Te Tupu ra Ainei Rai te Au Rapakau Anga Temeio?

“E ARIKI ia Iesu kia rapakauia!” Kua riro te au tuatua mei teia ei arataki ia Alexandre, e mema o tetai akonoanga Evangeria, kia irinaki e na te kai anga i te vairakau no tona maki ka akakite mai ia i tetai ngere anga akarongo. Kua papu iaia e na tona akarongo anake e apai mai i te rapakau anga temeio tana i anoano ra. Kua akakeu oonuia a Benedita, e Katorika tae tikai i tona rongo anga no runga i te au rapakauanga temeio i roto i te ngai tapu o te Aparecida do Norte, i roto i te teite o São Paulo, i Paratiri. Te taangaanga anga i tetai au tuatua manamana ta tona aniti i apii iaia, kua pure a Benedita ki to Tatou Vaine o te Aparecida, ko Anthony, e tetai atu “au tainiti” no te mana ei rapakau i tei maki.

Tei kiteaia, i te openga katoa tikai o te 20 anere mataiti, e manganui te au tangata tei irinaki rai i te au rapakau anga temeio​—inara eaa ra? Te akara anga, te riri ra etai pae me kare e rauka i te au taote i te rave maata atu no te akamaru i te au maki, te mamae, e te mamaeanga o ta ratou aronga akaperepereia, te tamariki tikai. Te aronga tei mamae i te au maki kino penei ka manako e no te maata o te moni no te vairakau o teia tuatau, kare e kino e tupu kia ratou na te kimianga i te rapakauanga akarongo. Te kite ra etai pae i runga i te tivi te au akonoanga e te au tangata tataki tai tukeke te orongaanga i te au rapakau anga no te AIDS, te taitaia, te kaneta, te maki neneva, te toto kake, e tetai atu au maki e manganui. Noatu e akarongo to ratou i teia au mea e me kare, penei ka aere atu ratou ki teia ei tauturu anga openga. Noatu rai ra tetai pae tei irinaki e kua akatupuia to ratou maki e te au vaerua kino penei ka manako e te ngere ra te au vairakau matauia i te mana no te tauturu ia ratou.

I tetai tua, te vaira te aronga tei patoi pakari, pera katoa tei akaapa, te manako o te au rapakau anga temeio a te “au tainiti” tei mate me kore te aronga rapakau e ora ra. Kia tau ki te Jornal da Tarde, te karanga ra te immunologist ko Dráusio Varella e te riro ra te irinaki anga “ei aviri i te akarongo o te aronga kite kore e tei anoano tikai ra.” Kua tuatua katoa aia: “Na te manakoanga i te au temeio, penei e manganui ka akaruke i te rapakau anga vairakau tikai no teia au akavare anga.” E kua akataka The New Encyclopædia Britannica e: “Te au rapakauanga kare i matauia kua akapiriia kite au ngai tapu e te au peu akonoanga, e ka inangaro te ravenga taineti vairakau i te tuku i taua au tu rapakauanga katoatoa ki te ravenga matauia o te akakeu anga i te tu te angaanga anga i raro ake i te au turanga tau.” Noatu rai, te vaira e manganui te irinaki ra e kua rapakau tikaiia ratou e tetai temeio. Kia ratou, kua angaanga meitaki te rapakauanga!

Te aronga tei matau i te Pipiria kua kite e kua rapakau a Iesu Karaiti i te maki i te au ati anga e manganui, te rave anga i teia na te “mana maata o te Atua.” (Luka 9:42, 43) No reira penei ka manako ratou, ‘Te angaanga ra ainei rai te mana o te Atua e te akatupu ra i te au rapakauanga temeio i teia tuatau?’ Me koia ia, eaa te au titau anga no te rapakau i autu kore ei i te apai mai i te au tupu anga tei taputouia? Ko te mea ainei kare e rava ana te akarongo me kore ra kare tana moni tauturu e rava maata ana? E mea tau ainei no tetai Kerititiano kia kimi i tetai rapakau anga temeio me te mamae ra aia i tetai maki mamae tikai me kore maki rapakau koreia? Ka tupu akaou ainei te au rapakau anga temeio autu mei ta Iesu i rave? Ka kitea e koe te au pauanga ki teia au uianga puapinga i roto i te atikara ka aru mai.