Ko te Tarere Anga Ainei te Taviri ki te Autuanga?
“KARE atu e apinga puapinga maata mari ra kia re ua.” I teia tuatau e manganui te noo nei ki teia au tuatua, i te maata anga te akatutu ra i tetai tangata tereni tueporo i Marike, ko Vince Lombardi. I teianei, te piri atu nei te au enua kare i te Komuniti i te akateiteianga i te kaveinga o te tarere anga. Te akakiteanga i te tarere anga i roto i ta ratou uipaanga te karangaia ra e ko te tiketi ia i te puapinga maata. I te Orieni e manganui te au metua te taumaro ra i ta ratou tamariki ki tetai e te tono ra ia ratou ki tetai apii ke tei apii ia ratou i te tu kikite o te aereanga na roto i te au tarere akamata anga. Te papu nei i nga metua tei manata maata ra e ko te tomoanga i roto i te apii ngateitei ko te taviri ia i te puapinga anga maata i te tuatau ki mua.
E manganui te irinaki ngaueue kore ra, e ko te tarere anga te taviri ki te autuanga. Kia tau ki ta ratou i irinaki, kua tere atu te au tangata ki mua na te tarereanga kia ratou uaorai. “Te tarere anga no te akateiteianga ko te reira te tumu o te maroiroi pu tikai o te au taokotaianga Tiapani,” tei tuatuaia e te 65.9 patene o te aronga akaaere o te taokotaianga maata tei tareia e te Federation of Economic Organizations o Tiapani. E i te akaraanga e kua autu ana te au kamupani Tiapani no tetai taime. Inara, ko te tarere anga ainei te taviri ki te autuanga?
E Puapinga Tikai Ainei?
Ko te aronga te tarere ra ki etai atu te akaari ra i te tu noinoi e te tu ko au na mua. Te mataora ra ratou me autu kore tetai ke, i te tamanakoanga e ka taui te reira i to ratou uaorai turanga. No to ratou uaorai inangaro anga noinoi, penei ka taangaanga ratou i te au ravenga mamae ki tetai ke. Ka arataki ainei te kimi anga o te autuanga na roto i te tarere anga ki teaa? Ko Yasuo, tei taruku iaia uaorai i roto i te oro anga kia riro mai ei tangata rongonui i roto i tana kamupani, kua maara iaia i tona aerenga tei topa e kua tuatua e: “Ki i te vaerua tarere anga e te manakonakoanga akateiteiia, kua akaaite au iaku uaorai ki tetai ke e kua manako puapinga tikai. I te tuku angaia te reira aronga ki tetai turanga i runga ake iaku, ka mii au e ka kopekope i te au ra katoa no runga i te au aronga apii manitia o te kamupani. I te tu tikai o te reira tuatua kare oku au oa.”
Ka arataki katoa te vaerua tarere anga ki te mate vave. Akapeea? Te akapiri ra te Mainichi Daily News o Tiapani i te karoshi, me kore te mate mei ko mai i te angaanga putuputu, ki te tu akono tu-A. Te akataka maira te tu-A i tetai tu akono te autu ra ma te apiapi maata na te putuputu i te kaimoumou i te taime, i te tarereanga, e te patoi tikai. Kua akapiri atu te nga tangata apiipii i te maki pukuatu o Marike ko Friedman raua ko Rosenman i te tu akono tu-A ki te maki pukuatu o te uaua. Ae, penei te vaerua tarere anga e mea kino ia.
Ko te tarere anga i roto i te ngai angaanga ka arataki katoa atu ki tetai manamanata i te pae kopapa e te manako. Ko tetai akaraanga ko Keinosuke, ko tetai tangata okooko teitei ia no tetai o te au ngai okoanga motoka maata i Tiapani. Kua akatumu aia i tetai rekoti na te okoanga e 1,250 motoka te katoatoa. Kua akapapaia tona tutu e kua tukunaia i roto i te pia tei taangaangaia e te au manitia teitei i ko i te opati maata o te kamupani. Noatu e e riri ana aia i te taangaanga i tona au taeake ei au takainga-toka kia rauka tona au turanga akateitei, kua opara atu te kamupani iaia kia tarere. Ei tupuanga, i te mataiti okotai kua akatupu aia i te kopu tona e te ara. I te reira mataiti rai, e 15 au aronga akaaere i roto i tona kamupani kua apainaia ki te are maki, e ko tetai kua tamate iaia uaorai.
I te kainga te tautaanga kia rauka te au apinga kopapa e manganui e mei toou au tangata tupu te akaoro ra i te tangata kia maani i tetai akaariarianga o ta ratou apinga o te oraanga i roto i tetai patoi anga kare e akamutu anga. (1 Ioane 2:16) Te puapinga ua ra teia i te pae o te angaanga moni anake, te tukuanga i te moni i roto i te rima o te aronga okooko o te enua.—Akaaite Apokalupo 18:11.
E noatu rai e penei ka akatupu te vaerua tarere anga e te patoi i te angaanga kia tere ki mua, no reira rai kua akara te Ariki ko Solomona e: “Kua akara iora au i te au mea katoa i raveia, e te au angaanga tika katoa ra; kua varea katoaia oki te reira e te tangata tupu nei. E mea puapinga kore katoa te reira e te kai i te matangi.” (Koheleta 4:4) E no reira akapeea e raukaʼi ia tatou i te tamou i te au o te manako koi noo ei i roto i tetai totaiete tarere? E kiteaʼi, ka akara tatou na mua e no ea mai te manako o te tarere anga i akamata mai ei.