E Matakite i te Au Tu Akonoanga Itoro Ravarai

“Eaa to te nao o te Atua ra aite anga atu i te idolo?”​—2 KORINETIA 6:16.

1. Eaa tei akatutuia mai e te puakapa e e nga iero o Iseraela ra?

E IERO to Iehova kare ra i te are no te au itoro. Kua akatutuia mai te reira e te puakapa tei akatuia e Mose e pera katoa oki e nga iero tei patuia ra ki Ierusalema i muri akera. Kua akatutu mai aua nga are ra “i te puakapa mou,” koia te iero vaerua maata o Iehova ra. (Ebera 8:1-5) Ko te iero te akanoonooanga no te akavaitata atu anga ki te Atua i te akamori anga na runga i te tumu anga o te atinga oko o Iesu Karaiti ra.​—Ebera 9:2-10, 23.

2. Koai ma te ka riro ei au poupou i te iero vaerua maata o te Atua ra, e eaa te turanga te rekarekaia ra e te urupu maata?

² Kua riro te au Kerititiano akatainuia ra “ei pou i roto i te nao o taku Atua” i te raukaanga tetai ngai i te rangi ra. “E urupu maata” no tetai atu aronga akamori ia Iehova ra e “oronga ra ratou i [te Atua] te rave i te angaanga tapu” te akatutuia maira e te paepae o to te au Kenitara i te iero tei patu akaouia ra e Heroda. No te akarongo i te atinga o Iesu, kua rauka ia ratou tetai turanga tuatua tika te ka akatupu i te akaora anga na roto i “te tumatetenga maata” ra.​—Apokalupo 3:12; 7:9-15, NW.

3, 4. Te akaaiteia ra te putuputuanga o te au Kerititiano akatainuia i runga i te enua nei ki teaa, e eaa te tu viivii te ka tau ia koe kia kore e piri atu?

³ E pera katoa, kua akatutuia te putuputuanga o te au Kerititiano akatainuia ra ki tetai atu iero tei atea ke ra i te akamori itoro. Ki taua aronga tei ‘akairoia i te vaerua tapu,’ kua na ko atura te apotetoro ko Paulo: “Kua patuia oki ki runga i te tango o te au aposetolo e te au peroveta ra, ko Iesu Mesia uaorai te toka tiavā; Nona oki te are katoa i te piri meitaki anga iaia ra, i riro ei oki ei nao tapu no te Atua ra: E kua patu katoaia kotou e ia kia riro ei nooanga no te Atua i te Vaerua.” (Ephesia 1:13; 2:20-22) Ko teia aronga 144,000 tei akairoia ra “kua patu katoaia [ratou], i te toka ora ra, ei are vaerua, ei kau taunga tapu.”​—1 Petero 2:5; Apokalupo 7:4; 14:1.

⁴ I te mea ko teia aronga kau taunga no raro akenei e ‘are no te Atua,’ kare aia e akatika i te reira iero kia taviiviiia. (1 Korinetia 3:9, 16, 17) “Auraka kotou e kapitiia ma te tau kore i te aronga akarongo kore ra” ta Paulo ia i akamatakite atu. “Eaa to te tuatua-tika tau anga i te tuatua-tika kore? e eaa to te mārama tau anga i te poiri? Eaa to te Mesia tau anga ia Beliala? e eaa to te tangata akarongo ra puapinga i te tangata akarongo kore? E eaa to te nao o te Atua ra aite anga atu i te idolo?” Ka anoanoia te aronga Kerititiano akatainuia na “Iehova mana katoatoa ra,” kia atea ke i te akamori itoro ra. (2 Korinetia 6:14-18) Ka tau katoa oki te aronga o te urupu maata kia kopae ke i te au tu akamori itoro ravarai.

5. No te kite e te tau ra te akamorianga no Iehova anake ua, eaa ta te au Kerititiano mou ka rave?

⁵ Te vaira te au tu akamori itoro kite puia ra ma te au tu akavare kitea kore ra. Kare, kare te akamori anga itoro i kotingaia ki te au atua pikikaa e te au atua vaine ra. Ko te akamorianga ia i tetai ua atu apinga me kare tetai ua atu i te pae atu ia Iehova ra. Ei te Ngateitei no te Ao Katoa e pini ua ake, te tika ra aia kia umuumu e te tau ra te akamori anga nona anake ua. (Deuteronomi 4:24) No te manako anga i teia, kua akarongo te au Kerititiano mou i te reira au akamatakite anga i te au akamori itoro ravarai. (1 Korinetia 10:7) E akamanako tatou i etai au tu no te akamorianga itoro te ka tau kia kopae ke ia e te au tavini o Iehova.

Akatutu Anga i Mua Mai i ta Kerititome Akamori Itoro

6. Eaa te au mea rikarika ta Ezekiela i kite na roto i te orama ra?

⁶ Iaia i te tuikaa anga i Babulonia i te 612 M.T.N. ra, kua kite te peroveta ko Ezekiela i tetai orama no te au mea rikarika tei raveia ra e te au ngati Iuda akaruke i te akarongo ra i te iero o Iehova i te iero i Ierusalema ra. Kua kite atura a Ezekiela i tetai “idolo akavareae ra.” E itu ngauru te aronga pakari tei akaraia atu i te oronga anga akakakara i te iero ra. Kua kite ia atu te au vaine te aue ra i tetai atua pikikaa. E e 25 au tane te akamori ra i te ra. Eaa te aite anga o te reira au ravenga na teia aronga akaruke i te akarongo mou ra?

7, 8. Penei eaa te “idolo akavareae ra,” e na teaa te reira i akariro ia Iehova kia vareae?

⁷ Kua akatutuia maira te akamori anga itoro a Kerititome e te au mea rikarika ta Ezekiela i kite ra i te orama. Ei akatauanga, kua karanga aia: “I na, i te ngutupa o te atarau ra, ki te pae i apatokerau ra, teianei idolo akavareae ra, i te tomoanga ra. Kua tuatua maira oki [a Iehova te Atua] kiaku, E te tamaiti a te tangata na, te kite ra koe i ta ratou e rave nei? te au mea viivii maata ta te ngutuare o Iseraela i rave i teianei ngai, kia akaruke rava au i toku ngai-tapu nei?”​—Ezekiela 8:1-6.

⁸ Penei e poupou tapu taua itoro akavareae ra te akatutu maira i te vaine atua pikikaa ra ta to Kanaana i manako ra e e vaine na to ratou atua koia a Baala. Me eaa taua itoro ra, kua akariro kia vareae a Iehova no te mea kua akatupu i te pae ke anga i ta Iseraela ra akamorianga kiaia anake ua i te aati anga i tana au akauenga: “Ko au toou Atua ra ko Iehova . . . Auraka rava toou ei atua ke atu iaku nei. Auraka rava koe e rapa i te idolo akatikitikiia noou, e te tu no tetai mea i runga i te rangi ra, e no tetai mea i raro i te enua nei, e no tetai mea o te moana i raro ake i te enua ra: Auraka rava koe e tupou ki raro ia ratou, auraka oki e akamori atu ia ratou; e Atua vareae oki au ko te Atua noou nei ko Iehova.”​—Exodo 20:2-5.

9. I akapeea ta Kerititome akakeu anga i te Atua ra kia vareae?

⁹ Ko te akamorianga i te itoro akavareae i roto i te iero o te Atua ra ko tetai ia o te au mea viivii rava atu tei raveia e to Iseraela tei akaruke i te akarongo mou. Mei te reira katoa oki te au akonoanga o Kerititome kua akaviiviiia e ta ratou au itoro e te au tikitiki akangateitei kore i te Atua ra tei akatupu ra i te pae ke anga i te akamori anga kiaia anake ra ta ratou i karanga e te oronga ra ratou ki Tei manakoia e ratou e ko ta ratou ia i tavini ana. Kua akariro katoaia te Atua kia vareae no te mea kua kopae ke te au orometua i tona Patireia ei manakonakoanga anake no te au tangata nei e kua akamori atu i te Taokotaianga Enua ei itoro​—koia “te mea rikarika . . . i te tu anga i te ngai-tapu ra,” te ngai kare ra ia i tau kia tu ki reira.​—Mataio 24:15, 16; Mareko 13:14.

10. Eaa ta Ezekiela i kite i roto i te iero ra, e eaa te aiteite anga o te reira ki tei kiteaia i roto ia Kerititome ra?

¹⁰ I te tomoanga i te iero, kua akakite maira a Ezekiela: “E i na, te au aite anga ravarai o te au mea totoro aere, e te au puaka viivii, e te au idolo ravarai o te ngutuare o Iseraela, i te kotikoti angaia ki runga i te patu e pini ua ake. Kua tu ua maira oki ki mua ia ratou nga tangata e itu ngauru o te aronga pakari o Iseraela, . . . i te tu ua anga i rotopu ia ratou, e āriki ai anake tei te rima o taua au tangata ravarai ra, peke atura te tumurangi atinga kakara patapatatue ra ki runga.” E tamanako ana! Te aronga pakari o Iseraela i roto i te iero o Iehova, te oronga ra i te akakakara ki te au atua pikikaa ra, tei akatutuia maira e te au kotikoti anga viivii i runga i te patu ra. (Ezekiela 8:10-12) Mei te reira katoa oki te tu, te akonoia ra te au manu rere e te au manu taae ei akatutu anga i te au enua o Kerititome ra, ko ta te au tangata oki ia e akamori nei. Pera katoa oki, e manganui te au orometua te apa nei i te tauturu anga i te arataki ke anga i te au urupu tangata na te akakitekiteanga i te apiianga tarevake e i tupu mai te tangata nei mei te au oraanga manu akaaka ua ra e kare e mou i te tataanga mou o te Puka Tapu no runga i ta te Atua ra ko Iehova anga mai anga.​—Angaanga 17:24-28.

11. Eaa ra te au vaine o Iseraela tei akaruke ra i te akarongo mou i aue ei no Tamuza?

¹¹ I te tomoanga o te ngutupa o te are o Iehova ra, kua kite atu a Ezekiela i te au vaine Iseraela tei akaruke ra i te akarongo mou te aue ra ia Tamuza. (Ezekiela 8:13, 14) Kua manako to Babulonia e to Suria ia Tamuza e ko te atua o te ngangaere tei tupu ra i te tuatau ua ua e te mate ra i te tuatau maro. Ko te tuatau o tona matenga te akatutu maira i te matenga o Tamuza, te aueia ra e te aronga akamori iaia i te au mataiti ravarai i te tuatau o te vera kino ra. I te tupu akaou anga te ngangaere i te tuatau ua ua ra, kua manakoia e kua oki akaou maira a Tamuza mei te ao i raro iora. Kua akatutuia mai aia i te reta mua o tona ingoa ra, ko te tau i taito ra ko te reira te tu no te rakau tapae koia te koroti. Penei ka akamaaraara mai te reira ia tatou i te akamori anga itoro akatapuia e Kerititome ra no te koroti.

12. Eaa ta Ezekiela i kite i ta te tangata 25 o Iseraela tei akaruke i te akarongo mou, i rave ana, e eaa te angaanga aiteite ki te reira te raveia ra i roto ia Kerititome?

¹² I te paepae o roto i te iero ra, kua kite atura a Ezekiela e 25 tangata Iseraela tei akaruke ra i te akarongo mou te akamori ra i te ra​—e aati anga i ta Iehova ra akauenga auraka e rave i te reira tu akamori itoro. (Deuteronomi 4:15-19) Kua tuku atura taua aronga akamori itoro ra i te uri rakau viivii ki te putaiu o te Atua ra, penei e akatutu anga i te mero o te tane. No reira rai te Atua e kore ei e pau i ta ratou au pure, mei ia Kerititome te ka kimi puapinga kore ua i tana tauturu a te tuatau o te “mate maata ra.” (Mataio 24:21) Mei taua aronga Iseraela i akaruke i te akarongo mou e kua akamori atu i te ra tei oronga maira i te marama ma te akaariu atu anga i to ratou mokotua ki te iero o Iehova ra, te pera katoa nei a Kerititome i te akaariu atu anga i to ratou mokotua ki te marama no ko mai i te Atua ra, e kua apii i te au apiianga pikikaa, e kua akamori atu i te pakari no teianei ao e kua kamo i te rave anga akaturi.​—Ezekiela 8:15-18.

13. Na teea au mataara te Au Kite o Iehova i te kopae anga i te au tu akamori itoro tei kitea ra i te orama a Ezekiela?

¹³ Te kopae ke nei te Au Kite o Iehova i te au tu ravenga akamori itoro a Kerititome, me kare ta Ierusalema kare ra i akatutu mai i te tika, mei ta Ezekiela i kite momua maira. Kare tatou akamori ua i te au akatutu anga akangateitei kore i te Atua ra. Noatu rai e ka akaari tatou i te kauraro anga i te “aronga mana taoonga” o te kavamani, e mea kotingaia ra to tatou kauraro anga kia ratou ra. (Roma 13:1-7; Mareko 12:17; Angaanga 5:29) Ko te akamori anga a to tatou ngakau te orongaia ra ki te Atua e tona Patireia. Kare roa tatou e mono atu i te apiianga tupu ua maira no Tei Anga maira e tana au mea i anga ra. (Apokalupo 4:11) Kare rava tatou e akangateitei i te koroti me kare e akamori atu i te kite o teianei ao, te apiianga na te tangata, e etai atu tu kite pakari no teianei ao nei. (1 Timoteo 6:20, 21) Te matakite katoa nei tatou i etai ke atu tu akamori anga itoro ravarai. Eaa ra etai o teianei au apinga?

Etai Atu Au Tu Akamori Itoro

14. Eaa te turanga ta te au tavini o Iehova e akono nei no runga i te “puaka taae” o Apokalupo 13:1?

¹⁴ Kare te au Kerititiano e piri atu ki te au tangata i te akamorianga i te “puaka taae” akatutuia maira. Kua tuatua maira te apotetoro ko Ioane: “E akara atura au i tetai puaka taae i te kake anga ki runga me raro i te moana, e itu ona mimiti, raungauru oki tara, e raungauru korona i rungao i taua aronga tara nona ra . . . E i akamori to te ao katoa nei iaia.” (Apokalupo 13:1, 8) Te rauka ra i te au puaka taae i te akatutu mai i te ‘au ariki’ me kare au mana poritiki ra. (Daniela 7:17; 8:3-8, 20-25) E no reira ko nga mimiti e itu o te puaka taae akatutuia maira e tutu ia no nga mana patireia o teianei ao​—ko Aiphiti, ko Asura, ko Babulonia, ko Madai e Peresia, ko Ereni, ko Roma, e ko Engarani e Marike te taokotai anga a Peritane e te Unaite Teite o Marike. Kua akaari mai te au orometua o Kerititome i te akangateitei kore maata i te Atua raua ko Karaiti na te takianga i te au tangata kia akamori atu i te akatereanga poritiki a Satani, koia ra “te ariki o teianei ao.” (Ioane 12:31) Inara, ei au Kerititiano neutara, te turu nei ra i te Patireia, te kopae ke nei te au tavini o Iehova i te reira au tu akamorianga itoro.​—Iakobo 1:27.

15. Eaa te manako o te au tangata o Iehova no te aronga rongonui o teianei ao, e eaa ta tetai Kite i tuatua no te reira tu?

¹⁵ Te akakore katoa ra to te Atua au tangata i te akamorianga i te aronga rongonui o teianei ao no te pae i te tamataora e te tarekareka. I muri ake i tona riroanga ei Kite no Iehova, kua tuatua tetai tangata akatangi imene e: “Te rauka ra i te akatangi anga imene no te tamataora anga e no te ura anga, kia akakeu mai i te inangaro tarevake ra . . . Te imene maira te tangata imene no runga i te tu mataora e te maru tei manakoia ra e te aronga akarongo rongo atu e te ngere ra i tona tokorua. E putuputu taua tangata imene ra i te akatakaia ma tana apinga e imene ra. E maata te au tangata kite i te akatangi imene e pera katoa i te imene kua kite au e no te reira tumu kua akaperepereia e te au vaine ra. Me topa atu te tangata ki roto i teianei ao inangaro tau kore, ka rauka i te reira i te taki atu iaia kia akamori atu i te aronga rave ra i te au tamataora anga. Penei ka akamata kino kore ua na te patianga tetai tangata kia tataia mai tona ingoa ei apinga akamaaraara anga. Inara ko tetai papaki ka manako i taua tangata kite ra e e akaperepere na ratou, e ka akateitei iaia, kua akariro iaia ei itoro na ratou. Penei ka akatautau mai i te tutu o taua tangata rongonui ra ki runga i te paruru e ka akamata i te aoao te kakau e te akamanea iaia mei tona rai. Ka tau te au Kerititiano kia tamou ki roto i to ratou manako e ko te Atua anake ua te tau ra kia akamoriia.”

16. Eaa te akaari maira e te kopae ke ra te au angera tuatua tika i te akamori itoro?

¹⁶ Ae, ko te Atua anake ua te tau ra kia akateiteiia e kia akamoriia. I to Ioane “tipapa anga ki raro e akamori ki mua i nga vaevae o te angela” tei akaari atura kiaia i etai au apinga umere ra, kare taua mea ora vaerua ra i akatika kia akamoriia aia na tetai ua atu mataara mari ra kua tuatua maira aia: “Kia matakite! Auraka e rave akapera! Ko au nei e taeake tavini noou e no toou au taeake e peroveta ra ratou e no te aronga te akono ra i te au tuatua i roto i teianei pokaikai tuatua. E akamori i te Atua ra.” (Apokalupo 22:8, 9, NW) Na te mataku ia Iehova, me kare te akatapu anga oonu iaia, e akariroia tatou nei kia akamori iaia anake ua. (Apokalupo 14:7) E na reira, te akamori anga akono mou i te Atua ra e riro ei ei paruru ia tatou kia kore e akamori itoro.​—1 Timoteo 4:8.

17. Akapeea e raukai ia tatou te matakite i te akamori anga i te rave akaturi?

¹⁷ Ko te akaturi tetai atu tu o te akamori itoro te kopae keia ra e te au tavini o Iehova. Kua kite ratou e “kare a te akaturi, e te tangata viivii ra, kare a te noinoi apinga ra, e akamori idolo ïa, kare anake a ratou tuanga i te basileia o te Mesia ra e te Atua.” (Ephesia 5:5) Te kapitiia ra te akamori itoro no te inangaro i te mareka anga tau kore tei riro ra ei apinga no te manako akamori. Kua akakinoia te au tu tei tau i te Atua ra na te inangaro tau kore no te ainga. Na te ariu anga tona nga mata e nga taringa ki te au apinga viivii, kua akakino te tangata i tetai ua atu pirianga ona ma te Atua tapu ra, koia a Iehova. (Isaia 6:3) Ei matakite anga i te reira tu akamori itoro, ka tau te au tavini o te Atua kia kopae ke i te au akatangi anga imene tau kore e te apinga viivii oki. Ka anoanoia ratou kia mou ki te au mea puapinga maata i te pae vaerua tei akatumuia ki runga i te au Tuatua Tapu ra, e ka tau katoa ratou kia tamou marie i te “akatangata ou oki ko tei angaia kia tau i te Atua ra, i te tuatua-tika e te tapu mou.”​—Ephesia 4:22-24.

E Kopae Ke i te Noinoi e te Morimori Apinga

18, 19. (a) Eaa te noinoi e te morimori apinga? (e) Akapeea e raukai ia tatou i te matakite i te akamori i te noinoi e te morimori apinga ra?

¹⁸ Kia matakite katoa te au Kerititiano i te noinoi e te morimori apinga, ko nga tu piri vaitata ia o te akamori anga itoro ra. Ko te noinoi apinga e inangaro kotinga koreia mei te manu rai, e ko te morimori e te noinoi apinga katoa ia no etai apinga na etai ke ra. Kua akamatakite oki a Iesu i te morimori apinga e kua tuatua no tetai tangata apinganui tei kore i puapingaia i tana apinganui i tona matenga e e turanga mii oki tona no te kore “i maata tona apinga i te Atua ra.” (Luka 12:15-21) Kua ako atura a Paulo i tona au taeake akarongo kia tau ki te reira: “Ka tamate i to kotou au melo i te au mea o teianei ao te . . . te noinoi apinga, e akamori idolo oki te reira.”​—Kolosa 3:5.

¹⁹ Ko te aronga te pou ra te manako i te anoano i te moni, ma te kaituauau i te manga e te inu, me kare ma te anoano maata i te mana te akariro ra i te reira tu anoano ei akamori anga itoro na ratou. Mei ta Paulo i akakite maira, ko te tangata noinoi e tangata akamori itoro aia e kare aia e noo i te patireia o te Atua. (1 Korinetia 6:9, 10; Ephesia 5:5) E no reira, ko te aronga tataki tai tei rave ra i te akamori itoro ei au tangata noinoi apinga penei ka akaateaia atu i te putuputuanga Kerititiano ra. Na te akonoanga i te au Tuatua Tapu e te pureanga akatenga, ka rauka ia tatou i te kopae atu i te tu noinoi ra. Te tuatua ra a Maseli 30:7-9: “E rua aku mea inangaro ia koe, e te Atua e Iehova e; te ora nei au ra, auraka koe e tāpu i te reira iaku: E akataka ke atu koe i te tuatua puapinga kore e te pikikaa iaku nei auraka e tukuia mai te putaua e te apinga nui iaku nei: e akaangai mai koe iaku ki te kai e tau iaku ra: Ko te ki ua aea oki au, e kua uuna iora au ia koe, ko te karanga aea oki au e, Koai a Iehova? e ko te putaua aea oki au, e kua keia iora au, e ko te akaiki puapinga kore ua aea au i te ingoa o taku Atua ra.” Ka rauka i te reira tu vaerua i te tauturu ia tatou kia matakite i te noinoi e te morimori apinga ei akamori anga itoro ra.

E Matakite i te Akamori Anga ia Koe Uaorai

20, 21. Akapeea ta te au tangata o Iehova ra matakite anga i te akamori ia ratou uaorai?

²⁰ Te matakite katoa ra oki to Iehova au tangata i te akamori anga ia koe uaorai. E mea matauia i teianei ao kia akamori ia koe uaorai e toou uaorai anoano ra. Te anoano no te rongonui e te kaka te akariro ra i te aronga e manganui kia rave i te au mataara tau kore. Te inangaro ra ratou kia raveia ta ratou i anoano, kare i to te Atua. Inara kare o tatou pirianga ma te Atua ra me ka tuku ua atu tatou ki te akamori ia koe uaorai na te kimianga tau kore kia riro ki ta tatou uaorai i anoano e te tautaanga kia tutara ki rungao ia etai ke ra. (Maseli 3:32; Mataio 20:20-28; 1 Petero 5:2, 3) Ei au pipi na Iesu ra, kua akaruke atu tatou i te au mea akavare anga o teianei ao.​—2 Korinetia 4:1, 2.

²¹ Kare ko te kimianga i te rongonui, kua aru ra to te Atua au tangata i ta Paulo i apii maira: “E teianei, te kai ra e te inu ra oki, e te au mea ravarai ta kotou e rave na, e rave anake ïa ma te akakakā i te Atua.” (1 Korinetia 10:31) I te mea e au tavini no Iehova ra, kare tatou e maro ua atu kia akamori i ta tatou uaorai mataara mari ra ka rave rekareka i te anoano o te Atua ra, na te arikianga i te arataki anga no ko mai i “te tavini akono meitaki e te pakari ra” e te taokotaianga mou tikai ki te akaaerenga a Iehova ra.​—Mataio 24:45-47.

Kia Matakite!

22, 23. Na teea mataara tatou i te rave tamou marie anga i te matakite i te au tu akamori itoro ravarai?

²² Ei au tangata no Iehova ra, kare tatou e tupou ki raro i mua i te au itoro kopapa nei. Ka matakite katoa oki tatou i te au tu kikite o te akamori anga itoro ra. Ko te tika ra, ka tau tatou kia rave tamou i te kopae ke i te au tu akamori itoro ravarai. Ka aru tatou i reira i ta Ioane i ako maira: “E matakite ia kotou i te au idolo ra.”​—1 Ioane 5:21.

²³ Me ko koe tetai o te au tavini o Iehova ra, e akono tamou marie i toou akava ngakau tei akamatauia ra i te Puka Tapu e te mana kite ra. (Ebera 5:14) Na reira koe e kore ei e taeroia i te vaerua akamori itoro o teianei ao mari ra ka aite atu ki nga Epera tiratiratu e toru ra e ki te au Kerititiano tapu mou mua ra. Ka akono koe i te akamori anga mou kia Iehova anake ua, e nana e tauturu ia koe kia matakite ua atu i te au tu akamori itoro ravarai ra.

Eaa Toou Au Manako?

◻ Akapeea ta te Au Kite o Iehova ra kopae ke anga i te au tu akamori itoro tei kiteia ra i te orama a Ezekiela?

◻ Eaa te “puaka taae” o Apokalupo 13:1 ra, e eaa te turanga ta te au tavini o Iehova te akono ra no runga i te reira?

◻ Eaa i tau ei kia matakite i te akamorianga tamataora anga e te aronga rongonui no te tarekareka ra?

◻ Akapeea e raukai ia tatou i te matakite i te akamori anga ia tatou uaorai?

◻ Eaa i tau ei kia matakite i te au tu akamorianga itoro ravarai?

[Au Tutu i te kapi 26]

Te kite ra ainei koe i akapeea te au mea rikarika tei kitea ra i te orama a Ezekiela i te akaata anga mai i te akamori anga itoro a Kerititome ra?

[Akameitakianga]

Angaanga Tutu (i runga i te tua kaui) akatumuia ki runga i te tutu na Ralph Crane/Bardo Museum