Te Kaingamanga a te Atu e Aiteanga Maata Noou

TE KAINGAMANGA a te Atu e aiteanga puapinga e te ope kore ainei ia noou? Kia kite ei, ka na mua ana tatou i te akanoo i te aiteanga i to Iesu Karaiti akapiri atu anga iaia uaorai ki teia tupu anga takake.

I te aiai ia Nisana 14, 33 T.N., kua akaputu mai a Iesu ma tana 12 apotetoro i roto i tetai pia i runga ra i Ierusalema kia akono i te Pasa mataiti. I muri ake i te kai anga ratou i te manga o te Pasa, kua akaruke a Iuda pikikaa i te pia kia pikikaa ia Iesu. (Ioane 13:21, 26-30) Ko te toenga o te 11 apotetoro ra, kua oronga a Iesu “kia kai i te kaingakai a te Atu.” (1 Korinetia 11:20) Kua taiku katoaia te reira ei Akamaaraanga, i te mea e kua akaue a Iesu i tana au pipi e: “E pera kotou ei manako anga iaku.” Ko teia anake ua te tupu anga ta te au Kerititiano i akaueia mai kia akamaara.​—1 Korinetia 11:24.

Kia tau ki te tikitinari a Webster, ko te akamaaraanga tetai apinga ia te ka tauturu “kia akono i te akamaaraanga” me kare “kia vai akaora ua i te akamaaraanga.” I te au ngai e manganui, kua akatu te au tangata i tetai menema me kare kua iki i tetai ra takake kia akamaaraia, me kare kia akamaara i tetai tangata me kare i tetai apinga puapinga maata. I roto i teia turanga nei kua akanoo a Iesu i tetai kaikai akamaaraanga​—e kaikai anga tei riro ei tauturu i te manako, ei tauturu i tana au pipi kia akono i te akamaaraanga no te au tupu anga puapinga maata tikai no taua ra puapinga ra. No te au uki i te tuatau ki mua, ka akamaara teia kaikai anga akamaaraanga i te aronga te akono ra i te puapinga o te aiteanga no ta Iesu i rave i taua po ra, no runga i te au akatutu anga tana i taangaanga tikai ana. Eaa te au akatutu anga, me kare te au oroa, ta Iesu i taangaanga, e eaa to raua aite anga? Ka akara matatio ana tatou i te papaanga Pipiria i akonoia i taua po ra i te 33 T.N.

Au Akatutuanga Tapu

“Kua rave iora aia i te manga, akameitaki atura, vavaʼi iora, tuku atura kia ratou, na ko atura, [“E aiteanga teia no toku kopapa,” NW] e orongaia no kotou; e akpera kotou ei manako anga iaku.”​—Luka 22:19.

I to Iesu rave anga i te varaoa e kua na ko atura e, “e aiteanga teia no toku kopapa,” te akakite maira aia e te varaoa opue kore ra ei akatauanga no, me kare ei akatutu anga no, tona uaorai kopapa tangata ara kore, tana i oronga mai “ei ora no to te ao.” (Ioane 6:51) Noatu e te karanga ra tetai au urianga Pipiria e “ko [Ereni, es·tinʹ] toku kopapa teia,” te karanga ra te Thayer Greek-English Lexicon of the New Testament e ko te aite anga putuputu o teia verepa nei “kia akakite, aiteanga, puapinga.” Te akakite maira te reira i te manako no te akatauanga, me kare te akatutuanga.​—Mataio 26:26.

Kua tika katoa te reira ki te kapu uaina. Kua tuatua maira a Iesu e: “[“Te aiteanga no,” New World Translation] teianei kapu, ko te koreromotu ïa i toku nei toto, e akamaringiia no kotou nei.”​—Luka 22:20.

I roto i ta Mataio tataanga, kua tuatua maira a Iesu no runga i te kapu e: “[“Te aiteanga no,” NW] toku ïa toto teia, no te koreromotu ou ra, tei akamaringiia no te tangata e manganui, kia matara te ara.” (Mataio 26:28) Kua taangaanga a Iesu i te uaina i roto i te kapu ei akatauanga, me kare ei akatutu, i tona uaorai toto. Kua riro tona toto akamaringiia ei tumu anga no “tetai koreromotu ou” no te au pipi akatainuia ma te vaerua, te ka tutara ei au ariki e te kau taunga kiaia ra i te rangi.​—Ieremia 31:31-33; Ioane 14:2, 3; 2 Korinetia 5:5; Apokalupo 1:5, 6; 5:9, 10; 20:4, 6.

Kua riro katoa te uaina i roto i te kapu ei akamaara anga e ka riro to Iesu toto akamaringiia ei tumu no te oronga anga “kia matara te ara,” i te akatuera anga i te mataara no te aronga te kai ra kia kapikiia ki te oraanga i te rangi ra ei aronga tuangaia ma Karaiti ra. Ma te marama ua, ko te aronga no teia kapiki anga i te rangi​—e numero iti ua​—ko ratou anake ua te ka kai i te varaoa e te uaina i te Akamaaraanga.​—Luka 12:32; Ephesia 1:13, 14; Ebera 9:22; 1 Petero 1:3, 4.

Inara, akapeea oki te au pipi katoatoa a Iesu kare i roto i te koreromotu ou ra? Ko ratou te “mamoe ke atu” a te Atu, te akara ra ki mua, kare ki te tutara anga ma Karaiti i te rangi, mari ra kia rekareka i te oraanga ope kore i runga i te enua parataito. (Ioane 10:16; Luka 23:43; Apokalupo 21:3, 4) Ei “aronga maata rava” o te au Kerititiano tiratiratu ‘i akamori ei [i te Atua] i te po e te ao,’ ka rekareka ratou i te riro mai anga ei aronga akarakara ariki ua i te Kaingamanga a te Atu. Te akakite maira ta ratou au tuatua e te au angaanga e: “No to tatou Atua te ora, tei noo ki rungao i te terono, e no te Punua-mamoe.”​—Apokalupo 7:9, 10, 14, 15.

Mei Teaa te Putuputu?

“E akapera kotou ei manako anga iaku.”​—Luka 22:19.

Mei teaa te putuputu ka tau kia akonoia te Akamaaraanga kia rauka ei i te akono i te akamaaraanga i to Karaiti ra matenga? Kare a Iesu i taiku tika mai ana. Inara, i te mea e kua akanoo aia i te Kaikai Anga Aiai a te Atu ia Nisana 14, i te aiai o te Pasa, ta to Iseraela i akono mataiti ra, e mea papu e te akakoro ra a Iesu i te Akamaaraanga kia akamaaraia mei taua tu rai. Kareka ra kua akono mataiti to Iseraela i to ratou akaoraia anga mei te tuikaa i Aiphiti, kua akamaara mataiti te au Kerititiano i to ratou akaoraia anga mei te tuikaa ki te ara e te mate.​—Exodo 12:11, 17; Roma 5:20, 21.

Te manako no te akonoanga mataiti ra kia akamaara i tetai tupu anga puapinga e papu tikai e kare i te mea matau koreia. Ei akatauanga, e akamanako ana, te akono anga tetai nga tokorua i te ra i akaipoipo ei raua me kare me akamaara te enua i tetai tupu anga puapinga maata o te tuatua enua o reira ra. Tei matauia ka raveia te akamaaara anga e tai ua taime i te mataiti i te ra akamaara anga no taua tupu anga. Ma te tau, no tetai au anere mataiti i muri ake ia Karaiti, e manganui te au Kerititiano tutu ua tei kapikiia e ko te au Quartodeciman, te aite anga te “Aronga Ngauru ma A,” no te mea kua akamaara ratou i to Iesu matenga e tai ua taime i te mataiti, ia Nisana 14.

E Ngoie Inara e Puapinga Tikai

Kua akataka mai te apotetoro ko Paulo e te akono anga i te Kaingamanga a te Atu te tauturu ra i te au pipi a Iesu kia ‘akakite i te matenga o te Atu.’ (1 Korinetia 11:26) No reira, ko teia akamaara anga ka akara pakari atu ki runga i te tuanga maata ta Iesu i rave, na roto i tona matenga, kia akatupu i ta te Atua ra akakoroanga.

Na roto i tona tu tiratiratu e tae ua atu ki te matenga, kua akangateitei a Iesu Karaiti i te Atua ko Iehova Tei Anga aroa e te pakari e te Ngateitei tuatua tika ra. Tuke ki te au akaapa anga a Satani e kare mei ia Adamu rai, kua akapapu mai a Iesu e ka rauka i tetai tangata i te vai tiratiratu ki te Atua, noatu e tei raro i te au taomianga maata.​—Iobu 2:4, 5.

Te akono ariki katoa ra te Kaingamanga a te Atu i te akamaaraanga i to Iesu aroa akaatinga-uaorai. Noatu te au timata anga pakari, kua vai akarongo apa kore a Iesu ki tona Metua. No reira kua rauka iaia i te oronga i tona uaorai oraanga tangata tiama kia tapoki i te au ara maata a Adamu. Mei ta Iesu uaorai i akataka mai, kua aere mai aia i te “oronga i tona ora ei oko no te tangata e manganui.” (Mataio 20:28) No reira, te katoatoa tei tuku i te akarongo ki roto ia Iesu ka akakoreia ta ratou au ara e ka rauka te ora mutu kore tei rotai ra ki ta Iehova akakoroanga mua no te au tangata.​—Roma 5:6, 8, 12, 18, 19; 6:23; 1 Timoteo 2:5, 6.a

Pouroa teia te akakite katoa maira i te maata i te tu meitaki e te takinga meitaki o Iehova i te oronga anga mai i te akapapaanga ei ora no te au tangata. Te akakite maira te Pipiria e: “Kua kitea to te Atua aroa ia tatou nei, koia i tono mai i tana Tamaiti anau tai ki te ao nei, kia ora tatou iaia. Ko te aroa mou teia, kare ïa na tatou i aroa atu i te Atua, koia ra tei aroa mai ia tatou nei, e kua tono mai i tana Tamaiti ei tarangaara i ta tatou nei ara.”​—1 Ioane 4:9, 10.

Ae, e akonoanga umere te Akamaaraanga! E mea ngoie ua e te tau kia akamaaraia i te ao katoa nei i raro ake i tetai au turanga tukeke e manganui, inara e akatutu anga kia vai ei akamaara anga oonu tikai e tere ua atu no tetai tuatau roa.

Tona Aiteanga Noou

Te atinga mate o to tatou Atu ra ko Iesu Karaiti e tutaki anga maata ia kiaia e ki tona Metua, kia Iehova. Ei tangata apa kore, kare a Iesu i aro atu i te mate akatuangaia mei ia tatou katoatoa rai. (Roma 5:12; Ebera 7:26) E tika anga tona kia ora e tuatau ua atu. Kare e tamateia tona oraanga, noatu me ka maro pakariia, me kare aia e akatika i te reira. Kua tuatua aia e: “Kare e riro e na tetai ke e rave [i toku oraanga]; naku uaorai e oronga ua atu.”​—Ioane 10:18.

Inara, kua oronga puareinga mai a Iesu i tona oraanga tangata apa kore ei atinga e “na te mate aia i te akangere atu iaia nona te mate ra, koia oki te diabolo; E kia akaora oki aia i te aronga i tuikaa i te mataku i te mate, e ope ua ake to ratou ora anga nei.” (Ebera 2:14, 15) Kua akapapu ua mai rai to Karaiti aroa akaatinga-uaorai i te tu no te matenga i tona kauraro anga iaia uaorai. Kua kite meitaki aia i te tu ka mamae e ka mate ei aia.​—Mataio 17:22; 20:17-19.

Te akamaara katoa maira te Akamaaraanga kia tatou i te akakite anga maata roa o te aroa tei raveia e to tatou Metua i te rangi ra, ko Iehova. Mei teaa ra te taitaia nona ra, tei “aroa e te takinga-meitaki maata,” i te akarongo e te kite anga i te “aue maata e te roi-mata,” o Iesu i te kainga i Getesemane, te papaanga pakari, te patiti anga kino, e te mate mamae roa atu. (Iakobo 5:11; Ebera 5:7; Ioane 3:16; 1 Ioane 4:7, 8) Te manako ua anga i te reira i teianei, e anere ua atu mataiti i muri mai, te akatupu ra i te mamae anga ngakau ki te manganui.

E akamanako ana e ko te Atua ra ko Iehova e Iesu Karaiti tei tutaki i tetai tutaki anga maata no tatou ei aronga ara! (Roma 3:23) I te au ra ravarai, te aro atura tatou i te tu mamae tikai no to tatou tu ara e to tatou au tu apa. Inara, no runga i te tumu anga o te akarongo i roto i te atinga oko o Iesu, ka rauka ia tatou i te pati ki te Atua kia akakore mai i te ara. (1 Ioane 2:1, 2) Na teia e akariro kia rauka ia tatou kia rekareka i te akavaitata atu ki te Atua e ma te akava ngakau ma. (Ebera 4:14-16; 9:13, 14) Te mea maata, ka rauka ia tatou i te akono i te manakonako anga kia ora ua atu ki runga i te enua parataito e mutu kore ua atu. (Ioane 17:3; Apokalupo 21:3, 4) Ko teia e tetai ua atu au akameitaki anga e manganui e au tupu anga katoatoa no te angaanga teitei a Iesu no te akaatinga-uaorai.

Akaari Anga i te Arikianga no te Kaingamanga a te Atu

Te Kaingamanga a te Atu kare e ekokoanga e e akakiteanga umereia no “te rai o te aroa ua o te Atua.” E ta te Atua ra ko Iehova akapapaanga no te atinga oko​—tei rauka na roto i te aroa akaatinga-uaorai o Iesu​—e tika anga tikai nana ra kia “oronga kare e tika kia tuatua ra.” (2 Korinetia 9:14, 15) Kare ainei teia au akakiteanga i to te Atua ra tu meitaki na roto ia Iesu Karaiti e akakeu i tetai tu oonu e te ope kore i roto ia koe no te tu akameitakianga e te arikianga?

Te papu nei ia tatou e te akakeu ra ratou i taua manako ra. No reira, te pati pumaana atu nei matou ia koe kia akaputuputu mai ma te Au Kite o Iehova i te akonoanga i te Akamaaraanga i to Iesu matenga. I teia mataiti ka raveia te Akamaaraanga i te Ruitoru, ia Aperira 16, i muri ake i te opunga ra. Ka mataora te Au Kite o Iehova i toou ngai ra i te akakite atu kia koe i te ora tikai e te ngai no teia tupu anga puapinga maata roa atu.

[ Tataanga Rikiriki i Raro]

[Pia/Au Tutu i te kapi 6]

“E KOPAPA TEIA NOKU” ME KARE “E AITEANGA TEIA NO TOKU KOPAPA” KO TEEA AINEI?

I to Iesu tuatua anga e, “ko au te ngutupa” e, “ko au te vine mou,” kare rava tetai e manako ana e koia tikai tetai ngutupa me kare tetai vine tikai. (Ioane 10:7; 15:1) Pera katoa, te taiku anga The New Jerusalem Bible i ta Iesu i tuatua e: “Teia kapu e koreromotu ou ia,” kare tatou e manako atu ana e ko te kapu uaorai ra ko te koreromotu ou tikai ia. No reira, i te tuatua anga aia ko te varaoa ‘ko’ tona kopapa, te papu tikai ra e ko te varaoa te aite anga, me kare e akatutuanga, i tona kopapa. No reira, te karanga ra te urianga na Charles B. Williams e: “E akatauanga teia no toku kopapa.”​—Luka 22:19, 20.

[Tutu i te kapi 5]

Te varaoa opue kore e te uaina e au akatutu anga tau no to Iesu kopapa ara kore e tona toto akamaringiia

[Tutu i te kapi 7]

Te Akamaaraanga e akamaara anga ia i te aroa maata tei akaariia mai e te Atua ra ko Iehova e Iesu Karaiti