Eaa ka Matakite ei i te Akamori Itoro?

“Au tamariki rikiriki, e paruru ia kotou uaorai i te au itoro ra.”​—1 IOANE 5:21, NW.

1. Eaa ra te akamori anga o Iehova ka atea takiri mai i te akamori anga itoro?

KARE a Iehova i te itoro auri, rakau, me kare e toka. Kare aia e o ki roto i tetai iero i te enua nei. I te mea ko ia te Vaerua mana katoatoa, akara koreia e te au tangata, kare e rauka i te maani i tetai tiki nona. E no reira, ka tau te akamori ma ia Iehova kia atea takiri mai i te akamori anga itoro ra.​—Exodo 33:20; Angaanga 17:24; 2 Korinetia 3:17.

2. Eaa te au uianga te tau kia akamanakoia e tatou nei?

² Me ko koe tetai te akamori ra ia Iehova, ka tau koe kia ui e, ‘Eaa te akamori itoro? Akapeea i raukai i te au tavini o Iehova ra i te kopae ke i te reira i te tuatau kua topa ra? E eaa ka paruru atu ei i te akamori itoro i teia tuatau?’

Eaa te Akamori Itoro

3, 4. Akapeea te akataka anga i te akamori itoro?

³ Ko te mea matauia, te akamori itoro te kapiti ra i tetai tu oroa me kare karakia. Te akamori itoro e akatapu anga, e inangaro, akamori anga, me kare e akangateitei anga i tetai itoro. Eaa ra te itoro? E tiki ia, e akatutu anga no tetai apinga, me kare e tutu, no tetai apinga akamoriia. E putuputu te takiia atu te akamori anga itoro ki tetai mana teitei tika tikai me kare e mana manako uaia e i vai ana (e tangata, e manu, me kare e akaaerenga). Inara ka rauka katoa te ravenga akamori anga itoro i etai apinga kare e ora anga (tetai mana me kore tetai apinga ora kore o te reira tu).

⁴ I roto i te Au Tuatua Tapu, e putuputu te au tuatua Epera i te taiku ketaketa mai i te au itoro ei mea puapinga kore anake, me kare e au tuatua akakino. I roto i teia e au tuatua tei uriia ra e e au “tiki taraiia i te rakau me kare i te toka” (tikaanga, e apinga taraiia); “e tiki, me kare itoro angaia i te karakaraea” (apinga tiriia me kare riringiia ki vao); e “itoro akamataku”; “itoro puapinga kore” (tikaanga, puapinga kore ua); e te “itoro rikarika ra.” Te tuatua Ereni eiʹdo·lon kua uriia e “itoro.”

5. Eaa ra i raukai kia tuatuaia e kare te au tiki ravarai i te au itoro?

⁵ Kare te au tiki katoatoa i te au itoro. Na te Atua uaorai i akaue to Iseraela kia maani e rua nga kerupi auro no te aruna o te koreromotu e kia akairoiro i etai au tutu no te reira au mea ora vaerua ra ki runga i te tapoki o roto o te tai ngauru kakau no te puakapa e ki runga i te arai te akataka ke ra i te ngai Tapu mei te ngai Tapu Roa. (Exodo 25:1, 18; 26:1, 31-33) Ko te kautaunga angaanga anake i reira tei kite i taua au tutu ra tei riro ra ei akatutu anga no te au kerupi i te rangi ra. (Akaaiteia atu kia Ebera 9:24, 25.) E mea papu e kare taua au tutu kerupi i te puakapa i manakoia ei apinga akamoriia, no te mea kare te au angera tuatua tika uaorai i akatika kia akamoriia ratou ra.​—Kolosa 2:18; Apokalupo 19:10; 22:8, 9.

To Iehova Manako no te Akamori Itoro

6. Eaa to Iehova manako no runga i te akamori anga itoro?

⁶ Ka matakite te au tavini o Iehova i te akamori itoro no te mea kare aia e akatika i te au ravenga akamori itoro ravarai. Kua akaue te Atua i to Iseraela e auraka e rapa i te au tiki ei apinga akatapuia e ka akamori atu ia ratou. I roto i te Ture Ngauru ka kitea teia au tuatua: “Auraka rava koe e rapa i te idolo akatikitikiia noou, e te tu no tetai mea i runga i te rangi ra, e no tetai mea i raro i te enua nei, e no tetai mea o te moana i raro ake i te enua ra: Auraka rave koe e tupou ki raro ia ratou, auraka oki e akamori atu ia ratou; e Atua vareae oki au ko te Atua noou nei ko Iehova, i te tutaki anga i te ara a te aronga metua ki runga i te tamariki, e tae ua atu ki te toru e te a o te uki, kia kore ratou e inangaro mai iaku ra; E te aroa anga atu i te aronga i inangaro mai iaku, e kua akono i taku au akauenga, e tausani ua atu.”​—Exodo 20:4-6.

7. Eaa ra a Iehova i patoi ei i te au akamori itoro ravarai?

⁷ Eaa ra a Iehova i patoi ei i te au akamorianga itoro katoatoa? Te tumu maata no te mea te inangaro maira aia i te akamori anga tika tikai nona anake ua, mei tei akakiteia maira i runga akenei i te rua o te Ture Ngauru ra. Pera katoa oki kua tuatua mai aia na roto i tana peroveta ia Isaia: “Ko au ko Iehova; ko toku ïa ingoa; kare au e oronga i toku ra kakā no tetai ke, e te akameitaki iaku ra no te au idolo akatikitikiia ra.” (Isaia 42:8) I tetai tuatau, kua ereere maataia to Iseraela ki te akamori anga itoro e “kua apai ratou i ta ratou au tamariki tamaroa e ta ratou au tamaine na te au demoni” ei atinga. (Salamo 106:36, 37) Kare e e akakore anake ta te aronga akamori itoro ia Iehova ra e ko ia te Atua mou mari ra kua rave katoa ratou ei tavini atu i te au mea manakoia e tona Enemi maata, koia a Satani, kapiti katoa ma te au temoni ra.

Tiratiratu i Raro Ake i te Timata Anga

8. Eaa te timata anga tei aroia atura e nga Epera e toru koia a Sadaraka, a Meseka, e Abedenego?

⁸ Na te tiratiratu katoa oki kia Iehova ra e akamatakite ia tatou i te akamori anga itoro ra. Te akatutuia maira te reira i te tupu anga tei tataia ra ia Daniela pene 3. Ei akatapu anga i tetai tiki auro maatamaata tana i akatu ra, kua akaputu mai te ariki o Babulonia ko Nebukanesa i te aronga mana taoonga katoa o tona patireia. Kua kapiti katoaia a Sadaraka, a Meseka, e Abedenego i taua ikuiku anga ra​—e toru Epera e aronga akaaere i rungao i te matakeinanga o Babulonia ra. Kua patiia te katoatoa i reira ra kia tipapa ki mua i te tiki ra i te tangi anga mai te au apinga akatangiia ra. E tauta anga teia na te atua tikai o Babulonia ra, koia a Satani, kia tipapa atu teia nga Epera e toru ra ki mua i te tiki tei akatutu maira i te Patireia o Babulonia. E tamanako ana e ko koe tetai i reira.

9, 10. (a) Eaa te turanga i akonoia e nga Epera e toru ra, e i akapeea to ratou tutaki angaia? (e) Eaa te akamaroiroi anga te ka rauka mai i te Au Kite o Iehova no tei raveia e nga Epera e toru ra?

⁹ I na! Te tu ra nga Epera e toru. Kua akamanako ratou i te ture a te Atua e auraka e anga e e tavini oki i te au itoro me kare au tiki rapaia ra. E kua tuku atura a Nebukanesa i tetai ikianga​—e tipapa ki raro me kare e mate! Inara no te tu tiratiratu kia Iehova, kua karanga atu ratou: “I na, e tika i to matou Atua, ta matou e akamori nei, i te akaora ia matou i te umu ai kakā ra: e nana rai matou e akaora i to rima, e te ariki. Kore oti ra, kare rai matou e araara i toou ra au atua, kia kite mai koe, e te ariki, kare oki e akamori i te tiki auro i akatuia e koe ra.”​—Daniela 3:16-18.

¹⁰ Kua titiriia aua nga tavini tiratiratu o te Atua ra ki roto i taua umu ai kaka maata ra. No te poitirere i te kite anga e a katoa nga tangata te aaere ra i roto i te umu ai, kua kapiki atura a Nebukanesa i nga Epera e toru kia aere mai ki vao, e kua aere maira ratou ki vao kare i kino. I reira kua na ko akera te ariki: “Kia akameitakiia te Atua no Sadaraka, no Meseka, e no Abede-nego, ko tei tono mai i tana angela, e kua akaora i ona puke tavini i irinaki iaia ra, e kua akatu ke akenei i ta te ariki ra tuatua, e kua oronga ua mai i to ratou kopapa kia kore ratou e araara, kia kore oki e akamori i tetai atua ke, mari ra ko to ratou uaorai Atua. . . . No te mea kare atu atua e tikaʼi kia akaora mei teianei te tu.” (Daniela 3:28, 29) Kua oronga mai te tu tamouanga tiratiratu o aua nga Epera e toru ra i te akamaroiroi anga no to Iehova ra Au Kite i teia tuatau nei kia tiratiratu katoa oki ki te Atua, kia tamou i te tu neutara ki to teianei ao, e kia akakore i te akamori anga itoro ra.​—Ioane 17:16.

Kua Ruti te Au Itoro i te Akavaanga

11, 12. (a) Eaa te tataanga no runga ia Iehova e te au atua itoro ra tei raveia e Isaia? (e) I akapeea te turanga o te au itoro o to te au pa enua ra i te akaaoanga na Iehova ra?

¹¹ Ko tetai atu tumu no te matakite i te akamori itoro no te puapinga kore ua te akangateitei anga i te au itoro ra. Noatu rai e te akaraanga ora ra etai au itoro maaniia e te tangata nei—​e putuputu e e vaa to ratou, e mata, e nga taringa​—kare ratou e tuatua, e kite, me kare e akarongo, e kare a ratou apinga e rave no te aronga akamori ia ratou. (Salamo 135:15-18) Kua akakiteia mai teia i te varu o te anere mataiti M.T.N., i te tata anga te peroveta a te Atua i Isaia 43:8-28 e eaa ia, ko tetai akavaanga i rotopu ia Iehova e te au atua itoro ra. I roto i reira ko te au tangata o te Atua ko Iseraela i tetai pae, e ko te au pa enua o teianei ao i tetai pae. Kua akaao atura a Iehova i te au atua pikikaa o to te au pa enua kia akakite mai “i te au mea taito” kia totou tika mai. Kare i rauka i tetai i o ratou ra i te rave. Kua anga atura ki tona au tangata, kua na ko atura a Iehova: “Ko kotou toku kite . . . ko au te Atua.” Kare i rauka i to te au pa enua i te akapapu e i vai ana to ratou au atua i mua ake ia Iehova e me kare ka rauka ia ratou i te totou. Inara kua totouia e Iehova te akatanea angaia a Babulonia e te tatara mai anga i tona au tangata tei tuikaaia ra.

¹² Ka tuatua to te Atua ra tavini tei akaoraia ra tei akatakaia ra ia Isaia 44:1-8, e “no Iehova” ratou. Nana uaorai i karanga e: “Ko au te muatangana, e ko au oki te akaopenga; e kare atu Atua mari ra ko au.” Kare e tuatua patoi anga mei ko mai i te au atua itoro ra. “Ko kotou rai toku kite,” ta Iehova i tuatua akaou no tona au tangata, ma te tuatua kapiti atu: “Te taka atura ainei te Atua mari ra ko au? kare rava atu oki e mato ke.”

13. Eaa ta te akonoanga akamori itoro i akakite mai no runga i te tangata akamori itoro ra?

¹³ Te matakite katoa ra tatou i te akamori itoro no te mea na te raveanga i te reira te akakite ra i te ngere i te pakari. I tetai potonga o te rakau ka iki aia, ka maani te tangata akamori itoro i tetai atua ei akamori anga, e ko tetai atu potonga o taua rakau ra ka tutungi aia i tetai ai ei tunu i tana manga. (Isaia 44:9-17) E neneva tikai ia! Ka akama katoa oki te tangata maani e te akamori i te au atua itoro no te kore e rauka iaia i te akakite papu i to ratou ra atua anga. Inara ko to Iehova ra Atua anga kare e ekokoanga, no te mea kare e kua totou anake aia i te mataraanga tona au tangata mei Babulonia mari ra kua akatupu katoa oki aia i te reira. Kua tangata akaouia a Ierusalema, kua patu akaouia te au oire o Iuda, e kua maro atu to Babulonia “moana”​—koia te Kauvai o Eupharati—​tei paruru ia ratou ra. (Isaia 44:18-27) Mei ta te Atua katoa i totou maira, kua autu a Kuro o Peresia ra ki runga ia Babulonia.​—Isaia 44:28–​45:6.

14. I roto i te Akavaanga Teitei o te Ao Katoa e Pini Ua Ake, eaa te ka akapapu mutu koreia?

¹⁴ Kua ruti te au atua itoro ra i ta ratou oroanga i te ture no runga i te atua anga. E ko tei tupu kia Babulonia e mea papu ka tupu katoa ki tona akatutu anga, koia a Babulonia Maata, te patireia akonoanga pikikaa ra. Ko ia ma tona au atua katoatoa, te apinga akonoanga pikikaa ra, e te au apinga akamori itoro kare e roa atu ka ngaro ke atu e tuatau ua atu. (Apokalupo 17:12–​18:8) I taua Akavaanga Teitei Rava o te Ao Katoa e Pini Ua Ake, ka akapapu mutu koreia e ko Iehova anake ua te Atua mou e te ora e ka akatupu aia i tana Tuatua i totou ra.

Au Atinga ki te Au Temoni

15. Eaa tei akakiteia mai e te vaerua tapu e te pupu akaaere katoa oki no runga i te au tangata o Iehova e te akamori anga itoro ra?

¹⁵ Te matakite katoa ra to Iehova au tangata i te akamori itoro no te mea te aratakiia ra ratou e te vaerua o te Atua ma tana akaaerenga oki. Kua akakite atu te pupu akaaere o te au tavini o Iehova i anere mataiti mua ra ki to ratou au oa Kerititiano e: “E mea meitaki i te Vaerua Tapu e ia matou katoa nei oki, auraka rava ei teimaa ke e tukuia atu ki rungao ia kotou, mari ra ko teianei au mea tika; Auraka kotou e kai i te manga i apaiia na te au idolo ra, e te toto, e te mea kukumi uaia ra, auraka oki e akaturi: kia akaruke kotou i te reira, e meitaki ïa kotou. Kia ora na kotou”!​—Angaanga 15:28, 29.

16. Na roto i taau uaorai au tuatua, akapeea koe me akataka i ta Paulo i tuatua ra no te au apinga akaatingaia ki te au itoro ra?

¹⁶ Ko tetai atu tumu no te matakite i te akamori itoro kia kopae ke atu i te angaanga temoni. No runga i te Oroa Aiai a te Atu ra, kua tuatua te apotetoro ko Paulo ki te au Kerititiano o Korinetia e: “E rere ke atu i te araara idolo. . . . Te kapu no te meitaki ta tatou e akameitaki nei, kare aina i te kapiti katoa anga i te toto o te Mesia nei? Te manga ta tatou e atiati nei, kare aina i te kapiti anga i te kopapa o te Mesia nei? No te mea okotai rai manga, ko tatou ravarai e manganui, okotai rai ïa kopapa: te kai katoatoa nei oki tatou i taua manga okotai ra. I na oki Iseraela i te akonoanga i te kopapa nei: kare aina te aronga i kai i te atinga, i te aronga i rave katoa i to te atarau ra? E teianei, te karanga nei aina au e, e mea tika te idolo? e e mea mou te atinga a te idolo ra? Kare, teia ra taku tuatua, ta te etene i akaatinga ra, i akaatinga ïa na te au demoni, kare na te Atua: kare oki au i inangaro e kia kapiti katoa kotou i te akamori demoni. Kare e tika ia kotou kia inu i te kapu a te Atu, e te kapu a te au demoni: kare e tika ia kotou kia kai i te kaingakai a te Atu ra, e te kaingakai a te au demoni. Te akakoko nei tatou i te Atu kia riri? e maata aina to tatou maroiroi i tona?”​—1 Korinetia 10:14-22.

17. I te anere mataiti mua o te T.N., eaa te au turanga e raukai i te Kerititiano kia kai i te kiko manu tei akaatingaia ra ki te au itoro, e no teaa ra?

¹⁷ Kua tuku atingaia tetai tuanga o te manu na tetai itoro, ko tetai tuanga na te kautaunga ra, e kua peke tetai tuanga ei umukai na te tangata akamori ra. Inara, penei ko tetai tuanga o te kiko ka okoia i te makete. Kare i te mea tau no tetai Kerititiano kia aere atu ki te iero itoro ra kia kai i te kiko noatu rai e kare aia i kai ei raveanga peu, no te mea penei ka turoriia tetai ke ra me kare ka taki atu iaia ki te akamori anga pikikaa. (1 Korinetia 8:1-13; Apokalupo 2:12, 14, 18, 20) Kare te oronga anga i te manu ki tetai itoro e taui i tona kiko, e no reira ka rauka ua i tetai Kerititiano te oko i tetai tuanga nana i te makete ra. Kare katoa oki e umuumuia kia ui aia e noea mai te kiko manu tei kaikaiia i tetai ngutuare i kai aia i reira ra. Inara me ka tuatua atu tetai e “e atinga apai teia,” kare aia e kai i te reira, kia kore e turoriia tetai ke ra.​—1 Korinetia 10:25-29.

18. Akapeea te aronga te kai ra i tetai apinga akaatingaia ra ki tetai itoro e ka piri atu ei ki te au temoni ra?

¹⁸ E putuputu te manakoia e i muri ake i te peu atinga ra, kua o atu te atua ki roto i te kiko manu ra e ka tomo atu ki roto i te kopapa o te aronga kaikai ra i te umukai a te tangata akamori ra. I te kaikai anga kapipiti te au tangata ra kua akatupu i tetai ruru anga i rotopu ia ratou uaorai, e no reira ko te aronga tei kaikai i taua manu atingaia e kapiti anga to ratou i te atarau ra e e piri anga to ratou ma te atua temoni tei akatutuia maira i taua itoro ra. Na roto i te reira akamori anga itoro kua araiia te au tangata kia kore e akamori i te Atua mou anake ra. (Ieremia 10:1-15) No reira rai i tau ei te au tangata o Iehova kia kore e kai i te manga tei atingaia ki te au itoro ra! Ko te tiratiratu ki te Atua, te ariki i tana arataki anga na tona vaerua tapu e tana akaaerenga, ma te manako tamou kia kore e o atu ki te akonoanga temoni te riro ra ei mana ririnui ei akamatakite kia kore e rave i te akamori itoro i teia tuatau nei.

Eaa i Tau Ei Kia Vai Matakite?

19. Eaa te tu akamori itoro tei vai ana i Ephesia i taito ra?

¹⁹ E maroiroi te au Kerititiano i te matakite anga i te akamori itoro no te mea e manganui to te reira au tu, e noatu rai e okotai ua rave anga i te angaanga akamori itoro ka akakore ua te reira i to ratou akarongo. Kua karanga atu te apotetoro ko Ioane ki tona au taeake akarongo e: “E paruru ia kotou uaorai i te au itoro ra.” (1 Ioane 5:21, NW) Kua anoanoia te reira akoanga no te mea e manganui te au tu akamori itoro tei takapini ia ratou ra. Kua tata mai a Ioane mei Ephesia ra, e oire ki i te au ravenga manamana e te au tua no te au atua pikikaa ra. I Ephesia tetai o nga mea umere katoa e itu o teianei ao​—koia te iero o Artema, e ngai akapuanga no te aronga rave kino e ngai no te au peu akaturi ra. Kua akaaite mai tetai apii ko Heracleitus no Ephesia i te arataa poiri ki taua atarau o te iero ra ki te poiri no te tu rikarika, e kua akamanako aia i te au tu akono o te iero ra e e kino roa atu i to te au manu taae. E no reira, kua tau te au Kerititiano o Ephesia kia tu ngaueue kore te matakite i te akonoanga temoni, te akaturi, e pera katoa te akamori itoro.

20. Eaa ra i anoanoiaʼi kia kopae ke noatu te akamori anga itoro meangiti ua ra?

²⁰ Ka anoanoia te manako maroiroi no te au Kerititiano kia kopae ke noatu rai te akamori anga itoro meangiti ua no te mea okotai ua rave anga akamori ki te Tiaporo ka oronga i te turu anga ki tana akaaoanga e kare te au tangata e vai tiratiratu ki te Atua ra i raro ake i te timata anga. (Iobu 1:8-12) I te akaarianga kia Iesu i “te au basileia katoa o te ao nei, e to ratou kakā,” kua tuatua mai a Satani: “E oronga atu au i teianei au mea katoa kia koe, kia akatopa mai koe ki raro e akamori mai iaku.” Na ta Karaiti akakore anga i te reira i te akamou i to Iehova ra tuanga no te maroanga i te ngateitei o te ao katoa e pini ua ake e kua akapapuia te Tiaporo ra e pikikaa.​—Mataio 4:8-11; Maseli 27:11.

21. Eaa ta te au Kerititiano tiratiratu ra i kore e rave no te ariki o Roma ra?

²¹ Kare katoa oki te au pipi mua a Iesu ra i rave i te akamori no te turuanga i to Satani ra tuanga no te maroanga. Noatu rai e manako tika to ratou no te “aronga mana taoonga” o te kavamani, kare ratou e tau akakakara ei akangateitei i te ariki o Roma, noatu rai me ka tamateia ratou. (Roma 13:1-7) No teia tu kua tata a Daniel P. Mannix e: “E tokoiti ua ake te au Kerititiano tei unui ki muri, noatu rai e e atarau tetai ma te ai tei ka ra i runga i te reira, kua vaioia ki roto i te ngai vaitata no ratou. Ko ta te tangata tapekaia ka rave e tuku ua i tetai akakakara meangiti ua ki runga i te mura o te ai e kua orongaia atu tetai Pepa no te Atinga e kua tukuia aia kia aere ua atu. Kua akataka marieia kiaia e e kare aia i rave ana i te akamorianga i te ariki; e akatika anga ua i te pae ki te atua o te ariki ra ei upoko no te patireia o Roma. Noatu rai te reira tu, vaitata kare e Kerititiano tei akatika ia ratou uaorai no te reira ravenga kia ora.” (Those About to Die, kapi 137) Me ka timataia mei te reira ra, ka patoi takiri ainei koe i te au tu akamori itoro ravarai?

Ka Matakite Ainei Koe i te Akamori Itoro?

22, 23. Eaa ra koe ka tau ei kia matakite i te akamori anga itoro ra?

²² Te taka meitaki ra, ka tau te au Kerititiano kia matakite i te au tu akamori itoro ravarai. Te akaue maira a Iehova i te akamori anga kiaia anake ua. Kua akanoo mai nga Epera tiratiratu e toru ra i tetai akaraanga meitaki i te akakoreanga i te akamori itoro atu i te tiki maatamaata tei akatuia ra e te ariki o Babulonia ko Nebukanesa. I te akavaanga o te ao katoa ra e pini ua ake tei tataia e te peroveta ko Isaia, ko Iehova anake ua tei akakiteia mai e koia te Atua mou e te ora oki. Kua anoanoia tona au kite Kerititiano mua ra kia akakore ua atu i te tuku i te au apinga akaatingaia na te au itoro. Kare te aronga tiratiratu e manganui i rotopu ia ratou ra i tuku ua ki te taomi anga kia rave noatu ko tetai angaanga akamori itoro okotai ua te ka akakite i te akakore anga ia Iehova ra.

²³ E no reira, te matakite ra ainei ia koe uaorai i te akamori anga itoro? Te oronga ra ainei koe i te akamori anga ki te Atua anake ua ra? Te turu ra ainei a koe i to Iehova ra ngateitei anga e te akapaapaa katoa iaia ei Atua mou e te ora oki? Me koia ia, ka tau kia riro te reira ei manako tamou anga naau kia rave ua atu i te turanga ngaueue kore i te patoi atu i te au ravenga akamori itoro ra. Inara eaa etai atu tumu no te Tuatua Tapu te ka rauka i te tauturu ia koe kia matakite atu i te au tu akamori itoro ravarai?

Eaa Toou Au Manako?

◻ Eaa te akamori itoro ra?

◻ Eaa ra a Iehova i patoi ei i te au akamori anga itoro ravarai?

◻ Eaa te turanga i akonoia e nga Epera e toru ra no runga i te akamori itoro?

◻ Akapeea te aronga kaikai ra e te au apinga akaatingaia ki te au itoro e piri atu ei ki te au temoni ra?

◻ Eaa ra tatou ka tau ei kia matakite i te akamori anga itoro?

[Tutu i te kapi 23]

Noatu rai te akakokoia ra to ratou au oraanga, kare rava nga Epera e toru ra i rave i te akamori itoro