Ripoti a te Aronga Tutu Patireia

Tutu Aere ma te Akapapa Kore te Au Kite o Iehova ma te Akaotianga Meitaki

E MANGANUI te tangata tei kite i mua ana te tuatua mou Puka Tapu na tetai Au Kite o Iehova i tutu aere kia ratou ma te akapapa koreia. Na roto i teia, kua aru te Au Kite i to Iesu Karaiti akatauanga, koia tei tutu aere ma te akapapa koreia ki te vaine Samaria tei aere maira ki te ruavai i te tiki vai. (Ioane, pene 4) I te Pae Itinga Ra o Aperika, kua tutu aere ma te akapapa kore tetai Kite o Iehova ki tetai paretenia Katorika. Na te opati manga o te Totaiete Punanga Tiaki i akakite maira te akaotianga:

◻ Na tona aere anga ki te taoni i tetai popongi roa, kua aravei te Kite i tetai paretenia Katorika. Kua apai aia i te tuatau no te ui ki te paretenia e: “Ka aere koe ki ea i teia nei taime o te ra?” Kua pau maira: “Ka aere au ka pure ki toku Atua.” Kua ui atu aia ki te paretenia e: “Kua kite ainei koe i te ingoa o toou Atua?” “Kare ainei tona ingoa e ko te Atua?” te pau maira te paretenia. Kua patiia atu e te Kite kia aere ki tona kainga i te reira avatea e ka uriuri manako no te ingoa o te Atua. I muri ake i te tuatuaanga kua aere atu te paretenia ki te are pure e kua ui aia ki tetai orometua me kua kite aia i te aiteanga o “Iehova.” Kua pau maira, “Ko te ingoa ia o te Atua ra.” Kua poitirere tikai te paretenia i te akarongo anga e kua kite takere te orometua i teia inara kare aia i apii ana te reira ki aia.

Kua atoro te Kite i teia vaine no e iva ra tataki tai e kua apii iaia te tuatua mou no runga i te Toru Tai, te meta, te ai i era, e te manakonakoanga no tei mate. Kua apai aia i teia au apinga katoatoa e kua patiia te Kite kia oronga ki aia i tetai tuatau no te akara akaou i teia au apiianga ou. I tetai nga epetoma e rua i topa akenei kua aravei akaou aia i te Kite e kua pati akaou i tetai uriuri anga tuatua. I te reira taime rai kua papu takere i te paretenia tona manako na te akaruke anga i te akonoanga e kua akamata takere i aia i te akapou i tona au tiki, ei meterio, e te koroti. Kua tamata te orometua kia taui aia i tona manako e kia oki mai, inara kua papu tikai iaia kia aruaru i te tuatua mou. I muri mai kua papetitoia aia e te tavini nei i te au marama e manganui ei painia tauturu tamou e noatu rai e e paruparu tona turanga e te ruaine.

Noatu e are maatamaata tona, kua oronga atu aia ki te putuputuanga kia taangaangaia ei Are Uipaanga Patireia. Kua tapoki akaouia e te au taeake te punu are, e kua takore ia te au patu i roto, e kua maaniia tetai tuanga maata o te are ei ngai uipaanga manea. Te noo ra teia paretenia Katorika o mua ana ki tetai pia i muri ake i te are uipaanga. Kua mataora tikai aia no tei rauka teia tauturu anga ki te akamori anga a Iehova.

◻ Kua akaari mai tetai kite anga i te pakari o te tutu aere anga ma te akapapa koreia no ko mai ia Kampala, Ukanata. Na te aere anga ki tetai opati o te kavamani, kua tuatua ma te akapapa koreia tetai Kite angaanga evangeria kia ratou i roto i te pia tere. Ko tetai tangata ko L​——​——, kua akaari mai i tetai inangaro i te ariki te au puka inara kare e rauka iaia no te apai i te reira taime. Tera ra kua oronga aia ki te tangata angaanga evangeria i tona ingoa e te ngai o tona opati. I muri mai kua aere te tangata angaanga evangeria ki reira e kua uiia atu te tangata ko L​——​——. Kua kapikiia atu aia kua poitirere te tangata angaanga evangeria no te kite anga e tangata ke teia. E rua nga tangata e aiteite to raua ingoa e angaanga ra i te reira opati. Te orongaia ra tetai manga akakitekite anga ki te rua o te tangata ko L​——​——, e kua akaari aia i te tu inangaro tikai. Ko te tangata mua ko L​——​—— kua ngaro tona inangaro, inara kua akamata te rua o te tangata ko L​——​—— i te apii te Puka Tapu. I teia nei koia tetai Kite papetitoia, ko tana vaine e te tamaiti te tupu ra ma te meitaki e tere roa atu ki te papetito anga.

Ko Iesu Karaiti te Tiaki Mamoe meitaki e kua kite aia i te tu o te mamoe e to ratou ngakau tei opara ia ki te tuatua tika. Te akaari maira teia au akakitekite anga e, koia te akaaere i tana au pipi ki teia aronga ra. Ka riro te tutu aerenga ma te akapapa koreia ei mea uua tikai!​—Ioane 10:14.