E Kauti Ainei te Au Kite o Iehova?

KUA akaapaia a Iesu Karaiti ei kona kava, ei tangata kai tuauau, ei tangata aati i te Tapati, ei kite pikikaa, ei tangata akakino i te Atua, e ei karere no Satani. Kua akaapa katoaia aia no te takino.​—Mataio 9:34; 11:19; 12:24; 26:65; Ioane 8:13; 9:16; 19:12.

I muri ake i to Iesu matenga e te akatuakaou anga, kua riro katoa tana au pipi ei takete no te au akaapa anga pakari. Okotai pupu o te au Kerititiano o te anere mataiti mua tei kikaia ki te au tutara o te oire e te au tangata ma te aue: ‘Kua taruri ke teia au tangata i te pa enua ravarai.’ (Angaanga 17:6) I tetai atianga ke atu kua apainaia atu a Paulo e tona tokorua ko Sila ki ko i te aronga mana e kua akautungaia no tei tamanamanata maata i te oire o Philipi.​—Angaanga 16:20.

Kua akaapaia a Paulo i muri mai e ei “tangata pekapeka, e te taoriori i te ngati Iuda ravarai e pini ua ake te enua katoatoa” e no te tautaanga “i te akanoa i te iero.” (Angaanga 24:5, 6) Kua akataka meitaki tikai te au tangata puapinga maata o te ngati Iuda i Roma i te turanga o te au pipi a Iesu i to ratou akatika anga e: “I tenana [“aireti,” NW], kua akakinoia ïa e kare e ngai toe, kua kite matou.”​—Angaanga 28:22.

Ko te tika, teia pupu ou tei akatumuia e Iesu Karaiti kua manakoia e etai papaki e ei pupu akonoanga ma te au akara anga e te au angaanga maata tei u atu i tei arikiia i taua au ra e e tu totiara matauia. Kare e ekoko anga, penei e manganui to teia tuatau i akamanako i te au Kerititiano e ei kauti takore. Te aronga akaapa e putuputu ana te taime e au mema mamaata e te akangateiteiia o te ngai tangata, e i te akaraanga kua riro teia ei akakeu anga ririnui ki te au pikikaa anga. E manganui tei irinaki i te au akaapa anga no runga ia Iesu e tana au pipi. Tera ra, penei mei taau i kite, e pikikaa teia au akautunga anga tataki tai! Ko te tika e kua tuatua te tangata i teia au mea kare i akariro ia ratou e kia tika.

Akapeea i teia tuatau? Ka tau ainei i te taiku i te Au Kite o Iehova e ei pupu akonoanga ma te au akara anga e te au angaanga maata tei u atu i tei arikiia e e tu totiara matauia? E kauti ainei te Au Kite o Iehova?

Ta te Tika e Akaari Maira

Kua akamarama tetai opita kavamani o te oire o St. Petersburg, Rutia e: “Kua orongaia mai te Au Kite o Iehova kia matou mei tetai tu aireti pipini ua te nooanga i roto i te poiri e te tamateanga i te au tamariki e te taanga ia ratou uaorai.” Inara, ou ua akenei kua matau mai te au tangata o Rutia i te au tu natura tikai o te Au Kite. I muri ake i te angaanga anga ma te Au Kite o Iehova na roto i tetai uruoaanga pa enua, kua akara taua opita rai e: “I teianei te kite nei au i te au tangata ua nei e te katakata, meitaki rava atu i te maata anga o te au tangata taku i kite. E au ua ratou e te pereteki, e te aroa maata ra ratou tetai ki tetai.” Kua kapiti atu aia e: “Kare rava au i marama e eaa ra te au tangata i tuatua ei i te reira au pikikaa no runga ia ratou.”

Kare te Au Kite o Iehova e rave ana i te au uipaanga peu, e kare katoa ta ratou akamorianga i tapokiia na roto i te tu muna. Kua akakite te vaine tata kare i te Kite ko Julia Mitchell Corbett e: “Me aravei ratou, e mea matauia e maata atu i te okotai taime i te epetoma, i roto i te au Are Uipaanga Patireia (to ratou au ngai uipaanga kare i kapikiia e e au are pure), te maata anga o to ratou au taime kua akapouia i roto i te apii anga e te uriuri anga i te Puka Tapu.” To ratou au ngai uipaanga kua akataka marama uaia i te akairo. E tuera ua ana te au uipaanga, e kua patiia atu te au tangata o te papuriki kia tae mai. Ma te kore e akakiteia ka ariki uaia te au manuiri.

“Kua rauka i te Au Kite te ingoa meitaki no te tiratiratu, te akara aroa, e te maroiroi,” i kapiti mai ei a Corbett i roto i tana puka Religion in America. Te au tangata e manganui kare i te Au Kite te papa ua ra i te akakite e kare e apinga tau kore me kore tuke rava no runga i te Au Kite o Iehova. Kare to ratou tu akono e u atu ana i tei arikiia e e tu totiara matauia. Kua akakite tika ra The New Encyclopædia Britannica e ko te Au Kite te “tauta ra i te akatupu i tetai ravenga tika teitei rava o te tu akono uaorai.”

Kua tata atu te akatere o te au nuti e te au angaanga takake no tetai ngai o te tivi i te Unaite Teite ki te Au Kite o Iehova te ariu anga atu i tetai ripoti akaapa ua no runga i te Au Kite i runga i te TV akaariari anga nuti 60 Minutes. Kua karanga aia e: “Naringa e maata te tangata e noo ana na te mataara o to kotou akarongo, kare teia pa enua e riro mai mei teia rai te tu. Ko au tetai tangata nuti okotai tei kite e ko ta kotou akaaerenga kua akatumuia ki runga i te aroa e tetai akarongo pakari i roto i tei Anga. Ka inangaro au kia kite kotou e kare te katoa anga o te au tangata Nuti e akaapa ua ana mei te reira.”

E Akonoanga Kitea Puia

Ka tau ainei i te karanga e ko te Au Kite o Iehova e pupu akonoanga tuanga meangiti ua? I tetai akara anga, e tokoiti ua te numero o te Au Kite o Iehova me akaaiteia atu ki etai au akonoanga. Inara, e akamaara ana i ta Iesu i karanga: “Te kokota ua nei te ngutupa, e te piri oki o te ara, e tae atu ei ki te ora, e tokoia ua ake tei kite atu i te reira.”​—Mataio 7:13, 14.

Tera ra, e mamao atu te Au Kite kia riro mai ei tuanga kauti meangiti ua. I te tuatau tupu anga rau o te 1993, tere atu i te 11 mirioni au tangata tei tae atu i ta te Au Kite Akamaara Anga i to Iesu matenga. Inara maata atu i to ratou numero ko to ratou tu akono e te tu akara anga meitaki, tei apai mai kia ratou i te akameitaki anga i te ao katoa. Kare e ekoko anga kua riro teia ei tumu i roto i te au enua tei oronga kia ratou i te kite anga akamanaia e ei, akonoanga tika tikai.

Ko tei kitea puia ko tetai tika anga ou ua akenei a te Court of Human Rights (Koti o te Au Tikaanga Tangata) o Europa. Kua akakite te reira e e tau te Au Kite kia rekareka i te tu rangatira o te manako, te akava ngakau, e te akonoanga e e tika anga to ratou i te tuatua i to ratou akarongo e te apii i te reira ki tetai ke atu. Kare teia e tupu me kua kiteaia te Au Kite o Iehova i te taangaanga i te pikikaa e te au ravenga kare e no te tu akono ei akaputuputu mai i te au mema me kore ra me kua taangaanga ratou i te au ravenga kikite ei akatere i te au manako o ta ratou au pipi.

Te urupu maata takapini i teianei ao kua kite meitaki i te Au Kite o Iehova. O te au mirioni o te au tangata kare i te Au Kite e apii ra i te Puka Tapu ma te Au Kite me kore kua apii ana ma ratou i tetai taime me kore i tetai taime ke atu, ka ui matou e, E au tauta anga ainei tetai ei akangaro i toou manako? I taangaanga ana ainei te Au Kite i tetai au ravenga ei akatere i toou manako? Kare e ekoko anga e “Kare” taau pauanga tika. E tikai, me kua taangaangaia teia au ravenga, ka vai rai tetai numero maata o te au tangata ei patoi i tetai ua atu tauetono anga i te tua o te Au Kite o Iehova.

“O Oonu Tikai i te Tauturuanga i te Tangata”

E putuputu te taime e akamamao ana te au mema o te kauti ia ratou uaorai mei te pamiri, te au oa, e pera katoa te totaiete ua nei. Ko te reira ainei tei tupu no te Au Kite o Iehova? “Kare au e no te Au Kite o Iehova,” i tata ei tetai tangata nuti i te Repapuriki o Tekorovakia. Inara i kapiti atu ei aia: “Te taka marama ua ra e e tu akono maroiroi maata tikai to ratou [Au Kite o Iehova]. . . . Te kite ra ratou i te au mana kavamani inara te irinaki ra e ka rauka anake i te Patireia o te Atua i te akatikatika i te au manamanata ravarai o te tangata. Inara kia kite e​—kare ratou i te aronga mamao ke roa. E au tangata ratou tei o oonu tikai i te tauturuanga i te tangata.”

E kare ratou e noo ana i roto i te au pupu tangata, te akamamaoanga ia ratou mei te kopu tangata e tetai papaki. Kua kite te Au Kite o Iehova e e apainga Tuatua Tapu no ratou i te aroa e te akono i to ratou au pamiri. Te noo ra ratou e te angaanga ma te au tangata mei te au iti tangata e te au akonoanga ravarai. Me tupu te au tumatetenga, kua viviki ratou i te ariu atu ma te au putunga apinga tauturu e tetai au tauturu anga ke atu i te tangata.

Tei maata atu, te piri atura ratou i roto i tetai porokarama apiipii anga tei kore i akaaiteia. Eia au akonoanga e akatereanga akaaereia ta ratou no te atoro tika atu i te au tangata tataki tai ravarai i roto i to ratou ngai? Te rave ra te Au Kite o Iehova i teia i roto i tetai au enua maata atu i te 200 e i roto i te au reo maata atu i te 200! Te taka marama ra, te Au Kite o Iehova kua “o oonu tikai i te tauturuanga i te tangata.”

Akono Tikai i te Puka Tapu

Ko te tika, e tuke rai te au apiianga a te Au Kite o Iehova mei tei orongaia mai e te au ekaretia. Te irinaki ra te Au Kite o Iehova e ko te Atua mana katoatoa a Iehova e ko Iesu e Tamaiti nana, e kare i te tuanga o tetai aitu toru tai. Kua tutauia to ratou akarongo i roto i te irinaki e na to te Atua Patireia anake e apai mai i te tauturu ki te au tangata e mamae ra. Te akamatakite ra ratou i te au tangata no te takore anga e vaitata maira o teia akatere anga kino o te au mea nei. Te tutu aere ra ratou no runga i ta te Atua taputou no tetai parataito i te enua nei no te au tangata akarongo. Kare ratou e akangateitei ana i te taata. Kare ratou e akamaara ana i te Keritimeti. Te irinaki ra ratou e ko te meta ka mate ia e kare e ai era. Kare ratou e kai i te toto, e kare katoa ratou e ariki i te au pamu anga toto. Te porori ra ratou i te o anga atu i roto i te poritiki e te piri anga atu i roto i te tamaki. I ui ana ainei koe ia koe uaorai i tetai ua atu taime e eaa ra te au apiianga a te Au Kite o Iehova i tuke ravaʼi?

Te akamarama ra tetai nuti pepa Massachusetts, ko te Daily Hampshire Gazette e, ko ta te Au Kite o Iehova “uri anga pakari o te Puka Tapu te ture ra i te au angaanga e manganui ta tetai papaki i manako e te meitaki ua ra . . . , te tumu o teia au mea ravarai no te tauta anga i te aru i te akara anga a te au Kerititiano o te anere mataiti mua e te tuatua a te Puka Tapu.” Te akatika ra te Encyclopedia of Religion e ko te “katoa anga o ta ratou i irinaki kua akatumuia ki runga i te Puka Tapu. Te ‘akapapu ra i te potonga tuatua’ (koia oki, te oronga maira i tetai au manako ei turu) vaitata rai i te au akakite anga ravarai o te akarongo, te ariki anga ma te kore e ui i te mana o te Puka Tapu, tei mono takiri i te au apii anga taito.” Kua akakite te puka Religion in America e: “Kare rava te pupu i ngaueue mei tana akara anga no runga i te apii Puka Tapu, e kua turuia tana au apiianga e tetai akatere anga mako tikai o te au akara anga ki te tuatua tapu.”

Koai to Ratou Arataki?

No teia akono anga vaitata tikai i te au apiianga Puka Tapu i koreʼi e kitea i rotopu i te Au Kite o Iehova te akangateitei anga e te akamori anga i te au arataki tangata mei te tu o te au kauti i teia tuatau. Te kopae ra ratou i te manako o te tuke i te orometua mei te au tangata kare e taoonga i akatakaia. Kua tano ta The Encyclopedia of Religion akakite anga no runga i te Au Kite o Iehova: “Kua pamokotoia tetai au pupu orometua e te au taoonga tuke ua ake rai.”

Te aru ra ratou ia Iesu Karaiti ei Arataki no ratou e ei Upoko no te putuputuanga Kerititiano. Ko Iesu tei karanga e: “Auraka kia tapaia ia Rabi; okotai rai oki o kotou Orometua, ko te Mesia: e taeake anake oki kotou katoa na. Auraka kotou e akametua i tetai tangata i teianei ao: okotai rai oki o kotou Metua, ko tei noo i te rangi. Auraka kotou kia tapaia i te arataki; okotai o kotou Arataki, ko te Mesia.”​—Mataio 23:8-12.

Te taka marama ra i reira e e mamao rava atu te Au Kite o Iehova kia riro mai ei kauti meia Iesu rai kia riro mai ei tangata kai tuauau e ei kona kava. Ko te tika, kare te katoa anga o te au tangata tei akakeuia e te au ripoti pikikaa no runga ia Iesu e tana au pipi i o i roto i te ereere o te akakinoanga iaia. Penei kua tarevake ua te au manako i orongaia atu i etai papaki. Me e au uianga taau no runga i te Au Kite o Iehova e to ratou au irinaki anga, eaa ka kore ei e tauta i te kite meitaki ia ratou? Te tuera atea ua ra te au ngutupa i to ratou au Are Uipaanga Patireia ki te au tangata ravarai e kimi ra i te tuatua mou.

Ka puapinga katoaia koe mei ta ratou kimikimi anga meitaki i te kite tano tikai o te Puka Tapu e ka apii e akapeea i te akamori anga i te Atua kia rotai ki ta Iesu au tuatua: “Kua vaitata, e teianei oki taua ora ra, e akamori ei i te Metua te aronga akamori tika ra, ma te vaerua e te tuatua-mou: ko te tu ïa o te tangata akamori ta te Metua e anoano ra.”​—Ioane 4:23.