata i tona tiratiratu: Ei reira aia e aroa mai ei iaia, e kua karanga e, ‘E akaora iaia auraka kia tae ki te vaarua: Kua kiteia e au te [oko, NW] . . . E oki aia ki te au ra o tona ou anga ra.’”—Iobu 33:21-25.
Kua kite tatou e kua oronga a Iesu Mesia i tona uaorai oraanga tangata apa kore ei oko aiteite no te au tangata ara. Tona atinga kua aiteite te reira ki ta Adamu i ngaro, te tutaki anga i te tutaki tei anoanoia kia rauka te matara anga mei te ara. (Roma 5:12-19; 1 Timoteo 2:5, 6) Inara, kare e ko te reira ua te taangaanga anga o te “oko” i roto i te Puka Tapu. Te tuatua Epera tei kitea i roto ia Iobu 33:24 aiteanga tei matauia koia oki “tapoki.” (Exodo 25:17) I te Atua e tiaki ra ia Isaraela i taito, e ravenga oki tana no te tapoki, me kare tataraanga no te, au ara—koia oki te au atinga tei tapoki i te ara, kia akatikatika ia te au mea i rotopu i te tangata e te Atua.—Exodo 29:36; Levitiku 16:11, 15, 16; 17:11.
I mua atu, ana kua tika oki i te Atua i te ariki i te au atinga ei akaarianga i te akameitaki me kare ei au pati anga no te tataraara e kia arikiia mai. (Genese 4:3, 4; 8:20, 21; 12:7; 31:54) Kua marama oki a Iobu i te puapinga o te reira au atinga. Tatau tatou e: “E kua tu akera aia i te popongi metua, e kua apai i te atinga karakaratio na ratou ravarai e pini ua ake: te karanga ra oki a Iobu, Peneiake kua ara taua au tamariki naku nei, e kua akakino i te Atua i to ratou ngakau. I pera oki a Iobu i te au ra katoa ra.” (Iobu 1:5) No te mea kua tauta aia kia akamareka i te Atua e no tona manako taitaia, kua riro tana au atinga ei puapinga ia i mua i to te Atua aroaro.—Salamo 32:1, 2; 51:17.
Inara i mua ake kua rokoia a Iobu e te maki tei riro ei akatumatetenga i tona oraanga. Kua tarevake katoa tana manakoanga i tona turanga tuatua tika no reira kua anoano aia i te ako, ta Eliu oki i oronga. (Iobu 32:6; 33:8-12; 35:2-4) Kua akakite a Eliu kia Iobu e auraka aia e noo maromaroa ki roto i te reira tu ka mate ei e ki te vaarua (ade, me kare te vaarua tanumanga). Me tataraara a Iobu, ka rauka “tetai oko.” (NW)—Iobu 33:24-28.
Auraka oki tatou e manako e no te “oko” e ta Eliu aiteanga e ko tetai tangata kia mate i te reira taime e no Iobu ra. No te mea te au atinga ta te aronga akamori tika i matau i te oronga, ko te reira rai te oko ta Eliu e taiku nei no Iobu koia oki e atinga manu. E mea mataora te kite e, kua akakite te Atua i muri mai ki te au taeake akaapaapa o Iobu e: “Ka apai ei i tetai atinga karakaratio na kotou; e na taku tavini na Iobu e pure ia kotou.” (Iobu 42:8) Noatu eaa te tu o te oko, te tumu maata o ta Eliu manakoanga koia oki ka rauka ta Iobu ara kia tapokiia e kia rauka te au puapinga no te reira.
Ko te reira oki tei tupu. Kua ‘tataraara a, Iobu, i raro i te one pueu e te reu.’ Eaa atura? “Kua ruri ke akerā Iehova i taua eketumu anga o Iobu ra . . . Akameitaki roa akerā Iehova i to Iobu openga i to tona muatangana: . . . E muri ake i te reira, te ora ua rā Iobu e okotai akera anere e a ngauru i te mataiti, e kua kite i tana au tamariki, e te au tamariki katoa a aua nga tamariki nana ra, e a katoa uki ra.” E tika rava, kare te oko i akaora takiri ia Iobu mei te ara, no te mea i muri mai kua mate. Inara, te akaroaroa anga i tona oraanga kua akakite mai te reira e, tika rava e, ‘E maata oki te poria o tona ra kopapa i to te tamariki ra, e oki aia ki te au ra o tona ou anga ra.’—Iobu 33:25; 42:6, 10-17.
Ko te reira au akameitakianga tei rauka mei te oko ravarava ua kia Iobu kua akaari mai te reira i te akameitaki anga maata ka rauka te ka tae mai ki te aronga akarongo i roto i te ao ou. I reira, te katoa anga o te puapinga o te atinga oko o Iesu ka rauka mai i reira te akakore anga e tuatau ua atu te tumatetenga maata o te ara e te tu apa ua. Mei teaa atura to tatou “maeva i te rekareka” mei ta Eliu i taiku!—Iobu 33:26, NW.