E Maata Atu te Aronga Evangeria no te Kokoti Anga i te Ao Katoa

KO Tepetema te marama kokoti anga no te au tangata tanutanu, inara e angaanga kokoti anga puapinga maata rava atu tei akakeu i tetai urupu maata ki te Jersey City Assembly Hall o te Au Kite o Iehova, tikoti i te Hudson River mei New York City mai, ia Tepetema 8, 1991. Te karatuati ra te pupu 91 o te Apii Puka Tapu Punanga Tiaki Anga o Gileada. Tei reira e 4,263 au mema o te ngutuare Betela e te au manuiri tei patiia, ma tetai 1,151 tei piri atu na roto i te tereponi raini ki te au opati maata o Brooklyn e te au pama i Wallkill e Patterson.

Na te peretiteni o te Apii o Gileada, ko Frederick W. Franz, vaitata i te 98 mataiti, i akatuera i te porokarama ma tetai pure akakeuanga e te oonu ma te ngateitei. A Albert D. Schroeder, tetai mema o te Pupu Akaaere e e tangata retita e te ikuiku aia no te apii i mua ana, kua riro aia ei tiamana no te porokarama karatuati anga. Kua akamaara atu aia i te katoatoa no runga ia Salamo 2:1, 2 e tetai atu au totou te akakite maira i teia taime o te ruruanga e te pueurikiriki anga i rotopu i te au pa enua. Te aiteanga o teia tu tamanata anga ko te akatueraanga o te au koro ou e manganui no te angaanga kokoti anga.

Te tuatua mua o te ra kua orongaia te reira e George M. Couch, ko tetai mema o te Kumiti Betela. Tana tumu tuatua “Tare i Taau Au Akameitakianga.” Kua akamaara atu aia i te aronga apiipii o Gileada e kare rava i te taime ou roa no te akamata i teia rave anga. Kua tuatua aia e kua akameitaki tikaiia te aronga apiipii uaorai inara ka tae mai teia au akameitakianga i muri anake ua i te angaanga maata tikai. Aiteite rai, kia Iakoba e 97 ona mataiti te kukumi anga i te po katoa ma tetai angera​—kia rauka ua nei tetai akameitakianga. (Genese 32:24-32) Kua raurau atu te Taeake a Couch i te aronga apiipii kia kore e manako i te au manako papu kore mari ra kia riro mai ei akameitakianga ki tetai pae atu na te tatanuanga i te au o te manako na roto i te pure e te tu tauta pakari.

I muri mai kua tuatua a John E. Barr o te Pupu Akaaere no runga i te tumu tuatua “Kia Vai te Aroa i Rotopu ia Kotou Uaorai.” Kua anoano te au pipi a Iesu kia mate tetai no tetai. “Te kite ra ainei kotou i teia tu aroa i te pupuanga i roto i to kotou au ngakau?” i ui ei aia ki te aronga apiipii. ‘Me kare teia aroa,’ i nana ei, ‘kare ua tatou. Mei tera ua ra te ngoie.’ (1 Korinetia 13:3) Kua papa mai te Taeake a Barr i etai au mataara tau no te akaari i te aroa. Kua akamaroiroi aia i te aronga apiipii kia akono i to ratou au taeake angaanga evangeria ma te ngateitei, ma te kimi ua rai i tetai mataara karape no te tuatua i te au mea. ‘E akangaropoina i te au mea rikiriki,’ i ako atu ei aia ia ratou, te tuatuaanga ia 1 Petero 4:8. Kua akakite aia e ka riro te au ra tunu kai a te aronga angaanga evangeria ei au atianga e raukaʼi ia ratou i te akaari i te aroa na te manakoanga i te angaanga ei mea maata rava atu i te rave anga angaanga ua. Kua akamaara atu aia i te aronga apiipii: “Kare rava tatou e akamutu ana i te ou i te aroa ki to tatou au taeake tane e te vaine.”​—Roma 13:8.

Kua oronga a David A. Olson o te Kumiti Tipatimani Tavini Anga i te tumu tuatua reka koia oki “Mei Teaa Tikai Toou Tu Papu?” Kua tuatua aia e rua ngai no te tu papu: ki roto ia Iehova e tana akaaerenga, e e manganui ua atu te au tumu no te reira (Maseli 14:6; Ieremia 17:8); e ki roto ia koe uaorai. E tumu to te aronga apiipii no tetai manga tu papu iaia uaorai, mei to ratou papaanga ei au orometua e te irinaki anga ta Iehova e tana akaaerenga i tuku ki runga ia ratou. Kua akaari te apotetoro ko Paulo i teia tu irinaki no te au tumu mei teia rai. (1 Korinetia 16:13; Philipi 4:13) Inara kua akamatakite te Taeake a Olson no te tu papu roa ta teianei ao e akamaata ra, mei tei akaariia e tetai tangata tata rongonui tei tuatua e: “E kuotu ua ana rai au iaku uaorai. E akareka ana te reira i taku pukapuka anga.” Inara, te tu papu tei paunu meitakiia ki te tu akaaka ka akauru te reira i te tu papu ki roto i tetai pae atu. Kua tika tikai teia i to Paulo turanga.​—Philipi 1:12-14.

I muri mai kua karanga atu a Lyman A. Swingle o te Pupu Akaaere ki te aronga apiipii e: “Aere ki te au Koro te ka Kokotiia, e Kotou e te Au Karatuati Gileada!” Kua karanga aia e e ra kokoti anga teia no te Apii o Gileada e no te akataeake anga i te ao katoa, i te mea ka aere te au karatuati ka piri atu ki te tauatini ua atu o te au karatuati i mua atu tei roto rai i te angaanga evangeria​—ko etai pae no roto mai i te pupu tai, rua, e te toru o te au mataiti o te 1940! Kua tuatua te Taeake a Swingle e i te reira tuatau kare okotai tangata i kite e ka aere ua atu te angaanga evangeria no tetai 50 mataiti akaou, me kare ka pururu te Akaaerenga Nati, Vatiti, e tetai atu au arairai anga a te kavamani no te angaanga tutu aere. “Me kua umere tatou i ta Iehova i rave i mua ana,” i ui ei aia, “akapeea i reira no te tuatau ki mua?” Kua taopenga aia ma te kapiki anga akakeu ki te aronga apiipii: “Aere ki te koro!”

Kua tuatua i reira te nga tangata ikuiku maata tikai e rua o te Apii o Gileada ki te pupu 91 no te taime openga. Kua tuatua a Jack D. Redford no runga i te tumu tuatua “Tauta kia Rauka te Kite Pakari.” Kua akakite aia ki te aronga apiipii e te apii ra te Apii o Gileada i te kite e te maramaanga, inara kia tauta ratou kia rauka te kite pakari, te rave anga no te taangaanga i to ratou kite na roto i te mataara tau. Kua raurau aia i te aronga apiipii kia kopae i te mea maani ua e kua apii ratou i te reira katoatoa i Gileada. “Te mea puapinga atu ko taau i mou i muri ake i te apii.” I rotopu i te au mea ta ratou ka apii: kia raverave atu i te au tangata ma te au, kia rauka i te tuatua e “te mii nei au kua tarevake au” ki te tokorua, ki te au taeake angaanga evangeria, e ki te au taeake tane e te vaine o te reira ngai; kia matakite i te irinakianga mua i te au tu e te kite e e tukeke te au manamanata ravarai, te umuumuanga i tetai maramaanga oonu o te au turanga i mua ake ka orongaʼi i te ako anga pakari; e kia akangateitei i te au taeake o te reira ngai no ta ratou rauka anga i te raverave atu i roto i te au turanga ngata.​—Maseli 15:28; 16:23; Iakobo 1:19.

Kua rave a Ulysses V. Glass, te retita o te Apii o Gileada ia Philipi 3:16 ei tumu tuatua no tana tuatua. Kua akameitaki aia i te pupu no to ratou tu mako te tere anga ki mua e kua ako atu ia ratou kia tamou ua rai i te aru i te reira irava. Kia tamou ua atu rai te aronga apii i te tauta kia rauka te kite tika tikai, kua tuatua aia, kare rava ratou e kite i te au mea ravarai. Kua akatutu aia i te manako na roto i tetai uati tikitara. Penei ka kite te tangata e akapeea te maani anga i te reira kia angaanga ma te kore e kite e akapeea tikai te reira i te angaanga tikai anga. Aiteite rai, auraka te aronga angaanga evangeria e akameangiti i te aronga, kare i aite atu i to ratou kite oonu tei kite e eaa te mea puapinga​—e akapeea te mataku ia Iehova. (Maseli 1:7) Kua akamaara atu aia i te pupu no te puapinga o te akonoanga i te ‘mata ngoie.’ (Mataio 6:22) Ka rauka te mata vaerua i te tapupuia mei te mata kopapa rai. Mei ia etai pae e mata akara meangiti ua to ratou​—te akara matariki ua anga i te au mea rikiriki kia kiteaʼi te katoa anga o te tutu—​e ko tetai pae, te tuatua ua anga e, te kite ua ra i te au mea kare e puapinga ana e te tamanamanataia ra mei te au mea puapinga tikai tei anoanoia ratou kia rave atu.

Te tuatua openga no te popongi ko te “Akatakaanga e te Angaanga Anga ma te Akaaerenga a Iehova,” tei orongaia e Theodore Jaracz o te Pupu Akaaere. Kua tuatua te Taeake a Jaracz e koi vai ei e tauatini ua atu au akaaerenga e te au totaiete i teianei ao, okotai anake rai o teia katoatoa kare no teianei ao. Akapeea te akataka anga i tei komono ra ia Iehova? Te oronga maira te Tuatua na te Atua i te au akairo akatakaanga. Te akaari maira te Puka Tapu e kua akaaere meitaki tikaiia tana au mea angaia i te rangi ra. (Salamo 103: 20, 21; Isaia 40:26) Te rauka katoa ra ta Iehova akaaerenga i te enua nei i te akatakaia na tona tu mako pera katoa na tona akatakake anga mai mei teianei ao, tona tu aru pakari anga i te au kaveinga Puka Tapu, tona turanga teitei o te tu akono ma te ma, e te aroa i rotopu i tona au mema. Kua raurau te Taeake a Jaracz i te aronga apiipii o Gileada kia tauturu i te manganui ta ratou ka rauka i ta ratou au angaanga no te akataka anga i ta Iehova akaaerenga na roto i te Tuatua Tapu. No te reira, kua rave aia i te akakitekite anga mataora: Kare e roa atu ana ka takirua te maata o te Apii o Gileada ki te 50 aronga apiipii i roto i te pupu 93! Pera katoa, ka akamata te au pupu Apii Gileada Akatuanga i Tiamani i taua taime rai. Kua roa te maeva anga e kua rongo maataia!

Ei take no te popongi, kua rauka i te 24 aronga apiipii katoatoa o Gileada ta ratou au tiporoma. Kare e roa atu ana ka aere atu ratou ki te 12 au enua tukeke takapini i teianei ao. Kua oronga te pupu i tetai tuku anga ngakau tae tikai, te akameitakianga i te Pupu Akaaere e te ngutuare Betela. I muri ake i te kaikai anga avatea, kua rave te Taeake a Charles J. Rice o te Kumiti Punanga Tiaki Anga o te Au Pama i tetai Apii Punanga Tiaki Anga poto ua. I reira kua rave te au karatuati i tetai porokarama oraora, te akatutu anga i etai o ta ratou au kite anga i rave i te angaanga tutu aere i te tuatau o ta ratou apii e rima marama i Wallkill, New York. I muri ake i te reira, kua oronga te au papuritia o te au putuputuanga e manganui o te reira ngai i tetai nuku Youths Who Remember Their Creator Now (Te Au Mapu Tei Maara i Tei Anga ia Ratou i Teianei).

Ei topiri anga i te porokarama, kua oronga te Taeake a George Gangas, tetai mema o te Pupu Akaaere e 95 ona mataiti, i tetai pure oraora kia Iehova. Kua akaruke te katoatoa ma te au vaerua meitaki, kare ekoko anga kua akakeu tataki taiia kia rave atu i tetai tuanga maata atu ki roto i te angaanga kokoti anga i te ao katoa.

[Pia i te kapi 22]

Te Au Tu o te Pupu

Numero o te au enua tei komonoia: 6

Numero o te au enua tei tonoia: 12

Numero o te aronga apiipii: 24

Numero o te au tokorua akaipoipo: 12

Mataiti averiti: 33.4

Au mataiti averiti i roto i te tuatua mou: 16.13

Au mataiti averiti i roto i te angaanga orometua tamou: 11.3

[Tutu i te kapi 23]

Te 91 Pupu Karatuatianga o te Apii Puka Tapu Punanga Tiaki Anga o Gileada

I te papaanga i raro ake, kua ta numeroia te au pa mei mua ki muri e kua papaia te au ingoa mei te tua kaui ki te katau i te au pa tataki tai.

(1) McDowell, A.; Youngquist, L.; Skokan, B.; Wargnier, N.; Miller, Y.; Muñoz, M. (2) Bales, M.; Perez, D.; Attick, E.; Vainikainen, A.; Mostberg, K. (3) DePriest, D.; DePriest, T.; Perez, R.; Wargnier, J.; Muñoz, J.; Miller, J. (4) McDowell, S.; Bales, D.; Skokan, M.; Attick, C.; Youngquist, W.; Vainikainen, J.; Mostberg, S.