Ka Kite Ainei Tei Mamae ra i te Au?

KA INANGARO ainei koe i te kite i te openga o te mamae, kare anake noou uaorai mari ra no te au tangata katoa? Ka akamanako ana i teia au akaraanga:

E maata tikai to Sonia au mamae anga.a Te mea mua, kua kite mai aia e kua akaturi ana tana tane e tai ngauru mataiti. I reira kua tuia tana tamaiti meangiti roa e te HIV e kua mate i te AIDS. E rua mataiti i muri mai kua maki akaou mai tetai atu o tana tamaiti, e kare i roa kua mate katoa aia i te AIDS. “Kua roa te tuanga openga o tona maki i te tupu anga,” i maara ei ia Sonia. “Kua mamae aia i te taitaia anga pakari, kua pururu tona rauru, e kare e kite meitaki akaou. E mea maromaroa tikai.”

Ko Fabiana, e tamaine apii teitei i Paratiri, kua manata aia i te au tu tika kore o te tangata i teianei ao. I reira kua tupu te tumatetenga i tona uaorai oraanga. Ko tona tungane, tei mamae ra i te taitaia anga, kua tamate iaia uaorai. I te ngere anga a Fabiana i tana ngai angaanga, kua karanga atu tetai oa kiaia kia kimi i tetai pai-de-santo (taunga purepure), te manakoanga e no to Fabiana mamae i teia manuia kore anga penei kua taumaaia aia e tetai tangata! Inara kare te pai-de-santo i apai mai i te akamaru anga kiaia. Mari ra, kua manako tamamaeia a Fabiana, te kore anga e rauka i te moe no tona au mamae maata.

Kua akamata to Ana mamae i tona au mataiti akamata anga i te oraanga. “I toku tai mataiti,” i nana ei, “kua akaruke toku mama iaku, no reira na toku mama ruau i akono iaku.” I reira, i to Ana toru mataiti anga, kua mate tona mama ruau. Kua tukuia a Ana ki tetai ngai akono anga tamariki matiroeroe i Rio de Janeiro, te ngai i vai ei aia e tae ua atu ki tona 13 anga mataiti. “Kua akono kinoia matou i reira, e kua meameaau mai au,” i nana ei. “Iaku e maata maira, vaitata au i te tamaki atu i te au mea ravarai.”

Vaitata rai te akatuki ra te mamae anga i te oraanga o te au tangata ravarai i tetai tu e tetai. E tikai, ka kite tatou i te au tua tumatetenga o te tangata i te au ra ravarai​—me akara tatou, me tatau, me kore me akarongo i te nuti. “Kia tae . . . roa mai ki te tuatau o te komunikeiti anga maata i ngata tikai ei i te oro ke atu i te tuku anga putuputu o te au nuti kino,” i tata ei a Dr. Mary Sykes Wylie. “Te au tamaki, te au tumatetenga natura, te au tumatetenga ngai angaanga, te au tumatetenga i runga i te mataara maata, te rave kino, te rave anga pupu patoi, te takino anga ainga, te tauati, te ta ua i te ngutuare​—te akariro pouroa ra i te mamae ei apinga vinivini e te tupu ua i te au ra ravarai o te 20 anere mataiti.” Kua tuatua tikai te apotetoro Kerititiano ko Paulo i ta te tangata e kite ra: “Te ngunguru anake nei te au mea katoa i angaia mei te mamae anau ra.”​—Roma 8:22.

Akapeea koe? Te kite ra ainei koe i te mamae? Eaa taau akamaru anga ka tapapa atu? Ka kite ainei koe i te au tikai? Kua kitea e Sonia, Fabiana, e Ana te pumaana tikai e tetai tu au tikai! Ka tatau koe i te reira i te atikara ka aru mai.

[Tataanga Rikiriki i Raro]