Toou Tuatau ki Mua kua Akanooia Ainei ki Runga i Tei Tuatuaia?

I TE mea e kia ora atu koe i tetai tumatetenga maata, ka manako ainei koe e kua marekaia koe i tei tuatuaia? Me kare ka akameitaki ainei koe i te mea e kua tupu ngoie ua kia koe i te ngai tau e i te taime tau?

Kua tuatua te tangata kite a Solomona e: “E manganui oki toku kite anga i te ao nei e, kare tei te vaevae viviki te emo e emo ei, e kare tei te maroiroi e riro ei te re, e kare tei te aronga pakari te kai, e kare tei te aronga kite meitaki te apinga, e kare tei te karape te kiteia mai; e tuatau ra, e te manuia ua, to te tangata katoa ra.” (Koheleta 9:11) Mei teaa atura te maata me tupu tei tamanako koreia! Kua kino tetai tangata oro tei marekaia, kua re tei reka koreia. Kua tupu tetai tumatetenga kino ki tetai tangata pitiniti tiratiratu e topa akera aia i te pae o te moni, te tukuanga i tei tarere mai kiaia ma te tiratiratu kore ra kia ona. Inara kua tuku ainei a Solomona i teia au tupu anga ki tei tuatuaia? Kare rava. E tu ua teia “e tuatau ra, e te manuia ua, to te tangata katoa ra.”

Kua rave a Iesu Karaiti i tetai akara anga mei teia. Te tuatua anga no runga i tetai rave anga tei kite putuputuia i rotopu i te aronga tei akarongo iaia, kua ui a Iesu: “E nga tangata tino ngauru ma varu, i topaia i te are maata i Siloama ra, e mate iora, e te manako na kotou e, e aronga ara maata ratou i to Ierusalema katoatoa ra?” (Luka 13:4) Kare a Iesu i akaapa ana i teia au kino ki runga i etai mea ngaro tei tuatuaia me kare ki runga i te anoano o te Atua, kare katoa aia i irinaki ana e kua tau te aronga tei mate kia akaapaia i tetai pae. E akara anga ua teia tumatetenga kino no te tuatau e te rave anga kitea koreia e angaanga ra.

Kare e ngai i roto i te Puka Tapu e akatika ra i te manako e kua tamanako takere te Atua i to tatou tuatau e mate ei. Kua tika e te tuatua ra a Koheleta 3:1, 2: “E atianga to te au mea katoa nei, e e tuatau to te au akakoroanga katoa i raro ake i te rangi nei: E tuatau to te anau, e e tuatau to te mate; e tuatau to te tanu, e e tuatau to te kiriti i tei tanumia ra.” Inara te uriuri ua nei a Solomona i te turanga tamou o te oraanga e te mate te tupu ra ki te au tangata tiama kore. Kua anauia mai tatou, e me tae mai te tuatau, me taea te oraanga noa ua nei tei tamanakoia​—te maata anga o te taime i muri ake i te 70 me kare 80 mataiti e te vai atura​—kua mate tatou. E tika, te tuatau tikai o te matenga kare ia i tamanako maataia e te Atua pera katoa te tuatau i manako ei te tangata tanu kai no “te tanu” me kare e “tuatau to te kiriti i tei tanumia ra.”

Te tika, kua akaari a Solomona i muri ake e penei ka mate tetai peretana i mua ake i te tuatau tau, te tuatuaanga: “Auraka e akamaata rava te kino, auraka oki kia nenevaia; eaa oki koe e rapurapu ei i te mate kare i tae ki to tuatau tikai?” (Koheleta 7:17) Eaa te puapinga o teia ako i te mea e kua tamanako takereia ma te taui kore te ra o te matenga? No reira te patoi ra te Puka Tapu i te manako o tei tuatuaia. Te au Iseraela akaruke i te akarongo tei mou i teia apii anga peikani kua akaapa pakariia ratou e te Atua. Te tuatua ra a Isaia 65:11 e: “Ko kotou ra, ko tei akaruke ia Iehova, e kua akangaropoina i toku ra maunga tapu, e kua ārikiriki i te kaingakai na Gada, e kua akaki i te atinga inu na Meni.”

Mei teaa atura te neneva i reira te tuatua e na tei tuatuaia i tupu ei te au tumatetenga e te au manamanata me kare, tei kino rava atu, te akaapa i te Atua uaorai! Te tuatua ra te Puka Tapu “ko te Atua oki te aroa” e te akaapa iaia ei tumu no te au manamanata o te tangata nei te patoi ra ia i teia tuatua tika tikai.​—1 Ioane 4:8.

Ta te Atua Au Akakoro Anga no te Tuatau ki Mua

Akapeea ra to tatou au manakonako anga no te ora? Ko te aite anga ainei e i te mea kare a tei tuatuaia akatere anga i to tatou au oraanga ka aere ua atu ainei tatou ma te puapinga kore? Kare rava, i te tu noa ua nei kua kite te Atua i tei tuatuaia no te tuatau ki mua o te tangata. Te tuatua ra te Puka Tapu no te anga mai anga o “tetai enua ou” te ngai te “vaira te tuatua tika.”​—2 Petero 3:13, NW.

E raukaʼi teia, ka akao takiri mai te Atua ki roto i te au rave anga a te tangata nei. Ma te kite kore, penei e kua pure ana koe no teia kia tupu na te tuatuaanga i te pure te tuatua ra: “Kia tae toou basileia. Kia akonoia toou anoano i te enua nei, mei tei te ao katoa na.” (Mataio 6:10) Teia Patireia e kavamani tika tikai teia tei akatumuia i te au rangi ra. Na te pureanga no te reira kia tae mai, te pure ra koe kia akaaere te Patireia i te enua nei mei ko mai i te au kavamani o teia tuatau.​—Daniela 2:44.

Akatinamouanga i Toou Uaorai Tuatau ki Mua

Akapeea teia au rave anga tukeke te akatuke anga i toou tuatau ki mua, tei runga te reira, kare i tei tuatuaia me kare ki runga i te tuatau e te au rave anga kitea koreia, mari ra ki runga i te kaveinga taau ka iki no te aru atu. E akamaara ana i te tumatetenga i te punanga o Siloama. Kua taangaanga a Iesu i te reira rave anga maromaroa no te apii i tetai apii anga ngateitei tikai. Kare te aronga tei kino ra i ora atu ana i te topa anga te reira punanga. I tetai tua, ka rauka i te aronga akarongo ia Iesu i te kopae atu i te akapou anga te tupu maira mei te akamareka kore anga i te atua. Kua akamatakite a Iesu ia ratou: “Kia kore ra kotou e tataraara, mei te reira katoa ïa to kotou mate.” (Luka 13:4, 5) Te papu ra, ka rauka ia ratou i te kite i to ratou uaorai tuatau ki mua.

Te oronga katoaia maira teia tuatau kia tatou i teia ra​—kia angaanga ma te rave i to tatou uaorai ora. (Philipi 2:12) Te anoano ra te Atua “i te tangata katoatoa . . . kia rauka te kite i te tuatua-mou.” (1 Timoteo 2:4) E noatu e kua iri mai kia tatou tataki tai te tuanga e te au tu, kua oronga mai te Atua i te anoano matara ua​—te tika anga no te manako e akapeea tatou i te inangaro anga i te taangaanga i to tatou oraanga. (Mataio 7:13, 14) Ka rauka ia tatou i te rave i te tika me kare tei tarevake. Ka rauka ia tatou tetai turanga marekaia ma te Atua ko Iehova kia rauka te ora, me kare ka rauka ia tatou i te patoi iaia e te mate atu.

E manganui te iki ra i te noo takake mai mei te Atua. Te akapou ra ratou i to ratou uaorai au oraanga no te aruaru atu i te au mea apinganui, te au mea e navenave ra, me kare kia rongonui. Inara te akamatakite maira a Iesu: “E akono meitaki e e matakite ia kotou i te morimori apinga: e maata ua oki to te tangata nei apinga, kare oki tei taua apinga nona ra tona ora.” (Luka 12:15) Tei runga i reira to tatou oraanga i teaa? Ia 1 Ioane 2:15-17, te akamarama maira te Puka Tapu: “Auraka e anoano i teianei ao, e te au mea ravarai o teianei ao. . . . Ko te au mea ravarai oki o teianei ao, ko te anoano tika kore o te kopapa nei, e te anoano tika kore o te mata nei, e te akatietie o te ora anga nei, kare ïa i to ko mai i te Metua ra, no teianei ao anake ïa. Te ngaro ke nei teianei ao, ma ta to reira katoa e anoano nei: ko tei akono ra i to te Atua ra anoano, e tika ïa i te ora anga e tuatau ua atu.”

Ikianga i te Ora

Akapeea e papu ei ia koe e te rave tikai ra koe i to te Atua anoano? Kua akakite a Iesu: “Teia te aiteanga o te oraanga mutu kore, te tamouanga i te kite ia koe, te Atua mou anake ua, e tei tono maira koe iaia ra, ko Iesu Karaiti.” (Ioane 17:3, NW) Te oronga maira te kite tika tikai no ko mai i te Puka Tapu i te tumu no te akarongo. “Kare ra e akarongo ra kare rava aia e mareka: ko te akamori i te Atua ra, kia akarongo aia e, e Atua e tikai, e koia tei tutaki mai i te aronga i kimi tikai iaia.” (Ebera 11:6) Te kite taau e anoano ra kia rauka te papa ua ra te reira. E mirioni ua atu ta te Au Kite o Iehova i tauturu e raukaʼi teia na roto i tetai apii putuputu i te Puka Tapu.a

E raukaʼi i te akamareka i te Atua, e tau koe kia rave i etai au taui anga. Penei te vaira etai au tu kino te tau ra kia aroia atu me kare te au rave anga tau kore kia akaopeia. Inara auraka e akaruke i te tauta anga no te taui, i te mea e e rauka anga ngata ia koe no te taui. Te manako e kare te au mea e taui e manako ke atu ia no ko mai i te apii anga pikikaa o tei tuatuaia. Ma to Iehova tauturu, ka rauka i tetai ua atu i te ‘maani ua rai i tona manako’ e kia rauka “te tu tangata ou.” (Roma 12:2, NW; Ephesia 4:22-24, NW) Toou au tu tauta no te akamareka i te Atua kare te reira e aere ua ma te kitea koreia. Te vaira aia ma te papa ua no te akameitaki i te aronga e rave ra i tona anoano.

E tikai, te apiianga i te Puka Tapu kare te reira e rapakau i toou au manamanata katoatoa. Ka tupu rai te au tumatetenga e te au turanga kino ki te au tavini ngakau tae o te Atua, mei tetai pae rai. Inara, ka rauka i te Atua i te oronga mai kia tatou i te kite pakari no te autu atu i te au tumatetenga. (Iakobo 1:5) Te vai katoa ra te rekareka o te kiteanga e e pirianga meitaki to tetai ma te Atua. Kua tuatua a Maseli 16:20, “e ao ra tona to tei irinaki kia Iehova.”

I roto i te Parataito te ka akaokiia mai i raro ake i te Patireia o te Atua, kare tatou e manako ma te mataku akaouia e te tuatau e te au rave anga kitea koreia. E tikai, ka takore te Atua i te au mea ravarai te takino ra i te mataora o te tangata i teianei. Kua taputou mai te Puka Tapu “e ka orei aia i te au roimata ravarai mei to [tatou] mata, e kore rava te mate, e kore katoa te mii me kore te aue me kore te mate e te mamae oki.” (Apokalupo 21:4, NW) E maata ua atu te aronga tei mate i te tumatetenga ka kite ratou i tetai tuakaou anga.​—Ioane 5:28, 29.

Ka o atu ainei koe ki roto i teia tuatau ki mua ma te kaka? I mua ua ake ka aere ei te au Iseraela ki roto i te Enua Taputouia, kua akakite a Mose kia ratou: “Kua tuku au i te ora e te mate, i te meitaki e te kino, ki mua ia koe e tenana, ka rave i te ora, kia ora koe e toou katoa uanga.”​—Deuteronomi 30:19, 20.

Kare, e kare tatou i te aronga puapinga kore i raro ake i te akaaerenga a tei tuatuaia ma te akaaroa kore. Toou mataora i te tuatau ki mua, e toou tuatau ki mua ma te ope kore, tei roto ia i taau akaaere anga. Te raurau nei matou ia koe kia iki i te ora.

[Au Tataanga Rikiriki i Raro]

[Tataanga i te kapi 5]

Te au Iseraela akaruke i te akarongo tei mou i teia apii anga peikani kua akaapa pakariia ratou e te Atua