Tei Oronga i te “Au Apinga Aroa Meitaki Ravarai”

“I tetai atianga kua aravei mai tetai orometua o te ekaretia Taui Anga kiaku. Kua inangaro aia i te kite e akapeea au i te akatere anga i taku ekaretia. Kua karanga atu au kiaia: . . . ‘Kare matou e tutaki ana i tetai au moni; kare e apinga ei maani i te au tangata kia taumaro. Kare rava matou e rave ana i tetai akaputu anga.’ ‘Akapeea i reira e raukaʼi ia koe te moni?’ i ui mai ei aia. Kua pau atu au, ‘I teianei, e te Dr.​——, me akakite atu au kia koe i te tika ngoie ua kare paa e rauka ia koe i te irinaki i te reira. Me inangaro te tangata i teia mataara, kare a ratou kete e kite i te tukuna angaia i raro ake i to ratou putangiu. Inara te kite ra ratou i te au tutaki anga. Kua karanga ratou kia ratou uaorai, “E tutaki tetai no teia are. . . . Akapeea ra au i te tuku anga atu i tetai moni meangiti ua ki teia akakoro anga?”’ Kua akara mai aia kiaku mei te mea e te manako ra aia e, ‘Eaa au i toou manako​—e tangata kite kore ainei?’ Kua karanga atu au, ‘I teianei, e te Dr.​——, te akakite atu nei au ia koe i te tika mama ua. . . . Me rauka i tetai tangata tetai akameitaki anga e e au apinga tana, ka inangaro aia i te taangaanga i te reira no te Atu. Me kare ana au apinga, eaa ra matou ka akakoko ei iaia no te reira?’”

​—Charles T. Russell, peretiteni mua o te Totaiete Punanga Tiaki, “The Watch Tower,” Tiurai 15, 1915.

TE ORONGA nei matou no te mea ko te Atua ko Iehova tei oronga mua. Kua akamata tana oronga anga i te au tuatau roa tei kore i akakiteia, i te anga anga​—tana apinga mua tikai i anga, tana “Tamaiti anau tai.” (Ioane 3:16) No te aroa, kua oronga aia i te apinga aroa o te oraanga ki etai pae.

Te Tamaiti a te Atua, ko Iesu Karaiti, ta Iehova apinga aroa maata rava atu kia tatou. Inara kare te Tamaiti a te Atua i te openga o ta te Atua uaorai orongaanga. Ko “te rai o te aroa ua o te Atua” ta te apotetoro ko Paulo i kapiki no ta Iehova ra i “oronga kare e tika kia tuatua ra.” (2 Korinetia 9:14, 15) I te akara anga te kapitiia maira ki teia apinga aroa te katoa anga o te au meitaki ravarai e te aroa takinga meitaki ta te Atua e oronga atura ki tona au tangata na roto ia Iesu. E umere tikai te reira takinga meitaki oronga uaia e kua maata rava atu te reira i te ririnui o te tangata i te akamarama me kore i te akataka. Tera ra, te vai atura te maata o ta te Atua orongaanga.

Kua roa akenei te tuatau, kua akakite pakari tetai ariki ma te akaaka e noatu e eaa tana au apinga meitaki i oronga ei au apinga aroa na Iehova tikai te reira. Kua karanga aia e: “To runga i te rangi ra, e to runga i te enua, noou anake ïa; tei ia koe te au, e Iehova, e ko koe tei teitei ei upoko i te au mea katoa nei. . . . Koai ra au nei, e eaa toku nei au tangata, e tikaʼi ia matou kia apai ua atu mei teianei te tu? No ko na mai ia koe na te au mea katoa nei, e no roto i taau ta matou i apai atu kia koe na.”​—1 Paraleipomeno 29:11-14.

Ta te Atua Akara Anga

Kua kite a Iakobo, te pipi a Iesu Karaiti e ko te Atua ko Iehova te tumu o tetai ua atu apinga tei meitaki katoa ra i roto i te au tu ravarai. E au apinga aroa tiama anake te aere maira mei ko mai iaia. Kua tata a Iakobo e: “Te au apinga aroa meitaki ravarai e te au apinga tiama ravarai no runga mai ia, te aere maira te reira ki raro nei mei te Metua o te au marama o te rangi ra, e kare rava e tuke anga o te urianga o te ata iaia ra.”​—Iakobo 1:17, NW.

Pera katoa i roto i te au mea no te orongaanga i te apinga aroa, kua kite a Iakobo i te tuke o te Atua mei te au tangata. Ka rauka i te au tangata i te oronga i te au apinga aroa meitaki inara kare e rave ua ana i te reira. Penei ka tupu mai teia au apinga aroa no tetai akakoroanga noinoi, me kore penei kua taangaangaia ratou ei timata i tetai tangata kia rave i tetai apinga kino. Ia Iehova kare e tuke; kare rava aia e taui. No reira, kare te tu o tana au apinga aroa e taui. Te ma ua ra ratou. Te turu ua ra rai ratou i te meitaki e te mataora o te au tangata. Te meitaki ua ra rai ratou e te tauturu ra kare e takore atu.

Au Akakoroanga no te Orongaanga i te Au Apinga Aroa

I te au ra o Iakobo, kua rave te au arataki akonoanga rekaia i te orongaanga i te apinga aroa kia akara uaia e te au tangata. Kua oronga ratou ma te akakoro anga kino. Te aruaru anga no te pokarakara anga a te au tangata, kua tuku ua ratou i to ratou au turanga tuatua tika. Inara, kua tuke te Au Kerititiano. Kua ako a Iesu ia ratou: “Kia oronga ra koe i taau apinga aroa, auraka e na mua i te akatangi i te pu, mei ta te aronga pikikaa, i roto i te au sunago, e i te au arataa ra, kia akameitakiia ratou e te tangata. Koia tika taku e karanga atu kia kotou na, Kua rauka ta ratou tutaki. Kareka kia oronga koe i taau apinga aroa, auraka toou rima kaui e kite i ta toou rima katau e rave ra: Kia munangaro taau oronga anga apinga aroa, e na to Metua, tei kite ua mai i te mea ngaro, e o mai akakite ua i taau tutaki.”​—Mataio 6:2-4.

Te tumu o ta tetai Kerititiano orongaanga i te apinga aroa koia oki kia tauturu i etai pae i te akaki i tetai anoano me kore kia maani ia ratou kia mataora me kore kia akatere i te akamori anga tika ki mua. Kare te reira e no te akakaka-uaorai. I te mea e, ka rauka i te mata o Iehova i te tomo atu i roto i te akoko oonu tikai o to tatou ngakau. Te kite ra aia i te akakoroanga oonu tikai i muri ake i ta tatou au apinga aroa.

Te tauta ra te Au Kite o Iehova i te aru i te akaraanga a Iehova e tana Tamaiti i te orongaanga i tetai apinga aroa. Te oronga ra ratou mei ta ratou ra. Tei ia ratou te tuatua meitaki o te Patireia, e te oronga ra ratou i teia ei akameitakianga ki etai pae. Kua kite ratou e te akakite ra a Maseli 3:9 e: “E akangateitei atu ia Iehova i taau ra au apinga, e te mataiā o taau katoa ra apinga kia tupu.” I te mea e te kimi tikai ra te au opati manga ravarai, te au putuputuanga, e te au tangata tataki tai i te tauturu no te meitaki o te katoatoa, kua akamaroiroiia te akataeake anga katoa i te pae vaerua ma te puapinga. Kare te puapinga i te pae o te apinga e arataki atu ki te puapinga i te pae vaerua, inara ka apai mai te puapinga i te pae vaerua i te puapinga i te pae o te apinga tei rava ua no te au ngai i ngere o ta Iehova angaanga.

Au Mataara no te Tauturu

Te vaira te au mataara e manganui e raukaʼi i te katoatoa te tauturu i te turu atu i te tuatua meitaki. Tetai mataara koia oki no runga i te au Are Uipaanga Patireia. Te taangaanga ra te au mema katoatoa o te putuputuanga i te Are Uipaanga Patireia. Na tetai tangata i oronga mai i te moni no te akatu me kore no te tarau anga, te turama anga, te akatere anga i te vaito o te reva, e te akono anga i te reira. I te mea e ka anoanoia te turu anga a te katoatoa, kua tukuia te au pia tauturu i roto i te Are Uipaanga Patireia, e kua taangaangaia te au tauturu tei oronga uaia tei rauka mai ei tutaki i te au tutaki anga a te putuputuanga. Mei te toenga, penei ka maaniia tetai au tauturu anga ki te manga Punanga Tiaki o te reira ngai, ia tau i te iki anga a te au putuputuanga.

Ka rauka te au tauturu anga i te maaniia atu ki te manga tikai o te Totaiete no te terenianga e te turuanga i te au mitinari e te au painia takake i te au tuanga o teianei ao kare te maata anga o te tangata i taeria ake e te tuatua meitaki. Tetai au tutaki anga no te totoaanga i te tuatua meitaki te akapiriia atura ki te angaanga a te au akaaere tutaka. Kua akameitaki te apotetoro ko Paulo, tei tuku i te akara anga no te angaanga tutaka i te anere mataiti mua, i te putuputuanga i Philipi: “I akau ake kotou i te apinga naku, e e rua oki akau anga ei tauturu iaku i toku nei ngere.” (Philipi 4:14-16) I te pae atu i te moni no teia au tu angaanga tamou, tei tupu ra i te au manga katoatoa, te vaira te akono tamouanga i te au kainga Betela tataki tai e te aronga e noo ra e e angaanga ra ki reira. Te tataanga e te neneianga o te au puka tei ki i te tuatua akakite manea o te tuatua meitaki e au ­akameitaki anga tikai tei orongaia mai e te Atua, inara te anoano katoaia ra te tua anga o te au puka, e te apai maira te reira i te au tutaki anga. I reira te vaira te tutaki anga no te au akaputuputuanga e te au uruoaanga, ma te kore e taikuia te akavaanga tei raveia atu ei ‘akatika anga e ei akamouanga i te evangelia.’​—Philipi 1:7.

Te taime i akapouia no te tutu aereanga i te tuatua meitaki e te au tavini tataki tai o Iehova kua oronga uaia ia, e pera katoa tana orongaanga i te tauturu i te pae o te au apinga. Te akapae anga putuputu o te moni ei turu i te akamaata anga o te akamori anga mou kua akakiteia e te apotetoro ko Paulo: “E teianei, i te tuatua i te apinga uipa na te aronga tapu ra . . . Kia tae ki te rā mua o te ebedoma ra, e vaio ake kotou ravarai i tetai papaki moni ki roto i te vairanga ra, kia tau i ta te Atua akamanuia anga mai iaia ra.”​—1 Korinetia 16:1, 2.

Me maani tetai tangata i tetai tauturu anga, kare aia e kite tikai i te au taime ravarai e akapeea te reira i te taangaangaia, inara te kite ra aia i te au tupu anga i roto i te akamaata anga i te tutu aereanga o te Patireia. Te akaari maira te au ripoti i roto i te 1993 Yearbook of Jehovah’s Witnesses e te tutu aereia ra te tuatua meitaki o te Patireia e maata atu i te 200 au enua e te au airani o te tai e te au orometua Kerititiano tei maata atu i te 4,500,000. Te pumaana nei te ngakau i teia au ripoti. Tetai ua atu apinga aroa i reira, noatu e eaa te maata, te tauturu ra i te akatotoaanga i te tuatua meitaki i teianei ao katoa.

Te tutakiia ra teia angaanga e te orongaanga taokotaiia a te katoatoa. Kua rauka i etai pae i te oronga ma te maata, e kua tauturu i te angaanga tutu aere ki tetai turanga maata rava atu. E meangiti ua ta tetai pae i oronga. Inara ko te aronga tei maani i te au tauturu mako tikai kare e tau kia kite i te akama me kore kia manako e e puapinga kore ua ta ratou tauturu. Kare rava a Iehova e manako ana na te reira mataara. Kua akataka meitaki tikai a Iesu no teia i tona akaari anga i te maata o ta Iehova ariki anga i ta te vaine takaua ra tauturu meangiti. “E kite katoa atura aia i tetai vaine takaua apinga kore i te tuku anga i nga lepeta e rua ki roto. Kua karanga atura aia, E tuatua-mou teia taku e karanga atu kia kotou na, E maata ta te vaine takaua apinga kore nei i tuku ki roto, i ta ratou ravarai: No roto oki i te toenga i to ratou apinga maata ta ratou i tuku maira ki roto i te apinga a te Atua: kareka aia nei, kua ope rava tona apinga rikiriki i te tukuia e ia ki roto.”​—Luka 21:2-4.

Noatu e eaa to tatou turanga i te pae o te moni, ka rauka ia tatou i te oronga na roto i te au mataara te ka akamareka ia Iehova. Kua akakite meitaki tikai te tata taramo e akapeea tatou i te oronga anga i te kaka ki to tatou Ariki e te Akava. Kua akakite aia e: “O atu kia Iehova i te kakā e tau ki tona ra ingoa: ei taoonga-rima te apai mai me tomo ki tona ra au paepae.” (Salamo 96:8) No reira, e aru tatou i te akara anga aroa a to tatou Metua i te rangi na roto i ta tatou orongaanga i te apinga aroa ma te perepere kavana no te mea kua na mua aia i te oronga mai kia tatou.

[Pia i te kapi 30]

TE TAUTURU ANGA MAI ETAI PAE I TE ANGAANGA TUTU ANGA PATIREIA

◻ AKAPUTU ANGA NO TE ANGAANGA I TEIANEI AO: E manganui te akapae ra me kare te akapapa ra i tetai moni no te tuku ki roto i te au pia tauturu tei akairoia: “Au Tauturu no te Angaanga i Teianei Ao a te Totaiete​—Mataio 24:14.” I te au marama katoatoa e tuku mai ana te au putuputuanga i teia au moni ki te opati maata o teianei ao i Brooklyn, New York, me kare ki te opati manga vaitata.

◻ APINGA AROA: Kia tuku tikaia mai te au moni tauturu tei oronga uaia ki te Watch Tower Bible and Tract Society of Pennsylvania, 25 Columbia Heights, Brooklyn, New York 11201, me kare ki te opati manga o te Totaiete i toou ngai. Ka rauka katoa te au apinga akamanea me kare ra tetai atu au apinga puapinga i te orongaia mai. Kia aru mai tetai reta poto ua i te au apinga tei akaputuia no te akakite i teia oronga anga tauturu.

◻ AKANOO ANGA I TE TURANGA NO TE TAUTURU: Penei ka orongaia te moni ki te Totaiete Punanga Tiaki kia tukuia ki tetai ngai tei irinakiia, e a tetai taime me anoanoia e te reira tangata, ka akaokiia te reira kiaia.

◻ AKAPAPU ANGA: Kia puapinga te Totaiete Punanga Tiaki i tetai tika anga no te akapapu anga i te ora anga me kore i tetai moni pakari no te akaangaroi anga. Kia akakiteia ki te Totaiete i tetai ua atu akanoo anga mei teia.

◻ AKAPAPA ANGA PANGIKA: Penei kia tukuia te au akapapa anga pangika, te au pepa tuku anga, me kare te au akapapa anga akaangaroi no tetai tangata ki roto i te tataanga irinakiia no me kare tei maaniia kia tutakiia me mate ake ki te Totaiete Punanga Tiaki, i tau ki te au ikuiku anga a te pangika o te reira ngai. E tau kia akakiteia te Totaiete no teia ua atu tu akanoo anga.

◻ APINGA AKAPUTUIA E TE PONI: Penei ka orongaia te au apinga akaputuia e te poni ki te Totaiete Punanga Tiaki ei apinga aroa me kare i raro ake i tetai akanoo anga ka aere ua rai te puapinga ki tei oronga mai i te reira.

◻ ENUA: Penei ka orongaia te au enua e te au are ka rauka i te oko ki te Totaiete Punanga Tiaki ei apinga aroa me kare te akono anga i tetai pepa koreromotu ki tei oronga mai i te reira, te ka rauka iaia i te noo ki roto i te tuatau te ora ra aia. E tau kia araveiia atu te Totaiete i mua ake ka orongaʼi i tetai ua atu enua ki te Totaiete.

◻ AU KOREROMOTU E TE AU TATAANGA IRINAKIIA: Penei ka tikaia te apinga me kare moni ki te Watch Tower Bible and Tract Society of Pennsylvania na roto i tetai koreromotu tikaia e te tataia, me kare kia akairoia te Totaiete ei puapinga no tetai tataanga koreromotu irinakiia. Tetai tataanga irinakiia tei orongaia ki tetai akaaerenga akonoanga ka riro te reira ei au puapinga i te pae o te tero i tetai taime. E tau kia tukunaia tetai kopi o te koreromotu me kare tataanga irinakiia ki te Totaiete.

No tetai akakite anga tuatua maata no runga i teia au mea, e tata ki te Treasurer’s Office, Watch Tower Bible and Tract Society of New Zealand, P.O. Box 142, Manurewa, Nu Tirani, me kare ki te opati manga vaitata o te Totaiete.

[Au Tutu i te kapi 31]

Akapeea taau au tauturu i te taangaangaia:

1. Aronga angaanga Betela

2. Akatu anga o te opati manga

3. Tauturu no te tumatetenga

4. Au Are Uipaanga Patireia

5. Au mitinari