Kiea Ngai te Mataora Tikai e Kiteaʼi?

E MANGANUI te au tangata te manako ra e ka kitea te mataora na te raukaanga mai te au apinga materia. Akapeea koe? Koi riro ei te au apinga materia ei akamaata atu i to tatou mataora, kare ratou e akapapu mai i te reira; e kare katoa te au akamaru anga kopapa e akaketaketa i te akarongo me kore e akaki i te au anoano pae vaerua.

I tana Tuatua i te Maunga, kua karanga a Iesu Karaiti: “E mataora to te aronga tei manako i to ratou anoano i te pae vaerua, no ratou oki te patireia o te au rangi ra.” (Mataio 5:3, NW) Kua karanga katoa a Iesu: “E matakite ia kotou i te morimori apinga: e maata ua oki to te tangata nei apinga, kare oki tei taua apinga nona ra tona ora.”​—Luka 12:15.

E manganui te kimi ra i te mataora na te pirianga ki roto i te ainga tureia e tetai atu “au angaanga a te kopapa.” (Galatia 5:19-21) Inara, na te tuku ua atu anga ki te au angaanga navenave o te kopapa kare ia e apai mai i te mataora tikai ma te ope kore. Te tika, ko te aronga e rave ra i teia au mea kare e tae ki te Patireia o te Atua.​—1 Korinetia 6:9, 10.

Kua uri tetai pae kia ratou uaorai i ta ratou kimi anga no te tu mataora na te tautaanga i te patu i to ratou uaorai puapinga. Te ki ra te au ngai vairanga puka e te au are toa puka i te au puka tauturu, inara kare taua au puka i apai mai i te mataora ope kore ki te au tangata. No reira, kiea ngai e kiteaʼi e tatou te mataora tikai?

E mataora tikai ei, ka anoanoia tatou kia kite i to tatou anoano pae vaerua no roto maira. Kua karanga a Iesu: “E mataora to te aronga tei manako i to ratou anoano i te pae vaerua.” E tikai, kare tatou e puapingaia me ka marama ua tatou i teia anoano e ka autu kore i te rave atu i tetai mea no te reira. Ei akatutu anga: Eaa te ka tupu ki tetai tangata oro mamao tei autu kore i muri ake i te taemoemo anga i te ariu atu ki te kaki anga o tona kopapa no te vai? Kare ainei aia e roko vaveia e te turanga maro e tetai atu au tupu anga kino? Pera katoa, me autu kore tatou i te ariu atu ki to tatou anoano no te akamatutu anga pae vaerua, i te openga ka mae tatou i te pae vaerua. Ka arataki atu teia ki te ngere anga i te rekareka e te mataora.

Kua kite tikai a Iesu i tona anoano pae vaerua, te apiianga e te manakonako tamou anga i te Tuatua na te Atua. Kua rauka iaia i te kimi e te tatau meitaki ua i te au tuanga ngai o te au Tuatua Tapu, e kua apii aia i tetai atu kia rave katoa i te reira. (Luka 4:16-21; akaaite ia Ephesia 4:20, 21.) Kua akaaite katoa a Iesu i te raveanga i te anoano o tona Metua ki te kai. Na te raveanga i te anoano o te Atua kua apai mai ia i te mataora maata kiaia.​—Ioane 4:34.

Ae, kare te tu mataora tikai e rauka na te raukaanga mai te au apinga materia; e kare katoa te mataora e tupu mai mei te tuku ua atu anga ki to tatou tu kopapa ara. Te mataora tikai e turanga ia o te ngakau, tei akanooia ki runga i te akarongo tae tikai e tetai pirianga meitaki ma te Atua ko Iehova. Ma te tau, i reira, kua imene te tata taramo ko Davida: “E ao to te aronga, ko Iehova to ratou Atua.”​—Salamo 144:15e.

[Tutu i te kapi 23]

Na te akarongo e tetai pirianga meitaki ma te Atua e apai mai i te mataora tikai kia koe