Tomo te au Karatuati Gileada ki Tetai Tu Oraanga Tutakiia

“MEI teaa te rekareka i teia atianga, te karatuati anga o te pupu 90 o Gileada!” Ma teia au tuatua, kua oronga mai te tiamana ko Karl F. Klein o te Pupu Akaaere, i te porokarama karatuati anga. Te akamaaraanga e i naea te Apii Puka Tapu Punanga Tiaki Anga o Gileada i akamataʼi, kua tuatua aia: “Koai te ka manako e i te 1943, te karatuati anga te pupu mua o Gileada e e 48 mataiti i muri mai te taokotai kapipiti nei rai tatou no te karatuati anga o tetai akaou pupu​—te 90?”

Inara, ia Mati 3, 1991, e ra tuke te maana no te reira tuatau i New Jersey, kua tere atu i te 4,000 au manuiri e te au mema o te ngutuare Betela tei akaputuputu mai ki te Jersey City Assembly Hall, i tetai tua mai ia New York City, no te karatuati anga o teia aronga ou i te angaanga evangeria. I mua ake i te tomoanga ki roto i te oraanga angaanga evangeria, ka orongaia ki te au karatuati etai au ako akarukeanga no teia koia oki to ratou ra karatuati anga.

Kua akatueraia te porokarama ma tetai imene. I muri mai, te aronga pouroa tei tae kua pakiaia ma te oonu ratou te oronga anga a Frederick W. Franz, e 97 mataiti, te peretiteni o te Apii Puka Tapu Punanga Tiaki Anga o Gileada i te pure akatueraanga. I reira i muri ake i te tuatua akakite anga a te tiamana kua akarongo te au karatuati​—e te katoatoa tei tae atu—​ma te inangaro ki tetai au tuanga tuatua poto ma te tau.

Kua tuatua na mua a Max H. Larson o te Kumiti Ngai Angaanga, no runga i te tumu tuatua “Au Taeake Angaanga ma Iehova.” I muri ake i te tuatua anga no te araka akaora anga ta Noa e tona ngutuare tangata i akatu, kua tuatua aia: ‘I teia ra, e akaputuputuanga ta Iehova i tetai ngutuare tangata i te ao katoa ie mirioni ua atu, e te akakoro ra aia no te apai i teia ngutuare tangata na roto i te tumatetenga maata.’ Akapeea? A, na roto i te araka o teia tuatau​—te parataito i te pae vaerua! ‘Ko kotou,’ i akamaaraʼi aia i te au karatuati, ‘ka aere ki te au tuanga ke ke o te enua nei, te ngai e riro ei koe ei au taeake angaanga ma Iehova i te akatuanga i te araka o teia tuatau.’ Te akateateamamaoanga ia ratou no te au mea e tu maira i mua, kua tuatua aia: ‘Ka riro ia ei angaanga kia kotou. Ka riro ia ei mea akakoromaki anga. Ka kite kotou i te au manamanata. I konei kotou e anoano ei i te au tu karape tei orongaia atu e ta kotou akamatauanga.’

Koi atoro ua akera a Daniel Sydlik, tetai mema o te Pupu Akaaere, i te aronga tei roa i te angaanga evangeria i Tiapani e Kota Rika. Te akatupuanga i te tumu tuatua “No Kotou te Tu Oraanga Tutakiia,” kua oronga aia i etai o tana au tuatua memeitaki tana i rave mai mei teia aronga angaanga evangeria tei puapingaia. Kua akakite aia no tetai tuaine tei oronga mai i etai ako anga ta tona metua vaine i oronga kiaia: ‘E inangaro i te angaanga tutu aere. E maani taeake ki te au tangata. E tua i toou oraanga ki tetai atu, e ka riro ei rekareka anga noou.’ Kua tuatua tetai tuaine: ‘I te au mataiti i aereia mai, kua ariki matou e me kare matou e anoano maata rava no ko mai i tetai atu, kare matou e maromaroa ngoie ua. Tetai ua atu tu takinga meitaki e te manako meitaki te ka tupu mai kia matou, ka riro ia ei mea maata tikai kia matou.’ Te taangaangaanga i te au ako mako kare e ekoko anga e ka tauturu ia i te au karatuati kia puapinga ratou uaorai ei aronga angaanga evangeria.

“Kia roa te akakoromaki anga i te tangata ravarai,” i tuatuaʼi a 1 Tesalonia 5:14. Kua tuatua a Leon Weaver o te Tipatimani Kumiti Tavini Anga no runga i teia irava iaia e tuatua ra no runga i te tumu tuatua “Kia Akakoromaki i ta Kotou Raveanga Katoatoa.” Koai te ka o ki roto i te “katoatoa” kia taangaanga tatou i te akakoromaki iaai ma? Kua pau mai te vaa tuatua: ‘Ki te aronga ta kotou ka aravei i roto i te angaanga tutu aere. Te au taeake tane e te vaine i roto i ta kotou putuputuanga. To kotou au taeake angaanga evangeria. Te aronga i roto i te manga. Toou tokorua. Ia koe uaorai.’ Eaa kia akakoromaki ei i ta tatou au raveanga katoatoa? Kua tuatua te vaa tuatua, e te au ‘taeake tane e te vaine,’ na te tu akakoromaki e akameangiti mai i te tu manamanata e te taitaia. Na te tu akakoromaki e akatupu i te au. Na te tu akakoromaki e tauturu ia tatou kia tamou i to tatou tu mataora i te tavinianga.’

Tei aru mai kua tuatua a Albert D. Schroeder, tetai mema o te Pupu Akaaere e te tangata retita tikai o te Apii Gileada. Te tuatuaanga no runga i te tuatua “E Aru Tamou i to Kotou Akaraanga​—Ko Iesu Mesia,” kua akatumu aia i tana au tuatua ki runga ia Philipi pene 2. “E tamou i teia tu manako i roto ia kotou mei tei roto katoa oki ia Iesu Mesia,” i tuatuaʼi te Philipi 2 irava 5. ‘Te akakite maira teia,’ i tuatuaʼi te vaa tuatua, ‘e te anoanoia ra tatou kia rauka te manakoanga tau ua, mei ia Iesu rai te manako tau ua anga.’ Te akamataanga ki te Philipi 2 irava 6, tei aru mai kua rave aia i tetai akarakara anga, te akaarianga e kua oronga mai a Paulo na mua i te au tika e tei ia Iesu te manakoanga tau ua (Philipi 2 au irava 6-8) e oti kua tuku mai i te au mataara ta Iehova i tutaki iaia no tona kaveinga akarongo (Philipi 2 au irava 9-11). Kua taopenga aia ‘ko teia tetai tuanga,’ o ta kotou akameitaki anga, ‘te tutu aereanga i te Atu ko Iesu Mesia, te tauturuanga ia tetai atu kia rauka te tu manako aiteite mei iaia rai.’

Eaa ta te aronga ikuiku au tuatua akarukeanga ki te aronga apiiia? Kua tuatua a Jack D. Redford no runga i te tumu tuatua “Na te Tu Manako e Tamou ma te Paruru ia Kotou.” (Maseli 2:10, 11, NW) ‘Ia kotou e aere nei ki vao i teianei,’ kua tuatua aia, ‘kare toou rekareka e tei runga e koai koe me kore i taau i rauka pera katoa te tika e e karatuati Gileada koe. Tei runga toou rekareka i te akapeea koe me manako. Me taangaanga koe i toou tu manako e te taangaangaanga i toou kite, ka rekareka koe.’ Te akaarianga i te puapinga o te tu manako, kua tuatua aia: ‘Te tuke i rotopu i te raveanga tika e te raveanga tarevake ko toou manako. Taau ka manako na te reira e tuku i taau ka rave.’ Kua taopenga a J. D. Redford ma teia au tuatua akamaroiroi anga ki te aronga apiiia: ‘E manganui te au tangata kite pakari i teianei ao e aronga kite kore i te manako, e e manganui te au tangata averiti te kite pakari kua riro mai e aronga karape i te manako. No reira e rave i te reira tu karape. E tauta i te taangaanga i toou manako. E taangaanga i toou kite. E autu ma te au manamanata. E akaoaoa ki te au tangata. E ariki i te mana akaaere. Kia uua i taau angaanga. E akakoromaki i ta kotou oronga anga angaanga.’

Kua iki a Ulysses V. Glass, te retita o te apii, i te tumu tuatua “Te Turu ra Iehova i to Tatou Rima,” kua akatumuia ki runga ia Salamo 37:23, 24 (NW). Kua akara aia ‘ka akameitaki au i teia pupu, no to ratou inangaro i te apii.’ Kua akamaara aia no etai o te au tauturu ta Iehova i oronga mai no te turu ia ratou​—ko te Tuatua na te Atua, te tavini akono meitaki i raro ake i te akatere anga a Iesu no te oronga mai i te aiteanga e te maramaanga i te au Tuatua Tapu, te au puka tukeke, te au uipaanga, e te au uruoaanga. Kua tuatua ua atu aia, ‘te au tauturu ta kotou i taangaanga i roto i ta kotou apii, mei te rakau e te tokotoko rai i te pae vaerua. Ka anoano tatou i te reira ei turu anga i te pae vaerua, e ka tauturu katoa ia tatou kia tuatua ma te mana i te orongaanga i te Tuatua na te Atua ki tetai atu.’ Ei taopenga ko teia au tuatua ako no te aronga apiiia: ‘Me te ki ra to kotou ngakau i te aroa no te tangata, ka ariu mai te au ngakau tiratiratu. Ka manuia kotou i ta kotou angaanga oroemtua, e ka kite kotou e te turu ra a Iehova i to kotou rima.’

Te vaa tuatua openga no te porokarama i te popongi ko Carey W. Barber o te Pupu Akaaere, tei iki i te tumu tuatua “E Aere na Roto i te Ngutupa Oiti.” Te tuatuaanga no runga ia Luka 13:23, 24 (NW) kua tuatua aia: ‘E manganui te inangaro ra i te au akameitakianga o te oraanga, inara e meangiti ua te inangaro ra i te akakeu maata ia ratou uaorai kia rauka te reira ia ratou.’ Akapeea tatou? ‘E mea meitaki kia ui tatou kia tatou uaorai, “Eaa tikai te aiteanga o teia tutu o te ngutupa oiti ki aku uaorai?”’ Te aronga e poka ra no te aere na roto i te ngutupa oiti kua poka ratou, kare ua e no te mea e e mea aka angaanga, mari ra no te mea te anoano kore ra ratou no te akakeu ia ratou uaorai. ‘Kare a Iehova e pati maata maira mei ia tatou,’ i tuatuaʼi te vaa tuatua. Kua taopenga aia, ‘ma te tauturu o Iehova, kia akakeu maata ma te rekareka e te maroiroi no te roromi atu na roto i te ngutupa oiti ki roto i te ao ou o te oraanga mutu kore, te au, te rekareka, e te mataora, ki to Iehova kaka ope kore!’

Te aruanga i teia au tuatua, kua oronga te tiamana i te au tuatua araveianga tei rauka mai mei te au tuanga tukeke o te enua nei. Kua tae mai te tuatau no te au karatuati kia rauka mai ta ratou au tiporoma. Kua aere mai te aronga apiiia mei te ono au enua​—ko Kanata, ko Vinirani, ko Tiamani, ko Peritane Maata, ko Tuiterani, e te Unaite Teite. Inara ka apai ta ratou oronga anga angaanga ia ratou ki te au enua mei ia Atenetina, ia Penini, ia Porivia, te Repapuriki o Tominika, Papua Nu Kini, Peru, Tainiti Rutia, e Taiuana. Eaa te manako ngakau o te au karatuati i to ratou ra karatuati anga? I roto i tetai reta reka tei tukuia ki te Pupu Akaaere e te ngutuare Betela, kua tuatua ratou i tetai tuanga: “Te papu nei ia matou i te turuanga o te Pupu Akaaere, te ngutuare tangata Betela, e te katoa anga o te akaaerenga a Iehova. Ia matou e aro atura i te au timata anga ki mua, ka akono ua rai matou i te reira turuanga ma te puapinga tikai. No teia te rekareka tikai nei matou.”

I muri ake i tetai akamutu anga poto, kua akamata te porokarama avatea ma tetai Apii Punanga Tiaki Anga tapotoia, tei raveia e Karl A. Adams. I muri i te reira, kua akatutu mai te aronga apiiia i tetai au kiteanga tika tikai i te oraanga no te itaeanga i te ngakau i te apiianga i te Tuatua na te Atua. I te openga, pouroa te aronga tei tae mai, kapiti atu te au karatuati o te pupu 90, kua rekareka ratou i tetai nuku i te tuatau tau, te ingoa Avoid Life’s Anxieties (Kopae i te au Tu Taitaia o te Oraanga), tei orongaia e te aronga akakitekite o te Patireia i te reira ngai.

Kua tuatua te tiamana, a Karl Klein no te katoatoa i te tuatua anga aia i roto i tana au tuatua taopenga: “E tikai kua riro teia ei mea meitaki no tatou kia tae mai i teia ra toru o Mati 1991!” Kua akamutu te porokarama reka tikai ma te imene topirianga, tei aru mai te pure na Harold J. Dies.

[Pia i te kapi 27]

Te au Tu o te Pupu

Numero o te au enua tei komonoia: 6

Numero o te au enua tei tonoia: 10

Numero katoa o te aronga apiiia: 24

Mataiti averiti: 31.2

Au mataiti averiti i roto i te tuatua mou: 15

Au mataiti averiti i roto i te angaanga orometua tamou: 11

[Tutu i te kapi 26]

Te 90 Pupu Karatuatianga o te Apii Puka Tapu Punanga Tiaki Anga o Gileada

I te papaanga i raro ake, kua ta numeroia te au pa mei mua ki muri e kua papaia te au ingoa mei te tua kaui ki te katau i te au pa tatakitai. (1) Miller, M.; Helenius, S.; Marsh, L.; Kleeman, A.; Loosli, Y.; Nizan, H. (2) Skogen, R.; Nutter, D.; Noack, E.; Diehl, L.; Hair, J. (3) Marsh, C.; Helenius, H.; Loosli, M.; Danio, A.; Danio, A.; Nizan, D. (4) Miller, L.; Noack, J.; Hair, L.; Kleeman, W.; Skogen, D.; Diehl, S.; Nutter, W.