Kia Vai Mairai to Kotou Tu Aroa Taeake!

“Kia vai marie mairai te aroa taeake.”​—EBERA 13:1.

1. Eaa taau ka rave kia vai marie ei te ka anga o te ai i tetai po anu ra, e eaa te apainga aiteite te vaira na tatou katoatoa?

TE ANU kino ra a vao, e te topa viviki ra te vaito anga reva. Te tumu okotai no te tamaana anga i roto i toou are ko tetai ai te pakakina maira i te ngai tutungi anga ai. Tei runga te au ora anga i taau tukuanga i te vaie ki runga kia ka ua atu. Ka noo ua ainei koe e ka akara i te au mura ai i te mate anga e te pura muramura o te au reu kia riro ei tu reureu, ora kore ra? Kare rava. Ka angai roiroi kore ua koe i te reira ma te apinga kia ka oraora ua atu. I tetai tu, e angaanga ta tatou takitai tei aiteite ki tetai “ai” maata roa atu te puapinga​—koia tei tau ra kia ka ua atu ki roto i to tatou au ngakau ra​—koia te aroa.

2. (a) Eaa ra i tikaʼi kia tuatuaia e kua anu mai te aroa i teia tuatau openga nei? (e) Eaa te puapinga o te aroa ki te au Kerititiano mou ra?

² Te noo nei tatou i tetai tuatau, mei ta Iesu i totou mai i te tuatau roa kua topa e, ka meangiti te aroa o te au Kerititiano tutu ua takapini i teianei ao. (Mataio 24:12) Te taiku ra a Iesu ki te tu aroa puapinga maata atu, koia te aroa no te Atua ko Iehova e no tana Tuatua oki, te Pipiria. Te topa katoa ra oki etai atu au tu aroa. Kua totou mai te Pipiria e “i taua tuatau openga ra,” e manganui ka “aroa kore.” (2 Timoteo 3:1-5) Mei teaa ra te tika o te reira! E mea tau kia riro te ngutuare tangata ei tetai ngai meitaki no te tu aroa natura, inara noatu i reira, kua riro te ta ua e te akakino anga​—i etai taime te takino anga mataku​—ei apinga matauia. Inara, i roto i teianei ao anu te reva, te akaueia maira te au Kerititiano kare e kia aroa anake tetai i tetai mari ra kia aroa tuku-atinga, ma te tukuanga ia etai ke ra ki mua ia koe uaorai. Ka tau tatou kia akaari i teianei aroa kia taka meitaki e kia kitea ateaia e te katoatoa, kia riro ei akairo akatakaanga i te putuputuanga Kerititiano mou ra.​—Ioane 13:34, 35.

3. Eaa te aroa taeake, e eaa te aiteanga e kia vai tamou marie i te reira?

³ Kua akauruia te apotetoro ko Paulo kia akaue: “Kia vai marie mairai te aroa taeake.” (Ebera 13:1) Kia tau ki ta tetai tataanga apii, ko te tuatua Ereni tei uriia i ko nei e “aroa taeake” (phi·la·del·phiʹa) “te taiku ra i te aroa inangaro anga, akaarianga takinga meitaki, e tu tangi, e orongaanga tauturu.” E eaa te aite anga o ta Paulo tuatua anga e ka tau tatou kia rave ua atu i taua aroa ra? “Auraka rava te reira kia anu,” i akakite maira taua tataanga. No reira kare e rava kia akaaroa ua no to tatou au taeake; ka tika tatou kia akaari i te reira. Pera katoa, ka tika tatou kia akariro i teianei aroa kia tinamou, auraka e tuku i te reira kia anu. E akaaoanga ainei? Ae, inara ka rauka i te vaerua o Iehova i te tauturu mai ia tatou kia tatanu i te inangaro taeake e kia tamou marie i te reira. E akamanako tatou e toru mataara no te aka ka tamou marie anga i te ai no teianei aroa ki roto i to tatou au ngakau.

E Akaari i te Tu Akaaroa

4. Eaa te tu akaaroa?

⁴ Me te anoano ra koe kia maata atu te aroa no toou au taeake e te au tuaine Kerititiano oki, penei ka umuumuia koe na mua kia akaaroa atu ia ratou, kia tangi atu ma ratou katoa ra i te au timataanga e te au akaaoanga ta ratou e aro atura i te oraanga. Kua akakite mai te apotetoro ko Petero i te reira i tana tata anga: “Ei ngakau tai to kotou ravarai, i te aroa katoa anga, ei aroa taeake ra, ei ngakau maru, ei ngakau taunga.” (1 Petero 3:8) Te tuatua Ereni tei taikuia ra i ko nei no te akaarianga i te “aroa katoa anga” te akakite maira i te “mamaeanga ma ratou katoa.” Kua tuatua tetai tangata kite i te reo Ereni Pipiria no teia tuatua e: “Te akataka maira te reira i te tu manako te vaira me ka kapiti atu tatou ki roto i te au manako akaaroa o etai ke ra mei te mea rai e no tatou uaorai te reira.” No reira ra, te umuumuia ra te ngakau tangi. Kua tuatua tetai tavini ruaine tiratiratu no Iehova e: “Te ngakau tangi ko te kiteanga i toou mamae i roto i toku ngakau.”

5. Akapeea tatou e kite ei e tu akaaroa to Iehova?

⁵ Tei ia Iehova ainei taua tu akaaroa? Koia tikai ia. Ei akatauanga, ka tatau tatou no te au mamaeanga o tona au tangata Iseraela: “I to ratou katoa ra au mate kare aia i te enemi.” (Isaia 63:9) Kare a Iehova i akara ua i to ratou au taitaia; kua akaaroa aia i te au tangata. E akapeea tikai te maata tona manako akaaroa te akatutuia maira na ta Iehova uaorai au tuatua ki tona au tangata, tei tataia ra ia Zekaria 2:8: “Ko tei akatukia atu oki ia kotou ra, kua akatukia ïa i tona koringo mata nei.”a Kua akataka tetai tangata tuatua no runga i teianei irava: “Ko te mata tetai o te tuanga ngata rava e te paruparu oki i te kopapa tangata nei, e ko te koringo o te mata​—te puta na reira te tomo anga o te marama no te rangi mai no te akakoroanga kia kite​—te ngai paruparu roa atu, pera katoa te puapinga, i taua ngai ra. Kare atu e apinga tei akakite meitaki mai i te manako no te utuutu anga maru meitaki o Iehova no te au apinga o tona aroa ra.”

6. I akapeea to Iesu Karaiti akaari anga i te tu akaaroa?

⁶ Kua akaari tamou katoa a Iesu i te tu akaaroa no te tangata. Kua putuputu aia i te “tangi atura ia ratou” no te tu kino o tona au tangata ra tei makiia me kare tei taitaiaia. (Mareko 1:41; 6:34) Kua akakite aia e me ka kore tetai e akono takinga meitaki i tana au pipi akatainuia ra, kua manako ngakau aia mei te mea rai e ko ia uaorai te akonoia ra na te reira tu. (Mataio 25:41-46) E i teia tuatau ei “taunga maata” no tatou i te rangi ra, ko ia tetai te ka “aroa mai ia tatou i to tatou au paruparu nei.”​—Ebera 4:15.

7. Penei akapeea te tu akaaroa i te tauturu anga ia tatou me ka akariri mai tetai taeake me kare tuaine ia tatou?

⁷ “Aroa mai ia tatou i to tatou au paruparu nei”​—kare ainei te reira i tetai manako akapumaana anga? E mea tika tikai, i reira, kia anoano tatou kia rave akapera no tetai e tetai. Inara, e ngoie roa atu kia kimi no te au paruparu o tetai ke ra. (Mataio 7:3-5) Inara a tetai atu taime e akariri mai ei tetai taeake me kare tuaine ia koe, eaa oki koe ka kore ei e tauta i teia? E tamanako ua ia koe i roto i te au turanga o taua tangata ra, ma tona tupu anga mai, e taua tu tangata ra oki, ma taua au tu tarevake ra kia akakoromaki. Ka papu ainei ia koe e kare koe e rave i taua au tarevake ra​—me kare penei i etai tei kino atura? Kare e kia manako atu kia maata roa mei etai ke mai ra, ka tau tatou kia akaari i te manako ngakau taeake, te ka tauturu ia tatou kia manako tau mei ia Iehova ra ‘tei manako ra e one tatou nei.’ (Salamo 103:14; Iakobo 3:17) Kua kite aia i to tatou au kotinga. Kare rava aia e manako mai kia maata atu mei ia tatou i te ka tau kia raveia. (Akaaite ia 1 Ariki 19:5-7.) Kia akono atu tatou katoatoa i taua manako ngakau taeake kia etai ke ra.

8. Eaa ta tatou ka tau kia rave me te rokoia ra tetai taeake me kare tuaine i tetai turanga ngata?

⁸ Kua tata a Paulo e te aite ra te putuputuanga ki tetai kopapa ma te au mero tuke tuke tei tika ra kia angaanga kapiti ma te taokotai anga. Kua tata katoa aia: “Kia mamae tetai melo ra, e mamae katoa te au melo ravarai.” (1 Korinetia 12:12-26) Ka tau tatou kia mamae atu, me kare kia tangi, ma te aronga te aere ra na roto i tetai tu taitaia. Na te aronga pakari e arataki i te raveanga i te reira. Kua tata katoa Paulo: “Koai tei paruparu e kare au i paruparu? koai tei turori e kare au i ka?” (2 Korinetia 11:29) Ka aru te aronga pakari e te au akaaere tutaka ia Paulo i roto i teianei tu. I ta ratou au tuatua anga, i ta ratou angaanga tiaki, e pera katoa i ta ratou raveanga i te au tumu akavaanga ra, ka tauta ratou kia akaari i te manako ngakau taeake. Kua akamaroiroi mai a Paulo: “Ka aue katoa oki i te aronga e aue ra.” (Roma 12:15) Me ka kite te au mamoe e te manako ngakau tika maira te au tiaki no ratou, kua kite i to ratou au kotinga, e te tangi ra i te au tu ngata ta ratou e aro ra, e mea matauia e ka mareka ratou kia ariki i te ako anga, te arataki anga, e te papa anga. Ka rekareka ratou kia aere ki te au uipaanga, ka irinaki e ka kitea e ratou ‘te akaangaroianga no to ratou vaerua.’​—Mataio 11:29.

Akaarianga i te Tu Ariki

9. Akapeea ta Iehova ra akaari anga e te ariki ra aia i te meitaki i roto ia tatou?

⁹ Te rua o te ravenga kia akaka i te aroa taeake koia oki na roto i te ariki anga. Kia ariki ia etai ke ra, ka tika tatou kia akara e kia akamanako i to ratou au tu meitaki e te au tauta anga. Me rave tatou i te reira, te aru ra tatou ia Iehova uaorai. (Ephesia 5:1) I te au ra takitai te akakore ra aia i ta tatou au ara meangiti e manganui. Te akakore katoa ra aia i te au ara kikino me te tataraara tika tikai ra. E me ka akakore anake aia i ta tatou au ara, kare aia e manako akaou atu ia ratou. (Ezekiela 33:14-16) Kua ui te tata taramo: “Naringa koe, e Iehova, e akairo ana i te au ara nei, e te Atu, koai te ka mou?” (Salamo 130:3) Ta Iehova e akara maira ko te au mea meitaki ta tatou e rave ra i te tavinianga iaia.​—Ebera 6:10.

10. (a) Eaa ra i kino ei no nga tokorua akaipoipoia kia kore te tu ariki no tetai e tetai? (e) Eaa ta tetai te ka tau kia rave me te kore atura tona ariki anga no tona tokorua?

¹⁰ E mea puapinga tikai kia aru i teianei akatauanga i te ngutuare tangata. Me akaari nga metua e te ariki ra raua tetai i tetai, ka akanoo raua i tetai akaraanga no te ngutuare tangata. I roto i teianei tuatau no te au akaipoipo anga poto ua, ka ngoie ua i te akono tau kore ua i te tokorua e kia akamaata i te au apa e kia akamea-ngiti mai i te au tu meitaki. Ka akakino taua tu manako tau kore ra i te akaipoipo anga, te akariro anga i te reira ei apainga reka koreia. Me te topa aere ra toou arikianga no toou tokorua, e ui kia koe uaorai, ‘Kare tikai ainei e au tu meitaki o toku tokorua?’ E tamanako akaou ki runga i te au tumu i inangaro ei koe e i akaipoipo ei. Kua ngaro ke ainei taua au tumu katoa ra no te inangaroanga i teia nei peretana tu meitaki ra? E tika tikai e kare; no reira e tauta pakari kia ariki i te meitaki o toou tokorua, e ka tuku ei i toou ariki anga ki roto i te au tuatua.​—Maseli 31:28.

11. Me kia kore atu te pikikaa i te aroa akaipoipo anga ra, eaa te au ravenga te ka tika kia kopae keia?

¹¹ Ka tauturu katoa oki te ariki anga i nga tokorua akaipoipoia ra kia tamou marie i to raua inangaro ma te kore e pikikaa. (Akaaite ia 2 Korinetia 6:6; 1 Petero 1:22.) Taua inangaro, tei akakaia e te ariki anga ngakau aroa, kare e akatika i te ngai no te takino i muri ake i nga ngutupa topiriia ra, kare e ngai no te au tuatua te ka tamamae e ka akataakaaka, kare e ngai no te akono anga pakuivi anu e pati atu ei te au ra ma te kore tetai tuatua takinga meitaki me kare maru e tuatuaia, e kare tikai e ngai no te ta ua i te kopapa. (Ephesia 5:28, 29) Te tane e te vaine tei ariki tikai tetai i tetai te akangateitei ra raua tetai i tetai. Ka rave raua i te reira kare i te ngai tangata anake mari ra i te au tuatau ravarai tei mua raua i te mata o Iehova​—tona aite anga, i te au tuatau ravarai.​—Maseli 5:21.

12. Eaa ra i tau ei te au metua kia akaari i te tu ariki no te meitaki i roto i ta ratou tamariki?

¹² Ka tau katoa oki te tamariki kia manako ngakau e te arikiia ra ratou. Kare mei te mea e kia riringi atu te au metua i te akapaapaa anga akameamea ua, mari ra ka tau ratou kia akameitaki i te au tu tau o ta ratou tamariki e te meitaki tikai ta ratou e rave ra. Kia maara i ta Iehova akatauanga i te tuatuaanga i tona mareka anga ia Iesu ra. (Mareko 1:11) Kia maara, katoa oki, i ta Iesu akatauanga ei te “pu” i roto i tetai parapore ra. Kua akameitaki aiteite aia i ‘nga tavini akono meitaki’ e rua ra, noatu rai e tuke anga tetai i tei orongaia kia raua takitai ra e tetai tuke anga aiteite i ta raua takitai i akatupu. (Mataio 25:20-23; akaaite ia Mataio 13:23.) Pera katoa oki te au metua pakari ka kimi i te au mataara kia akaari i te tu ariki no te au tu meitaki tikai, te au tu karape, e te au mea i oti no te au tamaiti takitai. I reira katoa oki, ka tauta ratou kia kore e akaketaketa maata rava i te au mea i oti ra e kia manako putuputu ta ratou tamariki kia rave i te reira. Kare ratou e anoano i ta ratou tamariki kia tupu ake ma te riri me kare kia ati ngakau.​—Ephesia 6:4; Kolosa 3:21.

13. Koai ma te rave ra i te arataki anga i te akaarianga i te tu ariki no te au mema takitai o te putuputuanga?

¹³ I roto i te putuputuanga Kerititiano, ko te aronga pakari e te au akaaere tutaka te arataki ra i te akaarianga ariki anga no te au mema takitai o te anana a te Atua. E turanga ngata to ratou, ia ratou e rave katoa ra i te apainga teiaa kia ako ma te tuatua tika, kia akatikatika i te aronga apa ra ma te vaerua maru, e kia oronga i te ako anga ketaketa ki te aronga te umuumuia ra te reira. Akapeea ratou i te akatau anga i teianei au apainga tuke tuke?​—Galatia 6:1; 2 Timoteo 3:16.

14, 15. (a) I akapeea ta Paulo akaari anga i te tu tau i te oronga anga i te ako pakari ra? (e) Akapeea e raukaʼi i te akaaere Kerititiano kia akatau i tei umuumuia kia akatikatika i te au tarevake ma tei umuumuia kia akameitaki atu? E akatutuia mai.

¹⁴ E tauturu maata to Paulo akatauanga. Koia tetai puapii karape, e tangata pakari, e te tiaki. Kua akono aia i te au putuputuanga e au manamanata kikino to ratou, e kare aia i tapu mataku ua i te orongaanga i te ako anga ketaketa me te umuumuia ra te reira. (2 Korinetia 7:8-11) Te akakite maira te katoa anga o ta Paulo angaanga orometua e kare aia i rave putuputu i te ako anga ketaketa​—mari ra me te tau anake ra te turanga kia raveia te reira me kare te tika ra ia. I teia tu kua akaari aia i te pakari tau i te Atua.

¹⁵ Me te aite ra te angaanga orometua a tetai tangata pakari i mua i te putuputuanga ki tetai tuanga akatangi anga imene, kua aite i reira te ako anga ketaketa e te akakite anga apa ki tetai tangi anga okotai ua te tu te tukuia ra ki roto i te katoa anga. Te meitaki ra te reira tangi anga ki roto i tona ngai. (Luka 17:3; 2 Timoteo 4:2) E tamanako ana i tetai imene okotai ua tu tona tangi anga, tei taokioki akaouia ra kare e tauiia. Kare e roaia ka ongoongo to tatou taringa. I roto i tetai tu aiteite, ka tauta te aronga pakari Kerititiano kia akatano i ta ratou apiianga e kia akameitakiia ma te tu tuke tuke. Kare ratou e akakotinga i te reira ki te akatikatika anga manamanata anake ra. Mari ra ko tona tangianga katoa ra e akamatutuanga. Mei ia Iesu Karaiti ra, ka kimi te aronga pakari aroa na mua no te meitaki kia akameitakiia kare i te tarevake kia akaapaia. Te ariki ra ratou i te angaanga pakari ta to ratou au taeake Kerititiano e rave ra. Te irinaki ra ratou e ko te mea matauia, te rave ra te aronga takitai i tei rauka tikai i te tavini ia Iehova. E viviki ua te aronga pakari i te tuku atu i te reira manako ngakau ki roto i te au tuatua ra.​—Akaaite ia 2 Tesalonia 3:4.

16. Eaa te tupu anga no ta Paulo tu ariki e te ngakau aroa ki runga i tona au taeake Kerititiano ra?

¹⁶ Kare e ekoko anga, kua kite te maata anga o te au Kerititiano ta Paulo i tavini atura ei orometua, e kua ariki aia ia ratou e e manako aroa tona ia ratou. Akapeea tatou i kite ei i teia? E akara e eaa to ratou manako ia Paulo. Kare ratou i mataku iaia, noatu rai e e maata tona mana taoonga. Kare, kua akaperepereia aia e e ngoie ua kia tuatua atu. No reira, i tona akaruke anga i tetai ngai, ‘kua takave atura te aronga pakari ki runga i tona kaki e kua ongi atura iaia’! (Angaanga 20:17, 37) Mei teaa ra te tau te akameitaki anga te aronga pakari​—e tatou katoa oki​—e tei ia tatou ta Paulo akatauanga kia aru atu! Ae, e akaari tatou i te ariki anga tetai no tetai.

Au Angaanga Aroa Takinga Meitaki

17. Eaa etai au tupu anga meitaki te tupu maira mei te au angaanga takinga meitaki i roto i te putuputuanga ra?

¹⁷ Tetai apinga akaka ririnui maata no te aroa taeake ko tetai angaanga mama ua no te takinga meitaki ia. Mei ta Iesu i tuatua ra, “e mea meitaki te oronga atu i te rave mai.” (Angaanga 20:35) Me ka oronga tatou i te pae vaerua, i te pae kopapa, me kare i to tatou taime e te maroiroi, kare e ka akariro anake tatou ia ratou kia mataora mari ra ka mataora tatou uaorai oki. I roto i te putuputuanga, e mea piri te takinga meitaki. Ka akatupu tetai angaanga takinga meitaki okotai i etai atu au angaanga aiteite katoa ra. Kare e roaia, ka tupu ruperupe te inangaro taeake!​—Luka 6:38.

18. Eaa te aiteanga o te “takinga-meitaki” tei tuatuaia ra ia Mika 6:8?

¹⁸ Kua raurau a Iehova i tona au tangata ia Iseraela kia akakite i te takinga meitaki. Ia Mika 6:8, ka tatau tatou: “Kua akakite mai aia kia koe, e te tangata na, i te mea meitaki: e eaa ta Iehova inangaro ia koe ra, mari ra ko te rave i te tuatua-tau, e kia inangaro i te [“takinga-meitaki,” NW], e te aerenga akamako tikai i to Atua ra?” Eaa te aite anga e “kia inangaro i te takinga-meitaki”? Te tuatua Epera tei taikuia ra i konei no te “takinga-meitaki” (cheʹsedh) kua uriia katoa ki roto i te reo Engarani ei “aroa ua.” Kia tau ki The Soncino Books of the Bible, te “akakite maira teianei tuatua i tetai apinga maata atu te angaanga i ta te tuatua Engarani aroa ua. Tona aiteanga ‘e aroa ua tei uriia ra ki roto i te raveanga angaanga,’ te raveanga i te au angaanga a tetai tangata no te inangaro takinga meitaki, kare ki te aronga putaua anake e tei ngere ra, mari ra ki te au oa tangata katoa o tetai ra.” E no reira kua tuatua tetai atu tangata apii ra e te aiteanga o te cheʹsedh e “aroa tei taangaangaia ra.”

19. (a) I roto i teea au tu penei ka tamata ua tatou kia akaari i te takinga meitaki kia etai ke i roto i te putuputuanga ra? (e) E oronga mai i tetai akatauanga i akapeea te aroa taeake i te akaariia anga kia koe na.

¹⁹ Kare to tatou aroa taeake i te mea manako uaia, akara koreia. E apinga tika tikai ia. No reira, e kimi i etai mataara no te rave apinga takinga meitaki no toou au taeake e te au tuaine. Kia aite mei ia Iesu ra, tei kore ra i tiaki ua no te au tangata kia aere atu kiaia kia pati tauturu mari ra kua putuputu aia i te tamata atu. (Luka 7:12-16) E tamanako atu i te aronga e maata tei anoanoia no ratou. Te umuumuia ra ainei kia atoro atu i tetai kua ruaine me kare e pirikoki me kare tetai tauturu no te tiki apinga? Te anoanoia ra ainei tetai tuatau e te manako anga no tetai ‘tamaiti matiroeroe’? Te umuumuia ra ainei tetai taringa akarongo me kare au tuatua akapumaana e tetai tei maromaroa ra? Me ka rauka ia tatou, e akataka tatou i te tuatau no taua au angaanga no te takinga meitaki ra. (Iobu 29:12; 1 Tesalonia 5:14; Iakobo 1:27) Auraka e ngaropoina e i roto i tetai putuputuanga te ki ra i te au tangata apa ua, ko tetai o te au angaanga puapinga maata roa o te takinga meitaki ko te akakore anga ara ia​—te tuku uaanga kia kore atu te riri, noatu rai me e tumu tika tetai no te akaapa anga. (Kolosa 3:13) Ko te papa ua anga kia akakore i te ara ka tauturu kia kore te au tatakake anga, te akamoupuku, e te au taumaro anga, tei aite ra ki tetai parangikete te maʼu ra te ka tapoki kia kore te ai no te aroa taeake.

20. Akapeea tatou katoatoa e tau ei kia rave tamou marie i te akara matatio ia tatou uaorai?

²⁰ E tamanako taka meitaki tatou katoatoa kia tamou marie i te akakaanga i teianei ai puapinga maata no te aroa ki roto i to tatou ngakau. E tamou marie tatou i te akara matatioanga ia tatou uaorai. Te akaari ra ainei tatou i te manako ngakau taeake no etai ke ra? Te akaari ra ainei tatou i te ariki anga no etai ke ra? Te rave ra ainei tatou i te au angaanga takinga meitaki ki etai ke ra? Me te rave ra tatou i te reira, ka akamaanaana te ai o te aroa i to tatou taeake anga noatu ra e akapeea te anu kino e te manako ngakau kore o teianei ao. No reira ra, “kia vai marie mairai te aroa taeake”​—i teianei e tuatau ua atu!​—Ebera 13:1.

[Tataanga Rikiriki i Raro]

Eaa Toou Manako?

◻ Eaa te aroa taeake, e eaa i tikaʼi tatou kia tuku ua i te reira kia tupu?

◻ Akapeea te tu akaaroa i te tauturu anga ia tatou kia tamou marie i to tatou aroa taeake?

◻ Eaa te tuanga a te tu ariki i roto i te aroa taeake ra?

◻ Akapeea te au angaanga takinga meitaki i te akatupu anga i te aroa taeake kia tupu ruperupe ki roto i te putuputuanga Kerititiano ra?

[Pia i te kapi 16]

Te Aroa te Angaanga Ra

I etai mataiti kua topa, ko tetai tangata tei apii ra i te Pipiria no tetai tuatau ma te Au Kite o Iehova te vaira ma tetai tu ekoko no runga i te aroa taeake. Kua kite aia e i tuatua a Iesu: “Ko te mea teia e kite ei te tangata katoa e e pipi kotou naku, kia aroa kotou ia kotou uaorai.” (Ioane 13:35) Inara kua kite aia e mea ngata te reira kia irinakiia. I tetai ra kua kite aia i te aroa Kerititiano i te angaanga anga.

Noatu rai e kua noo roa aia ki runga i te nooanga uira oparaia, e mamao te aereanga o teianei tangata mei tona kainga. I Betelehema, i Iseraela ra kua aere atu aia ki tetai uipaanga putuputuanga. I reira, kua manono atu tetai Kite Arapia kia noo tetai atu Kite tutaka aere ra ma tona ngutuare tangata i taua po ra, e kua kapitiia atu teianei tangata apiiia i te Pipiria i taua patianga ra. I mua ake i te aereanga i te moe, kua pati atu teia tangata tutaka aere ki tona tangata akono ra iaia me ka akatikaia aia kia aere atu ki runga i te porotito i te popongi kia akarakara i te itinga mai te ra. Kua akamatakite ketaketa atura tona tangata akono iaia auraka aia e rave i te reira. I tera mai ra kua akataka atu teianei taeake Arapia i te tumu. Na roto i tetai tangata uri reo, kua tuatua aia e me ka kite tona au tangata i te pae mai e au manuiri tana no tetai papa anga ngati Iuda​—mei te tu o teia tangata apiiia ra i te Pipiria​—ka tutungi ratou i tona are ma ia e tona ra ngutuare tangata katoa i roto. I te oripu uaanga te manako, kua ui atura te tangata apiiia ra i te Pipiria, “Eaa ra, koe i reira, i rave ei i te reira?” Ma te kore ua te tangata uri reo ra, kua akara tika atu te taeake Arapia e te tuatua ua anga ia, “Ioane 13:35.”

Kua manako oonu te tangata apiiia ra i te Pipiria i te tika tikai o te aroa taeake ra. Kua papetitoia aia i muri poto akera.

[Tutu i te kapi 18]

No te tu maoraora e te ariki ua o Paulo i ngoie uaʼi te tuatua atu kiaia