Au Kauti​—Eaa ra Ratou?

PEPERUARE 28, 1993​—maata atu i te anere au rima rave tuku ture tei tomo i tetai aua are tei nooia e te au tatini au tane, au vaine, e te au tamariki. Ko te akakoro anga no te kimi i te au apinga tamaki tei tureia e no te tapeka i tetai tangata rave kino tei tarotokakaia. Inara, kua poitirere te au rima rave i te rereanga mai te au katiriti vaitata ia ratou mei roto mai i te au are. Kua akaoki atu ratou i te pupui anga.

Kua akaruke teia aravei anga e tai ngauru i mate e ko etai papaki kua putaputa. I te au ra e 50 i aru mai, e au anere ua atu au rima rave o te kavamani tei takapini i te aua ma te au pupui te ka rava ei akatupu i tetai tamaki anga meangiti. Kua akamutu te tupuanga na roto i tetai rave anga tei akaruke e 86 i mate, kapitiia atu tetai 17 au tamariki.

Inara koai te enemi? E nuku tangata okooko apinga akakona ainei? E au rave anga akatupu tamaki ainei? Kare. Penei mei taau i kite, te “enemi” ko tetai pupu tangata akamori o te akonoanga, e au mema no tetai kauti (cult). To ratou mate kua maani i tetai ngai tangata kitea koreia i runga i te ngai titika o Texas rotopu, U.T.M., ei manako anga no te pa enua katoa. Kua akaki te akakitekite anga nuti i te au mea o te reva e te au kapi neneiia i te au ripoti maata tikai, te au kimikimi anga, e te au tuatua no runga i te au kino o te au kauti mamao ke roa.

Kua akamaaraia te papuriki i tetai au tupu anga i mua ana, te aratakiangaia te au mema o te kauti ki to ratou mate e to ratou au arataki: te au taanga a Manson i California i te 1969; te maata o te au mema o te kauti tei apai i te oraanga i Jonestown, Kaiana i te 1978; te 1987 taanga e te apai anga i te oraanga tei paraniia e te arataki kauti ko Park Soon-ja o Korea, tei tupu i roto i te mate o tetai 32 au mema. Te aiteanga tikai, te maata anga o teia au tangata kua karanga e e au Kerititiano ratou e kua karanga e e irinaki to ratou i te Puka Tapu.

Ma te marama, te au tangata e manganui tei akangateitei i te Puka Tapu ei Tuatua na te Atua kua mii tikai i te taangaanga anga akama kore a teia au kauti i te Tuatua Tapu. Ko tei tupu, i te au mataiti i muri mai e au anere ua atu te au akaaerenga tei akatumuia, te akakoroanga no te akaraanga i te au kauti e te akamaeuanga i ta ratou au angaanga kino. Te tamanako ra te aronga kite no runga i te tu o te kauti e ko te aereanga mai o tetai tauatini mataiti ou i roto i tetai au mataiti tokoiti ua penei ka akamata i te tupu anga viviki o te au kauti. Kua akakite tetai nuti makatini e kia tau ki te au pupu kare i te kauti, te vaira te au tauatini au kauti “i vao i ko kua papa i te opu i toou kopapa, akatere i toou manako, takino i toou meta. . . . E tokoiti ua tei rakeiia i te au mea tamaki inara ko te maata anga kua manakoia e e kino. Ka akavare ratou ia koe e ka rave i taau apinga, ka akaipoipo e ka tanu ia koe.”

Eaa ra te Kauti?

Kua taangaanga matara uaia te tuatua “kauti” e te au tangata e manganui penei kare ratou i kite tikai i tona au manako. Ei arai i te oripu anga, kua kopae tikai etai aronga apii akonoanga i te taangaanga i te reira tuatua.

Kua akamarama The World Book Encyclopedia e “mei te au peu taito, te tuatua kauti te taiku ra i tetai ua atu tu akamori anga me kore akono anga akatumuia.” Na te reira turanga, pouroa te au akaaerenga akonoanga penei ka akatakaia e ei au kauti. Inara, i roto i te au taangaanga anga ua nei o teia tuatau, te tuatua “kauti” e aiteanga tuke rai tona. Kua akakite rai te reira enetaikoropitia e “mei rotopu mai i te au mataiti 1900, te ravenga e kite ei te papuriki no runga i te au kauti kua taui i te aiteanga o te tuatua. I teia tuatau, te taangaangaia ra te reira tuatua ki te au pupu tei aru i tetai arataki ora tei akatere i te au apiianga otototi kore e te au ravenga ou ki mua.”

Te akatikaanga i te au taangaanga anga rekaia o te tuatua, kua akamarama te Newsweek makatini e ko te au kauti “ko tei matauia e au pupu tuanga meangiti ua, to ratou au mema te rauka maira to ratou akatakaanga e te akakoroanga mei tetai tangata okotai tei akauruia.” Ma te aiteite, kua akakite te Asiaweek makatini e “ko te tuatua [kauti] e papu kore ua ia, inara tei matauia ko tona akatutu anga e irinakianga akonoanga ou tei akatuia takapini i tetai arataki akauruia, tei akakitekite putuputu iaia uaorai e ko te tu tikai o te Atua.”

Te reo tei taangaangaia i roto i tetai ikianga taokotai o te Congress 100 o te Teite o Maryland, U.T.M., te arataki katoa ra i te manako akameangiti o te tuatua kauti. Te akakite ra te ikianga e ko “tetai kauti e pupu me kore e akaaerenga tei akaari i te akamori anga maata ki tetai tangata me kore i tetai manako e te taangaanga ra i te au ravenga kare e no te tu akono ma te kikite ei akakeu e ei akatere anga kia tere ki mua te au akakoroanga o te au arataki o te reira.”

Te taka marama ua ra i reira, kua marama uaia te au kauti e ei au pupu akonoanga ma te au akara anga e te au angaanga maata tei u atu i tei arikiia i teia tuatau e e tu totiara matauia. Tei matauia te akono ra ratou i ta ratou au angaanga akonoanga na roto i te tu muna. Ko te tika e manganui o teia au pupu kauti te akamamao ra ia ratou uaorai i roto i tetai au pupu tangata. Ta ratou akamori anga i tetai arataki tangata akakitekite-uaorai i te akara anga kare e tauiia e nona anake ia. E putuputu te taime te kopere ra teia au arataki e kua ikiia ratou e te Atua me kore ra e tu tu-atua tikai to ratou.

I tetai au atianga, kua taiku ia ana te au akaaerenga kare i te kauti e te aronga akakitekite no te Au Kite o Iehova e e kauti. Te kapiti ra tetai numero o te au atikara nuti pepa ou ua akenei i te Au Kite ma tetai au pupu akonoanga tei kiteaia no ta ratou au angaanga uiia. Inara ka tano ainei i te taiku i te Au Kite o Iehova e ei pupu akonoanga tuanga meangiti ua? E akamamao putuputu ana te au mema o te kauti ia ratou uaorai mei to ratou au oa, au pamiri, e pera katoa i te totaiete ua nei. Ko te reira ainei tei tupu no te Au Kite o Iehova? Te taangaanga ra ainei te Au Kite i te pikikaa e te au ravenga kare e no te tu akono ei akaputuputu mai i te au mema?

Kua kiteaia te au arataki kauti i te taangaanga i te au ravenga kikite ei akatere i te au manako o ta ratou au pipi. Te vaira ainei tetai tika e te rave ra te Au Kite o Iehova i teia? Te tapokiia ra ainei ta ratou akamorianga na roto i te tu muna? Te aru ra ainei ratou e te akangateitei ra i tetai arataki tangata? No reira, e kauti ainei te Au Kite o Iehova?

[Akameitakianga no te Tutu i te kapi 3]

Jerry Hoefer/​Fort Worth Star Telegram/​Sipa Press