Kua Rave Ratou i to Iehova Anoano

Akarongoanga i ta Iesu Au Tuatua ka Takake Atu Ei

I TE aiai o Nisana 14, 33 T.N., kua noo a Iesu Karaiti e tana au apotetoro tiratiratu e 11 ki tetai kaingakai i roto i tetai pia i runga i Ierusalema. Te kiteanga e te vaitata maira tona mate, kua akakite atu aia kia ratou: “E poto ua toku noo ki o kotou nei.” (Ioane 13:33) Ko te tika, kua aere takere a Iuda Ikariota i te akakoko i te au tangata kino tei inangaro i te tamate ia Iesu.

Kare e tangata i roto i te reira pia i runga i kite i te tu rapurapu o te turanga i maata atu ia Iesu ra. Kua kite tikai aia e kare e roa atu ana ka mamae aia. Kua kite katoa a Iesu e ka akaruke tana au apotetoro iaia i te reira po rai. (Mataio 26:31; Zekaria 13:7) I te mea e ko teia te atianga openga o Iesu i te tuatua atu ki tana au apotetoro i mua ake ka mate atu ei aia, e mea papu ia tatou e ko tana au tuatua ka takake atu ei kua tamouia ki runga i te au mea puapinga tikai.

“E Akapera Kotou ei Manako Anga Iaku”

Ma tana au apotetoro tiratiratu ra, kua akanoo a Iesu i tetai akono anga ou te ka mono atu i te Pasa a te Ngati Iuda. Kua kapiki te apotetoro ko Paulo i teia ko “te oroa aiai a te Atu ra.” (1 Korinetia 11:20, NW) Te raveanga i tetai manga varaoa opue kore, kua rave a Iesu i tetai pure. Kua vavai iora aia i te manga e kua tuku atura i te varaoa ki tana au apotetoro. “Ka rave, ka kai; ko toku kopapa teia,” i na ko atu ei aia. I reira kua rave mai aia i tetai kapu uaina, kua oronga atu i tetai pure akameitaki e kua tuku atura i te reira ki tana au apotetoro, na ko atura: “Ka inu na kotou ravarai; Ko toku ïa toto teia, no te koreromotu ou ra, tei akamaringiia no te tangata e manganui, kia matara te ara.”​—Mataio 26:26-28.

Eaa ra te aiteanga o teia atianga? Mei ta Iesu i akataka maira, te akatutu maira te varaoa i tona kopapa ara kore. (Ebera 7:26; 1 Petero 2:22, 24) Te akatutu maira te uaina i to Iesu toto i akamaringiia, na roto i te reira e raukaʼi te akakore atu i te au ara. Na tona toto atinga katoa e akamana i te koreromotu ou i rotopu i te Atua ko Iehova e te 144,000 au tangata, te ka tutara i te openga ra ma Iesu i te rangi. (Ebera 9:14; 12:22-24; Apokalupo 14:1) Na te patianga atu i tana au apotetoro kia kai i teia kaikai anga, kua akataka atu a Iesu e ka piri atu ratou kiaia i te Patireia i te rangi.

No runga i teia kaikai anga akamaaraaraia, kua akaue a Iesu e: “E akapera kotou ei manako anga iaku.” (Luka 22:19) Ae, te Kaikai Anga Aiai a te Atu ka raveia i te au mataiti ravarai, mei tei raveia no te Pasa ra. Koi akamaaraara ei te Pasa i te akaora anga o to Iseraela mei te tuikaa anga i Aiphiti ra, te tou atura te Kaikai Anga Aiai a te Atu ki tetai akaora anga maata rava atu​—to te au tangata tei okoia mei te tuikaa anga ki te ara e te mate. (1 Korinetia 5:7; Ephesia 1:7) Pera katoa, te aronga e kai ra i te varaoa e te uaina akatutu ua te akamaaraia atura no ta ratou akameitakianga i te tuatau ki mua ei ui ariki e ei kau taunga i te Patireia o te Atua i te rangi.​—Apokalupo 20:6.

Te matenga o Iesu Karaiti e atianga puapinga maata tikai i roto i te tuatua enua o te tangata. Te aronga tei ariki i ta Iesu i rave ra te akarongo ra i tana akauenga no runga i te Kaikai Anga Aiai a te Atu: “E akapera kotou ei manako anga iaku.” Te akamaaraara ra te Au Kite o Iehova i to Iesu matenga i te au mataiti tataki tai i te ra te aite atura ia Nisana 14. I te 1996 te topa ra teia ra i roto ia Aperira 2, i muri ake i te opunga ra. Te pati maanaia atu nei koe kia tae atu ki te Are Uipaanga Patireia i toou ngai.

‘Te Tuku Atu Nei Au i te Akauenga Ou Kia Kotou’

I te pae atu i te akanooanga i te Kaikai Anga Aiai a te Atu, kua oronga atu a Iesu i tetai ako anga ki tana au apotetoro ka takake atu ei. Noatu to ratou terenianga meitaki, e maata tikai ta teia au tangata ka apii. Kare ratou i kite meitaki i to te Atua akakoroanga no Iesu, no ratou, me kore no te tuatau ki mua. Inara kare a Iesu i tauta ana i te akataka atu i teia au mea katoatoa i teia taime. (Ioane 14:26; 16:12, 13) Mari ra, kua tuatua atu aia no runga i tetai apinga puapinga rava atu. “E tuku atu au i te akauenga ou kia kotou,” i nana ei, “E aroa kotou ia kotou uaorai: mei iaku i aroa ia kotou na, e aroa katoa oki kotou ia kotou uaorai.” I reira kua tuatua akaou atu a Iesu: “Ko te mea teia e kite ei te tangata katoa e e pipi kotou naku, kia aroa kotou ia kotou uaorai.”​—Ioane 13:34, 35.

Na teea mataara teia i riro ei ei “akauenga ou”? Ina, kua akaue te Ture a Mose e: “E aroa ra koe i to tangata tupu mei toou aroa ia koe uaorai na.” (Levitiku 19:18) Inara, kua akaue a Iesu i tana au pipi kia akaari i te aroa tuku atinga uaorai te ka tae roa ki te orongaanga i to tetai oraanga no te au taeake Kerititiano. Ko te tika, te ‘ture o te aroa’ te taangaanga katoaia ra ki tetai au turanga kare e kino roa ana. I te au turanga ravarai ka rave ua tetai pipi a Iesu Karaiti i te akaari i te aroa na te tauturuanga ia etai atu i te pae vaerua e na tetai ua atu tu.​—Galatia 6:10.

I teia po openga o to Iesu oraanga i te enua nei, na te aroa i akakeu ia Iesu kia pure i te Atua ko Iehova no tana au pipi. I tetai tuanga, kua pure aia e: “Ka noo tikai ra ratou i te ao nei, e te aere atu nei au kia koe na. E taku Metua tapu ra e, ka tiaki koe ia ratou i taau i o mai noku i toou ingoa, kia okotai ake ratou, mei ia taua katoa nei rai.” (Ioane 17:11) E akara anga tau e i roto i teia patianga ki tona Metua, kua pure a Iesu no te taokotai anga aroa o tana au pipi. (Ioane 17:20-23) Kua anoanoia ratou ‘kia aroa ia ratou uaorai, mei ia Iesu i aroa ia ratou ra.’​—Ioane 15:12.

Kua akarongo te au apotetoro tiratiratu i ta Iesu au tuatua ka takake atu ei. Ka tau katoa tatou kia ariki i tana au akauenga. I teia “tuatau openga” e te kino, te maata atura te puapinga o te aroa e te taokotai anga i rotopu i te aronga akamori mou i to mua ana. (2 Timoteo 3:1) E tikai, te akarongo ra te au Kerititiano i ta Iesu au akauenga e te akaari ra i te aroa taeake. Te kapitiia maira ki teia te akarongoanga i tana akauenga kia akono i te Kaikai Anga Aiai a te Atu.