E Ariki ma te Apinganui e te Pakari

I toou manako e ka rauka ainei i te apinga maata te akariro ia koe kia mataora? Me ka oronga mai tetai tangata i tetai aka moni naau, kare ainei koe e rekareka? Papu e ka rekareka koe. Penei te manako ra koe i tetai au mataara no te akapou atu i te reira.

E tika, e maata tikai te au apinga ka okookoia ei akariro i te oraanga kia pumaana maata e te rekareka. Ka rauka katoa oki te moni ei “akapuanga” no te au manamanata kare i manakoia ana, mei te maki rai me kare te kore anga e angaanga.​—Koheleta 7:12.

Inara eaa te pirianga i rotopu i te moni e te mataora? I toou manako, mei to te manganui rai, e apinga ua ainei te mataora no te apinganui? Te kimianga i te au pau anga no teia au uianga penei e e mea ngataia no te mea ka rauka ngoie ua te moni kia vaitoia, me kare kia tareia, kare i te mataora. Kare e rauka ia koe te tuku i te mataora ki runga i te paunu e kia paunaia.

Ei reira, katoa oki, ko etai aronga apinga maata te mataora nei, ko etai papaki te mataora kore nei. Te tika katoa ra oki te reira ki te aronga putaua. Inara, te maata anga o te au tangata​—noatu e ko te aronga e apinganui tikai ta ratou​—te irinaki ra e me maata atu te moni ka oronga maataia mai te mataora kia ratou.

Okotai tangata tei tata no runga i taua au turanga ra ko te Ariki ko Solomona o Iseraela i taito ra. Koia tetai tangata apinga maata roa atu tei ora ana. Ka rauka ia koe te tatau i te akataka anga no tana apinganui maata i roto i te Pipiria pene 10 o te puka Mua a te Ariki. E akara, ei akatauanga, te karanga ra te irava 14: “E te teiaa o te auro i tae mai kia Solomona i te mataiti okotai ra, e ono ïa anere e ono ngauru ma ono i te taleni auro.” Kua aite taua numero ki te 25 au tane auro. I teia tuatau, te tere atura te moni no taua auro ki te $200,000,000, U.S.!

Inara, kare ua e kua apinga maata a Solomona; kua akameitakiia aia e te Atua ma te pakari. Te akataka maira te Pipiria: “Tu ke rava atura te ariki ra ko Solomona i te apinga e te pakari i te ui ariki katoa i te ao nei. Kua kimi maira to te ao katoa nei ia Solomona, kia akarongo ratou i tana tuatua pakari i tukuia mai e te Atua ki roto i tona ngakau.” (1 Ariki 10:23, 24) Ka puapingaia rai tatou i to Solomona ra pakari, mei te mea e kua riro tana au tataanga ei tuanga rekoti no te Pipiria. Ka akara tatou e eaa tana i akakite mai no runga i te piri anga i rotopu i te apinganui e te mataora.

[Akameitakianga no te Tutu i te kapi 3]

Reproduced from Die Heilige Schrift - Übersetzt von Dr. Joseph Franz von Allioli. Druck und Verlag von Eduard Hallberger, Stuttgart