“Noea Mai i Reira te Moni?”

KUA umere tikai te aronga akarakara i te vitio a te Totaiete Punanga Tiaki, “Jehovah’s Witnesses​—The Organization Behind The Name.” Te kite ra ratou i te au tangata e te au vaine manea no te au iti tangata e te au ngai tukeke mai, te katakataanga e te angaanga kapiti anga ma te rotai. Kare to ratou au manako i mou ua ki runga i te au tauatini ua atu o te aronga angaanga mataora inara ki runga katoa i te ngai mamaata o te au are i te opati maata o te Totaiete i Brooklyn e i ta ratou au pama i Wallkill, New York. Te akaari maira te vitio e i roto i teia au are nei te kiteaia ra te ravenga kite mei to teia tuatau nei​—te apinga viviki no te neneianga e te vaianga te maanianga i te au mirioni au puka e manganui i te au marama tataki tai, te au apinga komopiuta tukeke, e te au tipatimani e manganui ei turu atu i te neneianga o te au puka.

Te akaata maira teia i te akapouanga maata o te au apinga. No reira te ui ra tetai papaki e, “Noea mai i reira te moni?”

Te umere katoa ra te aronga e atoro ra i te opati maata o te Totaiete i te ao katoa. Te akatoro ra ratou i to ratou au kaki kia kite atu i te are nooanga ou e 30 taua, ko tetai teia o te au are e manganui tei akonoia ei ngai nooanga no te au orometua tauturu e tere atu i te 3,000 e angaanga ra i reira. Tetai atoro anga ki te Ngai Apiipii Anga ou o te Punanga Tiaki mei tetai 110 kiro mita i te apatokerau o Brooklyn te akaruke katoa ra i te manganui kia tuua ma te umere. Te akatuia ra rai, ka nooia te reira e tetai 1,200 aronga angaanga. E rua nga pupu mitinari ka tereniia ki reira i te au mataiti tataki tai e ka tukunaia atu ki ta ratou au tuanga angaanga i te au enua ke. E mei teia ngai katoa te orongaia ra te arataki anga ki te au putuputuanga o te Au Kite o Iehova i te Unaite Teite e tere atu i te 10,000. E manganui te au manga i te ao katoa i ou ua ake nei kua akamaata katoa i to ratou au ngai me kore ra te rave ra i te reira. Te rave anga i teia au angaanga katoatoa te anoano maataia ra te moni. Te ui ra te au tangata e, “Noea mai i reira te moni?”

Te pauanga koia oki te aere maira te reira mei te au tangata noa nei mei tetai ia tatou nei. E au tangata ratou, i te ao katoa, tei anoano i te rave i te ka rauka ia ratou kia akatere i te angaanga Kerititiano puapinga o te tutu aereanga e te apiianga. Te reira tu puareinga o te vaerua kua tupu ana i mua ana.

Te Akaraanga tei Tukuia e Iseraela i Taito Ra

Tere atu i te 3,500 mataiti i topa, kua tupu te anoano no te au tauturu oronga ua. Kua ikuiku a Iehova kia Mose kia akatu i tetai tapenakara, me kore ra i tetai “Are uipaanga,” kia taangaangaia i te akamori anga Iaia. Te tutu tu-Atua i orongaia mai kua anoanoia te au apinga memeitaki tuke tuke. Kua akaue a Iehova e: “E rave kotou i te atinga na Iehova no roto ia kotou uaorai nei: ko te tangata ngakau oronga, e apai mai aia i te reira, koia te atinga na Iehova.” (Exodo 35:4-9) Akapeea te au tangata i te ariu anga mai? Te akakite maira te papaanga e “kua aere maira ratou, te tangata katoa i tae tona ngakau, te aronga katoa i tika to ratou ngakau, kua apai maira ratou i te atinga na Iehova, no te angaanga i te Are uipaanga ra, te au peu ravarai oki no te reira ra, e no te au kakau tapu ra.” Teia “apinga ngakau tae” kare i roa ana kua maata roa ‘maata rava atu i tei anoanoia no te angaanga ta Iehova i akaue maira e rave.’ (Exodo 35:21-29; 36:3-5) Mei teaa ia vaerua meitaki e te oronga ta te au tangata i akaari!

E iti ake i te 500 mataiti i muri mai, kua aere akaou tetai kapiki anga no te tauturu oronga ua mei te iti tangata Iseraela. Te anoano o te Ariki ko Davida kia akatu i tetai are tamou no Iehova ki Ierusalema kua vaitata i te kiteaia na roto i tana tamaiti ko Solomona. Na Davida uaorai i akaputuputu e i oronga mai i tetai tuanga maata o te au mea tei anoanoia. Kua piri mai tetai papaki i te tuku anga a Davida i te kapiki anga kia apai mai i “te apinga oronga kia Iehova.” Tei tupu? “Mareka rava akera te tangata i te mea kua oronga ua ratou; e ma te ngakau meitaki i te oronga ua anga kia Iehova: mareka katoa akera te ariki ra ko Davida e rekareka maata.” (1 Paraleipomeno 22:14; 29:3-9, akaaite ia NW.) Te ario anake e te auro vaitata e mei te $50 pirioni i te moni o teia tuatau nei!​—2 Paraleipomeno 5:1.

Te kite nei tatou mei teia au akaraanga e kare rava tetai tangata i maroia ana kia oronga. Kua “oronga” tikai e kua raveia “ma te ngakau meitaki.” Ka mareka ua rai a Iehova i te tauturu ngakau tae. Mei te reira rai, i te tu anga mai te atianga kia oronga i te moni ei tauturu i te au Kerititiano e ngere ra, kua tata te apotetoro ko Paulo e auraka te reira kia riro ei “mea umuumuia atu.” Kua karanga aia e: “E oronga te tangata ravarai i tana i akakoro i roto i tona ngakau; eiaa ma te noinoi, e mei te mea e no te umuumu: ko te tangata e oronga ma te rekareka ta te Atua e inangaro.”​—2 Korinetia 9:5, 7.

Te Anoano i Teia Tuatau

Te vaira ainei te anoano no te au tauturu i teia tuatau? Kare e ekoko anga i te reira, e ka maata atu te reira i te tuatau e tere atura ki mua. No teaa ra?

E au ikuikuanga takake tei orongaia ki te au Kerititiano no teia tuatau openga. Kua akaue a Iesu i tana au pipi: “E teianei, ka aere kotou, e akariro i to te pa enua katoa ei pipi; ka bapetizo atu ei ia ratou i te ingoa o te Metua, e no te Tamaiti, e no te Vaerua Tapu; Ma te apii atu ia ratou, kia akono i te au mea katoa taku i akaue atu kia kotou.”​—Mataio 28:19, 20.

Te akaotianga i teia apiianga maata e te angaanga tutu aere ia tatou e akavaitata atura ki te akamutu anga o “te openga o teianei ao” te anoanoia ra te taime e te au apinga maata. No teaa ra? No te au mea katoatoa e o maira i te apaianga atu i te tuatua akakite o to te Atua Patireia “ki te openga o te enua ra.” (Angaanga 1:8) Te maata anga o te au tangata kare i kite tikai i te au Tuatua Tapu mei te iti tangata ngati Iuda i te anere mataiti mua ra. Ko te tika, e maata te numero o te au tangata i te enua nei kare takiri i matau i te Puka Tapu e kare e akamanako atu ana i te reira ei Tuatua na te Atua. Te aronga tutu aere ka tau kia tereniia e kia tonoia atu ki te au enua mamao. (Roma 10:13-15) E akamanako katoa i te numero o te au reo e o maira! Te aronga e tutu aereia ra ka anoanoia kia rauka ta ratou au Puka Tapu e te au puka tei akatumuia ki runga i te Puka Tapu ei tatau e ei apii i roto i to ratou uaorai reo. E taeriaʼi te katoatoa ma te tau tikai e te taki anga atu ia ratou kia tere ki mua i te pakari anga i te pae vaerua kia rauka ia ratou te tauturu i etai aronga ke atu te anoanoia ra te akaaerenga i te au ngai ravarai.​—2 Timoteo 2:2.

Kua karanga a Iesu e ka “tutu aereia te evangelia o te basileia nei” na mua “e kako rava ake te ao katoa nei; ei kite no te pa enua ravarai; ko te openga iora ïa i reira ra.” (Mataio 24:14) No reira ko teia te tuatau i te oronga i te au mea katoatoa te ka rauka ia tatou i te akaoti i te reira angaanga puapinga. Ka taangaanga meitakiia ta tatou au apinga i mua ake ka kore ei te puapinga o te au mea puapinga i te pae kopapa.​—Ezekiela 7:19; Luka 16:9.

Te Aere ra te Moni Kiea?

Te nenei ra te Totaiete Punanga Tiaki i te au puka Puka Tapu i roto i te au reo e tere atu i te 230, e pera katoa i te tataanga a te matapo na te aronga matapo e te au vitio akairo rima na te taringa turi. Te umuumu ra te reira i tetai au pupu no te uri e te akatanotano i roto i te au reo tataki tai. Te akamanako ua anga i teia au angaanga katoatoa, no te makatini Punanga Tiaki tikai, tei neneiia i te au marama tataki tai i roto i te au reo e 121 e mei te reira katoa e 101 o ratou, e mea umere tikai. Inara te anoanoia ra te reira e raukaʼi i te au tangata i te ao katoa i te tatau i te au akakite anga aiteite. I te au mataiti ravarai te maata atura te moni o te pepa e tetai au apinga tei taangaangaia ei maani i te tuatua akakite o te Patireia i roto i te tu neneiia me kore ra te tepe me kore te au rekotianga vitio. Ka tutakiia te reira au apinga na te taangaangaanga i te au moni tauturu a te au taeake.

Te angaanga tutu aere e te apiianga te raveia ra i te au ngai e te angaangaia ra e tetai au putuputuanga tere atu i te 75,000 o te Au Kite o Iehova i te ao katoa. Ei taokotai e ei akamaroiroi ia ratou, te atoro atura te au akaaere tutaka tei tereniia i te au putuputuanga tataki tai e rua taime i te mataiti. Te rave katoa ra te au akaputuputuanga i tetai tuanga maata i te orongaanga i te ikuiku anga. Ka tarauia tetai au ngai mamaata no te au uruoaanga, tei riro tikai ei akamaroiroianga i te akarongo. Te taangaanga katoaia ra ta kotou au tauturu no teia au akakoroanga.

Koi rave uaiaʼi te au akaputuputuanga e toru taime i te mataiti, te akaputuputu ra te au putuputuanga tataki tai i te au epetoma no nga uipaanga e rima. (Akaaite ia Exodo 34:23, 24.) No te maata o te aronga ou e ariu maira kite tuatua meitaki kua kapitiia mai te au tauatini ua atu au putuputuanga ou i te au mataiti tataki tai. Ma te tauturu o te au mirioni tara o te au rounu tei tuaia na roto i te Totaiete, e anere ua atu au Are Uipaanga Patireia ou i akatuia i te au mataiti tataki tai, e e manganui katoa te vai atura te akaouia ra e te akamaataia ra. Noatu e ka takapinipini ua teia moni tei taangaangaia i te au taime ravarai, te tupu ua atura te anoano no te reira.

Tetai ngai kare e rauka te akaaite atu i te tupuanga ko te pa enua o Europa Itinga tei noo i raro ake i te Toviete Unioni i mua ana. Mei teaa te rekareka i te tere anga o te au nuti ki mua e kua akatueraia te angaanga i teia au ngai! I teianei te tukunaia ra te au mitinari ki teia au enua e manganui. Kua akamataia te au manga ou i tetai au enua, te akamaataanga i te numero o te au orometua tauturu ei au mema no te ngutuare Betela i te ao katoa kia tere atu i te 15,000. Ko te tika, e mea tau kia okoia me kore ra kia akatuia te au are manga ei ngai noo anga no ratou. Ta kotou au tauturu te riro ra ei tauturu i te akaki i tei anoanoia.

Teia au angaanga katoatoa kare i ngaro ia Satani e tana au temoni. Te rave ra ratou i te ka rauka ia ratou i te tapupu i te au tauta anga a te au tavini tiratiratu o Iehova me kore ra te akatupu ra i te au manamanata no ratou. (Apokalupo 12:17) Te aiteanga o teia te maata maira te apainga i te pae o te ture ei paruru i te tika o te iti tangata o te Atua kia tutu aere e kia noo rotai ua ma tana au ture tuatua tika. Kapiti atu i te reira, te au takinga kino anga o te tamaki i roto i ta Satani akatereanga o te au mea nei, pera katoa te au tumatetenga natura, no reira te anoano putuputuia ra te au putunga apinga tauturu no to tatou au tungane e te au tuaine e etai atu i ngere ma ratou ra. Ta kotou au tauturu te tauturu ra i te oronga atu ki teia angaanga puapinga.

Ka Tutaki a Iehova Ia Koe

Te taangaangaanga ma te oronga ua i to tatou taime e ta tatou au apinga ei akatere i te angaanga a te Atu te apai maira i te au akameitaki anga maata. Akapeea? No te mea na te Atua, te tumu o te au mea katoatoa, e tutaki mai ia tatou. Te akakite ra a Maseli 11:25 e: “Te tangata oronga ra, e matu ïa: e tei tamauu i te vai ra, ka tamauu katoaia mai aia.” Te mareka tikai ra a Iehova me rave tatou i ta tatou tuanga i te akatere i tana akamori anga ki mua. (Ebera 13:15, 16) Kua taputou aia ki te iti tangata Iseraela i taito ra te ka apai mai i te tauturu i anoanoia i raro ake i te Ture koreromotu ra e: “Ei timata anga te reira iaku nei i tenana, te tuatua mairā Iehova Sabaota ra; i te kore anga au i te kiriti anga i te au māramārama o te rangi ra, ka riringi atu ei i te apinga maata ua atu, kare e ngai e o ei, ei meitaki no kotou.” (Malaki 3:10) Te puapinga i te pae vaerua e rekareka ra te au tavini o Iehova i teia tuatau nei te akakite maira i te tika e te tamou ra te Atua i tana taputou.

Teia angaanga maata o te akakitekite anga ki te katoatoa i te ra akaora anga e te tauturu anga i te aronga ngakau tika ki runga i te mataara ki te ora kare e aere ua atu e tuatau ua atu. (Mataio 7:14; 2 Korinetia 6:2) Inara ko te au tangata katoatoa o te “mamoe ke atu” a te Atu ka tau kia akaputuputuia mai. (Ioane 10:16) Mei teaa te puapinga maata i te aravei atu i te reira akaaoanga i teia tuatau nei! E mei teaa te mataora ia tatou tataki tai, i te akaraanga atu ki muri mei te ao ou tuatua tika ra, te karanga anga e, ‘kua rave ana au i tetai tuanga maata i roto i te reira angaanga akaputu anga openga’!​—2 Petero 3:13.

[Pia i te kapi 30, 31]

Te Tauturu Anga Mai Etai Pae i te Angaanga Tutu Anga Patireia

AKAPUTU ANGA NO TE ANGAANGA I TEIANEI AO: E manganui te akapae ra me kare te akapapa ra i tetai moni no te tuku ki roto i te au pia tauturu tei akairoia: “Au Tauturu no te Angaanga i Teianei Ao a te Totaiete​—Mataio 24:14.” I te au marama katoatoa e tuku ana te au putuputuanga i teia au moni ki te opati maata o teianei ao i Brooklyn, New York, me kare ki te opati manga i te reira ngai.

APINGA AROA: Kia tuku tikaia mai te au moni tauturu tei oronga uaia ki te Watch Tower Bible and Tract Society of Pennsylvania, 25 Columbia Heights, Brook­lyn, New York 11201-2483, me kare ki te opati o te Totaiete te tavini ra i toou ngai. Ka rauka katoa te au apinga akamanea me kare tetai atu au apinga puapinga i te orongaia mai. Kia aru mai tetai reta poto ua i te au apinga tei akaputuia no te akakite i teia oronga anga tauturu.

AKANOO ANGA I TE TURANGA NO TE TAUTURU: Penei ka orongaia te moni ki te Totaiete Punanga Tiaki kia tukuia ki tetai ngai tei irinakiia, tae roa ki te mate o te tangata oronga, e a tetai taime me anoanoia e te reira tangata, ka akaokiia te reira kiaia.

AKAPAPU ANGA: Kia puapinga te Totaiete Punanga Tiaki i tetai tika anga no te akapapu anga i te ora anga me kore i tetai akapapa anga no te akaangaroi anga me kore moni pakari. Kia akakiteia ki te Totaiete i tetai ua atu akanoo anga mei teia.

AKAPAPA ANGA PANGIKA: Penei kia tukuia te au akapapa anga pangika, te au pepa tuku anga, me kare te au akapapa anga akaangaroi no tetai tangata ki roto i te tataanga irinakiia no me kare tei maaniia kia tutakiia me mate ake ki te Totaiete Punanga Tiaki, i tau ki te au ikuiku anga a te pangika o te reira ngai. E tau kia akakiteia te Totaiete no teia ua atu tu akanoo anga.

APINGA AKAPUTUIA E TE PONI: Penei ka orongaia te au apinga akaputuia e te poni ki te Totaiete Punanga Tiaki ei apinga aroa me kare i raro ake i tetai akanoo anga ka aere ua rai te puapinga ki tei oronga mai i te reira.

ENUA: Penei ka orongaia te au enua e te au are ka rauka i te oko ki te Totaiete Punanga Tiaki ei apinga aroa me kare te akono anga i tetai pepa koreromotu ki tei oronga mai i te reira, te ka rauka iaia i te noo ki roto i te tuatau te ora ra aia. E tau kia araveiia atu te Totaiete i mua ake ka orongaʼi tetai ua atu enua ki te Totaiete.

AU KOREROMOTU E TE AU TATAANGA IRINAKIIA: Penei ka tikaia te apinga me kare te moni ki te Totaiete Punanga Tiaki na roto i tetai koreromotu tikaia e te tataia, me kare kia akairoia te Totaiete ei puapinga no tetai tataanga koreromotu irinakiia. Tetai tataanga irinakiia tei orongaia ki tetai akaaerenga akonoanga ka riro te reira ei au puapinga i te pae o te tero i tetai taime. E tau kia tukunaia tetai kopi o te koreromotu me kare tataanga irinakiia ki te Totaiete.

PARANI NO TE ORONGAANGA: Kua akapapa te Totaiete i tetai poroutia i roto i te reo Engarani ko te tumu tuatua “Parani no te Orongaanga.” Te au tangata i te Unaite Teite te parani ra i te oronga i tetai apinga aroa takake ki te Totaiete i teianei me kare i te akaruke i te matenga i tetai tika anga penei ka tauturuia e teia akakite anga. Te tika ra te reira me ka inangaro ratou i te akaoti i tetai akakoroanga a te pamiri me kare i tetai akakoro anga i paraniia no te enua koi taangaanga ei i te au puapinga o te tero ei akameangiti mai i te tutaki o te apinga aroa me kore ra o te tika anga.

No tetai akakite anga tuatua maata no runga i tetai o te au mea i runga ake nei, e tata ki te Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, me kare ki te opati o te Totaiete te tavini ra i toou enua.