Ka Ora Atu Ainei Taau Angaanga i te Ai?

“E akono meitaki te tangata ravarai i te tu o tana e patu ki rungao [i te pange].”​—1 KORINETIA 3:10.

1. Eaa te manakonakoanga ta te au Kerititiano tiratiratu e manako maira no te aronga te ka riro ei au pipi?

TE AKARA atura nga tokorua i ta raua tamaiti anau ouia mai. Kua kite atu tetai papuritia Patireia i te akara anga inangaro e te mareka oki i runga i te mata o tetai te apiiia ra i te Pipiria. Kua kite atu tetai o te aronga pakari te ako maira i runga i te paata i tetai tei inangaro ou ua ra i te akarakaraanga matariki i te au tataanga i roto i tana Pipiria. Kua ki te au ngakau o teia aronga tavini tiratiratu ia Iehova ra i te manakonakoanga. Ka tamanako rai ratou e, ‘Ka riro ainei teianei peretana kia inangaro e kia tavini ia Iehova​—e kia vai tiratiratu oki?’ Inara, kare taua tupu anga ra e tupu ua mai. Ka umuumuia ra te angaanga.

2. Akapeea ta te apotetoro ko Paulo ra akamaara anga i te au Kerititiano Epera i te puapinga maata o te angaanga apiianga, e eaa te akara matatio anga ia tatou uaorai ta teia ka akakeu ia tatou kia rave?

² Kua akataka meitaki maira tetai orometua karape uaorai, koia te apotetoro ko Paulo i te puapinga maata o te angaanga apiianga e te akariroanga tangata ei pipi i tana tata anga: “Naringa oki mei teianei kua riro kotou ei orometua, kia tika ïa i te roa.” (Ebera 5:12) E meangiti ua te aerenga ki mua o taua aronga Kerititiano tana i tuatua atura, me akamanako ra i te roa to ratou riroanga ei aronga akarongo. E mamao ke maira i te papaanga kia apii atu ia etai ke ra, kua umuumuia kia akamaaraaraia atu ratou i te au tumu anga no te tuatua mou ra. I teia tuatau nei, ka tau meitaki rai tatou i etai tuatau kia akara matatio i to tatou uaorai kite ei orometua e kia kite akapeea e raukai ia tatou kia meitaki te aerenga ki mua. Te vaira te au oraanga i te tu kino. Eaa ta tatou ka rave?

3. (a) Eaa ta te apotetoro ko Paulo i akaaite atu i te akariroanga i tetai ei pipi Kerititiano? (e) Ei aronga patu Kerititiano, eaa ta tatou angaanga maata ka rave?

³ Na roto i tetai akatutu anga akatotoaia, kua akaaite atura Paulo i te akariroanga tangata ei pipi ki te rave anga i te patuanga i tetai are. Kua akamata aia na te tuatua anga: “E oa rave angaanga oki matou no te Atua: e koro kotou na te Atua; e are kotou no te Atua.” (1 Korinetia 3:9) No reira te rave kapiti ra tatou i tetai angaanga patuanga te o atura te au tangata, te tauturu ra tatou i te patu anga ia ratou ei pipi na Karaiti. Te rave ra tatou i te reira ei au oa rave angaanga no Tei “akatu ra i te au mea katoa.” (Ebera 3:4) Mei teaa ra tetai angaanga meitaki! E akara tatou kia kite akapeea ta Paulo akoanga akauruia ki to Korinetia ra i te tauturu anga ia tatou kia maata atu te karape i ta tatou angaanga. Ka akara tika atu tatou ki “te apii marie anga atu.”​—2 Timoteo 4:2.

Akamouanga i te Pange Tika

4. (a) Eaa ta Paulo tuanga i te angaanga patuanga Kerititiano? (e) Penei eaa ka tau ei kia tuatuaia e kua kite a Iesu e te aronga akarongo mai iaia ra i te puapinga maata o te au pange meitaki?

⁴ Me kia ngaueue kore tetai are e kia tinamou oki, ka tau tetai pange meitaki no te reira. No reira, kua tata a Paulo: “No te meitaki a te Atua i orongaia mai iaku nei, kua akamou au i te pange mei te taunga pakari i te akatu are ra.” (1 Korinetia 3:10) Na te taikuanga i tetai akatutu anga aiteite, kua tuatua a Iesu Karaiti no tetai are tei ora mai i tetai uriia no te mea kua ikiia e tei patu i te reira tetai pange ketaketa. (Luka 6:47-49) Kua kite a Iesu i te au tu puapinga maata katoatoa o te au pange ra. I reira aia i ta Iehova ra akamou anga i te enua.a (Maseli 8:29-31) Kua akameitaki katoa te aronga tei akarongo atura i ta Iesu akoanga no te au pange meitaki ra. Ko te au are meitaki anake te akamou anga i te au pange te ka vai tamou i te au vaipuke viviki ua te tae anga mai e te au ngaruerue enua oki te rokoia ra i etai tuatau ki Paretaina. Inara, eaa te pange ta Paulo i tamanako ra?

5. Koai te pange o te putuputuanga Kerititiano ra, e i akapeea te akakite angaia mai te reira?

⁵ Kua tata a Paulo: “Kare atu oki e pange ke e tika i te tangata ravarai kia akamou, mari ra ko tei akamouia ra, koia oki te Mesia ra ko Iesu.” (1 Korinetia 3:11) Kare teia i te taime mua tei akaaiteiai a Iesu ki tetai pange. Ko te tika, kua akakite maira Isaia 28:16: “E teianei te na ko maira te Atu ra ko Iehova, I na, te akamou nei au i tetai toka i Ziona ei pange, e toka timataia, e toka meitaki maata i te kapeu tara, e pange ngaueue kore.” Kua roa ta Iehova ra akakoro anga e kia riro tana Tamaiti e ko te pange o te putuputuanga Kerititiano ra.​—Salamo 118:22; Ephesia 2:19-22; 1 Petero 2:4-6.

6. Akapeea ta Paulo akamou anga i te pange tika ki roto i te au Kerititiano i Korinetia ra?

⁶ Eaa te pange no te au Kerititiano taki tai ra? Mei ta Paulo i tuatua ra, kare e pange ke atu no tetai Kerititiano mari ra ko tei akanooia i te Tuatua a te Atua ra​—koia Iesu Karaiti. Kua akanoo tikai a Paulo i taua pange ra. I Korinetia, te ngai tei manako teiteiia ra te apiianga a te tangata, kare ra aia i kimi kia akavare i te au tangata ma te pakari o teianei ao. Kareka ra, kua tuatua ratou i te “Mesia akasatauroia ra,” ta te au pa enua i akakore atu ei “mea neneva.” (1 Korinetia 1:23) Kua apii a Paulo e ko Iesu te tutu maata i roto i ta Iehova ra au akakoro anga.​—2 Korinetia 1:20; Kolosa 2:2, 3.

7. Eaa ta tatou ka kite mei ta Paulo taiku anga iaia uaorai ei “taunga pakari i te akatu are ra”?

⁷ Kua akakite a Paulo e kua rave aia i taua apiianga ra “mei te taunga pakari i te akatu are ra.” Kare teianei tuatua i te tu taemoemo anga. E akakite anga ua ia no tetai apinga meitaki ta Iehova i oronga kiaia​—no te akapapaanga me kare angaanga aratakianga. (1 Korinetia 12:28) E tika ra, kare ia tatou i teia tuatau te au rave apinga temeio tei orongaia ra ki te au Kerititiano o te anere mataiti mua ra. E penei kare tatou e manako ia tatou uaorai ei au orometua tei akataoongaia ra. Inara na roto i tetai tu puapinga maata, e pera tatou. E akamanako ana: te oronga maira Iehova i tona vaerua tapu ei tauturu ia tatou. (Akaaite ia Luka 12:11, 12.) E e inangaro to tatou ia Iehova e tetai kite i te au apiianga akatumuia i tana Tuatua ra. E au apinga orongaia mai tikai teia kia taangaangaia i te apiianga ia etai ke ra. E akapapa tatou kia taangaanga ia ratou ei akamou i te pange tika ra.

8. Akapeea ta tatou akamou anga ia Karaiti ei tetai pange ki roto i te aronga manakoia ra ei pipi?

⁸ Me akamou tatou ia Karaiti ei tetai pange, kare tatou e oronga iaia ei tetai pepe kite kore ua ra i roto i tetai ngai vairanga kai na te puakatoro, kare katoa oki ei tetai tei aiteite ra kia Iehova i roto i te Toru Tai. Kare, taua au manako tau kore ra i te au tataanga tapu e akatutu mai i tetai pange no te au Kerititiano pikikaa ra. Mari ra, ka apii tatou e koia te tangata maata rava tei ora ana, e kua tuku aia i tona oraanga apa kore ua no tatou, e ko ia i teia tuatau nei ta Iehova ra Ariki akataoongaia te tutara ra i te rangi. (Roma 5:8; Apokalupo 11:15) Te kimi katoa ra tatou kia akakeu i ta tatou aronga e apii ra kia aaere i to Iesu tapuae e kia aru i tona au tu. (1 Petero 2:21) Te anoano ra tatou ia ratou kia akakeu oonuia na to Iesu maroiroi no te angaanga orometua, tona aroa no te aronga akaaka e tei takatakaiia ra, tona aroa ua i te aronga ara tei akaparuparuia na to ratou uaorai apa, e tona maroiroi ngaueue kore i te aro atu anga i te au timataanga. E tika tikai, ko Iesu tetai pange meitaki maata. Inara eaa te ka aru mai i muri ake?

Patuanga ma te Au Apinga Tika

9. Noatu rai e ko ta Paulo angaanga maata e akamou pange, eaa tona manako no te aronga tei ariki ra i te tuatua mou no tana i apii atura?

⁹ Kua tata a Paulo: “E teianei, kia patu tetai tangata i te auro, te ario, te toka memeitaki, te rakau, te ngangaere, te teita, ki rungao i taua pange ra; E akakiteia ta te tangata ravarai ra angaanga: na taua rā ra oki e akakite, e akatakaia ïa oki e te ai; e na te ai e timata i te tu o ta te tangata ravarai ra angaanga.” (1 Korinetia 3:12, 13) Eaa te aite anga o ta Paulo tuatua? E akamanako ana i te turanga. Te angaanga maata ra a Paulo e akamou i tetai pange. I tona au tere mitinari, kua tutaka aere aia mei tetai oire ki tetai oire, i te tutu aereanga ki te aronga e manganui kare rava ra i akarongorongo ana ia Karaiti. (Roma 15:20) I te ariki anga te au tangata i te tuatua mou tana i apii, kua akanooia te au putuputuanga. Kua manako oonu tikai a Paulo no teianei aronga tiratiratu ra. (2 Korinetia 11:28, 29) Inara, kua umuumuia aia kia teretere aere i tana angaanga. No reira i muri ake i te akapouanga e 18 marama i te akamouanga i tetai pange i Korinetia, kua akaruke aia kia tutu aere i etai atu au oire ke ra. Inara, te vaira tona manako anga maata e i akapeea ta etai atura turu anga i te angaanga tana i akamata ra ki reira.​—Angaanga 18:8-11; 1 Korinetia 3:6.

10, 11. (a) I akapeea ta Paulo akatuke anga i te au tu apinga ke ke no te patuanga ra? (e) Eaa te au tu o te au are tikai ra penei tei vaira ki Korinetia i taito ra? (ng) Eaa te au tu are penei kare e ka i te ai, e eaa te tumu apiianga ta te reira e oronga maira no te aronga akariro tangata ei pipi Kerititiano?

¹⁰ I te akara anga ko tetai papaki tei patu ra ki rungao i te pange ta Paulo i akamou ra i Korinetia kare i meitaki ta ratou angaanga i rave. Ei akakite atea i taua manamanata ra, kua akatuke a Paulo i nga tu e rua o te au apinga patuanga: ko te auro, te ario, e te toka memeitaki i tetai pae; ko te rakau, te ngangaere, te teita i tetai pae. Ka rauka ua i te akatu i tetai are mei te au apinga meitaki, tinamou, kare e pakapaka i te ai; me kare ko tetai ka rauka kia viviki te akatu angaia na te taangaanga, i te au apinga no te tuatau poto ua, e ka ka ua oki i te ai. Kare e ekoko anga e ko taua oire maata mei to Korinetia ra kua ki i te au are no aua tu e rua ra. E au iero mamaata etai tei maaniia i te au piriki toka oko maata, penei kua akamaneaia etai tuanga ma te auro e te ario ra.b Penei kua tu mekameka teitei teianei au are akamori anga ki runga ake i te au are kapakapa, au are puapinga kore ua, e te au ngai makete tei maani viviki uaia i te rakau e te au tapoki ngangaere e te teita.

¹¹ Eaa te ka tupu ki teianei au are i roto i tetai ai? Kua taka meitaki te pauanga i to Paulo tuatau ra mei to tatou katoa nei rai. Ko te tika, kua peke te oire o Korinetia i te Rangatira Vaeau o Roma ko Mummius i te 146 M.T.N. E manganui te au are rakau, ngangaere, e te teita kua akapou takiriia. Inara akapeea oki te au are maroiroi e te toka ra, tei akamaneaia ma te ario e te auro? Kare e ekoko anga, e kua vai mai te reira. Penei kua aaere atu te aronga apiiia e Paulo ra na te pae i taua au are ra i te au ra taki tai​—te au toka parau tei ora maira i te au akapou anga kua roa ra te takore anga atu i to ratou au oa maroiroi kore i te pae maira. Mei teaa ra te taka meitaki i reira, ta Paulo akakite anga i tana tumu! Me rave i te apiianga, ka tau tatou kia manako ia tatou uaorai mei te aronga patu are ra. Ka anoano tatou kia rave angaanga ma te au apinga meitaki roa te ka vai tinamou marie. Na te reira mataara penei ka roa ta tatou angaanga. Eaa ra taua au apinga tinamou ra, e eaa i puapinga maatai kia taangaanga ia ratou?

Ka Rauka Ainei kia Kore Taau Angaanga e Pou i te Ai?

12. Na roto i teea au tu ta tetai papaki o te au Kerititiano Korinetia ra i te raveanga patuanga tau kore ra?

¹² Te taka meitaki ra e kua manako ngakau a Paulo e kua patu tau kore tetai papaki Kerititiano i Korinetia ra. Eaa te tarevake? Mei ta te tataanga i akakite maira, te tupu ra te tataka ke anga i te putuputuanga ra, te manako maataanga i te au tu tangata noatu rai te akakino anga i te tu taokotai anga o te putuputuanga ra. Te tuatua ra tetai papaki e, “no Paulo au,” inara ko etai te tuatua ra, “no Apolo au.” I te akara anga ko etai kua manako teitei roa no to ratou uaorai pakari. Kare i te mea poitirere, ko te tupu anga, ko tetai reva no te manakoanga kopapa, e pakari kore i te pae vaerua, e te maata te “vareae e te taumāro” oki. (1 Korinetia 1:12; 3:1-4, 18) Kua akaataia mai teianei au tu manako i te apiianga tei raveia ra i te putuputuanga e i te angaanga orometua oki. Ko te tupu anga kua riro ta ratou angaanga akariro tangata ei pipi kia mako kore ua, mei te angaanga patuanga rai ma te au apinga puapinga kore ua. Kare ia e ora mai i te “ai” ra. Eaa te ai ta Paulo i tuatua ra?

13. Eaa te aiteanga no te ai i ta Paulo akatutu anga ra, e eaa ta te au Kerititiano katoatoa ka tau kia matakite?

¹³ Te vaira tetai ai ta tatou katoatoa e aro atura i te oraanga​—koia te au timataanga i to tatou akarongo. (Ioane 15:20; Iakobo 1:2, 3) Kua tau te au Kerititiano i Korinetia ra kia kite, mei ia tatou katoa oki i teia tuatau nei ka tau kia kite, e ko tetai ua atu ta tatou e apii atu i te tuatua mou ka timataia ia. Me ka kore e tau ta tatou apiianga, penei ka tupu mai te au tu mii. Kua akamatakite mai a Paulo: “Kia toe ra ta tetai ra angaanga, tana i patu ki rungao i taua pange ra, e rauka iaia te tutaki. Kia ka ra ta tetai tangata angaanga, e ngere tona: koia uaorai ra te ka akaoraia ïa; mei te mea ra e, i na roto i te ai.”c​—1 Korinetia 3:14, 15.

14. (a) Penei akapeea te aronga akariro tangata ei pipi Kerititiano ka “ngere” ei, inara penei akapeea e raukai ia ratou te ora mei te mea rai e na roto i te ai? (e) Akapeea e raukai ia tatou te akameangiti mai i te tu mamae i te ngere anga?

¹⁴ E au tuatua tau tikai ia! Ka riro te reira ei tetai mamae maata kia angaanga ketaketa i te tauturu i tetai kia riro ei pipi, e kia kite oki i taua tangata ra i te topa anga ki te timataanga me kare te takinga kinoanga e i te openga kia akaruke i te aerenga o te tuatua mou. Te akatika ra Paulo i te reira i tana tuatua anga e ka mamae tatou i te ngere anga i roto i taua au tu ra. Penei e mamae kino roa taua tupu anga ra e te akatakaia ra to tatou ora mei te mea ra e “i na roto i te ai”​—mei tetai tangata tei pou katoa ra tana au apinga i roto i te ai e koia anake ua tei ora maira. No ta tatou tuanga, akapeea e raukai ia tatou kia akameangiti mai i te ngere anga? E patu ma te au apinga tinamou! Me ka apii tatou i ta tatou aronga e apii ra kia itae ki to ratou ngakau, ma te akakeuanga ia ratou kia manako maata i te au tu Kerititiano oko maata mei te pakari rai, te kite oonu, te mataku ia Iehova, e te akarongo tikai, ei reira tatou ka patu ei ma te au apinga tinamou, te ka kore e ka i te ai. (Salamo 19:9, 10; Maseli 3:13-15; 1 Petero 1:6, 7) Te aronga te ka kimi i teianei au tu ka tamou marie i te rave i to te Atua ra anoano; no ratou te manakonakoanga papu no te vai ora anga e tuatau ua atu. (1 Ioane 2:17) Inara, akapeea e raukai ia tatou te tuku i ta Paulo akatutu anga kia rave tau tikai? E akamanako ana i etai akatauanga.

15. Na roto i teea au tu e raukai ia tatou te akapapu i te kopae ke anga tatou i te raveanga tau kore i te angaanga patuanga no runga i ta tatou aronga apii Pipiria ra?

¹⁵ Me te apii ra i te aronga apiiia i te Pipiria, ka tau tatou kia kore e tuku i te au tangata ki runga ake i te Atua ra ia Iehova. Ko ta tatou akakoro anga auraka kia apii ia ratou kia manako ia tatou ei tetai tumu maata no te pakari. Ka anoano tatou ia ratou kia akara kia Iehova, ki tana Tuatua, e tana akaaerenga no te arataki anga. Ki taua openga ra, auraka tatou e oronga ua i ta tatou uaorai au manako i te pauanga i ta ratou au uianga. Kareka ra ka apii tatou ia ratou kia kimi te au pauanga, na te akaraanga i te Pipiria e te au Puka ta “te tavini akono meitaki e te pakari” i oronga maira. (Mataio 24:45-47) No etai tumu aiteite oki, kia matakite tatou auraka kia takave mai i ta tatou aronga e apii ra i te Pipiria e na tatou anake. Kare e kia reka kore me akakite etai ke ra i tetai manako anga ia ratou, ka tau tatou kia akamaroiroi i ta tatou e apii ra “kia maora katoa” oki i to ratou au inangaro, kia kite e kia ariki oki kia manganui i roto i te putuputuanga ra.​—2 Korinetia 6:12, 13.

16. Penei ka akapeea te aronga pakari i te patu anga ma te au apinga kare e ka i te ai?

¹⁶ Pera katoa oki te aronga pakari Kerititiano ra ka rave i tetai tuanga puapinga maata i te patuanga i te au pipi. Ia ratou e apii ra ki mua i te putuputuanga, ka kimi ratou kia patu ma te au apinga kare e ka i te ai. To ratou karape i te apiianga, te kite oki, e te tu tangata penei ka atea te tuke anga, inara kare ratou e rave kia puapingaia ratou uaorai i teia au tuke anga ei akavaitata atuanga i te au pipi kia aru ia ratou uaorai. (Akaaite ia Angaanga 20:29, 30.) Kare tatou i kite tikai e eaa tetai papaki i Korinetia i tuatuai e “no Paulo au” me kare, “no Apolo au.” Inara ka kite tikai tatou e kare tetai o eia nga tangata pakari i akatupu i taua manakoanga akataka ke ra. Kare a Paulo i akavareia e taua au manako ra; kua kopae pakari atura aia i te reira. (1 Korinetia 3:5-7) Mei te reira katoa i teia tuatau, ka tamou te aronga pakari i te manako e te tiaki ra ratou i “te anana a te Atua.” (1 Petero 5:2) Kare ia na tetai ua atu tangata. No reira ka mou ngaueue kore te aronga pakari i tetai ua atu manako anga no te tangata okotai kia tutara i te anana me kare i te pupu aronga pakari ra. Me te rave ra te aronga pakari i te akakeu anga na tetai anoano taakaaka kia tavini i te putuputuanga, kia itae i te au ngakau, e kia tauturu i te au mamoe kia tavini ia Iehova ra ma te ngakau katoa, te patu ra ratou ma te au apinga kare e ka i te ai.

17. Akapeea ta te au metua Kerititiano tauta anga kia patu ma te au apinga kare e ka i te ai?

¹⁷ E oonu katoa oki te manako anga o te au metua Kerititiano i teianei tumu. Mei teaa ra to ratou manako akaperepere kia kite i ta ratou tamariki i te ora anga e tuatau ua atu! Na reira ratou i angaanga pakari ei kia “apii tamou” i te au kaveinga o te Tuatua a te Atua ra ki roto i te au ngakau o ta ratou tamariki. (Deuteronomi 6:6, 7) Te anoano ra ratou kia kite ta ratou tamariki i te tuatua mou, kare ei tetai akapapa anga ture ua, mari ra ei tetai tutakianga ki katoa, e te tu mataora o te oraanga. (1 Timoteo 1:11) Kia raukai te patu i ta ratou tamariki ei au pipi tiratiratu na Karaiti, kua tauta te au metua aroa ra kia rave i te au apinga kare e ka i te ai. Ka angaanga akakoromaki ua ratou ma ta ratou tamariki, ma te tauturuanga ia ratou kia kiriti tumu atu i te au tu ta Iehova e makitakita ra e kia tatanu oki i te au tu tana e inangaro ra.​—Galatia 5:22, 23.

Naai te Apainga?

18. Me kopae ke tetai pipi i te apiianga tau ra, penei eaa ka kore ei e riro no te aronga tei tauta ra kia apii atu iaia e kia tereni oki iaia tei tarevake?

¹⁸ Te akatu mai nei teia uriurianga manako i tetai uianga puapinga maata. Me topa ke atu tetai ta tatou e tauta ra kia tauturu i te tuatua mou, ka riro ainei te aite anga e kua puapinga kore tatou ei au orometua​—e kua patu tatou ma te au apinga tau kore ra? Penei kare ia. E tika te akamaara maira te au tuatua a Paulo kia tatou e e apainga maata ia kia rave i te patuanga te au pipi. Ka tau tatou kia rave i te au mea ravarai i roto i to tatou mana kia patu meitaki. Inara kare te Tuatua a te Atua e tuatua mai ana kia tatou kia rave i te apai anga katoa e kia riro kia teiaa maataia ma te apa me ariu ke te aronga ta tatou e kimi ra kia tauturu i te tuatua mou. Te vaira etai atu tumu te o maira i te pae atu i ta tatou tuanga ei aronga patu. Ei akatauanga, e tamanako eaa ta Paulo i tuatua no runga i tei apii ra tei rave ra i tetai angaanga kare i meitaki i teianei angaanga patuanga: “E ngere tona: koia uaorai ra te ka akaoraia ïa.” (1 Korinetia 3:15) Penei me ka rauka te ora i teianei tangata i te openga ra​—mari ra ko te tu tangata Kerititiano tana i tauta ra kia patu ki roto i tana tangata i apii ra kua akatutuia mai e kua “ka i te ai” i tetai timataanga ai ra​—eaa ta tatou te ka tika kia manako? E mea tika rai, e ka mou a Iehova e na tei apiiia ra te apainga maata no tana uaorai au ikianga e me ka aru aia i tetai aerenga tiratiratu e me ka kore.

19. Eaa ta tatou ka akamanako i te atikara te ka aru mai?

¹⁹ E tumu puapinga maata oki te apainga a te tangata, me kare ta te aronga taki tai. Te akatukiia maira kia tatou tataki tai. Eaa tikai ta te Pipiria ra apii anga no runga i teianei tumu? Ka uriuriia teia i ta tatou atikara te aru mai nei.

[Au Tataanga Rikiriki i Raro]

Akapeea Koe me Pau?

◻ Eaa te “pange” i roto i tetai Kerititiano tika tikai, e akapeea te akamou anga i te reira?

◻ Eaa ta tatou te ka kite mei te au tu apinga tuke tuke no te patuanga?

◻ Eaa ta te “ai” e akatutu maira, e penei akapeea te reira i te akariro anga i tetai papaki kia “ngere”?

◻ Penei ka akapeea te aronga apii i te Pipiria, te aronga pakari, e te au metua i te patu anga ma te au apinga kare e ka i te ai ra?

[Tutu i te kapi 9]

I roto i te au oire taito e manganui, kua tu kapiti te au are patuia i te toka kare e ka i te ai, ma te au are kapakapa ua ra