Tetai Ao Meitaki Atu​—E Moemoea ua Ainei?

ME I riro ana koe ei pipi no te apii anga a Mazda mei tei tutu aereia e te peroveta Irana ko Zoroaster, penei kua tapapa ana koe i te ra e oki ei te enua ki tona manea mua. Me i noo ana koe i Ereni i taito ra, penei kua moemoea ana koe i te taeriaanga o te au Airani Manuia me kore ra i te kiteanga i te oki anga mai o te Tuatau Auro tei akatakaia e te tangata atu pee ko Hesiod i te varu anere mataiti M.T.N. Penei te kimi ra rai tetai tangata Initia Guaraní Marike Apatonga i te Enua Kino Kore. Te nooanga i roto i to tatou tuatau nei, penei te manakonako ra koe e kia meitaki mai te ao no etai au ravenga poritiki me kore ra no te tupu anga o te au akamatakite anga ekoroti o teia tuatau nei.

Te Tuatau Auro, te au Airani Manuia, te Enua Kino Kore​—tei rotopu ratou i te au ingoa e manganui tei taangaangaia ei akataka i taua anoano ra, te manakonako anga no tetai ao meitaki atu.

Teia ao, to tatou ao, kare rava ia i te ngai tano. Te takinga kino tikai e maata ua atura, te au tamaki tei ta ua te tungane i te tungane tei kore rava i tupu i mua ana, te takore anga i tetai pupu tangata, te tuke ki te au mamae o etai papaki, te putaua e te pongi, te angaanga kore e te ngere i te akono anga, te au manamanata ekoroti, te au maki kare e rauka i te rapakau tei takino i te au mirioni​—te papaanga o te au mate e tupu nei i teianei i te akaraanga kare e openga. Te akamanakoanga i te au tamaki e taia nei i teia tuatau, kua karanga tetai tangata tata tianara Itale e: “Te uianga te ka tupu natura ua mai koia oki me kare ainei te patoi i te manako pakari rava atu no to tatou tuatau nei.” Te akamanakoanga i te turanga, toou manako e e tika te kimi i te akatupu i tetai apinga tuke atu, tetai apinga meitaki atu? Me kore ra e kimi anga ainei te reira i te akatupu i te inangaro no te Utopia, e moemoea kare rava e tupu? Te noo nei ainei tatou i roto i te ao meitaki rava atu i te au ao katoatoa?

Kare teia i te au manako ou. No te au anere mataiti kua moemoea ana te au tangata i tetai ao ka tutara te rotai anga, te tika, te puapinga, e te aroa. I te aerenga o te tuatau, kua akakite tetai au aronga apiipii i to ratou au manako no te au Teite tano, e au ao meitaki atu. Inara, ma te mii, kare rava i rauka ana ia ratou i te akamarama e akapeea i te maani anga ia ratou kia angaanga.

Ka rauka ainei i teia au akapapaanga e au anere mataiti te taito o te au moemoea, te au Utopia, e te au kimi anga a te tangata no tetai totaiete meitaki atu i te apii mai ia tatou i tetai apinga?

[Tutu i te kapi 3]

Ko teia ainei tei meitaki rava atu i te au ao katoatoa?