Te Apii ra Ainei te Pipiria i te Irinaki Anga o Tei Tuatuaia?

PIKIKAA! AKAKINO ANGA! Me kite tetai mema akangateiteiia o tetai ngai tangata e kua akakinoia tona ingoa me kore tona tu e tetai ripoti pikikaa, ka inangaro tikai aia i te akatikatika i te au mea. Penei ka rave katoa aia i tei tau ra i te ture no te akatikatika i te aronga tei akatupu ra i te pikikaa.

Koia katoa oki, te irinaki anga i tei tuatuaia e akakino anga tikai ia ki te Atua Mana Katoatoa. Te karanga ra te manako anga e no te Atua te apa no te au tumatetenga e te au manamanata te takinokino ra i te tangata nei. Me te irinaki ra koe ki roto i tei tuatuaia, penei ka akamanako koe e kua akapapa Tei Ngateitei Rava i tetai akapapa anga o te au tupu anga tei tatau mei teia: ‘I teia ra, ka kinokino a John i roto i tetai u motoka, ka paiaia a Fatou e tetai maki mariri, ka takoreia to Mamadou are i roto i tetai uriia’! Ka akakeuia ainei tikai koe kia tavini i tetai Atua mei teia te tu?

‘Inara me kare no te Atua te apa no teia au tupu anga manuia kore, noai i reira?’ ka ui ei te aronga irinaki i tei tuatuaia. Ko Ousmane, te mapu tane tei taikuia i te atikara i mua ake nei, kua manako katoa aia i teia. Inara kare aia i anoanoia kia kimikimi ua me kore kia tamanako ua e kite ei i te tika. Kua apii mai aia e kua akakore te Atua iaia uaorai i teia akakino anga na roto i te au apiianga tei kitea i roto i Tana Tuatua akauruia, koia te Pipiria. (2 Timoteo 3:16) Ka uriuri ana tatou, i reira, i ta te Pipiria e tuatua ra no runga i teia tumu manako.

Koai te ka Akaapaia?

Te au vaipuke, te au uriia, te au ngaruerue enua​—teia au tumatetenga i te maata anga o te taime te kapikiia ra e au angaanga na te Atua. Inara kare te Pipiria i akakite mai e na te Atua i akatupu i teia au tumatetenga. Ka akamanako ana i tetai tumatetenga tei tupu e au anere mataiti i topa i Itinga Rotopu. Te akakite maira te Pipiria okotai anake tangata tei ora mai i teia tumatetenga te ripoti anga: “Kua topa maira te ai a te Atua [e tuatua Epera te aiteanga i te maata anga o te taime e uira] no te rangi mai, ka atura te au mamoe, e te au tavini, e kua pou iora ratou.”​—Iobu 1:16.

Koi manako ei teia tangata mataku ra e penei e na te Atua i tuku mai i te ai, te akaari maira te Pipiria e kare Nona te apa. E tatau ia Iobu 1:7-12 noou uaorai, e ka kite koe e kare na te Atua i akatupu i te uira, mari ra na tona Enemi​—ko te Tiaporo ko Satani! Kare e ko te katoa anga o te au manamanata e e ravenga tikai na Satani. Mari ra, te taka meitaki ra, kare e tumu no te akaapa i te Atua.

Ma te tika tikai, i te maata anga o te taime no te au tangata te apa e tupu ei te au mea tarevake. Te au autu kore anga i te apii, i te ngai angaanga, me kore i roto i te au piri anga tangata penei ka tupu no te ngere o te tauta anga e te terenianga meitaki me kore penei no te ngere o te manako anga a tetai atu. Pera katoa, te au maki, te au tumatetenga, e te au mate penei kua tupu no te tu kite kore. Na te tamou ngoie ua anga i tetai kiri noo anga ia koe e akaoro ra ka akameangiti maata mai ia i to tetai tamate angaia i roto i tetai u motoka. Kare e puapinga o tetai kiri noo anga me te angaanga ra “tei tuatuaia” taui kore ra. Ka tau katoa te akono anga pae rapakau e te tu ma ka akameangiti maata mai i te numero o te au mate vave. Pera katoa etai au tumatetenga tei matau i te akairoia ei “au angaanga na te Atua” ko te tika, e au angaanga anake na te tangata​—te koreromotu anga maromaroa o ta te tangata akono anga i te enua.​—Akaaite ia Apokalupo 11:18.

E “Tuatau e te Tupu Anga Kite Koreia”

E tika, te vaira te au tupu anga maromaroa e manganui tei kore i taka meitaki tikai e na teaa i akatupu. Ka akara ana, i ta te Pipiria e karanga ra ia Koheleta 9:11: “Kua oki mai au no te akara i raro ake i te ra e kare tei te viviki ra te taemoemo anga, e kare katoa tei te aronga maroiroi ra te tamaki anga, kare tei te pakari katoa ra te kai, kare katoa tei te aronga marama ra te apinganui, kare katoa tei te aronga kite ra te mareka anga; no te mea i te au tuatau e te tupu anga kite koreia ka tupu kia ratou ravarai.” (NW) No reira kare e tumu no te irinaki e tei muri ake Tei Anga ra i te au tumatetenga me kore ra te akautungaia ra te au tangata tei tumatetengaia i tetai tu ra.

Kua patoi a Iesu Karaiti uaorai i teia tu manako anga kikino. Te tuatuaanga no runga i tetai tumatetenga tei kiteaia e tona aronga akarongo, kua ui a Iesu: “E nga tangata tino ngauru ma varu, i topaia i te are maata i Siloama ra, e mate iora, e te manako na kotou e, e aronga ara maata ratou i to Ierusalema katoatoa ra? E akakite atu au kia kotou, Kare.” (Luka 13:4, 5) Kua karanga tikai a Iesu i te tumatetenga, e kare i te angaanga na te Atua, mari ra e “tuatau e te tupu anga kitea koreia.”

Te Au Kino o te Tu Ara

Akapeea, ra, te au mate e te au maki akamarama koreia? Te oronga maira te Pipiria i teia akatutu anga titika o te turanga tangata: “Mei te tangata i ope i te mate ia Adamu.” (1 Korinetia 15:22) Kua riro ana te mate ei kino ki te tangata mei te taime mai te takai anga to tatou tupuna ko Adamu i te ara o te akarongo kore. Mei ta te Atua i akamatakite ra, kua akaruke mai a Adamu i tetai koreromotu o te mate ki tana uanga. (Genese 2:17; Roma 5:12) I te openga tikai, i reira, ka rauka te au maki i te takiia atu ki to tatou tupuna noa nei ko Adamu. E maata katoa ta to tatou au ngai paruparu tei iri mai te riro ra ei akamamae ngakau anga e te autu kore anga na tatou i roto i te oraanga.​—Salamo 51:5.

Ka tamanako ana i te manamanata o te putaua. Te irinaki anga ki roto i tei tuatuaia i te maata anga o te taime kua akamaroiroi i te aronga tei mamae ra kia noo ua ratou uaorai ki roto i to ratou turanga ngata. ‘Ko to matou openga teia,’ i irinaki ei ratou. Inara, te akaari maira te Pipiria, e ko te tu ara o te tangata, kare tei tuatuaia, tei tau kia akaapaia. Ka riro mai etai pae ei aronga putaua me ‘kokoti ratou i ta ratou i ruru ra’ na roto i te tu kope me kore te kite kore i te akono i te au apinga. (Galatia 6:7; Maseli 6:10, 11) E au mirioni ua atu te noo ra i roto i te putaua no te mea te takinoia ra ratou e te au tangata noinoi i te ngai teitei. (Akaaite ia Iakobo 2:6.) “Te tutara ra tetai tangata ki rungao i tetai, ei mate nona uaorai,” i na te Pipiria ei. (Koheleta 8:9) Kare e akakite anga tika e vaira no te tuku i te apa o te au putaua katoatoa ki runga i te Atua me kore ki runga i tei tuatuaia.

Te Irinaki Anga ki Roto i Tei Tuatuaia​—Tona Au Tu Kino Ra

Ko tetai atu ra taumaro anga raurau no te patoi i te irinaki anga ki roto i tei tuatuaia ko ta te irinaki anga tei tuatuaia ka akatupu ki rungao i te aronga irinaki. Kua karanga a Iesu Karaiti: “E ua mai te au rakau meitaki katoa i te ua meitaki; e te au rakau kikino ra, e ua mai ïa i te ua kino.” (Mataio 7:17) Ka uriuri ana tatou i tetai “ua” o te irinaki anga o tei tuatuaia​—akapeea te reira i te akakeu anga i te manako apainga o tetai tangata.

E mea puapinga te manako anga tau meitaki o ta tetai uaorai apainga. Ko tetai ia o te au mea te akakeu ra i te au metua kia akono i to ratou au pamiri, te aronga angaanga kia rave i ta ratou au angaanga ma te mako meitaki, te aronga maani apinga kia maani i tetai apinga meitaki tikai. Penei na te irinaki anga ki roto i tei tuatuaia e akakore i te reira manako anga apainga. Ei akaraanga, ka akamanako ana e ngai kinokino tetai i te ngai akatika anga motoka o tetai tangata. Me e manako anga apainga tona ka tiki aia i te reira kia maaniia te manata anga i tona uaorai oraanga e te au oraanga o tana au patete. I tetai tua, ko tei irinaki ra i tei tuatuaia, penei ka kopae aia i te manako anga i te tumatetenga ka tupu, te manakoanga e ka tupu anake ua tetai tumatetenga me koia ia ‘to te Atua anoano’!

Ae, te irinaki anga ki roto i tei tuatuaia ka akamaata ngoie ua i te tu marikonga kore, te tu kope, te autu kore anga i te ariki i te apainga no te au rave anga a tetai uaorai, e tetai atu au tu tau kore.

E Arai Anga ki to Tatou Pirianga ki te Atua?

Tei kino rava atu, ka riro te irinaki anga o tei tuatuaia ei takino i to tetai manako anga apainga, me kore tuatua apainga, ki mua i te Atua. (Koheleta 12:13) Te raurau ra te tata taramo i te au tangata ravarai “ka tongi ana kia kite i te meitaki o Iehova.” (Salamo 34:8) Te akanoo ra te Atua i te au umuumu anga papu no te aronga te ka rekareka i tona tu meitaki.​—Salamo 15:1-5.

Ko tetai umuumu anga koia ko te tataraara anga. (Angaanga 3:19; 17:30) Te o maira te akatikaanga i to tatou au tarevake e te raveanga i te au taui anga tei anoanoia. Ei au tangata apa ua, e maata ta tatou ravarai e rave ra i anoanoiaʼi tatou kia tataraara. Inara me te irinaki ra tetai tangata e e tangata aia tei tupu tei tuatuaia kiaia ra, e mea ngata i te manako i tetai anoano no te tataraara me kore te ariki i te apainga no tana au tarevake.

I karangaʼi te tata taramo no runga i te Atua: “E meitaki maata oki tei to takinga-meitaki i tei te ora.” (Salamo 63:3) Inara, kua riro te irinaki anga i tei tuatuaia ei akapapu i te au mirioni e ko te Atua ra te tumu i to ratou mamae. Ma te tau ra, kua riro teia ei akamakitakita anga na te manganui iaia, te topirianga i te ngutupa ki to ratou raukaanga tetai pirianga vaitata tikai ki Tei Anga ra. Mei tera te tu, akapeea koe te manako anga i te aroa no taau i manako ra e te akatupu ra i toou au manamanata e te au timata anga katoatoa? No reira te akatu ra te irinaki anga o tei tuatuaia i tetai arai anga i rotopu i te Atua e te tangata.

Akarangatiraia Mei te Takinokino Anga o Tei Tuatuaia

Ko Ousmane mapu ra, tei taikuia atu i te akamata anga, i vai ana aia ki raro ake i te irinaki anga o tei tuatuaia. Inara, i te tauturu anga te Au Kite o Iehova iaia kia akara matatio i tona manakoanga na roto i te marama anga i te Pipiria, kua akakeuia a Ousmane kia akaruke i tona irinaki anga ki roto i tei tuatuaia. Kua riro mai te au tupu anga ei akamaru anga oonu e ei akara anga ou e te papu i te oraanga. Tei puapinga atu, kua kite mai aia ia Iehova ei Atua “takinga-meitaki, e te aroa ua, e te akakoromaki maata, e te meitaki maata, e te tuatua-mou.”​—Exodo 34:6.

Kua kite katoa mai a Ousmane no runga i te Atua, e noatu kare aia e parani ana i te au mea ravarai i to tatou oraanga, e e akakoro anga tana no te tuatua ki mua.a I karangaʼi a 2 Petero 3:13: “Te tatari nei ra tatou i te rangi ou e te enua ou tana i tuatua maira, i te vai tika anga o te tuatua-tika.” E au mirioni ua atu ta te Au Kite o Iehova i tauturu no te tatanu i te manakonakoanga o te nooanga e tuatau ua atu ei tuanga o teia “enua ou” tei taputouia. Ka inangaro katoa ratou i te tauturu ia koe.

Ia koe e tupu ra i roto i te kite tika tikai o te Pipiria, ka ariki i reira koe e kare toou tuatau ki mua i akatakaia ki runga i etai mea tei tuatuaia e tei tamanakoia tei kore ra e rauka ia koe i te akatere. Te tau ra te au tuatua a Mose ki te au Iseraela taito: “Kua tuku au i te ora e te mate, i te meitaki e te kino, ki mua ia koe: e tenana, ka rave i te ora, kia ora koe e toou katoa uanga: Kia inangaro oki koe i to Atua ra ia Iehova, e kia akarongo koe i tona reo, e kia piri atu koe kiaia.” (Deuteronomi 30:19, 20) Ae, e tuatua anga taau i roto i toou tuatau ki mua. Kare i roto i te au rima o tei tuatuaia.

[Tataanga Rikiriki i Raro]

[Au Tutu i te kapi 6, 7]

Kare teia au tumatetenga i te ‘au angaanga na te Atua’

[Au Akameitakianga]

U.S. Coast Guard photo

WHO

UN PHOTO 186208/M. Grafman