Tauturuanga i te Au Tangata kia Akapiri Vaitata kia Iehova

“Kare ua e tangata e tae ki te Metua ra, mari ra ei iaku.”​ —IOANE 14:6.

1. Eaa te akauenga ta Iesu tei akatuia maira i oronga ki tana au pipi, e eaa te tupu anga i te rave anga te Au Kite o Iehova ra i te reira?

KUA akaue a Iesu Karaiti i tana au pipi kia “akariro i to te pa enua katoa ei pipi; ka bapetizo atu ei ia ratou i te ingoa o te Metua, e no te Tamaiti, e no te Vaerua Tapu.” (Mataio 28:19) I te tai ngauru mataiti kua topa, kua tauturu atu te Au Kite o Iehova e tere atu i te toru mirioni au tangata kia aere vaitata mai ki te Atua, e kua papetitoia ratou i muri akera ei akatutu anga i to ratou akatapu anga kiaia kia rave i tona ra anoano. Mei teaa ra to tatou rekareka anga kia tauturu atu ia ratou kia akapiri vaitata atu ki te Atua!​—Iakobo 4:8.

2. Noatu rai e manganui te aronga ou tei papetitoia ra, eaa tei rokoia ra?

² Inara, i etai enua e manganui ra te au pipi ou tei papetitoia, kare i aiteite te tupuanga te numero o te au papuritia no te Patireia. Inara, ka tika kia manakoia etai no te aronga tei mate atura, ko te aronga tei mate atu e vaitata i te 1 patene i te mataiti. Tera ra, i nga mataiti tokoiti, kua topa e maata atu te numero no etai tumu ke atu. No teaa ra? Na teia e te atikara te ka akara matatioia e akapeea te au tangata kia akapiri vaitata kia Iehova e te au tumu e eaa i topa ke atu ei tetai papaki.

Te Akakoroanga o ta Tatou Tutuanga

3. (a) Akapeea te aiteite anga o te angaanga ta Iesu i akaue atura ki tana au pipi ma ta te angera tei taikuia ra ia Apokalupo 14:6? (e) Eaa tei kiteia ra e ko tetai mataara meitaki no te akakeu i te inangaro o te au tangata ra i te tuatua no te Patireia, inara eaa te manamanata te vaira?

³ I teianei “tuatau openga ra,” tei te au pipi a Iesu te angaanga kia akatotoa i te “kite” no “te evangelia o te basileia nei.” (Daniela 12:4; Mataio 24:14) Te aiteite atura ta ratou angaanga ma ta te angera tei iaia “te evangelia mutu kore, e tutu ki te aronga e noo i te ao nei, ki te pa enua katoa, e te au kopu, e te au reo, e te au iti-tangata.” (Apokalupo 14:6) I teianei ao nei te pou ra te tuatau ma te au apinga rikiriki ua, te mea matauia ko te tu maata kia akainangaro atu i te au tangata i te Patireia o te Atua e kia tauturu atu ia ratou kia akavaitata atu kia Iehova na te akakite atu kia ratou no te manakonako anga no te ora mutu kore ki runga i te enua parataito. I te mea ka kitea uaia teianei, ko te aronga te ka taokotai atu ma te au tangata o te Atua ra kia raukai te tomo atu ki roto ia Parataito kare e akono kia ngaueue kore to ratou au vaevae ki runga i te arataa o iti te taki atura ki te oraanga.​—Mataio 7:13, 14.

4. Kia tau ki ta Iesu e te angera tei rere ra i rotopu i te mareva nei, eaa tikai te akakoroanga o ta tatou angaanga tutu aere?

⁴ Kua tuatua a Iesu: “Teia oki te ora mutu kore, kia kite ratou ia koe i te Atua mou ra, e ia Iesu i te Mesia, i taau i tono maira.” (Ioane 17:3) Te akakite maira te angera te rere ra na rotopu i te mareva nei i “te evangelia mutu kore” e te tutu atura ki te aronga e noo i te enua nei: “Ka mataku i te Atua, e akakakā iaia; kua tae oki ki te ora akautunga anga nana; e akamori kotou iaia i tei anga i te rangi, e te enua, e te tai, e te au vai pupui ra.” (Apokalupo 14:7) Te aru maira e ko te akakoroanga tikai no ta tatou tutuanga i te evangeria kia tauturu atu i te au tangata kia akavaitata atu kia Iehova na roto ia Iesu Karaiti ra.

Ta Tatou Tuanga i ta Iehova Angaanga

5. Eaa nga tuatua a Paulo raua ko Iesu te akakite maira e te rave ra tatou i ta Iehova angaanga, kare i ta tatou?

⁵ I te tataanga ki te au taeake Kerititiano akatainuia, kua tuatua te apotetoro ko Paulo no “te taoonga akaongi nei” e kua tuatua e te akaongi ra te Atua i te au tangata kiaia uaorai na runga i te tumuanga i te atinga oko o Iesu Karaiti ra. Kua tuatua a Paulo e “mei te mea e te ako nei te Atua i te tangata ia matou nei” e “ei tuā matou no te Mesia, i te ako anga atu i te tangata e, e akaongi kotou i te Atua.” Mei teaa ra tetai manako akapumaanaanga ngakau! Noatu me e ‘au komono akatainuia no te Mesia’ me kare ei au karere ma te manakonako anga no te enua nei, kare tatou e tau kia akangaropoina e na Iehova teianei angaanga, kare na tatou. (2 Korinetia 5:18-20, akaaite ia NW.) Ko te Atua tikai te akavaitata maira i te au tangata e te apii ra i te aronga te aere maira kia Karaiti. Kua tuatua a Iesu: “Kare te tangata e tae mai kiaku nei, mari ra kia akatae mai te Metua ko tei tono mai iaku nei iaia: e naku aia e akatu akaou kia tae ki te rā openga ra. Kua tataia oki i roto i te au peroveta ra e, ‘Ka ope takiri ratou i te apiiia e te Atua’ e teianei, ko te akarongo e te apiiia e te Metua ra, ko te ka tae mai ia kiaku nei.”​—Ioane 6:44, 45.

6. Akapeea ta Iehova akangaueueanga i to te au pa enua na tetai tu akaata anga, e i taua taime rai, koai ma te kite ra i te tinamou i roto i tona “are” akamorianga?

⁶ I teia tuatau openga nei, akapeea ta Iehova ra akavaitata maianga i te au tangata e te akatuera anga kia ratou i te “ngutupa akarongo”? (Angaanga 14:27; 2 Timoteo 3:1) Ko tetai mataara tikai na te tukuanga i tana Au Kite e akakite i tana au tuatua no te ora e te akavaanga ki teianei akatereanga kino o te au mea nei. (Isaia 43:12; 61:1, 2) Te tuku atu nei teia akakitekite anga i te ao katoa i tetai akangaueueanga na roto i to te au pa enua ra​—ko tetai akaata anga no te akavaanga akapueuanga kare e roaia ka tae mai. I taua tuatau rai, ko te au tangata e “akaperepere” ra i ta te Atua akaraanga te raveia maira ki vao i teianei akatereanga e te kitea ra te tu tinamou i tona “are” no te akamori mou. No reira te akatupu ra a Iehova i tana au tuatua totou tei tataia ra e Hagai: “E naku e akangaueue i te au enua katoa ra: e e tae mai tei inangaroia e te au enua katoa ra: e akaki oki au i teianei are ki te kakā.”​—Hagai 2:6, 7; Apokalupo 7:9, 15.

7. Akapeea ta Iehova akatuera anga i te ngakau o te au tangata e te akavaitata anga te au tangata takitai kiaia uaorai e ki tana Tamaiti oki?

⁷ Na Iehova e akatuera i te au ngakau o teianei aronga mataku i te Atua​—“koia te au apinga inangaroia no te au pa enua ravarai”—​e “kia akono [ratou] i te tuatua i tuatuaia” e tona Au Kite ra. (Hagai 2:7, Jewish Publication Society; Angaanga 16:14) Mei te anere mataiti mua rai, i etai tuatau kua taangaanga Iehova i tana au angera kia arataki i tona Au Kite ki te au tangata ngakau tae tei kapiki ra kiaia no te tauturu. (Angaanga 8:26-31) I te kite anga te aronga tataki tai i te au apinga meitaki ta te Atua i rave no ratou na roto i tana Tamaiti, ia Iesu Karaiti, kua akavaitataia atu ratou kia Iehova ra na tona aroa. (1 Ioane 4:9, 10) Ae, te akavaitata atura te Atua i te au tangata kiaia uaorai e ki tana Tamaiti oki na Tona “aroa-takinga meitaki,” me kare aroa tiratiratu.​—Ieremia 31:3.

Koai ma ta Iehova e Akavaitata Atura?

8. Eaa te tu o te au tangata ta Iehova ka akavaitata atu kiaia?

⁸ Te akavaitata atura Iehova kiaia uaorai e ki tana Tamaiti oki i te aronga te kimi ra Iaia. (Angaanga 17:27) Te kapiti ra teianei i te au tangata “i aue ua, e kua kapiki ua, i te au mea viivii katoa i raveia” i roto ia Kerititome e, i roto i te ao katoa oki. (Ezekiela 9:4) “Te manako ra [ratou] i to ratou umuumu anga pae vaerua.” (Mataio 5:3, NW.) E tika, ko ratou te “aronga maru o te enua nei,” te ka noo ki runga i te enua parataito e tuatau ua atu.​—Zephania 2:3.

9. Akapeea a Iehova ka kite ei me te ‘tau tika ra te au tangata no te ora mutu kore,’ e akapeea tana akavaitata atu anga kia ratou?

⁹ Ka rauka ia Iehova i te tatau i te ngakau tangata. Kua tuatua te Ariki ko Davida ki tana tamaiti kia Solomona: “E kimi oki a Iehova i te ngakau katoa ra, e te kite ra aia i te akakoroanga o te au manako katoa: kia kimi koe iaia ra, ka kitea atu aia e koe.” (1 Paraleipomeno 28:9) Na runga i te tumu anga no runga i te tu ngakau e te vaerua o tetai, me kare te tu manako maata, ka kite a Iehova me ka akarongo aia ki te au orongaanga tu Atua no te akakoreanga ara e te manakonako anga no te ora mutu kore ki roto i ta te Atua ra akatere anga ou no te tuatua tika. (2 Petero 3:13) Na tana Tuatua, tei tutuia e tei apiiia e tona Au Kite, ka akavaitata mai a Iehova kiaia uaorai e ki tana Tamaiti i “te aronga i akonoia no te ora mutu kore ra; e ‘kua akarongo ïa’ ratou.​—Angaanga 13:48.

10. Eaa te akakite ra e ko ta Iehova akavaitata atu anga i tetai papaki e kare ki etai atu, e kare e kapiti ana i tetai akatakaanga kua raveia i mua ana?

¹⁰ Ka riro ainei ta Iehova ra akavaitata anga i tetai papaki e kare i etai, ei tu akatakaanga na mua i te ora anga? Kare ravaia! Ko ta te Atua ra akavaitataanga i te au tangata tei runga ia i ta ratou uaorai au rave anga. Te akangateitei ra aia i ta ratou anoano tu rangatira. Te tuku ra a Iehova ki mua i te au tangata o te enua nei i teia tuatau i taua ikianga rai mei tana i tuku ki mua i to Iseraela e tere atu i te 3,000 mataiti i topa, ia Mose i tuatua ra: “I na, kua tuku au i te ora e te meitaki, i te mate e te kino ki mua ia koe i teianei rā; . . . Te kapiki nei au ki te rangi e te enua ei kite noku ia kotou i teianei rā e, kua tuku au i te ora e te mate, i te meitaki e te kino, ki mua ia koe i tenana, ka rave i te ora, kia ora koe e toou katoa uanga: Kia inangaro oki koe i to Atua ra ia Iehova, e kia akarongo koe i tona reo, e kia piri atu koe kiaia; ko toou ïa ora aia, e ko te roa ïa o toou ra puke rā.”​—Deuteronomi 30:15-20.

11. I akapeea to Iseraela i te iki anga i te ora?

¹¹ E akara ra e kia iki to Iseraela i te ora ‘na te inangaroanga ia Iehova, na te akarongoanga i tona reo, e na te pirianga kiaia.’ I te tuatua anga i taua au tuatua ra, kare i riro ake i te au tangata o Iseraela ra te Enua Taputouia. Te tatari ra ratou i te ngai mataataa i te O o Moabi ra, te teateamamao ra ia ratou uaorai no te tikoti atu i te Kauvai Ioridana ra e kia tomo atu ki roto ia Kanaana. Noatu rai e mea matauia no ratou kia akaariu i to ratou au manako ki tetai enua “meitaki e te maata” e “taʼe a vai ua te u, e te meli” kare ra e roaia ka rauka ia ratou, ko te tupuanga tikai ta ratou e moemoea ra tei runga i to ratou inangaro ia Iehova, to ratou akarongoanga ki tona reo, e to ratou pirianga vaitata kiaia ra. (Exodo 3:8) Kua akataka meitaki maira Mose i teianei, i te na koanga: “[Me ka akarongo koe ki te au akauenga a to Atua ko Iehova], i taku e akaue atu kia koe i teianei rā, kia inangaro koe i to Atua ra ia Iehova, ma te aere na tona au arataa, e te akono i tana au akauenga, e tana au akonoanga e tana au tuatua-tau, ka ora koe, e ka maata rava koe: e ka akameitaki mai te Atua ra ko Iehova ia koe, ki runga i te enua taau e aere e rave nei ei nooanga.”​—Deuteronomi 30:16; akaaite ia NW.

12. Eaa ta te akatauanga a to Iseraela ka apii mai kia tatou no ta tatou angaanga tutuanga e te apiianga?

¹² Kare ainei e tau ta tatou i tatau ua akenei kia apii mai ia tatou i tetai apinga no runga i ta tatou angaanga tutuanga e te apiianga oki i teianei tuatau o te openga nei? Ka manako tatou i te enua Parataito te aere maira e ka tuatua i te reira i ta tatou angaanga orometua. Inara kare tatou e ta tatou aronga i akariro ei pipi e kite i te tupu anga taua taputou ra me te rave ra tatou me kare a ratou i te tavinianga i te Atua no te au tumu noinoi ua. Mei to Iseraela ra, ka tika tatou e te aronga ta tatou e apii ra kia ‘inangaro ia Iehova, kia akarongo i tona reo, e kia piri vaitata atu kiaia.’ Me ka maaraara tatou i teia ia tatou e rave ra i ta tatou angaanga orometua, te rave kapiti ra tatou ma te Atua i te akavaitataanga te au tangata kiaia ra.

Au Oa Rave Angaanga no te Atua

13, 14. (a) Kia tau ki ta 1 Korinetia 3:5-9, akapeea tatou e riro ei ei au oa angaanga ma te Atua ra? (e) Ka tika te akangateitei anga no tetai ua atu tupu anga kiaai, e no teaa ra?

¹³ Kua akatutu maira Paulo i te pirianga ma te Atua ra na te taikuanga i te tatanuanga i tetai kainga. Kua tata aia: “Koai a Paulo, e koai oki a Apolo, mari ra e orometua i akarongo ei kotou, ko ta te Atu ïa i oronga mai ia maua katoa nei? Naku oki i tanu, na Apolo i tamauu ki te vai; na te Atua ra i akatupu. E teianei, kare a te tanu, kare oki a te tamauu ki te vai; ko te Atua ra ko tei akatupu. Te tanu, e te tamauu vai ra, okotai ra ïa: e rave tetai e tetai i tana uaorai tutaki e tau i tana uaorai angaanga. E oa rave angaanga oki matou no te Atua: e koro kotou na te Atua.”​—1 Korinetia 3:5-9.

¹⁴ Ei au oa rave angaanga no te Atua ra, ka tika tatou kia tanu tiratiratu i “te tuatua o te basileia” ki roto i te au ngakau tangata, e ka tamauu atu ei i tetai ua atu inangaro tei akaariia mai na te oki akaouanga ma te manako tau kia atoro i taua aronga apii Pipiria ra. Me e meitaki te one, te ngakau, na Iehova e rave tana tuanga na te akariroanga i taua ua tuatua mou o te Pipiria ra kia tupu ei ngangaere uua maira. (Mataio 13:19, 23) Nana e akavaitata atu i taua tangata ra kiaia uaorai e ki tana Tamaiti oki. I te tuanga openga, i reira, ko tetai ua atu tupu anga i te numero o te au papuritia Patireia ra na Iehova ia i rave ki runga i te au ngakau o te au tangata, i te akariro anga i te ua o te tuatua mou ra kia tupu e te akavaitataanga i taua aronga ra kiaia uaorai e ki tana Tamaiti oki.

Te Angaanga Patuanga te ka Vai Mai

15. Eaa te akatutu anga ta Paulo i taiku mai kia akakite e akapeea tatou me tauturu ia etai ke kia akatupu i te akarongo?

¹⁵ Ia tatou e rekareka ra i te tupuanga maata, te anoano ra tatou ma te ngakau tae kia kite i te tamou marieanga te au tangata i te inangaro ia Iehova, i te akarongo ki tona reo, e te pirianga mou kiaia. Te mii ra tatou me kite tatou e kua anu mai tetai papaki e kua unui ke atu. Ka rauka ainei ia tatou te rave i tetai apinga ei kopae i teianei tu? I roto i tetai atu akatutu anga, kua akaari mai a Paulo e akapeea tatou me tauturu atu ia etai ke ra kia akatupu i te akarongo. Kua tata aia: “Kare atu oki e pange ke e tika i te tangata ravarai kia akamou, mari ra ko tei akamouia ra, koia oki te Mesia ra ko Iesu. E teianei, kia patu tetai tangata i te auro, te ario, te toka memeitaki, te rakau, te ngangaere, te teita, ki rungao i taua pange ra; E akakiteia ta te tangata ravarai ra angaanga: na taua rā ra oki e akakite, e akatakaia ïa oki e te ai; e na te ai e timata i te tu o ta te tangata ravarai ra angaanga.”​—1 Korinetia 3:11-13.

16. (a) Akapeea nga akatutu anga e rua tei taikuia e Paulo ra i tuke ei te akakoro anga? (e) Akapeea ta tatou angaanga e riro ei ei mea merengo koreia e kare e ora i te ai?

¹⁶ I ta Paulo akatutu anga no te koro ra, te vaira te tupu anga ki runga i te tanuanga ngakau tau, i te tamauuanga putuputu, e te akameitaki anga a te Atua. Te akakite maata maira tetai atu akatutu anga a te apotetoro ra i te apainga a te orometua Kerititiano ra no te tupuanga no tana angaanga patuanga. Kua patu ainei aia ki runga i tetai pange mou ma te au apinga tau tikai? Kua akamatakite a Paulo: “E akono meitaki te tangata ravarai i te tu o tana e patu ki rungao ra.” (1 Korinetia 3:10) I te akakeu anga i te manako o tetai tangata na te tuatuaanga kiaia i te manakonako anga no te ora mutu kore ki roto i Parataito, te akaanga atura ainei tatou i ta tatou apiianga ki runga anake i te kite Tuatua Tapu anake ra e ka akanoo ketaketa atu i te au kaveinga no ta taua tangata ra ka tika kia rave kia raukai te ora mutu kore? Ka tau ainei ta tatou apiianga ei teianei anake ua: ‘Me ka anoano koe kia ora mutu kore ua atu ki roto i te Parataito, ka tika koe kia apii, kia aere ki te au uipaanga, e kia rave oki i te angaanga tutu aere’? Me koia ia, kare tatou e patu ana i te akarongo o te tangata ra ki runga i tetai pange mou, e ko ta tatou i patu ra penei kare e vai tamou mai i te au timata anga a te ai me kare i te timata anga no te tuatau roa. Ko te tauta anga kia akavaitata atu i te au tangata kia Iehova na te manakonako anake i te oraanga ki roto i te Parataito ei tauianga no etai mataiti tokoiti ua i te tavinianga iaia te aite ra ki tetai patuanga ma “te rakau, te ngangaere, te teita.”

Patuanga i te Inangaro no te Atua e no Karaiti

17, 18. (a) Eaa tei kore e tau kia akakoreia me kia vai mai te akarongo o tetai tangata? (e) Akapeea e raukai ia tatou te tauturu i tetai tangata kia noo a Karaiti ki tona ngakau?

¹⁷ E vai tamou ei te akarongo, ka tika ia kia akatumuia ki runga i tetai pirianga tikai ma te Atua ko Iehova ra na roto ia Iesu Karaiti. Ei au tangata apa ua nei, ka rauka ia tatou taua pirianga au ra ma te Atua na roto anake i tana Tamaiti. (Roma 5:10) Kia maara e kua tuatua a Iesu: “Kare ua e tangata e tae ki te Metua ra, mari ra ei iaku.” Kia tauturu ia etai ke kia patu i te akarongo, “kare atu oki e pange ke e tika i te tangata ravarai kia akamou, mari ra ko tei akamouia ra, koia oki te Mesia ra ko Iesu.” Eaa te o atura ki teianei?​—Ioane 14:6; 1 Korinetia 3:11.

¹⁸ Te aite anga o te patuanga ki runga ia Karaiti koia te pange ko te apiianga na roto i tetai tu te ka akatupu i tetai tei apiiia ra i te Pipiria i te inangaro oonu no Iesu na roto i te kite ki katoa i Tana tuanga Tei Oko mai, ei Upoko no te putuputuanga, e Taunga Maata aroa, e ei Ariki te tutara ra. (Daniela 7:13, 14; Mataio 20:28; Kolosa 1:18-20; Ebera 4:14-16) Ka riro te aiteanga e ei tika tikai a Iesu kia ratou e kia noo tikai aia ki roto i to ratou ngakau. Ka tauta tatou te pure no ratou kia aite ki ta Paulo patianga no te au Kerititiano i Ephesia ra. Kua tata aia: “No reira oki au i akamingi atu ei i taku turi ki raro i te aroaro o te Metua, . . . kia oronga aia ia kotou . . . kia noo te Mesia i roto i to kotou ngakau i te akarongo; kia akaia kotou, e kia akatumuia i te inangaro.”​—Ephesia 3:14-17.

19. Eaa te tupu anga tau no te patuanga aroa no Karaiti ki roto i ta tatou aronga apiiia i te Pipiria, inara eaa te ka tika kia apiiia?

¹⁹ Me ka patu tatou na roto i taua tu ra e ka tupu te inangaro no Karaiti ki roto i te au ngakau o te aronga ta tatou e apii ra, ka riro teianei ei patuanga i te inangaro no te Atua ko Iehova ra. Ko to Iesu ra aroa, manako ngakau, e te inangaro e akaataanga tiratiratu ia no to Iehova ra au tu. (Mataio 11:28-30; Mareko 6:30-34; Ioane 15:13, 14; Kolosa 1:15; Ebera 1:3) No reira me ka kite te au tangata e ka inangaro oki ia Iesu, ka riro katoa ratou kia kite e kia inangaro ia Iehova.a (1 Ioane 4:14, 16, 19) Ka tau tatou kia apii i te aronga apiiia ra i te Pipiria e ko Iehova te turu ra i ta Karaiti i rave katoatoa no te au tangata e no reira kua kaiou tatou i te akameitaki anga Kiaia, te akapaapaa, e te akamori oki e ko “te Atua ïa to [tatou] nei ora.”​—Salamo 68:19, 20; Isaia 12:2-5; Ioane 3:16; 5:19.

20. (a) Akapeea e raukai ia tatou kia tauturu i te au tangata kia akavaitata atu ki te Atua e ki tana Tamaiti? (e) Eaa te ka akamanakoia i roto i te atikara te ka aru mai?

²⁰ Ei au oa rave angaanga no te Atua, e tauturu tatou i te au tangata kia akapiri vaitata atu kiaia e tana Tamaiti, na te tauturuanga ia ratou kia akatupu i te inangaro e te akarongo i roto i to ratou ngakau. Ka riro a Iehova e kia tika tikai kia ratou. (Ioane 7:28) Na roto ia Karaiti, ka rauka ia ratou kia akanoo i tetai pirianga vaitata ma te Atua, e ka inangaro ratou iaia e ka mou piri tikai kiaia. Kare ratou e akanoo te tuatau kotinga no ta ratou tavini anga aroa, ma te akonoanga i te akarongo e ka akatupuia ta Iehova ra au taputou umere tikai i tona tuatau tau ra. (Aue o Ieremia 3:24-26; Ebera 11:6) Inara, ia tatou e tauturu ra ia etai ke kia akatupu i te akarongo, te manakonako, e te inangaro oki, ka tika tatou kia patu i to tatou uaorai akarongo kia riro mei tetai pai ketaketa ra te ka rauka kia na roto atu i te au uriia kino. Ka akamanakoia teianei i roto i te atikara te ka aru mai.

[Tataanga Rikiriki i Raro]

Na te Akamanako Akaou Anga

◻ Akapeea ta tatou akakeu putuputu anga i te inangaro o te au tangata i te tuatua Patireia, inara eaa te tu kino te vaira?

◻ Eaa te tu o te au tangata ta Iehova ka akavaitata atu kiaia e ki tana Tamaiti?

◻ Kua tukuia ki runga i teaa to Iseraela ra tomo anga ki roto i te Enua Taputouia ra, e eaa ta tatou ka kite mei te reira maira?

◻ Eaa te tuanga ta tatou ka rave i te tauturuanga te au tangata kia akavaitata atu kia Iehova e ki tana Tamaiti oki?

[Tutu i te kapi 10]

Noatu rai e ka akakite atu tatou ki te au tangata i te manakonako no te ora mutu kore ki roto i te Parataito, ko ta tatou akakoro anga maata kia akavaitata ia ratou kia Iehova

[Au Tutu i te kapi 13]

Ka meitaki tikai ta tatou oki akaou anga me teateamamao meitaki tatou