Apii Gileada—E 60 Mataiti o te Terenianga Mitinari
“NO TA matou apii Pipiria pakari, kua akapiri vaitata atu matou kia Iehova e kua apii maata atu no runga i tana akaaerenga. Kua akateateamamao teia ia matou no te oraanga i roto i tetai tukuanga angaanga ke.” Akapera tetai karatuati o te pupu mua i te akatakaanga i tana au apii i rave ei i te Apii Pipiria Punanga Tiaki o Gileada. Mei tona akamataanga mai i te 60 mataiti i topa akenei, i te tuku anga te Apii Gileada i te au mitinari. Ia Mati 8, 2003, kua raveia te karatuatianga o te pupu 114 i ko i te Ngai Apiipii Anga Punanga Tiaki i Patterson, New York. Ko te 6,404 tei akaputuputu mai ki roto i te otitoriamu e tetai au ngai tei kapitiia mai na roto i te satellite kua akarongo marie atu i te porokaramu, tei kapiti mai i te au tuatua, te uiuianga, e te uriurianga a tetai pupu.
Ko Theodore Jaracz, e mema no te Pupu Akaaere, te tiamana. Kua akara tana tuatua akamaataanga ki te tu enua tuketuke o te aronga akarongo, te au manuiri mei Asia, te Caribbean, Marike Rotopu e te Apatonga, e Europa. Te akanooanga i tana tuatua ki runga ia 2 Timoteo 4:5, kua tuatua pakari te Taeake ko Jaracz i te angaanga maata a tetai mitinari tereniia i Gileada—kia “rave i te angaanga a te apii evangelia.” Te akakite ra te au mitinari i te tuatua mou na te apii anga i te Pipiria ki te tangata.
Rauka Mai i te Aronga Apiipii te Ikuikuanga Openga
Te akamata anga i te au akoanga poto ua, kua tuatua a John Larson, e mema no te Kumiti Manga o Marike, no runga i te tumu tuatua akamaroiroi i te akarongo “No Tatou te Atua ra, ka Tika Iaai kia Māro Mai?” (Roma 8:31) Kua akamarama te vaa tuatua i te tumuanga Pipiria no te aronga apiipii kia irinaki tikai ki runga i to Iehova mana i te tauturu ia ratou kia autu i tetai ua atu araianga penei ka aro atu ratou i roto i ta ratou au tukuanga angaanga. Te taangaanga anga ia Roma 8:38, 39, kua ako atu te Taeake ko Larson i te aronga apiipii: “E tapu e e akamanako ana no runga i te mana ta te Atua e taangaanga ra noou, e maara katoa e kare e apinga e rauka i te aati i to Iehova pirianga vaitata kia koe.”
Aru mai i roto i te porokaramu ko Guy Pierce, e mema o te Pupu Akaaere. Kua iki aia i te tumu tuatua “E Akono kia Mataora Toou Nga Mata!” (Luka 10:23) Kua akamarama mai aia e te kapiti maira ki roto i te mataora mou te kite anga ia Iehova e te marama anga i tana akakoroanga mutu kore e pera katoa te kite anga i te tupuanga o te au totou Pipiria. Te ngai e aere ra ratou, ka rauka i te aronga apiipii i te akono i te mataora mou na te akono anga kia mataora to ratou nga mata. Kua akamaroiroi te Taeake ko Pierce i te aronga karatuati kia akamanako oonu i to Iehova tu meitaki e kia akono tamou i to ratou manako e te ngakau ki runga i te rave anga i Tona anoano. (Salamo 77:12) Na te akono anga i te tu papu, ka rauka i te aronga karatuati i te autu i tetai ua atu au manamanata ta ratou ka aro atu.
E oti kua rauka mai i te pupu apii tetai au tuatua akamaroiroianga mei nga tangata ikuiku tei apii ana ia ratou i te au ra. “Te Kimi ra Ainei Koe i te Kaka?” ko te ui anga ia tei uiia e Lawrence Bowen i roto i te upoko tuatua o tana tuatua. E maata te tangata e manako ra i te kaka ma te akapaapaa, te akangateitei, e te akatukeanga ia ratou uaorai. Inara, kua akamata te tata taramo a Asapha i te marama i te kaka tika tikai—te apinganui puapinga maata no tetai pirianga akameitakiia ma Iehova. (Salamo 73:24, 25) Kua akamaroiroiia te aronga apiipii te ka karatuati kia akono i tetai pirianga vaitata ma Iehova na roto i te rave tamou ua atu rai i tetai apii oonu o te Pipiria. Te “arōrō mai [ra te au angera] e akara” i te au mea no runga i te tupuanga o to Iehova akakoroanga na roto ia Karaiti. (1 Petero 1:12) Kua inangaro ratou i te apii i tei rauka ia ratou no runga i to ratou Metua kia rauka ai i te akaata i tona kaka. I reira kua raurau te vaa tuatua i te aronga apiipii kia akakaka ia Iehova i roto i ta ratou tukuanga angaanga mitinari na te tauturuanga i tetai kia kitea te apinganui puapinga maata roa.
Na te retita o te apii, na Wallace Liverance, i taopenga i te akamataanga o te tuanga tuatua ma te tumu tuatua ‘Tuatua i te Tuatua Pakari a te Atua i te Tuatua Ngaro.’ (1 Korinetia 2:7) Eaa oki teia pakari tau i te Atua ta te apotetoro ko Paulo i tuatua i roto i tana angaanga mitinari? Ko ta Iehova ravenga pakari e te ririnui no te akatupu mai i te au e te taokotaianga i te ao katoa e pini ua ake. Te akatumuia ra teia pakari ki runga ia Iesu. Kare i tutu aere i te evangeria o te au manamanata tangata, kua tauturu ra a Paulo i te tangata kia kite e ka akapeea te Atua i te tatara anga i te au tumu no te tupuanga o te ara a Adamu. (Ephesia 3:8, 9) Kua raurau te vaa tuatua i tana aronga e akarongo maira: “E taangaanga i taau akameitakianga o te tavini anga mei ia Paulo rai, tei akara i tana tukuanga angaanga mitinari ei tuatau no te tauturu i te tangata kia kite e ka akapeea a Iehova i te akono anga i tona akakoroanga.”
Aru mai i teia, ko Mark Noumair, tetai tangata ikuiku Gileada, kua akono atu i tetai uriurianga maoraora ma tetai o te aronga apiipii o te pupu. Te tumu tuatua “Apiianga i te Tuatua a te Atua Kua Akatupu i te Au Orometua Maroiroi” te akakite maata ra i ta Paulo tuatua ia Roma 10:10. Kua akakite mai te pupu i tetai au tupuanga i roto i te angaanga koro ta ratou i rekareka ia ratou e aere ra i te apii. Kua akaari mai to ratou au tupuanga e me apii tatou e te akamanako i te Tuatua a te Atua, ka akaki te au mea meitaki no runga i te Atua ko Iehova e tona Patireia i to tatou ngakau e ka kitea ki runga i to tatou ngutu. I to ratou nooanga i reira e rima marama i te Ngai Apiipii Anga Punanga Tiaki, kua akamata te aronga apiipii maata atu i te 30 apii Pipiria i te kainga ma te aronga inangaro ki roto i tetai ngai tei angaanga meitakiia e te au putuputuanga i te pae mai.
Tuatua Mai te Aronga Pakari
Ia ratou e apii ra, kua puapingaia te aronga apiipii mei te taokotaianga ma te au mema o te pamiri Betela Marike. Kua rave nga mema o te Manga ko Robert Ciranko e Robert P. Johnson i te uiui anga ma tetai o te au tavini tiratiratu o Iehova kua roa i te tavini anga, kapiti mai i te au akaaere tutaka e tereniia ra i teianei i te Ngai Apiipii Anga Punanga Tiaki. Ko te katoatoa tei uiuiia e karatuati Gileada tei tavini ana i tetai taime ei mitinari. Kua riro ei akapapuanga ki te aronga apiipii e to ratou au pamiri e te au taeake kia akarongo i te au tuatua pakari mei teia au tangata pae vaerua kite tikai.
Kua kapiti mai ta ratou akoanga: “E akono maroiroi i te ka rauka i roto i te angaanga orometua e ki roto i te putuputuanga.” “Auraka e manako maata ia koe uaorai. E akamanako i toou akakoroanga ei mitinari, e e akariro i te ngai no taau tukuanga angaanga e ko toou kainga.” Te akatutu maira tetai atu au tuatua e ka akapeea te tereni anga i Gileada te akateateamamao anga i tetai orometua no te angaanga meitaki, noatu kua tukunaia aia kiea. Teia etai o te reira: “Kua apii matou i te taokotai e kia angaanga kapipiti.” “Kua tauturu mai te apii ia matou kia ariki i te au peu ou.” “Kua apiiia matou kia taangaanga i te au Tuatua Tapu mei tetai turanga tuke.”
Kua oronga a John E. Barr, e mema roa o te Pupu Akaaere, i te ako maata o te porokaramu. Ko tana tumu Tuatua Tapu koia oki “Kua Tae to Ratou Reo ki te Pa Enua Katoa.” (Roma 10:18) Kua ui aia i te uianga, Kua rauka ainei i te iti tangata o te Atua i te akono i teia akaaoanga i teia tuatau? Ae, tikai! Mei te 1881 mai, kua uiia ki te aronga tatau i te makatini Punanga Tiaki e: “Te tutu aere ainei koe?” I reira kua akamaara te vaa tuatua i te katoatoa i roto i te aronga e akarongo maira i te kapiki anga tuatua enua i te uruoaanga 1922 i Cedar Point, Ohio, U.S.A.: “E Akakite i te Ariki e tona Patireia!” I te openga ra, kua akakeu te maroiroi o te au tavini tiratiratu o te Atua ia ratou kia akakite aere i te au tuatua mou Pipiria ki te pa enua ravarai. Na roto i te pepa neneiia e te tuatua akakite aere, kua taenaia e te tuatua meitaki te au kotinga o te enua ravarai—pouroa ei akangateitei e ei akapaapaa ia Iehova. I te taopenga anga, kua raurau te Taeake ko Barr i te aronga karatuati kia akamaara i to ratou au akameitakianga, i te na ko anga: “I te au ra ravarai, me pure koe kia Iehova i roto i taau tukuanga angaanga, e akameitaki iaia mei toou ngakau atu no taau tuanga i roto i te akatupuanga i te au tuatua, ‘Kua tae ra to ratou reo ki te pa enua katoa.’”
I muri mai i teia tuatua, kua tatauia te au tuatua turou, e kua oronga te tiamana i tetai tiporoma ki te karatuati taki tai. I reira, ma te au manako ngakau rekareka e te mii no te akaruke anga i te apii akaperepereia, kua tatau tetai tei komono i te pupu i tetai akakoroanga ngakau tae ki te Pupu Akaaere e te pamiri Betela, te akakite anga i te tu aruaru o te aronga karatuati kia akameitaki ia Iehova “i teianei, e e tuatau ua atu.”—Salamo 115:18.
Te pure nei matou e ka akatanotano teia aronga karatuati ki to ratou kainga ou e ka rave i te au tauturuanga no te akatere i te angaanga tutuanga i te ao katoa ki mua, mei ta te aronga rai i mua ake ia ratou i rave mai ana no etai 60 mataiti.
[Pia i te kapi 23]
TE AU TU O TE PUPU
[Tutu i te kapi 23]
Numero o te au enua tei komonoia: 12
Numero o te au enua tei tukuia: 16
Numero o te aronga apiipii: 48
Au mataiti avereti: 34.4
Te mataiti avereti i roto i te tuatua mou: 17.6
Au mataiti avereti i roto i te angaanga tamou: 13.5
[Tutu i te kapi 24]
Te 114 Pupu Karatuatianga o te Apii Pipiria Punanga Tiaki o Gileada
I te papaanga i raro ake, kua numeroia te au pa mei mua ki muri, e kua papaia te au ingoa mei te kaui ki te katau i te pa takitai.
(1) Rosa, D.; Garrigolas, J.; Lindström, R.; Pavanello, P.; Tait, N. (2) Van Hout, M.; Donabauer, C.; Martínez, L.; Millar, D.; Festré, Y.; Nutter, S. (3) Martínez, P.; Clarke, L.; Maughan, B.; Fischer, L.; Romo, G.
(4) Romo, R.; Eadie, S.; Tuynman, C.; Campbell, P.; Millar, D.; Rosa, W. (5) Lindström, C.; Garrigolas, J.; Markevich, N.; Lindala, K.; van den Heuvel, J.; Tait, S.; Nutter, P. (6) Maughan, P.; Pavanello, V.; Eadie, N.; West, A.; Clarke, D.; Markevich, J. (7) Fischer, D.; Donabauer, R.; Curry, P.; Curry, Y.; Carfagno, W.; West, M.; Tuynman, A. (8) Van Hout, M.; Campbell, C.; Festré, Y.; Carfagno, C.; van den Heuvel, K.; Lindala, D.