E Painia Parani Ainei Koe?

KUA oraora te au mata o te papa iaia e tiaki ra ma te rima oora no tana tamaine kia rave i tana takainga mua ma te tapupu ra. I te topa viviki anga aia, kua akamaroiroi aia iaia kia tamata akaou. Kua kite aia kare e roa atu ka rauka iaia tona parania e te maroiroi.

Na roto i tetai tu mei te reira, penei ka anoano tetai orometua painia ou i te taime e te akamaroiroi anga i mua ake ka raukaʼi iaia te parani te anoanoia ra kia manuia ei tangata tutu aere tamou i te Patireia. E manganui te au painia kua tavini rekareka ua atu no tetai au ngauru mataiti. Kua inga tetai papaki no te au taui anga kitea koreia o to ratou au turanga. Kua ngaro te rekareka o etai pae. I tetai enua, e 20 patene i te aronga tei akamata i te painia kua akamutu i te painia i roto rai i nga rua mataiti mua o ta ratou angaanga tamou. Na teaa ra e tapu i tetai painia i te rave i teia angaanga rekareka? E apinga ainei tetai ka rauka i te rave kia kopae i teia au manamanata?

Noatu te turanga kino, te au anoano i te pae moni, e te au apainga a te pamiri penei ka akakeu i etai kia akaruke i te angaanga orometua tamou, kua riro te autu kore i te akono i te parani meitaki i rotopu i te au apainga Kerititiano tukeke ei turori anga no tetai. Te akatakaia ra te parani e “e tu kare e tuanga okotai, e mea, e tumu tau, me kore e akakeu anga i teimaa atu i tetai me kore i maata atu ki tetai atu.”

Kua akaari a Iesu Karaiti ki tana au pipi akapeea me raveia te angaanga tutu aereanga e te akariro i te tangata ei au pipi. I roto i tana uaorai angaanga orometua, kua akatutu katoa aia akapeea me akono i te parani. Kua akaari a Iesu e kua ngere te au arataki akonoanga ngati Iuda i te parani, te karanga anga kia ratou: “Te oronga nei kotou i te ngauru o te minete e te aneto e te kumino, e te akaruke nei i te au mea mamaata o te ture, te tuatua-tau, te aroa, e te akarongo: ko ta kotou ïa e akono e tikaʼi, e auraka katoa e akaruke i tera.”​—Mataio 23:23.

Te tau meitaki ra teia kaveinga ki teia tuatau, koia tikai ki te angaanga orometua painia. Tei akakeuia e te tu rekareka e te akakoroanga meitaki, kua painia ua etai ma te kore i akapapa tikai no te reira me kore i tamanako ana i te au mea pouroa ka o mai ki te reira. (Luka 14:27, 28) Ko tetai atu kua o oonu tikai i roto i te angaanga tutu aere e kua ngaropoina ia ratou i tetai au tu puapinga ravarai o te akonoanga Kerititiano. Akapeea e raukaʼi ia ratou e te akono i te parani?

Kia Vai Maroiroi i te Pae Vaerua!

Kare rava a Iesu i kopae ana i tona turanga i te pae vaerua. Noatu kua umuumu te urupu tangata tei aere mai i te akarongo iaia e kia rapakauia i tona taime, kua akanoo aia i tetai tuatau no te pure ma te manako oonu. (Mareko 1:35; Luka 6:12) Te umuumu katoaia ra te painiaanga parani i teia tuatau e kia taangaanga maata tetai i te au apinga e raukaʼi kia vai maroiroi i te pae vaerua. Kua tuatua atu a Paulo: “Ko koe oki ko tei apii atu i tetai ke ra, kare koe e apii ia koe uaorai?” (Roma 2:21) E mea tarevake kia akono ua tetai i tona tuatau pouroa i te tutu aereanga ki tetai ke e kua kopae i te akanoo i tetai tuatau no te apii naau uaorai e te pure putuputu ma te tau.

I riro ana a Kumiko ei painia no nga rua ngauru mataiti. Noatu e toru ana tamariki e te tane irinaki kore, kua kite aia na roto i te kite anga e ko te tuatau meitaki nona i te tatau e te apii i te Pipiria koia oki i mua ake ka aere aia ka moe. Iaia e apii ra, kua tata aia i te au tumu manako tana ka taangaanga i roto i te angaanga tutu aere e raukaʼi iaia i te akono i tana angaanga orometua i te au ra kia oraora e kia rekaia. E tu popongi ana tetai atu au painia manuia tikai i mua ake ka tu mai ei te katoa anga o to ratou pamiri kia rekareka i te akamaroiroi akaou anga i te pae vaerua i te au popongi. Penei kua akanoo ke koe i tetai tuatau tau i te akapapa no te au uipaanga e te tamou ua ma te au puka Kerititiano ou. Me te anoano ra koe i te tamou i te rekareka no te angaanga orometua, ka tau te apii naau uaorai auraka e kia rapurapuia me kore kia kopaeia.

Paranianga i te Au Apainga Pamiri

Ka tau katoa kia akamanako te au metua te painia ra e ko tetai tuanga maata o to “te Atu ra anoano” no ratou te o maira i te akonoanga i te au anoano i te pae kopapa, manako ngakau, e te pae vaerua o to ratou uaorai pamiri. (Ephesia 5:17; 6:1-4; 1 Timoteo 5:8) Tetai taime penei ka mataku te tokorua irinaki e te au mema pamiri e kare e rauka ia ratou te pumaana e te tauturu mei te vaine e te mama me akamata aia i te painia. Ka tupu te reira au manako anga i roto i tetai ariki anga oraora meangiti ua ki tona anoano kia riro mai ei painia. Inara, ma te au akanoonooanga meitaki e te manako na mua, ka rauka te parani i te akonoia.

E manganui te au painia te tauta ra i te rave pouroa i ta ratou angaanga tutu aereanga i te au mema pamiri kare i te kainga. Ko Kumiko, tei taikuia i mua ake, e kaikai ana aia ma te pamiri katoa i te popongi, e kite ana aia i tana tane e te tamariki i te popongi, e tei te kainga aia me oki mai ratou. E akanoo ana aia i te au Monite ei tunu i te au kai tuke i mua ake e raukaʼi iaia i te akaangaroi e te kaikai ma tona pamiri e kare e ka angaanga aia i roto i te ngai tunuanga kai. Te rave kia maata atu te angaanga i te taime okotai, mei tetai atu angaanga o te kainga koi maani ra i te kai ka riro katoa ia ei tauturu. Na te reira tu, kua rauka ia Kumiko te tuatau no te pati i te au oa o tana tamariki kia aere mai e kia akapapa i te au apinga reka na ratou.

I te au tamariki e maata maira i roto i to ratou tuatau mapu, i te maata anga o taime ka anoano maata ratou i te manako o to ratou nga metua kia autu ma te au manako ngakau ou, au anoano, au ekoko anga, e te au mataku te akataitaia ra ia ratou. Ka umuumu teia i te tu matakite e te akatanotano i te akapapa anga a tetai metua e painia aia. E tamanako ana ia Hisako, e mama painia e toru tamariki. Eaa tana i rave i te akaari anga tana tamaine mataiapo te tu rekareka kore e te tu oraora kore no te au uipaanga Kerititiano e te angaanga tutu aere no te akakeu anga a tona au oa o teianei ao i te apii? Ko tei anoanoia koia oki kia akariro tana tamaine i te tuatua mou e nana uaorai e kia papu tikai i te takake anga mai mei te ao e aerenga meitaki ia.​—Iakobo 4:4.

Kua akakite a Hisako: “Kua iki au i te apii akaou kiaia i te au apiianga tumu i roto i te puka Ora Mutukore i te au ra. I te akamata anga kua apii maua no tetai miniti tokoiti ua, i te akaape ua anga taku tamaine i te maata anga o te taime i te kopu mamae e te katu mamae i te tuatau no te apii. Inara kua rave putuputu au i te apii. I muri ake i te au marama tokoiti ua, kua meitaki mai tona tu, te aratakianga atu i te taime poto ki tona akatapu anga e te papetitoanga.” I teianei te rekareka ra a Hisako i te angaanga orometua tamou ma tana tamaine.

Ka tau katoa te au papa te painia ra kia matakite e auraka ratou e o i te akono ua i te aronga inangaro i roto i te angaanga tutu aere e no ta ratou au angaanga putuputuanga e kua autu kore ratou i te oronga ki ta ratou tamariki te maata maira i te turu anga pakari i te pae o te manako ngakau e te arataki anga tei tau kia ratou. Kare teia e ko tetai apinga ka oronga te tane ki tana vaine. Ko tetai tangata pakari Kerititiano maroiroi tei painia roa ana e te akono katoa ra i tetai pitiniti meangiti kua akanoo i tetai tuatau no te apii tataki tai ma tana tamariki e a. (Ephesia 6:4) Pera katoa, e akapapa ana aia i te au uipaanga i te epetoma ma tona pamiri. Kare te au painia te parani ra e kopae i to ratou pamiri i te pae kopapa e te pae vaerua.

Parani i te Pae Moni

Ko tetai ngai ka tau te au painia kia akono i te parani meitaki koia oki te manako tau no te au mea i te ra. I konei akaou, e maata ta tatou ka apii mai mei ta Iesu akaraanga meitaki e te ako. Kua akamatakite aia no te apiapi maata no runga i te au manata i te pae kopapa. Mari ra, kua akamaroiroi aia i tana au pipi kia tuku i te Patireia na mua, te taputouanga e ka akono te Atua ia ratou mei tana i rave no te katoa anga o tana au mea i anga. (Mataio 6:25-34) Na te aruanga i teia ako anga meitaki, e manganui te au painia kua rauka i te tamou ua atu i roto i te angaanga tamou no te au mataiti, e kua akameitaki a Iehova i to ratou maroiroi e raukaʼi “te kai . . . i teianei rā.”​—Mataio 6:11.

Kua ako te apotetoro ko Paulo i te au taeake Kerititiano ‘kia kitea meitakiia oki to ratou maru i te tangata katoa.’ (Philipi 4:5) Tika rai, ka anoano te tu tau e kia akono meitaki tatou i to tatou oraanga kopapa. Te tauta ra te au painia parani i te akaari i te tu tau i roto i to ratou oraanga e i roto i to ratou tu ki te au apinga pae kopapa, i te kiteanga e te akara maira tetai i to ratou tu.​—Akaaite ia 1 Korinetia 4:9.

Ko te au mapu tei rave ra i te angaanga painia kare ratou e tau kia ariki maata ua i te tu oronga ua o to ratou metua. Me te noo ra ratou i te kainga o tona nga metua, e akatutu anga meitaki i te tu parani e te ariki anga kia piri ki roto i te au angaanga i te kainga e tetai ngai angaanga i te taime ua ei tauturu ia ratou kia akono i te kainga.​—2 Tesalonia 3:10.

E Akameitakianga Tikai te Au Painia Parani

Penei e painia koe te angaanga pakari ra no te akono i te parani tau. Kia papu tikai. Mei tetai tamaiti meangiti e anoano ra i te tuatau no te apii i te parani iaia uaorai e te aaere, e manganui te au painia pakari kua karanga e kua anoano ratou i te tuatau e raukaʼi te parani i te akonoia no ta ratou au angaanga pouroa.

I te pirianga i roto i te apii naau uaorai, te akonoanga i te au mema pamiri, e te oronga anga i ta ratou uaorai au apinga i te pae kopapa ko teia te au ngai ka tau te au painia kia parani. Te akaari maira te au ripoti e manganui te au painia te akatupu ra i ta ratou au apainga na tetai mataara tau tikai. E akameitakianga tikai ratou ki te ngai tangata e e akapaapaa anga kia Iehova e tana akaaerenga.

[Tataanga Rikiriki i Raro]