Taokotaiia i te Tatua Apa Kore o te Aroa

“Kia rotai ma te taokotai kapitiia i te aroa.”​—KOLOSA 2:2, NW.

1, 2. Eaa te mana akatataka ke te kitea nei i teia tuatau tikai?

E AKARONGO! E reo maata te koropini ra i te rangi katoa: “E mate ra oki to te enua e to te tai! tei raro atu na oki te diabolo ia kotou na, e riri maata oki tona, no te mea kua kite aia e e manga tuatau poto ua tona e toe nei.” (Apokalupo 12:12) I te topaanga o te au mataiti tataki tai, kua maata ua atu te kino o taua tuatua akakite ra no te au tangata o te enua nei.

² Kua roa te kitea anga o taua enemi maata o Iehova ra e ko te patoi (Satani) e ko te akakino (Tiaporo). Inara i teianei ko teia akavare kua rave i tetai atu tuanga tei taki atu ki te mate​—kua riro aia ei atua riri! No teaa ra? No te mea kua uriia mai aia ki vao i te rangi e Mikaela e tana au angera i te tamaki tei akamataia i te rangi i te 1914. (Apokalupo 12:7-9) Kua kite te Tiaporo e e tuatau poto ua tona no te akapapu i tana akaaoanga e ka rauka iaia i te akaariu ke i te au tangata katoa mei te akamorianga i te Atua ra. (Iobu 1:11; 2:4, 5) I te kore anga e ngai nona kia aere e oraʼi, kua aite aia e tana au temoni ki te pupu rango meri te tuku ra i to ratou riri ki runga i te au urupu tangata te oripu ua ra.​—Isaia 57:20.

3. Eaa te tupuanga no to Satani uriia mai anga ki raro i to tatou tuatau nei?

³ Ko teia au tupuanga, tei kore e akaraia e te au mata tangata, te akataka maira e eaa i teianei i tupu ei te tu tau kore i roto i te au tangata nei. Te akataka katoa ra oki i te tumu o te au tauta anga puapinga kore a te au tangata i te tivae i te tataka keanga o te pa enua katoa kare ua ra e rauka kia noo rotai. Te au pupu kopu e te au tangata ke ke te tamaki atura tetai i tetai, te akariroanga kia kore e kainga o te aronga tei akataka keia ra. Kare i te mea poitirere e te tupu nei te rave kino kia maata roa! Mei ta Iesu i totou maira, ‘ka riro te rai anga o te tangata i te mea ngiti te aroa.’ Te au ngai ravarai taau ka akara, te vaira te akairo o te rotai kore e te aroa kore i te au tangata oripu ua i teia tuatau nei.​—Mataio 24:12.

4. Eaa ra te au tangata o te Atua i o atu ei ki roto i te tu kino taka ke?

⁴ I te akara anga i te turanga o teianei ao, kua oonu atu te puapinga o ta Iesu ra pure no tana au pipi: “Kare au i pure ia koe e, ka apai ke atu koe ia ratou i teianei ao, kia tiaki maira koe ia ratou, auraka ei kino. Kare ratou i to teianei ao, mei iaku nei rai oki, kare i to teianei ao.” (Ioane 17:15, 16) I teia tuatau, te akatupu tikai ra i tei “kino” i tona riri ki runga i te aronga “tei akono i te au akauenga a te Atua ra, i tei mou marie i te tuatua-akakite a Iesu Mesia ra.” (Apokalupo 12:17) Naringa kare ta Iehova utuutu anga matakite e te aroa, kua akapouia atu tona Au Kite tiratiratu ra. Tei runga ra to tatou au oraanga i ta tatou raveanga ma te irinaki i te au apinga ravarai ta te Atua e oronga mai nei no to tatou ora i te pae vaerua e te au apinga e puapingaʼi. Te kapiti ra te reira i ta tatou uapou marieanga ia tatou uaorai kia tau ki te angaanga a Tona mana na roto ia Karaiti, mei ta te apotetoro i raurau maira ia Kolosa 1:29.

5, 6. I akapeea to te apotetoro ko Paulo manako ngakau no te au Kerititiano i Kolosa ra, e eaa ra te irava tumu tuatua no te 1995 i tau ei?

⁵ Noatu rai e penei kare a Paulo i kite mata ana ia ratou, kua inangaro ra aia i tona au taeake i Kolosa ra. Kua akakite atu aia kia ratou e: “Te inangaro nei au kia kite kotou e eaa te oonu o toku nei apiapi no kotou.” (Kolosa 2:1, The New Testament in Modern English, na J. B. Phillips) I te mea kare ta Iesu au pipi i to teianei ao, ka tauta tamou ua atu tei “kino” kia akakore i te taokotai anga o te au taeake ra na te ruruanga i rotopu ia ratou i te vaerua o teianei ao. Kua akakite te nuti ta Epaphera i apai mai mei Kolosa e kua tupu teia i tetai tuanga.

⁶ Ko tetai manako maata o Paulo no tona au taeake Kerititiano ka rauka ua kia akatakaia i te au tuatua e: “Kia rotai ma te taokotai kapitiia i te aroa.” E meitaki takake te aiteanga o tana au tuatua i teia tuatau, i roto i te ao tei ki i te tataka ke e te aroa kore. Me ka mou tatou ki roto i to tatou ngakau i te ako a Paulo, ka rekareka tatou i ta Iehova utuutu anga. Ka kite katoa oki tatou i te mana o tona vaerua i to tatou oraanga, i te tauturuanga ia tatou kia patoi atu i te au taomi anga o teianei ao. Mei teaa ra te pakari o teia akoanga! No reira, ko Kolosa 2:2 (NW) ta tatou irava tumu tuatua no te 1995.

7. Eaa te tu rotai tei tau kia kiteia i roto i te au Kerititiano mou ra?

⁷ I roto i tetai reta i mua ake ki to Korinetia, kua taangaanga te apotetoro i te kopapa tangata ei akatutu anga. Kua tata aia e “kia kore rava te tau kore i te kopapa nei” i roto i te putuputuanga o te au Kerititiano akatainuia ra mari ra “kia arite katoa ra to te au melo akono ia ratou uaorai.” (1 Korinetia 12:12, 24, 25) Mei teaa ia akatutu anga umere tikai! To tatou au mero kopapa te angaanga kapipiti ra, kua kapitiia atu ratou tataki tai ki te kopapa ra. Mei te reira katoa oki te tu o to tatou taokotai anga taeake i te ao katoa nei, kua kapiti katoaia te aronga akatainuia ma te au mirioni ua atu o te aronga te manakonako ra kia noo ki runga i te enua parataito. Auraka rava tatou e akataka ke ia tatou uaorai mei te kopapa o te au taeake Kerititiano kia noo tataka ke! I te raveanga angaanga na roto mai ia Iesu Karaiti, te aere maira te vaerua o te Atua kia tatou i roto i te aite maata i to tatou taokotai anga ma to tatou au taeake.

Rotai Tei Tau ma te Kite

8, 9. (a) Eaa te tumu tau no ta tatou tauturuanga i te tu rotai i roto i te putuputuanga? (e) I akapeea i raukaʼi ia koe te kite ia Karaiti ra?

⁸ Ko tetai o ta Paulo au tumu maata koia oki ko te rotai Kerititiano tei kapitiia ma te kite, e maata oki ki tei piri atu ia Karaiti ra. Kua tata a Paulo e ka tau te au Kerititiano “kia rotai ma te taokotai kapitiia i te aroa e ma te manako anga i te au apinganui katoa o te akapapu anga tikai o to ratou maramaanga ma te manako anga i tetai kite tika tikai o te muna tapu a te Atua, koia, a Karaiti.” (Kolosa 2:2, NW) Kua rauka ia tatou te kite​—te au tika—​mei to tatou akamata anga mai rai i te apii i te Tuatua a te Atua ra. Ei tuanga no te raukaanga te kite e eaa te manganui o teia au tika te tau ra i te akakoro anga a te Atua, te kite nei tatou i te tuanga puapinga maata o Iesu. “Tei vaoo katoatoaia te apinga ra o te pakari e te kite i roto iaia ra.”​—Kolosa 2:3.

⁹ Ko te reira ainei toou manako ngakau no Iesu e tana tuanga i roto i ta te Atua ra akakoroanga? E manganui to Kerititome te viviki ra i te taiku ia Iesu, ma te karanga anga e kua ariki iaia e kua akaoraia oki. Inara te kite tika ra ainei ratou iaia? Kare ua, no te mea ko te maata anga te irinaki ra i te apii tau kore i te tuatua tapu no te Toru Tai. Kare e kua kite anake koe i te tuatua mou i teia tu mari ra penei kua atea katoa toou kite i ta Iesu i tuatua e i rave oki. E au mirioni ua atu kua tauturuia i teia na te apii taka meitaki i te taangaanga marieanga i te puka Te Tangata Maata Rava Atu Tei Ora Ana. Inara ka tau tatou kia rave tamou i te akaoonuanga i to tatou kite ia Iesu e tona au mataara.

10. Na roto i teea mataara e raukaʼi ia tatou te kite vaooia ra?

¹⁰ Kare te aiteanga o te tuatua e “te apinga ra o te pakari e te kite” kua “vaoo katoatoaia” i roto ia Iesu, e kare taua kite ra e rauka mai ia tatou. Kareka ra, te aite ra ia ki tetai ngai ko anga tuera ua. Kare tatou e kimi aere takapini i tetai ngai maata ma te kimianga manako e ka akamata te ko anga ki ea. Kua kite ke ana tatou e​—te akamata maira te kite tikai i ta te Puka Tapu i akakite maira no Iesu Karaiti. Me maata atu to tatou ariki anga i ta Iesu tuanga i te akatupuanga i ta Iehova akakoro anga, ka rauka ia tatou te au apinga o te pakari mou e te kite tikai. No reira ka tau tatou kia oonu atu te ko anga, ma te taakianga mai i te au poe me kare te au apinga oko maata mei ko mai i teia tumu ta tatou i ko ana i mua akera.​—Maseli 2:1-5.

11. Akapeea e raukaʼi ia tatou te akamaata atu i to tatou kite e te pakari na te tamanako marieanga ia Iesu? (E akatutu mai ma ta Iesu oreianga i te au vaevae o tana au pipi, me kare e taiku mai i tetai atu au akatauanga.)

¹¹ Ei akatauanga, penei kua kite tatou e i orei ana a Iesu i te au vaevae o tana au apotetoro. (Ioane 13:1-20) Inara, kua tamanako marie ainei tatou i te apiianga tana i apii mai e te tu manako tana i akaari maira? Na te raveanga i te reira, penei ka apai mai tatou i tetai apinga pakari te ka tauturu ia tatou​—ae, ka akakeu ia tatou—​kia taui i ta tatou akono anga i tetai tungane me kare i tetai tuaine tei roa ra tona tu tangata i te akaongoongo ia tatou. Me kare me ka orongaia mai tetai angaanga kare ra i tau ki ta tatou i inangaro, penei ka tuke to tatou manako i muri ake i te rauka anga ia tatou te aite anga puapinga tikai o Ioane 13:14, 15. Ko te tu ia o te tupu anga kia tatou no te kite e te pakari. Penei eaa te tupu anga kia etai ke ra me ka akariro tatou ia tatou uaorai kia aru vaitata atu i te akaraanga o Karaiti ma te kite maata atu? Penei ake ka maata ma te ‘rotai te taokotai kapitiia i te aroa’ te anana ra.a

Ka Kino te Rotai Anga me te Aere Ke te Manako

12. No runga i teea kite te ka tau tatou kia matakite?

¹² Me ka rauka i te kite tika ‘tikai i te akarotai ia tatou ma te taokotai kapitiia i te aroa,’ eaa te ka tupu mei tei “tapikipikiia e e kite”? Ko te tua patoi anake​—e taumaro, e pekapeka, e te tapae keanga mei te akarongo. No reira ka tau tatou kia paruru atu i taua kite pikikaa ra, mei ta Paulo i akamatakite ra ia Timoteo. (1 Timoteo 6:20, 21) Kua tata katoa a Paulo: “Ko te pikikaa mai aea tetai tangata atu ia kotou i te tuatua tarekareka, i na reira atu ei au. E matakite ko te pou aea kotou i te tuatua pakari e te puapinga kore a tetai tangata atu, i te tuatua ikuiku a te tangata nei, tei tau i te apiianga mua o teianei ao, kare i ta te Mesia.”​—Kolosa 2:4, 8.

13, 14. (a) Eaa ra te au taeake o Kolosa ra i vai ei ki roto i te tu kino no runga i te kite? (e) Eaa ra tetai papaki i teia tuatau ka manako ei e kare ratou i roto i taua tu kino ra?

¹³ Kua koropiniia te au Kerititiano o Kolosa e te mana ereere o tei tapikipikiia e e kite. E manganui te au tangata i vaitata ua i Kolosa tei akangateitei maata i te au apiianga Ereni. E aronga akonoanga ngati Iuda katoa etai tei anoano ra kia akono te au Kerititiano i te Ture a Mose, mei tana au ra oroa ra e tei umuumuia ra no te kai. (Kolosa 2:11, 16, 17) Kare a Paulo i patoi i tona au taeake kia kore e rauka te kite mou, inara kua tau ratou kia matakite ko te pou aea ratou i te tuatua pakari e te puapinga kore a te tangata nei no te oraanga e te au angaanga. Ka rauka ra ia koe kia ariki e me ka tuku ua tetai papaki i te putuputuanga i to ratou manakoanga i te au ikianga kia aratakiia e te reira au manako tau kore i te tuatua tapu e te au akavaitata anga ki te oraanga, ka patoi ia i te rotai e te aroa i rotopu i te au mema o te putuputuanga ra.

¹⁴ ‘Ae,’ penei ka manako koe, ‘te kite nei au i te kino tei aroia e to Kolosa, inara kare au i roto i te turanga kino no te riro ke i te mana o te au manako Ereni ra, mei to tetai meta mate kore ra me kare tetai atua toru tai; kare katoa au e kite ana i tetai tu kino no te akavareia e te au orote peikani ra a te akonoanga pikikaa taku i ora mai ana.’ Meitaki ia. E mea meitaki kia ngaueue kore i te maata atu o te tuatua mou tei akakiteia maira na roto ia Iesu e te vaira i roto i te au Tuatua Tapu. Inara, penei tei roto tatou i te tu kino mei etai atu au apii anga me kare au manako tangata te vai nei i teia tuatau?

15, 16. Eaa te manako anga i te oraanga penei ka akakino i te manakoanga o tetai Kerititiano?

¹⁵ Ko tetai tu manako mei te reira kua roa te vai anga mai: “Teiea ua te aerenga mai nona i karangaia ra? te vai ua nei rai oki te au mea katoa nei mei te moe anga mairai o te ai metua ra, mei te maani anga mairai o te enua ra.” (2 Petero 3:4, The New English Bible) Penei ka tuatuaia te reira manako na etai atu au tuatua, inara ko te manako anga ko taua tu rai. Ei akatauanga, penei ka manako ua tetai e, ‘I toku kite mua anga i te tuatua mou i te au ngauru mataiti i topa, te “vaitata ua maira te openga.” Inara kare ia i konei i teianei, e koai te kite ra e aea e tae mai ei te reira?’ E tika rai, kare e tangata i kite aea e tae mai ei te openga. Inara, e tamanako i te tumu tau ta Iesu i raurau maira: “E matakite oki ia kotou, e akamaroiroi, e e pure; kare oki taua tuatau ra i kitea e kotou.”​—Mareko 13:32, 33.

¹⁶ Mei teaa ra te tu kino kia manako e, no te kore e kite e aea te openga e tae mai ei, ka tau tatou kia parani i te akaki i to tatou oraanga e kia tau ki “te mea matauia”! Ka akaataia te reira tu i te manakoanga e: ‘Angari ake au i te rave i te au takainga te ka akatika iaku (me kare taku tamariki) kia rave i tetai angaanga maata te tutaki e ka rauka iaku kia rekareka i tetai oraanga pumaana. Inara, ka aere atu au ki te au uipaanga Kerititiano e ka piri atu ki etai angaanga tutu aere, tera ra kare e tumu noku kia akauapou iaku uaorai me kare ra kia rave i te au tuku anga atinga maata.’​—Mataio 24:38-42.

17, 18. Eaa te manako ta Iesu ratou ko tana au apotetoro i raurau mai ia tatou kia mou?

¹⁷ Inara, kare e rauka kia akakore e i akamaroiroi mai ana a Iesu e tana au apotetoro ia tatou kia akono ma te tu rapurapu no te tutu aere i te tuatua meitaki, ma te akauapouanga ia tatou uaorai e kia rekareka i te au tuku anga atinga. Kua tata a Paulo: “Teia ra taku tuatua, e te au taeake, te poto nei te tuatau. E tau i te aronga e vaine ta ratou ra, kia riro mei te mea e kare; . . . e te aronga i oko ra, mei te mea e kare a ratou; E te aronga i rave i to teianei ao ra, mei te mea e kare i rave; te ngaro ke nei oki te tu o teianei ao.”​—1 Korinetia 7:29-31; Luka 13:23, 24; Philipi 3:13-15; Kolosa 1:29; 1 Timoteo 4:10; 2 Timoteo 2:4; Apokalupo 22:20.

¹⁸ E mamao ke atu i te akakiteanga e kia akariro tatou i te oraanga meitaki ei akakoro anga na tatou, kua tata mai a Paulo i raro ake i te akauru anga: “Kare ua oki a tatou apinga i apai mai ki teianei ao; e kua kitea tikaia e kare takiri e apinga e tika kia apai katoa kia aere ke tatou nei. E teianei, e kai ta tatou, e te kakau, kia mareka tatou i te reira. . . . Kukumi ua ïa i te kukumianga meitaki ra i te akarongo; e opu atu i te ora mutu kore, i kapikiiaʼi koe, e kua aaki oki i te aakianga tuatua meitaki ki mua i te aroaro o te au kite e manganui ra.”​—1 Timoteo 6:7-12.

19. Eaa te ka tupu ki te putuputuanga me ariki te aronga i roto i te reira i te manako no te oraanga ta Iesu i akamaroiroi maira?

¹⁹ Me e au Kerititiano maroiroi to tetai putuputuanga tei tauta pakari ra i te ‘aaki i te aakianga tuatua meitaki,’ ka tupu ua mai te tu rotai. Kare ratou e tuku ua ki te tu manako e, ‘E apinga maata toou, kua uipa ïa ki te vairanga no te au mataiti e manganui; e akaangaroi marie, e kaikai, e inu, e kia rekareka marie.’ (Luka 12:19) Kareka ra, te taokotai ra ratou ma te tauta anga okotai, ma te rekareka kia oronga atu i te au atinga kia rave i te ka rauka tikai i roto i teia angaanga te ka kore e rave akaouia.​—Akaaite ia Philipi 1:27, 28.

Kia Matakite i te Tuatua Tarekareka

20. Eaa tetai atu ngai ke penei ka arataki keia te au Kerititiano ra?

²⁰ Inara, te vaira etai atu au mataara penei ka ‘akavare ma te tuatua tarekareka, i te au Kerititiano me kare e au akavare anga puapinga kore te ka tamanata i te ‘tu rotai ma te taokotai kapitiia i te aroa.’ Kua tata te opati manga o te Totaiete Punanga Tiaki i Tiamani e: “Kua taki atu tetai apinga i tupu ki te taumaro anga i roto i te au putuputuanga e manganui, kua akataka ke te au papuritia e te aronga pakari ia ratou i te turuanga i te tu rapakau tei raveia ra e tetai taeake.” Kua tuatua katoa mai ratou: “No te maata o te au ravenga tuke tuke tei raveia e te maata oki o te aronga maki ra, e ngai teia te tuera ua ra no te taumaro anga e, me te au ravenga rapakau te piri atura ki te purepure, penei ka akatupu mai i te kino.”​—Ephesia 6:12.

21. Penei ka akapeea e ngaro ei te manako tika o tetai Kerititiano i teia tuatau?

²¹ Te anoano ra te au Kerititiano kia ora ua atu ratou ma te meitaki kia raukaʼi ia ratou te akamori i te Atua. Inara, i teianei akatereanga te o atura tatou ki te ruaineanga e te maki tei tupu mai no te tu apa ua. Kare e kia akaketaketa i te au maroanga no te oraanga meitaki, ka tau tatou kia akara matariki atu i te rapakau tikai, no tatou e no etai ke katoa. (1 Timoteo 4:16) Ko Karaiti te tumu no te akara atu i taua rapakau ra, mei iaia katoa i riro ra ei tumu no ta Paulo akoanga i to Kolosa ra. Inara kia maara, kua akakite a Paulo e penei ka aere mai tetai papaki ma te “tuatua tarekareka” te akaariu ke anga i to tatou manako mei ia Karaiti, penei ki etai atu au ravenga kimikimi anga, e etai au rapakau anga, me kare au tu kai akatikaia ra.​—Kolosa 2:2-4.

22. Eaa te tu manako tau no tatou i te au manako e manganui no runga i te au ravenga no te kimikimi anga maki e te rapakau anga?

²² Te pokia ra te au tangata takapini i teianei ao e te au akakitekite anga e te au pepa akatika anga no te au tu ravarai o te rapakau anga e te au kimikimi anga i te maki. Ko tetai papaki o te reira te rave ateaia ra e te kiteia ra; ko etai ke atu te akaapa ateaia ra me kare te tarotokakaia ra.b Tei runga ra i te aronga tataki tai te apainga kia tuku i te tika e eaa tana ka rave no tona oraanga meitaki. Inara ko te aronga te ka ariki i ta Paulo ako anga ia Kolosa 2:4, 8 ra ka paruruia kia kore e akavareia e te “tuatua tarekareka” me kare te “tuatua ikuiku” te arataki ke ra i te aronga e manganui tei, ngere i te manakonako anga no te Patireia, e te anoano maata ra kia akaoraia. Noatu rai me te papu ra tetai Kerititiano e te meitaki ra tetai rapakau anga nona, kare aia e tau kia akakitekite maata i te reira i roto i te akataeake anga Kerititiano ra, no te mea penei ka riro te reira ei tumu totoa ateaia te uriuri anga e ei taumaro anga. Ka akakite aia i reira e te akangateitei maata ra aia i te puapinga o te tu rotai i roto i te putuputuanga.

23. Eaa ra i raukaʼi ia tatou te tumu takake no te rekareka?

²³ Kua akaketaketa maira Paulo e ko te rotai Kerititiano tetai akatumu anga tikai ia no te rekareka. I tona tuatau ra e mea papu e e mea ngiti mai te numero o te au putuputuanga i to teia tuatau nei. Inara kua rauka iaia i te tata ki to Kolosa e: “Taka ke ua mairai taku kopapa, tei i o kotou rai toku vaerua, i te rekareka anga, e te akara anga atu i to kotou akono meitaki, e te tinamou o to kotou akarongo i te Mesia ra.” (Kolosa 2:5; akara katoa ia Kolosa 3:14.) Mei teaa atura te maata o to tatou tumu no te rekarekaanga! Penei ka kite tatou i te tu tika tikai o te rotai anga, te papa meitaki, e te ngaueue kore o te akarongo i to tatou uaorai putuputuanga, tei akaata maira i te turanga matauia o to te Atua au tangata i te ao katoa nei. No reira i te tuatau poto te toe nei i teia akatereanga nei, kia manako papu tatou tataki tai “kia rotai ma te taokotai kapitiia i te aroa.”

[Au Tataanga Rikiriki i Raro]

I Manako Ana Ainei Koe?

◻ Eaa te irava mataiti no te 1995 a te Au Kite o Iehova?

◻ Eaa ra i tau ei te au Kerititiano o Kolosa kia rotai ma te kapitiia i te aroa, e eaa oki tatou i tau ei kia pera i teia tuatau nei?

◻ Eaa te manakonako anga akavare no runga i te oraanga te ka tau tikai te au Kerititiano kia matakite atu i teia tuatau nei?

◻ Eaa ra i tau ei te au Kerititiano kia matakite auraka e akavareia e te tuatua tarekareka no runga i te oraanga meitaki e te kimikimi anga i te maki?

[Au Tutu i te kapi 17]

Tei runga ainei taau au parani no te tuatau ki mua ra i to Iesu parutia?