Eaa ra ka Tavini ei ia Iehova?

“TE VAITATA maira te ra o Iehova! Te vaitata maira te ‘tumatetenga maata’ e kare koe e ora me kare koe e tavini i te Atua.” Me akakite atu tetai tangata i teia kia koe, akapeea koe me ariu atu?​—Zephania 2:2, 3; Mataio 24:21.

E tika, ka tau tatou kia tamou i te ra o Iehova i to tatou manako, e ko te ora anga atu na roto i te tumatetenga maata puapinga ra tei runga te reira i te angaanga ki te Atua ma te akarongo. Inara e tau ainei teia au tika ei au tumu tikai i orongaʼi tatou i te tavini anga tapu ki te Atua ko Iehova? Eaa ra koe ka tavini ei ia Iehova?

Te Anoano no te Manako Tau

Me kare tetai tangata e tavini i te Atua ma te manako tau, penei ka akaruke aia me kare tona au tamanako anga e kiteaia i roto i tetai tuatau. Ei akaraanga, kua tapapa etai au tangata ia Iesu Karaiti kia oki mai i te 1843 me kore te 1844, te au ra tei pati ra ma te kore e kite anga i to ratou au manakonako anga. Ma te tau tei tataia e George Storrs no runga i teia, e papuritia no te Bible Examiner e e tangata tei kite ra ia Charles Taze Russell, te peretiteni mua o te Totaiete Punanga Tiaki. I roto i te Bible Examiner o Tepetema 1846, kua tata a Storrs e:

“Ko te apainga no te tavini i te Atua te vai teitei atura te reira i te tika ua nei e te akaoti atura te ra. . . . Te tu ariu te ka tupu me topa te 1846 e te 1847 penei ka tupu, ma te kore e kite anga i te aerenga rua, ka kino te reira i mua atu i tei manakoia. Te akapapu maira te kite anga i teia​—tera taku aite anga te kite anga o te 1843 e te 1844. Teiea te maata anga o te aronga i teianei tei akatutu ra, tei ‘akakeuia kia tavini i te Atua’ mei tei tau ra ia ratou i te reira aue anga o te tuatau o to te Atu ra aerenga mai? E te karanga ra te reo oki akaou mai e​—KIEA!!! Ma te meangiti e okotai i roto i te tai ngauru ia ratou te kiteaia ra te aaereanga no te akangateitei i ta ratou angaanga Kerititiano. No teaa ra? Kua akakeuia ratou e te au manako tarevake. To ratou tu noinoi te mea puapinga maata tei akaraia atu e tei rekaia. Mei tetai tangata ara rai ratou tei manako ra iaia uaorai i te vaitata anga atu ki te mate i runga i tetai roi maki me kore i roto i tetai uriia i te moana. Kia mate ake aia, ka riro mai aia ei Kerititiano. Naringa aia i kite e kare aia i tu­mate­tenga­ia, ka tuke ua atu rai aia.”

Tavinianga ma te Au Manako Tika

Penei na te tu noinoi e te mataku i te akapou anga e akakeu i etai pae kia na roto i te au tu rave ua o te raveanga i to Iehova anoano. Penei ka rekareka etai pae i te manakonakoanga o te ora anga atu ki roto i te Parataito e ka tavini ua ratou i te Atua no te reira tumu. Inara, me akakeu tikaiia te au tangata e te au manako mei teia te tu e kare to Iehova ra e te tumatetenga maata e vaitata roa mai ana, penei kare ratou e inangaro roa ana i te tavini i te Atua ma te maroiroi.

E tikai, kare i te mea noinoi no te rekareka i te au taputou a te Atua e te au akameitakianga e manganui. Te inangaro ra aia ia tatou kia mataora no runga i te au manakonakoanga tei akanooia ki mua ia tatou ei au pipi na tana Tamaiti, ko Iesu Karaiti. Kua karanga te apotetoro ko Paulo e: “E rekareka i te [ma]nakonako anga; e akakoromaki i te mate; tamou marie tikai i te pure.” (Roma 12:12) Me kapitiia mai ‘te rekareka o Iehova’ ki te pure te tauturu anga ia tatou kia tamou marie i te au timata anga e te akakoromaki anga i te tapapa i te kite anga i te au taputou anga a te Atua. (Nehemia 8:10) I te reira taime, e manganui ta tatou au tumu no te tavini ia Iehova. Eaa etai o teia au mea?

Te Apainga e te Akameitaki Anga

Ei Tei Ngateitei Rava i te Ao Katoa e Pini Ua Ake, te tau ra a Iehova e kia akonoia aia anake ua. (Exodo 20:4, 5) No reira te Kerititiano takitai e aiteite te tuanga o tana apainga ki te Atua noatu e ka akamata te tumatetenga maata apopo, a teia mataiti ki mua, me kore a tetai atu taime. Tei runga iaia te apainga no te tavini ia Iehova ma te noinoi kore no te mea no te aroaanga i te Atua ma tona ngakau katoa, te meta, te manako, e te maroiroi. (Mareko 12:30) Kua manako etai au Kerititiano mua e te vaitata maira te ra o Iehova, inara kare te tamanako anga i kiteia, e kua mate atu ratou ma te kore te kiteanga i te reira rave anga. (1 Tesalonia 5:1-5; 2 Tesalonia 2:1-5) Inara naringa ratou i noo akarongo ua e tae ua atu ki te mate anga, i te openga ka rauka i te au pipi akatainuia a Karaiti te tutaki o tetai tuakaou anga ki te ora i te rangi.​—Apokalupo 2:10.

E tau te Au Kite papetitoia o Iehova kia tavini iaia ma te tu akarongo no te mea kua manako oronga ua ratou i te apainga o te rave anga i tona anoano. Ka akamanako ana! Mei te au angera tapu ra, ka rauka ia tatou i te rave i te anoano o Tei Ngateitei Rava i te Ao Katoa e Pini Ua Ake. (Salamo 103:20, 21) Kua akangateitei tikai a Iesu i teia akameitaki anga e kua karanga aia e: “Teia taku kai, ko te akono i tona anoano, to tei tono mai iaku ra, ma te akaoti i tana angaanga.” (Ioane 4:34) Me rauka ia tatou i taua tu vaerua ra, ka akakitekite maroiroi i reira tatou i te au akapaapaa anga a Iehova e te akakite ki tetai atu no runga i tana au akakoroanga, mei tei akakiteia i roto i te au Tuatua Tapu. Na roto i teia tu, kua akameitaki katoaia tatou i te tauturu i tetai pae i te pae vaerua. Te papu ra, te rave anga i te anoano o te Atua na roto i te aroa nona ra e akameitakianga umere rava ia, noatu e aea e akamata ei te ra o Iehova.

Oronga Mai te Tu Ariki i te Akakeu Anga

Te tu ariki no te aroa o te Atua i te orongaanga mai i te atinga oko o tana Tamaiti e tau katoa te reira ei akakeu ia tatou kia tavini ia Iehova. I tetai ati anga kua akatakakeia tatou mei te Atua ko Iehova no te mea no te ara. Inara, kua karanga a Iesu e: “I aroa mai te Atua i to te ao nei, kua tae rava ki te oronga anga mai i tana Tamaiti anau tai, kia kore e mate te akarongo iaia, kia rauka ra te ora mutu kore.” (Ioane 3:16) Kua manako a Iehova i teia, mei ta Paulo i tata: “Kua akamaata ua maira te Atua i tona aroa ia tatou nei, i te mea te vai tangata ara ua nei rai tatou, i mate ei te Mesia no tatou nei.” (Roma 5:8) E tau te tu ariki no teia akaari anga aroa o te Atua ei akakeu ia tatou kia tavini iaia ma te ngakau katoa.

Te oronga maira te tu ariki no te au apinga pae vaerua e te pae kopapa i tetai atu tumu no te tavini iaia ma te akarongo. E arataki anga papu te Tuatua na te Atua​—e marama no to tatou ara. Kua riro te au puka tei orongaia mai na roto i “te tavini akono meitaki e te pakari” ei tauturu ia tatou kia akarotai atu i to tatou oraanga ki te anoano o te atua. (Mataio 24:45-47; Salamo 119:105) E no te mea te kimi ra tatou i te Patireia na mua, te oronga katoa maira a Iehova i te au mea pae kopapa no tatou. (Mataio 6:25-34) Te akaari ra ainei koe i toou tu ariki no teia au mea?

Te tu ariki no te tu rangatira tei orongaia mai e te Atua mei te akonoanga pikikaa, te oronga maira i tetai atu tumu no te tavini ia Iehova ma te akarongo. Te vaine akonoanga akaturi ko Babulonia Maata “tei noo ki rungao i te au vai e manganui” tera te aiteanga “e au iti-tangata ïa, e au urupu tangata maata ïa, e au enua ïa, e au reo ke ke ïa.” (Apokalupo 17:1, 15) Inara, kare aia e noo ki rungao i te au tavini o Iehova, te akamanaanga i te akonoanga e te akatereanga ia ratou. Ei akaraanga, kua kopae ratou i te apiianga akonoanga pikikaa e e mate kore te meta tangata. Kua kite ratou e kua angaia te tangata ei “meta ora” e ko te aronga mate ra “kare a ratou apinga i kite” e ka tupu tetai tuakaou anga. (Genese 2:7, NW; Koheleta 9:5, 10, NW; Angaanga 24:15) No reira kare ratou e mataku e kare katoa e akamori i tei mate ra. Ka riro ainei te tu ariki no teia tu rangatira pae vaerua ei akatupu ia koe kia patoi i te akaruke anga i te akarongo e te pipiri atu ki te akamori anga ma a Iehova?​—Ioane 8:32.

Te tu ariki no ta Iehova turu anga i te au ra e tau te reira ei akamaata atu i to tatou tauta anga i te tavini iaia ma te tiratiratu. Kua akakite te tata taramo a Davida e: “Kia akameitakiia a Iehova, tei apai ra i te apainga na matou i te au ra takitai.” (Salamo 68:19, NW) I tetai atu ngai kua karanga te tata taramo e: “Akaruke ua toku metua tane e toku metua vaine iaku, ei reirā Iehova e rave mai ei iaku.” (Salamo 27:10) Ae, ka rauka i tetai tangata te tavini ra ia Iehova ma te akarongo i te titiri i tona teiaa akatutu ua ra, mei te au manamanata e te au timata anga, ki rungao i te Atua. Te akaari ra ainei koe i te tu ariki no ta ­Iehova turu anga autu ua na te tavinianga iaia ma te akarongo?​—Salamo 145:14.

E Akapaapaa ia Iehova e Tona Taoonga Ariki

E tau e na tetai anoano no te akakaka ia Iehova e akakeu katoa ia tatou kia tavini iaia. Kua komonoia te au mea ora o te rangi te akakakaanga i te Atua ma te au tuatua: “E tau te kakā ia koe, e te Atu, e te akangateitei, e te mana: naau oki i anga i te au mea ravarai nei, e no toou inangaro i mou ei e i angaiaʼi ratou.” (Apokalupo 4:11) Kua akapaapaa te Ariki ko Davida i te Atua na te karangaanga e: “Tei ia koe, e Iehova, te maata, e te mana, e te kakā, e te autu, e te tapunui . . . tei ia koe te au, e Iehova . . . No ko na mai ia koe na te apinga e te akangateitei, e ko koe tei tutara ki rungao i te au mea katoa . . . E teianei, e to matou Atua, te akameitaki nei matou ia koe, e te akapaapaa nei i toou ingoa kakā.” (1 Paraleipomeno 29:10-13) Ei au tavini no Iehova, kia meangiti mai ainei ta tatou ka rave no te akakaka iaia na roto i te tuatua e te angaanga koi tiaki ei i te akatupu anga o tana au taputou?​—1 Korinetia 10:31.

Na tetai raurau anga ketaketa no te tuatua i te Patireia o te Atua e tumu anake ia no te tavini ia Iehova. Kua tuatua meitakiia te reira manako ki katoa i roto i te au tuatua a te tata taramo: “Ka akapaapaa taau katoa ra au angaanga ia koe, e Iehova, e na toou aronga tapu e akameitaki ia koe. E tuatua ratou i te kakā o toou ra basileia, e karangaranga ua oki i toou ra ririnui, I te akakite anga ki te tamariki a te tangata nei i tona ra mana, e te mana kakā o tona ra basileia. Ko toou ra basileia, e basileia mutu kore ïa, e toou ra mana ka tae ïa ki te au uki ravarai.” (Salamo 145:10-13) Te akakiteanga i te tuatua no te Patireia e tuku anga angaanga ia na te Kerititiano e e angaanga puapinga maata rava atu te raveia i to tatou tuatau. (Mataio 24:14; 28:19, 20) E anoano mura ainei toou no te akapaapaa ia Iehova e te akakite ki tetai atu no runga i tona Patireia?

Te akangateitei anga i te ingoa o Iehova e te akatika anga i tona tu ngateitei rava e tau ia ei mea puapinga kia tatou no te inangaro i te tavini iaia ma te akarongo. Penei ka pure tatou no te akangateitei anga i te ingoa o Iehova e te akatika anga i tona tu ngateitei. (Mataio 6:9) Ka rauka ia tatou i te turu i ta tatou au pure na te o putuputu anga atu ki roto i te angaanga orometua Kerititiano e na te akatotoaanga i te tuatua mou no runga i teia au mea puapinga tikai.​—Ezekiela 36:23; 39:7.

Te Rekareka e te Merengo Anga

Na te tavini anga ia Iehova ma te akarongo, kua rauka ia tatou te tu merengo i te akarekareka anga i tona ngakau e te akakiteanga i te Tiaporo ei pikikaa. Noatu e te tuatua ra a Satani e kua tavini te au tangata i te Atua no te au tumu noinoi, te akapapu maira ta tatou tavini anga tiratiratu kia Iehova tei raveia na roto i te tu aroa i ta te reira akakino ra akaapa anga ei mea pikikaa. (Iobu 1:8-12) Te oronga maira teia i te tumu meitaki no te aere ua atu i te rave i tei karangaia ia Maseli 27:11: “E taku tamaiti, kia pakari koe, kia rekareka toku ngakau, kia tika iaku kia patoi atu i tei akakino mai iaku nei.” Pera katoa, me tavini tatou ia Iehova ma te tiratiratu noatu ta Satani katoatoa ka rave no te tapupu ia tatou, ka riro to tatou tu akono tamou i te akamaroiroi i te au taeake irinaki.​—Philipi 1:12-14.

E tau te rekareka e te merengo anga o te pirianga ki roto i te kokoti anga pae vaerua ei akakeu katoa ia tatou kia tavini ia Iehova ma te akarongo. Kua kitea e Iesu te tu mataora i roto i te tauturuanga i te au tangata, i roto tikai i te au mataara pae vaerua. Kua karanga a Mataio 9:35-38 e: “Aere aturā Iesu na roto i te au oire e te au vila katoa, i te apii anga i roto i to ratou au sunago, e te ako anga i te evangelia o te basileia, e te akaora anga i te au maki ravarai, e te au mate katoa o te tangata. E kia akara akera aia i te maata o te tangata, aroa atura aia ia ratou, no te mea kua mate ratou i te roiroi, e kua pueurikiriki keia, mei te mamoe tiaki kore ra. Kua karanga atura aia ki tana au pipi, Te maata ua nei te mou, te iti nei ra te aronga e kokoti: E teianei, e pure kotou i te Atu o te mou, kia unga mai aia i tetai aronga ei rave i taua mou nana ra.” Me ka roa atu te angaanga kokoti anga i tei tapapaia e tatou, ka oronga mai te reira i te tuatau no tatou kia kimi i te rekareka e te tu merengo i te tauturuanga ia etai atu i te pae vaerua. E mataara katoa teia no te akaari i te tu aroa i te tangata tupu tei tapapaia mei ia tatou.​—Mataio 22:39.

Eaa ra Koe ka Tavini ei i te Atua?

Mei te manganui e meangiti ua ta tatou i uriuri no te tavini ia Iehova ma te akarongo. E mea meitaki no te oronga i te manako pure ki ta tatou au tumu no te tavinianga i te Atua, no te mea ka oronga tatou takitai i tetai tutaki anga kiaia. (Roma 14:12; Ebera 4:13) Kare te aronga te ka aruaru ua atu rai i te au manako noinoi ua nei e rekareka i te mareka anga a te atua.

Eaa te ka tapapaia me manako tikai tatou i te akatapu anga i to Iehova ingoa e te oronga ra i te tavini anga tapu ki te Atua ma te au manako noinoi kore? Ka akameitaki a Iehova ia tatou e ta tatou angaanga orometua! (Maseli 10:22) Ka rauka katoa ia tatou te ora mutu kore no te mea kua tavini ana tatou ia Iehova ma te akarongo.

[Tutu i te kapi 9]

E tauatini ua atu te tavini ra ia Iehova i Tiapani

[Tutu i te kapi 10]

Tavinianga ia Iehova i Kote Tivua

[Akameitakianga no te Tutu i te kapi 8]

SIX SERMONS na George Storrs (1855)